Lókasɛ 1 - Nogálɔ ná mammana ya Gɛɔyɔ

Mbédíígí

¹ Bamɛ bá odɛ́má Tiofíli, batɔ gɛca bá mba sɛŋɛ́dá go ɔ́ŋɔ biidí bá masɛnɛ máama má mbaá bádómbánáa naá kadɛ́gadɛ́ɛ yɛcɔ́,

² gɔgɔ́ aŋa báaba bá mbaá lɔmɔ́ naá gobayɛga gá má bá mbaá có oyánɛ́náa, bɔ́ɔ bá ná lɔ́mɔ́ boyogóní bá nogálɔ.

³ Ŋgɛɛ́ ɛ́ná tɔ́nɔ bese naá bámɛ boayá, hɔ́ɔlɔ́ mbáá go fúmbe go búmmue go bummue, mbɛ́ɛ́ ɛ́ná naá mammana mbɔ́gɔ́ iŋkimée ya má, goŋaá mbɔ́ɔ́ ɔ́ŋɔ́ɔ moóma moánɛ bese bese naá kálata go busío báhɔ,

⁴ o gedie go íyime mammana ya kúunenye yɛ́ɛyɛ o lɔ́mɔ́ bɛáalú.

Ɛ́ŋgɛlɛsɛ ɛ ɛ́ ɛ́nɛ́gɛ́ná Sakalɛ́a

⁵ Naá gɛcamɛna gɛ́ɛgɛ Elóode a mbaá lɛ ufuŋe yá Yudée, udúmbí bɛbáágá naá Asaŋa ummue a mba lɛ́ hɔ́ɔ ufíno Sakalɛ́a, naá olɔŋɔ yá bedúmbí bɛbáágá yá Ábɛa. Okɔ́dɔ bɛhɛ́ ufíno Ɛlɛ́sabɛdɛ, a mba lɛ́ naá cume ya batɔ ya Álɔŋɔ.

⁶ Bɔ́ɔ biimée báandɛ́ bá mba lɛ́ bɛtɛ́nɛ́ɛ bá batɔ naá oŋgíso yá Asaŋa, bá beŋebeŋe bicele na bisúnígéné bá Daadáa kanɛ kégíi.

⁷ Kanɛ́ bá mba lɛ́ kanɛ moɔnɔ́, goŋaá Ɛlɛ́sabɛdɛ a mba lɛ́ gɛhóádá, gɔnɔ́ bɔ́ɔ biimée báandɛ́ bá mbaá ŋá bá ná lɛ́ bilunú bá batɔ.

⁸ Gɛcamɛna gɛ́hɛ́ gá go ɛ́da yɔgɔnɔ buelí naá busío bá Asaŋa naá oŋɛndɔ yá olɔŋɔ yɛ́hɛ́ go bola.

⁹ Adɔ gá yá go mo iyide aŋa caŋa ya buelí bá bedúmbí bɛbáágá ɛ lɔ́mɔ́, ɛ ɛ́da lókonyo bolɔ naá Nnyaŋá ya Asaŋa ya Daadáa.

¹⁰ Gɛcamɛna gɛ́ɛgɛ bá mbaá lɛ bá lókononyo alabɛ́nda, gɛdɔŋɔ giimée gɛ́ mba lɛ́ naá hanyɔ́, gɛ́ bósógolonyo.

¹¹ Gɔ́ɔ ɛ́ŋgɛlɛsɛ ummue ba Asaŋa ɛ ɛ́nɛgɛnamɔ́ Sakalɛ́a, a mba lɛ́ tɛ́nɛ́ɛ naá boayá bá ombɔ́gɔ onɔ́mɛ yá gɛdálɛ́ná gá bolɔ.

¹² Aŋa Sakalɛ́a a mbaá mo ɛ́ná, nciŋí go mo yímene, bofoá bó báá mo gumbéné.

