Maliko 11 - Chiyawo Bible

Yesu akwinjila mwa ucimbicimbi mu Yelusalemu

¹ Yesu* ni ŵakulijiganya* ŵakwe ŵaliji mkuŵandicila ku Yelusalemu, ŵayice ku Betifagi ni Betaniya, misi ja Kwitumbi lya Olifi.* Yesu ŵatumile ŵakulijiganya ŵakwe ŵaŵili,

² ni ŵasalile kuti, “Mjawule m'musi wumkuwuwonawo. Patimkajinjile m'musimo, timkamwone mwanace jwa bulu jwakanakweledwe ni mundu jwalijose citandilile. Mkamgopole ni mkayice najo akuno.

³ Naga mundu jwine akuja kumwusya kuti, ‘Jemanja cici cimkutendaco?’ Jemanja mkajile kuti, ‘Ambuje akwete najo masengo, pitakamale najo masengogo, takamtumisye ndaŵi jijojo akuno.’ ”

⁴ Ŵakulijiganya ŵala ŵapite, ni ŵamsimene mwanace jwa bulu ali amtaŵilile pa mlango mungulugulu msewu, ni ŵatandite kumgopola.

⁵ Ŵandu ŵiŵaliji pelepo ŵawusisye kuti, “Jemanja cici cimkutendaco, bulujo mkumgopolela cici?”

⁶ Ŵakulijiganyawo ŵajanjile mpela muŵasalile Yesu mula. Myoyo ŵandu ŵala ŵakundile kuti amgopole.

⁷ Ŵakulijiganya ŵala ŵayice najo mwanace jwa bulujo kwa Yesu. Ŵaŵisile yakuwala yawo pa mgongo pa bulu jula, nipo Yesu ŵakwesile.

⁸ Ŵandu ŵajinji ŵaliji mkutandika yakuwala yawo mu msewu, ŵane ŵaliji mkwala nyambi sya masamba siŵatemangulaga mwitinji.

⁹ Ŵandu ŵiŵajendaga pasogolo ni ŵiŵakuyaga munyuma ŵatandite gumila kuti, “Ucimbicimbi uŵe kwa Mlungu. Jwana upile jwakwisa mu lina lya Ambuje.

¹⁰ Upegwe upile Ucimwene wele uli mkwisa sambano wa atati ŵenu Daudi.* Ucimbicimbi kwa Mlungu kwinani mnope.”

¹¹ Yesu ali ajinjile mu Yelusalemu, ŵajile kwinjila M'nyumba ja Mlungu, ni ŵalolitelolite yosope. Ni pakuŵa cipi catandite, ŵakopwece ni ŵapite ku Betaniya pampepe ni ŵakulijiganya ŵakwe likumi ni ŵaŵili ŵala.

Yesu akuwulwesya mkuju

¹² Kundaŵi kwakwe, piŵatyokaga jemanjajo ku Betaniya kula, Yesu jamkwete sala.

¹³ Piŵaciweni citela ca mkuju cana masamba pakutalicila camti myoyo, ŵajile kukulola kuti mwine mwakwe takasimane nguju mwelemo. Nambo ali ayice, nganasisimana ngujusyo, nambo masambape pakuŵa nganijiŵa ndaŵi jakusogola nguju.

¹⁴ Papopo Yesu ŵacisalile citelaco kuti, “Kutandilila lelo pangali mundu jutacilya yisogosi yenu.” Ŵakulijiganya ŵakwe ŵala ŵagapikene maloŵe gelega.

Yesu akujiswejesya Nyumba ja AMBUJE

¹⁵ Jemanjaji piŵayice soni ku Yelusalemu, Yesu ŵajinjile m'Nyumba ja AMBUJE, ni ŵatandite kwakoposya ŵandu ŵiŵatendaga malonda gakusuma ni kusumisya yindu mwelemo. Ŵapikwisye matebulo giŵatendelaga malonda gakucenganya mbiya, nambo soni yitengu ya ŵakusumisya ngunda.

¹⁶ Nganakunda kuti mundu jwalijose apite m'maluŵala ga Nyumba ja AMBUJE ali atwicile kandu kalikose.

