Luka 8 - Chiyawo Bible

Acakongwe ŵane ŵampecesye Yesu

¹ Yili yitendekwe yeleyi, Yesu* ŵapitile m'misinda ni m'misi acilalicilaga ni kwasalila ŵandu Ngani Syambone* syakwamba ya Ucimwene wa Mlungu.* Pa ulendowo Yesu ŵaliji ni ŵakulijiganya* ŵakwe likumi ni ŵaŵili ŵala.

² Ŵapali soni acakongwe ŵane ŵele Yesu ŵaŵakopwesye misimu jakusakala ni kwaposya ku yilwele yine. Acakongwewo ŵaliji aŵa: Maliya jwakolanjidwa Magadala (mwa jwalakwejo mwakopwece misimu jakusakala msano ni jiŵili);

³ Yowana, ŵiŵaliji ŵamkwakwe Kusa juŵaliji kapitawo jwa Helodi;* Susana pampepe ni acakongwe ŵane ŵajinji ŵiŵaliji kumtumicila Yesu ni ŵakulijiganya ŵakwe pakukamulisya masengo yindu yiŵakwete.

Citagu ca mkumisa mbeju

⁴ Ŵandu ŵajinji ŵakutyocela ku misi josope ŵasongene kuŵaliji Yesu. Yesu ŵasalile jemanjajo citagu* aci acitiji:

⁵ “Mundu jwine ŵapite ku migunda kukumisa mbeju. Piŵaliji mkumisa yilayila, mbeju sine syagwilile mwitala, ni yijuni yayice ni kusilya.

⁶ Mbeju sine syagwilile petaka lya maganga, syamesile nambo syanyasile ligongo lyakusoŵa cinyesi.

⁷ Mbeju sine syagwilile pa mawukutu gamiŵa, mawukutugo pigakusile, ganyolwesye mbeju sila.

⁸ Mbeju sine syagwilile pa litaka lya cajila, syamesile ni kusogola, lisace lililyose lyakwete songolo makumi likumi.” Yesu piŵamasile kuŵeceta yeleyi, ŵaŵecete soni mwakwesya maloŵe acitiji, “Jwakwete mapikanilo apikane!”

Mate gakwe ga citaguci

⁹ Ŵakulijiganya ŵa Yesu ŵamwusisye jwalakwejo gopolela kwa citaguci.

¹⁰ Yesu ŵajanjile kuti, “Mlungu am'manyisye jemanja yindu yakusisika ya mu Ucimwene ŵakwe. Nambo kwa ŵaneŵa agambile kuyipikana kupitila mu yitagupe, kuti atamose alole nambo akalolecesya cenene, soni kuti atamose apikane nambo akapikanicisya cenene.”

Kugopolela kwa citagu ca mkumisa mbeju

¹¹ “Aku ni kugopolela kwakwe kwa citaguci: Mbejusyo sili maloŵe ga Mlungu.

¹² Mbeju sisyagwilile mwitala sila sili mpela ŵandu ŵakusapikana maloŵe ga Mlungu, nambo Satana* akusayika ni kutyosya maloŵe gala m'mitima mwawo, kogopela kuti atakulupilila ni kulupuka.

¹³ Mbeju sisyagwilile petaka lya pa lwala ali ŵandu ŵakupikana maloŵe ga Mlungu, ni akusagapocela mwa lukondwa, nambo maloŵego gangatoŵelela miciga jakwe mwa ŵelewo, mwa ndaŵi japanandi akusakulupilila, mwakuti pa ndaŵi jakulinjikwa akusajasa mtima.

¹⁴ Mbeju sisyagwilile pa maukutu sila, ali ŵandu ŵakusapikana maloŵe ga Mlungu, nambo panyuma pakwe akusakayicila, akusanonyela yipanje ni yakunonyelesya ya umi awuno yikusiyalepelekasyaga, soni yisogosi yawo yikusaŵa yangakomala ndaŵi syosope.