¹³ Ɛ́ŋgɛlɛsɛ go mo oyana a amɔ́: «Sakalɛ́a, o do bɛáa bofoá, Asaŋa ɔ ɔ́ ɔ́bɔ́ mbósógólí yahɔ. Okɔ́dɔ bahɔ, Ɛlɛ́sabɛdɛ, a ná go bíenine moɔnɔ́ onɔ́mɔtɔ́, o mo loga go amɔ́ Sáŋa.

¹⁴ A ná bɛ́ɛmba boóma bá mbékelí na bɛyaŋa go busío báhɔ, batɔ degédegé bá ná yaŋa go gobébíene gɛ́hɛ́,

¹⁵ goakɛ́, a ná bɛ́ɛmba gɛantáanta gá mɔtɔ naá oŋgíso yá Daadáa. A dɛ ná nyóɛna mɔgɛ́bɔ, akɛ́ má bɛ́ɛmba mbɔ́dɔ ɛhanɛ́ɛ, a ná bɛ́ɛmba dácɛ na Gimmúmpúu gá Giliíli gó bayɛga naá gadɛ́ɛ gá nnyeedíi.

¹⁶ A ná ŋa goŋaá gɛca gá baaná bá Ɛ́sɛlahɛ́ɛlɛ bá nco gunde naá Daadáa Asaŋa babɔ́.

¹⁷ A nɛ́ ɛnda naá busío bá Asaŋa na giliíli, gɔnɔ́ na bogaaga bá Elíi, goŋaá á ba gundíe ɛdɛ́má ya bebíéní naá baaná, a gunde a ŋa goŋaá belelí ɛdóɛ bá bɛa nciŋí ya bɛtɛ́nɛ́ɛ, a gedie gɛdɔŋɔ gɛ́ɛgɛ gɛ́ lɔ́mɔ́ pɛnɛ́ɛ go muúle má Daadáa.»

¹⁸ Kanɛ́ Sakalɛ́a go gundie ɛ́ŋgɛlɛsɛ a amɔ́: «Ɛkádɛ́ gá go ndincie boóma moánɛ goŋaá bó lɛ́ mammana. Yɔmɔ́ɔ mɔ́nyɔ́ɔ nná lɔ́mɔ́ gilunú, okɔ́dɔ bamɛ na gɛcɛcá gá nnyómá.»

¹⁹ Ɛ́ŋgɛlɛsɛ go mo gundinye a amɔ́: «Yɔmɔ́ɔ ndɔ́mɔ́ Gabɛlɛyɛ́ɛlɛ, kɛ́ga naá busío bá Asaŋa. Mɔ́ɔ a báá ná tómá goŋaá nco go gálagala, kunde ko oyana gɛnɔ́gɔ́ gá cɔ́mɔ gɛ́ɛgɛ.

²⁰ Dogálɔ dámɛ dɔ́ɔdɔ dó ná ɛ́nanɛna naá gɛcamɛna gá dɔ́ go ɛ́nanɛna. Kanɛ́ aŋa o báá ná ágá cuŋí, o goó obá na gɛmámɔ́ gó ɛ́da go éme aŋa boóma moánɛ bó nɛ́ ɛ́nanɛnamɔ́.»

²¹ Naá gɛcamɛna gá ndiemi, gɛdɔŋɔ gɛ́ mba lɛ́ gɛ́ gɛ́gana Sakalɛ́a, gɛ́ békúke mbɔ́dɔ yɛ́ɛyɛ ɛ ɛ́damɔ́ gɛ́ga makɔ́nɔ́ naá Nnyaŋá ya Asaŋa.

²² Ɛ ɛ́ ɛ́dá héme hɔ́ɔ, a báa gó bɛ́ɛmba kanɛ bogaaga bá go gɔnɔ gálɛda, a bó oyana boóma. Gɛdɔŋɔ go íyime goŋaá a bɛ́ɛ ɛ́na giínigie hɔ́ɔ naá Nnyaŋá ya Asaŋa. Gɛ́hɛ́ go ɛ́da go bó gálagala goana na ɛmbɔ́gɔ, a báá lɔbɛ́nɔ́ gimmúke.

²³ Medúgú mɛ́hɛ́ má buelí má á maná, gɛ́hɛ́ go gunde naá nnyaŋá.

