Maliko 4 - Chiyawo Bible

Citagu ca mundu jwa kumisa mbeju

¹ Yesu* ŵatandite soni kwajiganya ŵandu mungulugulu Nyasa ja Galileya. Ŵandu ŵajinji ŵasongangene kuŵaliji jwalakweko. Nipo Yesu ŵajinjile mwiboti ni kutama pasi, ŵandu wosope ŵala ali ajimi pamkuli mungulugulu nyasajo.

² Yesu ŵatandite kwajiganya yindu yejinji myitagu acasalilaga jemanjajo kuti:

³ “Pikanani! Mundu jwine ŵapite kukumisa mbeju.

⁴ Piŵaliji mkumisa yilayila, mbeju sine syagwilile mwitala, ni yijuni yayice ni kusilya.

⁵ Mbeju sine syagwilile petaka lya maganga, pilyaliji litaka lyamnono. Mbejusyo syamesile mwa citema pakuti litaka lyakwe nganilija kwika pasi mwakusokoka mnope.

⁶ Nambo pilyaŵasile lyuŵa, mbejusyo syatinice kaneko syajumwile, ligongo lyakuti miciga jakwe nganijijinjila pasi mnope.

⁷ Mbeju sine syagwilile pa mawukutu gamiŵa, mawukutugo pigakulaga, ganyolwesye mbeju sila, mwakuti mbejusyo nganisisogola.

⁸ Nambo mbeju sine syagwilile petaka lyacajila. Syamesile ni kula cenene, soni syasogwele. Masace gane gakwete songolo makumi gatatu, gane gakwete songolo makumi msano ni limo, gane gakwete songolo makumi likumi.”

⁹ Yesu ni ŵatite, “Jwakwete mapikanilo apikane!”

Ligongo lyakwe lyakwiganya myitagu

¹⁰ Nambo Yesu piŵaliji pa malo gangali ŵandu ŵajinji, ŵane mwa ŵandu ŵiŵampikene jwalakwejo pamo ni ŵakulijiganya* likumi ni ŵaŵili ŵala, ŵayice kwa jwalakwejo kukumwusya gopolela kwakwe kwa yitaguyo.

¹¹ Jwalakwe ŵajanjile kuti, “Mlungu am'manyisye jemanja yakusisika ya mu Ucimwene wakwe. Nambo ŵandu ŵane ŵali ŵakusaŵa, akuyipikana yosope myitagu basi,

¹² Yikutendekwa myoyo kuti, ‘Atamose ŵanduwo aloleje, nambo akalolecesya cenene, atamose apikaneje, nambo akapikanicisya cenene, kuti ni mkaŵa kupitikuka mtima, Mlungu ni kwakululucila ulemwa.’ ”

Kugopolela kwa citagu ca jwakumisa mbeju

¹³ Kaneko Yesu ŵawusisye kuti, “Ana yisyene kuti ngamkucipikanicisya cele citaguci? Nambi tiyimpikanicisye uli yitagu yine yiliyose yitinamsalileje?

¹⁴ Jwakumisa mbeju jula ni mundu jwakumisa maloŵe ga Mlungu.

¹⁵ Mbeju syakugwila mwitala sila sigopolela ŵandu ŵakusagapikana maloŵe ga Mlungu. Nambo ndaŵi jijojo Satana* akusayika kutyosya maloŵe gigamisidwe m'mitima mwawo gala.

¹⁶ Mbeju syakumisidwa petaka lyana maganga sila, sigopolela ŵandu ŵakusagapikana maloŵe ga Mlungu, ndaŵi jijojo akugapocela mwakondwa.

¹⁷ Ni pakuŵa maloŵego nganigajinjila mnope miciga jakwe, ŵanduwo akusagamba kulimbicila kwandaŵi jamnono. Naga akusimangana ni yilagasyo kapena yisawusyo ligongo lya maloŵe gala, ndaŵi jijojo akusajasa mtima.

¹⁸ Mbeju syakumisidwa petaka pijapali miciga ja mbeju sya miŵa sila, sigopolela ŵandu ŵakusagapikana maloŵe ga Mlungu.

¹⁹ Nambo akusanyenjedwa ni yindu ya pacilambo capasi pano, pakucinonyela mnope cipanje ni kusaka yindu yine yejinji kukusajinjila m'mitima jawo, yele yinduyi yikusaliŵasya maloŵe gala, ni ngasogola kose yisogosi.

²⁰ Nambo mbeju syakumisidwa petaka lyambone sila, sigopolela ŵandu ŵakusagapikana maloŵe ga Mlungu, ni kugapocela. Ŵandu ŵa mtundu welewo akusasogola yisogosi, mwine yisogosi makumi gatatu, mwine yisogosi makumi msano ni limo, soni mwine yisogosi makumi likumi.”

