Malilo 5 - Chiyawo Bible

Lipopelo lyakuŵenda canasa

¹ Ŵalakwe AMBUJE* akumbucile yele yiyatuwonecele uwe. Atulole uwe, nalole mwele muŵatunyocesyaga.

² Yindu yetu yili m'myala mwa acalendo; ŵandu ŵakwika akutama m'nyumba syetu.

³ Acibaba ŵetu ŵawulajidwe ni amagongo ŵawo, nipo sambano acimama ŵetu aŵele ŵamasije.

⁴ Tukwenela kulipila mesi gele gatukumwaga; soni sasu syakolecesya moto tukwenela kusuma.

⁵ Ŵatujendesyaga mwa ngalwe mpela mbunda kapena ngamila,* nginatukundaga kupumula, atamose tuli tupesile.

⁶ Twapite kuŵenda yakulya ku Iguputo ni kwa Asiliya, kuti uwe tuŵeje ni umi.

⁷ Acinangolo ŵetu ŵalemwisye, nipo ŵawile, ni uwe tukulaga ligongo lya ulemwa* wawo.

⁸ Uwe tukulamulidwa ni acikapolo, nipo pangali atamose jumo jwampaka atukulupusye m'myala mwawo.

⁹ Twasimanaga ni yisawusyo pa ndaŵi jitwasosagasosaga yakulya; ligongo lya ŵandu ŵakuwulaga acimjawo mcipululu.

¹⁰ Cilu cetu cikolela moto mpela cili mu ufuni ligongo lya ululu wa sala.

¹¹ Aciŵamkwetu ni ŵali ŵetu ŵakamulilaga, Petumbi lya Siyoni* ni palipose ku Yuda.

¹² Ŵakulamula ŵetu ŵajigele ni kuja kwakoleka pakwataŵilila makono gawo; soni acakulungwa ŵetu ngakwacimbicisya kose.

¹³ Acacanda ŵetu akwakanganicisya kusyaga tiligu mpela acikapolo; acacanda akupepeluka nago matenje ga usito ga sasu.

¹⁴ Acakulungwa ŵalesile kutama pa nganya, nipo acacanda ŵetu alesile kwimba nyimbo.

¹⁵ Kusengwa kutyosile m'mitima jetu; kulila kujinjile m'malo ga kuŵina.

¹⁶ Pangali cindu cilicose cicasigele mwa yele yitwayipocelaga. Twalemwisye, ni ligongo lyakwe tukulamulwa.

¹⁷ Mitima jetu jangali macili ni ligongo lya yeleyi ngatukombola kulola cenene.

¹⁸ Ligongo Litumbi lya Siyoni liŵele sambano masame, nipo masogo gagamba kwendajenda mwelemo.

¹⁹ Nambo ŵalakwe AMBUJE, ali mwenye jwangali mbesi, taciŵa ali mkulamula mpaka kalakala.

²⁰ Ligongo cici aŵele ali mkutuliŵalila ndaŵi josopeji? Ana tacitukumbucila soni uweji?

²¹ Atuwucisye kwa ŵalakwe, AMBUJE! Atuwucisye! Atupe soni ucimbicimbi wa masiku gakala gala.

²² Kapena atujasile mpaka kalakala? Lutumbilo lwawo ana lwangali mbesi?