²⁴ Gɛcamɛna gɛ́ á dómbá, okɔ́dɔ bɛhɛ́ Ɛlɛ́sabɛdɛ go súge ibume, go bɔ́ɔsɛgɔ na nɛ́ ɛfɛ́ ɛtáanɔ naá mɔ́ nnyaŋá, ɛ ɛ́da a bágálɛnagalɛna a amɔ́:

²⁵ «Gɛantá gá besé gɛ́gɛ́ɛ Asaŋa a ŋŋamɔ́ gɛ́ɛgɛ aŋa a gediemú goŋaá a ŋgúlie odóɛ gonóa yámɛ naá kadɛ́gadɛ́ɛ ya batɔ.»

Ɛ́ŋgɛlɛsɛ a á ncó go oyana Malɛ́a cɔ́mɔ ya go bíene

²⁶ Naá ofɛ́ yá gátáanɔ na gémmue yá ibume ná Ɛlɛ́sabɛdɛ, gɔ́ɔ Asaŋa a dómamɔ́ ɛ́ŋgɛlɛsɛ Gabɛlɛyɛ́ɛlɛ naá tɛ́sɔnɔ ya Násalɛdɛ ba gigísi gá cí gá Gelilée,

²⁷ naá ombóla ba okɔ́dɔ, gɛɔŋɛnɔ gá mɔtɔ ufíno yɛ́hɛ́ Yósɛbɛ. A mba lɛ́ naá cume ya batɔ bá Défidi, ufíno yá ombóla ba okɔ́dɔ moánɛ yó mbaá lɛ Malɛ́a.

²⁸ Ɛ́ŋgɛlɛsɛ i í íŋéné, go oyana Malɛ́a a amɔ́: «Ŋgaá go bédíígíe, maamɔ́ɔ mɔ́ɔnyɔ o bɛamɔ́ gɛantá gá niibo ná Asaŋa, Daadáa a lɛ́ nahɔ.»

²⁹ Naá nnyimé ya dogálɔ dá ɛ́ŋgɛlɛsɛ dɔ́ɔdɔ, nciŋí go yímene Malɛ́a, gɛ́hɛ́ go ɛ́da go búúhene aŋa mbɔ́dɔ ya mbédíígí moánɛ ɛ lɔ́mɔ́ naá cí.

³⁰ Ɛ́ŋgɛlɛsɛ go mo gundie a amɔ́: «O do gɔ́lɔ́ bofoá, Malɛ́a; goakɛ́ Asaŋa a á go ŋaáa gɛantáanta gá niibo.

³¹ Ɛ́ná, o ná gɔ́lɔ ibume, o bíene moɔnɔ́ onɔ́mɔtɔ́, o mo loga Yésusu.

³² A ná bɛ́ɛmba gɛantáanta, bá ná mo dɔ́ŋɔnɔ bá amɔ́ Moɔnɔ́ bá Asaŋa ba Páábɔ́ naá Mmoɛná, Daadáa Asaŋa a ná mo fáa undukí yá bufuŋe yá isée kɔ́nɔ́ɔ Défidi.

³³ Gɔ́ɔ a ná bɛ́ɛmbamɔ́ Ufuŋe yá nnyaŋá ya Yɔ́kɔbɔ go medúgú miimée, bufuŋe bɛhɛ́ bó do ŋgá mana.»

³⁴ Malɛ́a go oyana ɛ́ŋgɛlɛsɛ a amɔ́: «Boóma moánɛ bó ná báŋamɔ́ nɛɛ́nɛ, yɔmɔ́ɔ kanɛ go íyime onɔ́mɔtɔ́ o?»

³⁵ Ɛ́ŋgɛlɛsɛ go mo gundie a amɔ́: «Gimmúmpúu gá giliíli gɛ́ ná go úline, bogaaga bá Asaŋa ba Páábɔ́ naá Mmoɛná bó ná go boa na gifií gá bɔ́. Go busío moánɛ gɔ́ɔ moɔnɔ́ mɔ́ɔnyɔ a ná bébíenemú a ná bɛ́ɛmbamɔ́ Gimmúmpúu, bá mo dɔ́ŋɔnɔ Moɔnɔ́ ba Asaŋa.