Nyali jakuŵika kusi kwa ciŵiga

²¹ Yesu ŵawusisye kuti, “Ana ŵandu akusajigala nyali ni kujiwunicila ni ciŵiga, kapena kujisisa kusi kwa cindanda? Ana ngaŵaga kuti akusajiŵika pa malo gakuwonecela?

²² Pakuŵa cindu cilicose cakusisika ticiciwonecela, ni cilicose capacisyepela ticiciwumbuka pakulanguka.

²³ Jwakwete mapikanilo gakupikanila, apikanicisye yitagu yeleyi!”

²⁴ Ŵasalile soni kuti, “Msamalileje pa maloŵe gamkugapikana. Mlingo wumkukamulisya masengo pa kwalamula ŵandu ŵane, Mlungu tacikamulisya masengo mlingo uwowo pakumlamula jemanja, soni mlingo wa jemanja taciwujonjecesya mnope.

²⁵ Ligongo mundu jwakwete kandu tacimjonjecesya yine; nambo mundu jumkinakola kalikose tacisumulidwa.”

Citagu ca mbeju syasikusamela ni kula

²⁶ Yesu ŵasalile soni kuti, “Ya Ucimwene ŵa Mlungu tuwanicisye mpela mundu jwa kumisa mbeju mu mgunda.

²⁷ Jwalakwejo akukomboleka gambaga gona cilo, kundaŵi kwimuka lisiku ni lisiku, ndaŵi josopeji mbeju siŵamisile sila sikumela nipo soni sikukula, nambo msyenejo akakumanyilila muyikutendecela yosopeyi.

²⁸ Litaka ni likusasogosya mbejusyo lisyenepe. Ukusatanda m'mela, kaneko swaji, panyuma pakwe songolo sikusakomala mu swaji mula.

²⁹ Sambano mbejusyo sili sikomele, mundu jula akusajigala cipula cakatila, pakuŵa ndaŵi jagowola jikwanile.”

Citagu ca lusongolo lwa mcele

³⁰ Yesu ŵatite soni, “Ana Ucimwene wa Mlungu* mpaka tiwulandanicisye ni cici? Ana tukamulisye masengo citaguci kuti tugopolele ya ucimwenewo?

³¹ Uli mpela lusongolo lwa citela ca kacele, pakupanda mwitaka cikusaŵa camnono, naga tukulandanya ni songolo sine sya pacilambo pano.

³² Nambo ali akapandile mwitaka, kakusamela, nipo mbeju jakwe jikusakula kugapunda mawukutu gane gosope. Jikusakola nyambi syekulungwa, mwakuti yijuni yikusayika ni kutaŵa yisusi mu nyambi syakwe.”

³³ Yesu ŵajiganyaga ŵandu mu yitagu yejinji yamti mpela yeleyi, mwakulandana ni lunda lwa ŵanduwo.

³⁴ Yesu nganiŵajiganyaga ŵandu pangakamulisya masengo yitagu. Ŵatiji naga ali atemi pa malo pangali ŵandu ŵajinji, nambo ali ni ŵakulijiganya ŵakwepe, ŵagopolelaga yosope.

Yesu ŵalekasisye cimbunga pa nyasa

³⁵ Lisiku lilyolyo, lyuŵa lili likapile, Yesu ŵasalile ŵakulijiganya ŵakwe kuti, “Kwende tujombocele lisi linelyo.”

³⁶ Myoyo ŵalilesile likuga lya ŵandu pamkuli pala, ŵakulijiganya ŵakwe Yesu ŵajinjile mwiboti muŵaliji Yesu mula, ni ŵajawulaga nawo. Gapali soni maboti gane giŵalonganaga nago.

³⁷ Mwacisisimucisya, jatandite mbungo jakogoya pa nyasapo, mwakuti matumbela galiji mkwinjila mwiboti, mpaka lyatandite kugumbala ni mesi.

³⁸ Pa ndaŵi jeleji Yesu ŵaliji munyuma mwa libotilyo, ŵaliji mlugono ali asamile msamilo, ŵakulijiganya ŵakwe ŵamjimwisye, ni ŵamsalile kuti, “Cemwalimu, ana ngakusamala kuti uweji tuli ciŵandika kuwa?”

³⁹ Yesu ŵajimwice, ni ŵajilekasisye mbungojo kuti, “Mtame jii! Ŵajisalile soni nyasa kuti Mtame bata.” Mbungo jila jatondweŵe ndaŵi jijojo, mwakuti paliji pana bata pa nyasapo.

⁴⁰ Yesu ŵawusisye ŵakulijiganya ŵakwe kuti, “Ligongo cici mkutenda woga? Ana nganimkola cikulupi?”

⁴¹ Nambo jemanjajo wakamwile woga kwa mnope, ni ŵaliji mkuwusyana kuti, “Ana jweleju ali mundu jwamti uli pakuŵa mbungo ni nyasa yikumpikanila?”