¹⁷ Kaneko ŵatandite kwajiganya pakwasalila kuti, “Ana ngati Malemba gakuti, ‘Nyumba jangu tijicikolanjidwa nyumba jakupopelela ŵandu ŵa ngosyo syosope.’ Nambo jemanja mjitesile mbanga jakuŵamo ŵaciswamba.”

¹⁸ Acakulungwa ŵa ŵakutaga mbopesi ni aciŵalimu ŵa Malamusi,* piŵapikene yindu yeleyi, ŵatandite kusosasosa litala lyakuti amwulaje. Pakuŵa ŵamjogopaga pakulola kuti ŵandu wosope ŵaliji mkusimonga nayo yiŵajiganyaga jwalakwejo.

¹⁹ Kuli kutandite kuswa, Yesu ni ŵakulijiganya ŵakwe ŵakopwece mu msindamo.

Lijiganyo lya mkuju uŵawulwesile ula

²⁰ Kundaŵi kwakwe, cakundaŵindaŵipe, jemanjajo ali mkwenda mu msewu, ŵaciweni citela ca mkuju cila cili cijumwile cosope cene ni miciga jakwe.

²¹ Papopo Petulo* ŵakumbucile yiyatendekwe yila ni ŵamsalile Yesu kuti, “Cemwalimu alole citela ca mkuju ciŵacilwesile cila cijumwile.”

²² Yesu ŵajanjile kuti, “Mkoleje cikulupi mwa Mlungu.

²³ Ngumsalicisya, kuti jwalijose jwakulilamulila litumbili kuti, mtyoce apa, ni mkaliponye m'nyasa, ali asasile gele maloŵega ni mtima wangakayicila ni wacikulupi kuti yasasileyo yitendekwe, kweli tiyicitendekwa mpela mwaŵecetelemo.

²⁴ Ni ligongo lyakwe ngumsalila kuti, naga m'mapopelo genu mkumŵenda Mlungu cindu cilicose, mkulupilileje kuti mpocele, ni kweli ticiciŵa cenu.

²⁵ Soni ndaŵi jimkusosa kupopela, mtandeje kaje kumkululucila mlongo mjenu naga mkwete najo ligongo lililyose. Naga mkutenda myoyo, Atati ŵenu ŵakwinani nombe nawo, tacimkululucila ulemwa* wenu.”

²⁶ “Nambo naga jemanja ngamkwakululucila acimjenu, Atati ŵenu ŵakwinani nombe nawo, ngasamkululucila ulemwa wenu.”

Ŵamwusisye Yesu ya Ulamusi

²⁷ Yesu ŵayice soni ku Yelusalemu. Pa ndaŵi jele jwalakwe ŵagambaga kulijendela M'nyumba ja Mlungu, acakulungwa ŵa ŵakutaga mbopesi ni aciŵalimu ŵa Malamusi, ni acakulungwa ŵa Ayuda* ŵayice kwa jwalakwejo nipo ŵamwusisye kuti,

²⁸ “Ana ulamusi wumkutendela yeleyi mwawujigele kwapi? Ana ŵani ŵampele macili gelega?”

²⁹ Yesu ŵajanjile kuti, “Tinamwusye ciwusyo cimpepe. Naga mkunjanga none jwakwe tinamsalile kunagajigele macili gakuti ndendeleje yindu yeleyi.

³⁰ Ana Yohane* kuti abatisyeje, ulamusi wakwe watyocele kwapi, kwa Mlungu kapena kwa ŵandu?”

³¹ Jemanja jila ŵatandite kuŵecetana acimsyene acitiji kuti, “Naga tukuti ŵagajigele kwa Mlungu, jwalakwe jula tajile kuti, ‘Nambi ligongo cici nganimumkulupilila Yohane?’

³² Nambo soni naga tukuti, ‘Ŵagajigele kwa ŵandu, pelepo soni ni iyayi.’ ” Ŵatite myoyo pakwajogopa ŵandu, ligongo jwalijose jwakulupilile mu mtima mwakwe kuti Yohane ŵaliji jwakulocesya* jusyesyene.

³³ Ni ŵagambile kumjanga Yesujo kuti, “Kwali, uwe ngatukumanyilila.” Jwalakwe jwatite, “None jwakwe soni sambano nganimsalila kwele kunajigele macili gakutendela yeleyi.”