³⁶ Ɛ́ná kanɛ́! Tɛ́ɔbɛnɔ Ɛlɛ́sabɛdɛ mɔ́ɔ tɔ́nɔ ɔ ɔ́ gɔ́lɔ ibume ná moɔnɔ́ onɔ́mɔtɔ́ naá bulunú bɛ́hɛ́, ɛfɛ́ ɛtáanɔ na yúmmue yɛ́yɛ́ɛ, mɔ́ɔ mɔ́ɔnyɔ bá mbaá lɔmɔ́ bá dɔ́ŋɔnɔ bá amɔ́ gɛhóádá,

³⁷ goakɛ́ boóma bá go suge Asaŋa bó do báá.»

³⁸ Malɛ́a go oyɛda a amɔ́: «Ndɛ́ uyogóní ba Daadáa, ŋgá bó ŋŋa aŋa go oyamɔ́.» Gɔ́ɔ ɛ́ŋgɛlɛsɛ a dómbamɔ́.

Malɛ́a ɛ ɛ́da mɛ́nɛgɛna Ɛlɛ́sabɛdɛ

³⁹ Naá medúgú moánɛ mɔ́ɔmɔ, Malɛ́a go bágáyɛga go go ɛ́da naá ɛgɔndɔ naá tɛ́sɔnɔ mmue yɛ́ɛyɛ naá Yudée.

⁴⁰ Gɔ́ɔ i íŋenemú naá nnyaŋá ya Sakalɛ́a, go bedíigie Ɛlɛ́sabɛdɛ.

⁴¹ Gɔgɔ́ aŋa Ɛlɛ́sabɛdɛ a mbɔɔ́ ɔ́bɔ́ mbédíígí ya Malɛ́a, moɔnɔ́ bɛhɛ́ go ɛ́da dígimide na bogaaga naá gadɛ́ɛ gɛ́hɛ́. Gimmúmpúu gá Giliíli go dómba go hóogo Ɛlɛ́sabɛdɛ.

⁴² Gɛ́hɛ́ go áncɛda na bogaaga a amɔ́: «O lɛ́ fonáalú o dómbana bakɔ́dɔ biimée, moɔnɔ́ mɔ́ɔnyɔ a lɔ́mɔ́ naá gadɛ́ɛ gáhɔ a lɛ́ tɔ́nɔ fonáalú.

⁴³ Ndɔ́mɔ́ ánɛ́ɛ goŋaá nnyeedíi ba Daadáa bamɛ u úle naá yɔmɔ́ɔ o?

⁴⁴ Ɛ́ná, gɔ́ɔgɔ aŋa ŋgɔ́bɔmɔ́ mbédíígí yahɔ, gɔ́ɔ moádɔmbɔ́ ɛ ɛ́damɔ́ dígimide na bɛyaŋa naá gadɛ́ɛ gámɛ.

⁴⁵ Besé makɔ́nɔ́ na okɔ́dɔ mɔ́ɔnyɔ a lɔ́mɔ́ olímínyóolú goŋaá: bɔ́ɔbɔ bá lɔ́mɔ́ mo oyánáalú bó ɛ́da go úlene naá Daadáa bó ná bóhóogio.»

⁴⁶ Gɔ́ɔ Malɛ́a o oyɛdamɔ́ a amɔ́: «Odɛ́má yámɛ yó gúmenye Daadáa.

⁴⁷ Giliíli gámɛ gɛ́ lɛ́ na bɛyaŋa makɔ́nɔ́ go busío bá Asaŋa, Uféŋí bamɛ,

⁴⁸ goakɛ́, a báa béeniŋinye uyogóní bɛhɛ́ ba kanɛ ŋgénéménée. Ɛɛ́ɛŋ, a dúme godɔ́ɔdɔ na go busío buimée, ɛgɛlɛ ya batɔ iŋkimée ɛ ná ŋa yɛ oya yɛ amɔ́ ndɛ́ na besé makɔ́nɔ́,

⁴⁹ goakɛ́ Asaŋa ba bogaaga buimée a lɛ́ ŋaáalú bɛantá bá moóma go busío bámɛ. Ufíno yɛ́hɛ́ yó lɛ́ gimmúmpúu.