¹⁵ Nambo mbeju sisyagwilile petaka lya cajila sila, ali ŵandu ŵakugapikana maloŵe ga Mlungu ni kugasunga ni mtima wambone ni wakupikanila nipo akusalimbicila mpaka kuŵeleka yisogosi.”

Nyali jewunicile ni ciŵiga

¹⁶ “Pangali mundu jwakusapamba nyali ni kujiwunicila ni ciŵiga kapena kujisisa kusi kwa cindanda. M'malo mwakwe akusajiŵika pa malo gakuwonecela kuti ŵandu ŵakwinjila m'nyumbamo aliwone lilanguka lyakwe.”

¹⁷ “Pakuti pangali cindu cakusisika mu Ucimwene wa Mlungu cele ŵandu ngasacipikana. Camtemela cilicose ticicimanyika ni kuwonecela pakulanguka.”

¹⁸ “Sambano msamalile ni mwele yimkuti pakugapikana maloŵe, pakuti jwalijose jwakwete kandu tacimjonjecesya yine; nambo jumkinakola kalikose tacisumulidwa atamose kalikose kakuganisya kuti akwete.”

Mama ni acalongo acimjakwe ŵa Yesu

¹⁹ Mamagwe ni acalongo acimjakwe ŵa Yesu ŵayice ku nyumba kuŵaliji Yesu, nambo ligongo lya winji wa ŵandu, jemanjajo ŵalepele kwika piŵaliji jwalakwejo.

²⁰ Jwine jwakwe ŵamsalile Yesu kuti, “Mama ŵenu ni acalongo acimjenu ali pasapa akusosa kuwonegana namwe.”

²¹ Yesu ŵasalile ŵanduwo kuti, “Mama ŵangu ni acalongo acimjangu ali ŵandu ŵakupikana maloŵe ga Mlungu ni kutenda yigakuti maloŵego.”

Yesu ŵalekasisye mbungo jamacili

²² Lisiku line Yesu ŵajinjile mwiboti pamo ni ŵakulijiganya ŵakwe ni ŵasalile jemanjajo kuti, “Kwende tujombocele lisi linelyo.” Myoyo ŵawutandite ulendo wawo.

²³ Piŵajombokaga nyasa, Yesu ŵaliji mlugono. Mwacisisimucisya, mbungo jamacili japujile pa nyasapo, nipo mesi gatandite gumbala mwiboti mula mwakuti ŵasigele panandi kumilwa.

²⁴ Ŵakulijiganya ŵala ŵajile pa malo piŵaliji Yesu pala ni kumjimusya jwalakwejo acitiji, “Ambuje, Ambuje! Tuli ciŵandika kuwa uwe!” Yesu ŵajimwice ni ŵajilekasisye mbungo jamacilijo, nipo jatondweŵe mwakuti papali bata pa nyasajo.

²⁵ Kaneko Yesu ŵawusisye ŵakulijiganyawo kuti, “Ana cikulupi cenu cili kwapi?” Nambo jemanjajo ŵakamwile woga soni ŵaliji ŵakusimonga mnope. Myoyo ŵaliji mkuwusyana jwine ni mjakwe kuti, “Ana jweleju ali mundu jwamti uli? Agambile kujilamula mbungo jamacili ni mesi gakwe nipo yikumpikanila.”

Yesu ŵamposisye mundu juŵakamwilwe ni misimu jakusakala

²⁶ Yesu ni ŵakulijiganya ŵakwe ŵajile ku upande wa Agelasa wawuli lisi line lya nyasa kutyocela ku Galileya.

²⁷ Yesu piŵayice pamkuli, ŵasimene ni mundu jwine jwakutyocela m'musimo juŵakwete misimu jakusakala. Kwandaŵi jelewu mundujo ŵatamaga makonope soni nganatamaga pa mlango, nambo ku malembe.

