Malilo 4 - Chiyawo Bible

Yelusalemu ali ajonasice

¹ Golidi* jwetu jwambone jula juŵele jwangasalala; maganga ga Nyumba ja AMBUJE* gala gali palipose m'misewu.

² Acacanda ŵa ku Siyoni* ŵaliji ŵakusangalasya kwetuwe mpela golidi, nambo sambano akujigalidwa mpela mipika wamba ja lilongo.

³ Atamose lisogo nombe nalyo likusajonjesya ŵanace ŵakwe, nambo ŵandu ŵangu aŵele mpela ndiŵatiŵa, ŵangalwe ni ŵanace ŵawo.

⁴ Akusiŵaleka ŵanace ŵawo kuti awe ni sala ni njota; ŵanace akuŵenda yakulya nambo pangali jwine jwalijose jwampaka ŵape jemanjajo.

⁵ Ŵandu uŵalile yakulya yambone mnope akuwa ni kulaga ku misewu; nipo ŵele ŵiŵaleledwe ni umi wangasoŵa yindu, akupalapasa pa citutu kusosa yakulya.

⁶ Ŵandu ŵangu apocele cilango cacikulungwa kupunda cilango ca ŵandu ŵa ku Sodomu, ŵiŵapocele cilango mwangajembecela ni Mlungu.

⁷ Ŵakulamula ŵetu ŵaliji ŵaswela kupunda matalila, ŵaliji ŵamacili ni ŵakulimbangana, soni ŵakulaga ni umi wambone, usalale wawo waliji mpela maganga ga mtengo wapenani ga safilo.

⁸ Nambo sambano pangali ŵakwamanyilila m'misewu, ligongo ngope syawo siŵele syepiliwu mpela cenjelele; yilu yili yikwinyetekwinyete, ni kumula kwa mpela citela.

⁹ Ŵandu ŵiŵawile ku ngondo ŵaliji ŵana upile kulekangana ni ŵiŵawile panyuma pakwe, ŵandu ŵeleŵa ŵalepetalaga ni kulaga panandipanandi mpaka kuwa ligongo lyakusoŵa yakulya kuti aŵe ni umi.

¹⁰ Sala jijasimene ŵandu ŵangu jayice ni yisawusyo yakogoya acakongwe ŵa cinonyelo ŵatelekaga ŵanace ŵawo ni kwalyaga.

¹¹ AMBUJE ŵatumbile mnope, ni ŵatulwisye lutumbilo lwawo pasi; ni ŵapambile moto mu Siyoni ni wajonasile msindawo mpaka ni litaka lyakwe.

¹² Pangali jwalijose, atamose ŵakulamula ŵa yilambo yine, nganakulupilila kuti pana amagongo ŵaliwose ŵampaka akombole kwinjila myipata ya Yelusalemu.

¹³ Nambo ayi yatendecekwe ligongo lya ulemwa* ŵa ŵakulocesya ni ŵakutaga mbopesi ŵawo ni ŵiŵatendesye ciwa ca ŵandu ŵangalemwa.

¹⁴ Ŵakulamula ŵawo ŵagambaga kwendajenda m'misewu mpela ŵangalola, myoyo ŵalipacile miasi mwamti paliji pangali mundu jwalijose jwamti mpaka ŵakwaye.

¹⁵ Ŵandu ŵagumilaga kuti, “Atyoce, jemanja ŵandu ŵasakasidwe, akangwaya une!” Myoyo ŵagambaga kwendajenda kutyoka pa mtundu wine ni kuja ku mtundu wine soni nambo pangali atamose jumo juŵapocelaga.

¹⁶ AMBUJE nganakola soni mtima ŵakwasamala jemanjajo; ni ligongo lyakwe ŵapwilingenye jemanjajo msyene. Nganiŵacimbicisya ŵakutaga mbopesi ni ŵakulamula ŵetu.

¹⁷ Meso getu gapesile ni kwembecela cikamucisyo cele cimkaniciyika. Twagambaga kwembecela kutyocela kwa mtundu wele uwaliji wangali kandu ka mpaka kupeleka.

¹⁸ Amagongo ŵagambaga kutulola uwe, mwamti nganitujendaga m'misewu. Masiku getu gamasile; ni kuti mbesi jaliji jili jiyice.

¹⁹ Ŵandu ŵiŵatutopolagawo ŵaliji ŵakuwutuka mnope kupunda cijuni ca nyanga jaguluka mwinani. Ŵatutopwele mwitumbi, ni ŵatusisimwisye mcipululu kuti atuwulaje.

²⁰ Ŵakamwile ndande ja umi wetu, mwenye juŵamsagwile AMBUJE, jwele jutwamkulupilile kuti tacitucenjela kwa amagongo ŵaliwose.

²¹ Sengwani jemanja ŵandu ŵa ku Edomu ni Usi; sangalalani mwele mumpaka msangalalile. Conasiko cenu jemanja cikwisa; timcikolelwa mpaka kuwula yakuwala ni kutenda soni.

²² Siyoni alipile ulemwa wakwe; sambano AMBUJE ngaŵa mkutuleka kuŵa mu ukapolo kwa ndaŵi jine soni. Nambo ŵandu ŵa ku Edomu, AMBUJE tacimpa cilango, ulemwa wenu taciwulosya pakulanguka.