⁵⁰ Gɛnɔ́gɔ́ gɛ́hɛ́ gá odɛ́má gɛ́ báláfa báaba bá mo díinemú ɛgɛlɛ ɛɛ́ ɛgɛlɛ.

⁵¹ A lɛ́ ŋaáalú bɛantá bá moóma na bogaaga bá ombɔ́gɔ yɛ́hɛ́. A báá sénígíe bagayagáyáa.

⁵² A báá túlúnée bɛgaaga bá mefuŋe naá indukí ya má, a báá búlúgíe báaba bá bésiisenyemú,

⁵³ A báá nuncényée bancanáncana na moóma má besé. A báá gúlúgényée banɔ́mɛnɔmɛ ɛmbɔ́gɔ ɛhandɛ́.

⁵⁴ A báá sódío Ɛ́sɛlahɛ́ɛlɛ, uyogóní bɛhɛ́, a báá gɔnɔ́ dúfie gɛnɔ́gɔ́ gɛ́hɛ́ gá odɛ́má,

⁵⁵ naá boayá bá Ábalaháma na cume ya batɔ bɛ́hɛ́ go busío buimée, aŋa gɔ́ɔgɔ a mbaá dánɛ́ná biisée bá biisée kɔ́nɔ́ɔ bɛ́cɔ́.»

⁵⁶ Malɛ́a go gɛ́ga hɔ́ɔlɔ́ naá Ɛlɛ́sabɛdɛ boóma bá ɛfɛ́ ɛdadɔ́, kanɛ́ gɛ́hɛ́ go gunde naá nnyaŋá yɛhɛ́.

Gobébíene gá Sáŋa Begiyuminye

⁵⁷ Aŋa gɛcamɛna gá Ɛlɛ́sabɛdɛ go bíene gɛ́ mbaá bolá, gɛ́hɛ́ go bíene moɔnɔ́ onɔ́mɔtɔ́.

⁵⁸ Mebégu mɛ́hɛ́ na ncíbo yɛhɛ́ ya batɔ bɔ́ ɔ́ ɔ́bɔ́ goŋaá Asaŋa a lɛ́ mo ŋaáalú besé makɔ́nɔ́, gáábɔ́ go békelenye nɛhɛ́.

⁵⁹ Aŋa moádɔmbɔ́ a mbaá háá medúgú mánnámanyɛ́, gáábɔ́ go úle go go mo anca. Bá mba lɛ́ bá lɛ́galɛga go mo loga Sakalɛ́a, ufíno yá Isée.

⁶⁰ Kanɛ́ nnyeedíi go oyɛda a amɔ́: «Akɛ́ɛ, ufíno yɛ́hɛ́ yó ná bɛ́ɛmbamɔ́ Sáŋa.»

⁶¹ Gáábɔ́ go mo gundie bá amɔ́: «Mɔtɔ a dɛ bósó na ufíno yɔ́ɔyɔ naá ncíbo yahɔ ya batɔ.»

⁶² Gáábɔ́ go ɛ́da go gálagala Isée na ɛmbɔ́gɔ, bá mo úhene bá amɔ́: «Ufíno yóhanɛ́ɛ o lɛ́galɛgamɔ́ goŋaá dɛ mo loga o?»

⁶³ Sakalɛ́a go ɔŋɛnɔ gɛgɔ́gɔ́ go ɔ́ŋɔ kɔ́ɔ a amɔ́: «Ufíno yɛ́hɛ́ yó lɔ́mɔ́ Sáŋa.» Batɔ biimée go ɛ́da go békúke boóma moánɛ.

⁶⁴ Hɔ́ɔ na hɔ́ɔ, nyuudé ná Sakalɛ́a go dómba go bébuune; gɛ́hɛ́ go ɛ́da go búlugenye Asaŋa, a mo gúmenye ukelú naá mmoɛná.