²⁸ Mundujo piŵam'weni Yesu ŵagumisile ni ŵatindiŵele pameso pa Yesujo aciŵecetaga maloŵe mwakwesya kuti, “Yesu, Mwanace jwa Mlungu Jwakupunda yosope. Ana akusaka cici kwa une? Ngwaŵenda kuti akandagasya une.”

²⁹ Ŵaŵecete yeleyi ligongo Yesu ŵaliji ali awulamwile kala msimu wakusakalawo kuti ukopoce mwa mundujo. Kaŵilikaŵili msimu wakusakalawo wamyicililaga jwalakwejo nipo ŵandu ŵamtaŵaga ni maunyolo m'makono ni m'makongolo kumlekasya jwalakwejo. Nambo jwalakwejo jwakutulanyaga yakutaŵilayo nipo msimu wakusakalawo wamlongolelaga jwalakwejo kwawula kwitinji.

³⁰ Yesu ŵamwusisye jwalakwejo kuti, “Lina lyenu ŵani?” Jwalakwejo jwajanjile kuti, “Lina lyangu lili ‘Likuga.’ ” Mundujo jwaŵecete yeleyi ligongo misimu jejinji jakusakala jaliji jili jijinjile mwa jwalakwejo.

³¹ Kaneko misimu jakusakalajo jamŵendile Yesu kuti ajilamule jalakwejo kuti jikajinjile mu mbanga jakusokoka mnope.

³² Likuga lya maguluŵe lyaliji mkulya ciŵandika ni pelepo mungulugulu mwa litumbi. Myoyo misimu jakusakalajo jamŵendile Yesu kuti ajikunde jalakwejo kuti jikajinjile m'maguluŵemo. Myoyo Yesu ŵajikundile.

³³ Misimu jakusakalajo jakopwece mwa mundu jula ni jajile kukwinjila m'maguluŵemo. Papopo likuga lyosope lya maguluŵe lila lyawutucile kwicenjeko ni kuja kugwila m'nyasa ni kumilwa.

³⁴ Ŵakucinga maguluŵe ŵala ŵatisile piŵayiweni yiyatendekweyo, ni ŵajile kukwasalila ŵandu ku misinda ni ku misi ya nganiji.

³⁵ Ŵandu ŵiŵapikene ya nganiji ŵatyosile m'misinda jawo ni kuja kulola yiyatendekweyo. Piŵayice ku malo kuŵaliji Yesu kula, ŵamsimene mundu jwine, mwa jwele mujakopwece misimu jakusakala jula ali awete ni kutama pasi aku ali kumpikanicisya Yesu.

³⁶ Ŵandu wosope uŵayiweni yeleyi yili mkutendekwa ŵasalile ŵandu ŵane yiŵatite pakupola mundujo.

³⁷ Ŵandu wosope ŵakutyocela malo gakusyungulila upande wa Agelasa ŵamŵendile Yesu kuti atyoce kweleko ligongo lyakuti jemanjajo ŵakwete woga. Myoyo Yesu ŵakwesile mwiboti ni ŵatyosile kuwujila pesi pa nyasa.

³⁸ Nambo mundu juŵamkopwesye masoka jula, ŵamŵendile Yesu kuti alongane nawo. Nambo Yesu ŵamwusisye ni kumsalila mundujo kuti,

³⁹ “Mwujile kumangwenu ni mkasalicisye yindu yekulungwa yamtendele Mlunguyi.” Mundu jula ŵawujilile nipo ŵaliji mkwenesya kwa ŵandu wosope yiŵatesile Yesu kwa jwalakwejo.

Mwanace jwamkongwe jwa Yailo ni jwamkongwe juŵakwayiye cakuwala ca Yesu

⁴⁰ Yesu piŵajile lisi line lya nyasa ŵandu ŵajinji ŵaliji kumjembecela jwalakwejo kuti ayice.

