Malilo 2 - Chiyawo Bible

Cilango ca AMBUJE Yelusalemu

¹ AMBUJE* ni lutumbilo lwakwe awunicile Siyoni* ni cipi. Kusalala kwakwe kwa kwinani akutesile kuŵa masame. Pa lisiku lya lutumbilo lwakwe nginajawula atamose ku Nyumba jakwe.

² AMBUJE ŵajonasile misi josope ja ku Yuda mwangali canasa. Ŵagwisisye mapupa gigacingaga msindawo. Ŵawutesisye soni ucimwene ŵakwe ni ŵakulamula ŵakwe.

³ Ni kupya mtima kwakwe AMBUJE ŵajonasile macili ga Aisalaeli; Ŵakanile kutukamucisya ndaŵi jiŵayice amagongowo. Ŵatutumbilile uwe mpela moto, ni konanga yosope.

⁴ Ŵalocesye mapanga gakwe kwetuwe mpela kuti ali amagongo ŵetu; Ŵawuleje wosope ŵele ŵatwalolaga mwa lukondwa. Sambano akuno ku Yelusalemu twawuweni ukali wakwe wa moto.

⁵ AMBUJE ŵaŵele mpela m'magongo ni ŵajonasile Isalaeli; ŵagalesile mapupa ni nyumba sya ucimwene sili masame. Ŵayice naco canasa cangamala pa ŵandu ŵa ku Yuda.

⁶ Ŵapasulenye Nyumba jakwe jele jitwapopelelaga ŵalakwewo; AMBUJE ŵamasisye masiku gakusangalala ni masiku gakupumula ga Ayuda. Ni lutumbilo lwakwe ŵakanile ayimwene ni ŵakutaga mbopesi.

⁷ AMBUJE ŵagakanile malo gawo gakupelecela mbopesi mpaka soni malo gakwe gapajika; Ŵakundile amagongo ŵakwe kugumula mapupa gosope. Ŵagumilaga kulosya kupunda m'nyumba jitwapopelelaga uwe mwakusangalala.

⁸ AMBUJE ŵasimicisye kuti mapupa ga msinda wa Siyoni gagwe; Ŵalinjile jemanjajo kuti akole cikulupi cakuti tajonanje yosope yene. Sanja ni mapupa sambano yosope yili masame pampepe.

⁹ Yipata ya msindawo yasililice, soni yisyano yakulisya yakwe yatemecetemece. Mwenye ni ŵakulamula ŵakwe ali ku ukapolo. Ngakwiganya soni Malamusi, nipo ŵakulocesya ŵakwe ngakutenda soni yeyila yakuyiwona yindu m'mesomkulola yakutyocela kwa AMBUJE.

¹⁰ Acakulungwakulungwa ŵa msinda wa Yelusalemu atemi pasi jii, Ali alitasile luwundu m'mitwe mwawo ni kuwala yisaka myilu yawo. Ŵali ŵajinamicisye mitwe jawo pasi.

¹¹ Meso gangu gapesile ni kulila; umi wangu ulasile mnope. Mu mtima mwangu mugumbele ni canasa ligongo lyakonasika kwa ŵandu ŵangu. Ŵanace ni makandi gagamba komoka m'misewu ja mu msinda.

¹² Ŵanacewo ŵawusyaga acimama ŵawo kuti, “Ana yakulya ni yakumwa tukayipate kwapi?” Ŵagwaga m'misewumo mpela ŵandu ŵawulale, Myoyo panandipanandi ŵawilaga m'myala mwa acimama ŵawo.

¹³ M'mwe Yelusalemu, ŵakunonyelwa Yelusalemu, mbecete cici ya m'mwe? Ana mpaka namtulasye uli m'mwejo? Pangali atamose jumo kalakose juŵalasile camti myiyi. Conasiko cenu cili cekulungwa mpela Nyasa ja Njete; soni pangali cembeceyo.

¹⁴ Ŵakulocesya ŵenu agamba kumsalila ya unami ligongo nginakola yindu yakusala; Yakulalicila yawo yamlambwisye m'mwejo pangasala ulemwa* wenu. Ŵamtesile kuti mganisyeje kuti m'mwejo ngamkwenela kupesya ulemwa wenu.

¹⁵ Ŵandu ŵakupita mu msindawo agamba kumlola ni kumnyosyaga. Akusapukunya mitwe jawo ni kusekaga masame ga Yelusalemu. “Ana msinda wakunonyelwa ula nawu? Ana awu ni msinda wakusangalasya cilambo cosope capasi ula?”

¹⁶ Amagongo ŵenu wosope akumnyosya ni kumpalandacisya meso kulosya kuti ngakumsaka. Akumsonya ni kumgambaga kuti, “Tuwujonasile kusyene! Lelo ni lisiku litwalijembecelaga!”

¹⁷ AMBUJE sambano ayitesile yiŵatite kuti taciyitenda: Atujonasile uwe mwangatutendela canasa, ligongo ŵatutetele kutandila kalakala. Ŵatesile amagongo ŵetu kuti apunde, ni kwapa lukondwa ligongo lya kulepela kwetu.

¹⁸ Gumilani mwamacili kwa AMBUJE, jemanja ŵandu ŵa ku Siyoni. Misosi jenu jijendelele mpela sulo cilo ni musi; Mkakola ndaŵi jakupumula, nambo mgambeje kulila kuti misosi jigambeje kujilima.

¹⁹ Jimukani cilo cosope ni mgumileje kwa AMBUJE; Ŵecetani yosope yene ya ku lukosi kwenu pameso pa AMBUJE ni kwaŵendela ŵanace ŵenu cikululucilo. Ligongo agamba kulaga ni kuwa ni sala m'misewu josope.

²⁰ Alole AMBUJE! Ana ligongo cici akutupa cilango camti myiyi? Acakongwe akulya ŵanace ŵawo ŵiŵanonyelaga mnope! Ŵakutaga mbopesi ni ŵakulocesya agamba kuwulajidwa m'Majumba gakulambila.

²¹ Acacanda ni ngalamba wosope ali gonegone m'misewu. Acacanda ni ŵali awulajidwe ni upanga wa amagongo. Mwawuleje mwangatendela canasa pa lisiku lya lutumbilo lwenu.

²² Ŵalakwe ŵaŵilasile amagongo ŵangu kuti angamule kutyocela mbali syosope, nipo paliji pangali mundu jwalijose juŵatisile kapena kulupuka pa lisiku lya lutumbilo lwawo. Amagongo ŵangu ŵawuleje ŵanace ŵangu wosope, ŵinalelite ni kwanonyelaga mnope.