⁴¹ Kweleko kwayice mundu jwine, lina lyakwe Yayilo, juŵaliji jwamkulungwa jwakulongolela yindu yiyatendekwaga ku nyumba ja mapopelo. Jwalakwejo jwatindiŵele pameso pa Yesu ni kutanda kumcondelela jwalakwejo kuti alongane nawo ku nyumba jakwe mundujo,

⁴² ligongo lyakuti mwanace jwakwe jwamkongwe jwa yaka likumi ni yiŵili ŵalwalaga mwakuti ŵaliji ciŵandika kuwa. Mwanaceju ŵaliji jumpepe pejo. Yesu piŵaliji mkwawula kweleko, ŵandu ŵala ŵaliji kumŵijikanya.

⁴³ Mu likugalyo mwapali jwamkongwe jwine juŵaliji mkulwala ulwele wa kumwesi kwa yaka likumi ni yiŵili. Ŵamasile kukamulisya masengo yipanje yakwe yosope kwalipila asing'anga nambo ngapagwa ni jumo jose juŵapakombwele kuposya ulwelewo.

⁴⁴ Jwalakweju jwayice piŵaliji Yesu pakupitila cakunyuma kwa jwalakwejo ni ŵakwayiye lujenje lwa cakuwala ca Yesu, mwandaŵi jijojo ulwele wa kumwesiwo walesile.

⁴⁵ Yesu ŵawusisye kuti, “Ana ŵani ŵangwayiye?” Papopo Petulo* ŵatite, “Cemwalimu alole ŵandu wosope ŵaŵasyungulile ni kwaŵijikanyaŵa.”

⁴⁶ Nambo Yesu ŵatite, “Apali jwangwayiye, ligongo mbweni kuti macili gangu gane gakopwece mwa une.”

⁴⁷ Jwamkongwe jula piŵayiweni kuti ngakomboleka kulisisa jwayice ali mkutetemela ni ŵatindiŵele pameso pa Yesu. Jwalakwejo jwatandite kulondesya pameso pa ŵandu wosope ligongo liŵamkwayicisye Yesu ni yiŵatite pakupola mwacitema.

⁴⁸ Yesu ŵamsalile jwamkongwejo kuti, “Mwanangu, cikulupi cenu cimposisye. Jawulagani mwa mtendele.”

⁴⁹ Yesu piŵaliji mkuŵeceta, kwayice mundu jwine jwakutyocela ku nyumba ja Yailo ni kumsalila Yailojo kuti, “Alece kumsawusya mwalimuju, pakuti mwanace jula awile.”

⁵⁰ Yesu piŵapikene yeleyi ŵamsalile Yailo kuti, “Mkajogopa, mgambe kulupilila nipo mwanace jwenu taŵe cenene.”

⁵¹ Piŵayice ku nyumba kwa Yailo, Yesu nganakunda kuti jwalijose ajinjile pampepe ni jwalakwejo, akaŵe Petulo, Yohane,* Yakobo,* ni acinangolo ŵa mwalijo.

⁵² Ŵandu wosope ŵaliji kumlilila mwali juŵawilejo. Nambo Yesu ŵasalile ŵandu ŵiŵalilagawo kuti, “Alece kulila; mwanaceju nganawa, agambile kugona lugono basi.”

⁵³ Ŵandu ŵala ŵamsecile Yesu ligongo jemanjajo ŵamanyilile kuti mwalijo awile.

⁵⁴ Nambo Yesu ŵamkamwile pa mkono mwali juŵawile jula, ni ŵaŵecete mwakukwesya maloŵe acitiji, “Mwanangu, mjimuce!”

⁵⁵ Papopo umi wa mwalijo wawujilile ni jwajimwice ndaŵi jijojo. Kaneko Yesu ŵasalile acinangolo kuti ampe mwalijo yakulya.

⁵⁶ Acinangolo ŵakwe ŵala ŵasimonjile mnope, nambo Yesu ŵalamwile jemanjajo kuti akamsalila mundu jwalijose kwambaga yiyatendekweyo.