⁶⁵ Gɔ́ɔ batɔ báaba naá hoóma hɔ́ɔhɔ hiimée bá gɔ́lɔmɔ́ bofoá. Moóma muimée mɔ́ɔmɔ mó mbaá bádómbánáa mɔ́ɔmɔ go ɛ́da go bóoya naá ɛgɔndɔ iŋkimée ya Yudée.

⁶⁶ Biimée báaba bá mbaá lɛ bɔ́ ɔ́bɔnɔ bá gálagala moóma mɔ́ɔmɔ, go ɛ́da go bébide naá ɛdɛ́má bá gálagala bá amɔ́: «Moádɔmbɔ́ moánɛ a ná bɛ́ɛmbamɔ́ ŋkádɛ o?» Mammana, bogaaga bá Asaŋa bó mba lɛ́ nɛhɛ́.

Osagɔ ya Sakalɛ́a

⁶⁷ Gɔ́ɔ Gimmúmpúu gá Giliíli a hóogomú Isée Sakalɛ́a, go ɛ́da go émenye dogálɔ dá Asaŋa a amɔ́:

⁶⁸ «Ŋgáa Daadáa Asaŋa bá Ɛ́sɛlahɛ́ɛlɛ a gúme, goakɛ́ u ú úlé gióhiginyo, a báá fáŋá boɛ́nɔ bɛ́hɛ́.

⁶⁹ A á có dómɛ́ná gɛgaaga gá Uféŋí naá nnyaŋá ya batɔ ya uyogóní bɛhɛ́ Défidi.

⁷⁰ Bó lɛ́ boóma bɔ́ɔbɔ a mboó oyɛ́dá fueké fueké naá eŋgúdé yá bimmúmpúu bá mbúsí sá Asaŋa sá cóá cóá.

⁷¹ A mba dáná goŋaá a gaá có dúgúné naá ɛmbɔ́gɔ ya báaba bá có nuigenyemú, na báaba bá có bɛlabɛlamɔ́.

⁷² Nɔ́ɔ gɔ́ɔ a dúfenyemú gɛnɔ́gɔ́ gɛ́hɛ́ gá odɛ́má naá biisée bɛ́cɔ́ a gɔnɔ béeniŋenye gimmúmpúu gɛ́hɛ́ gá gɛlada bugúle,

⁷³ gɔgɔ́ aŋa a mbaá bálɛ́a a báá dánɛ́ná Isée kɔ́nɔ́ɔ bɛcɔ́ Ábalaháma.

⁷⁴ Hɔ́ɔlɔ́ a báa go có sódio naá ɛmbɔ́gɔ ya babɛlɔ́bɛlɔ bɛ́cɔ́, go goŋaá dɛ bɛa bogaaga bá go mo yɔgɔnɛnɔ kanɛ bofoá,

⁷⁵ naá bummúmpúu na naá botɛ́nɛ́ɛ gadɛ́ɛ, naá medúgú mɛ́cɔ́ má gɛɔyɔ miimée.

⁷⁶ Kanɛ́ maamɔ́ɔ moɔnɔ́ bámɛ, bá ná go dɔ́ŋɔnɔmɔ́ mbúsí ya Asaŋa ba Asaŋa Páábɔ́ naá Mmoɛná, goakɛ́, o nɛ́ ɛnda naá busío bá Daadáa go go mo gedinye gedinye pɛ́ sɛ́hɛ́.

⁷⁷ O ná fáa boɛ́nɔ bɛ́hɛ́ nciŋí ya go lɛnca gisódio gábɔ́, aŋa a ná bó héehinyemú bɛlɔgɔ bábɔ́.

⁷⁸ Go busío bá gɛantáanta gá gɛnɔ́gɔ́ gá odɛ́má gá Asaŋa bɛcɔ́, go gɛ́ gɔ́ɔ buisí bɔ́ɔbɔ naá mbálɛ́ná bó ŋgaá có ɛ́nɛ́gɛ́ná naá mmoɛná,

⁷⁹ go go semenye báaba bɔ́ ɔyɔmɔ́ naá bɛdɔmbɔ na naá bofoá bá nigúe, na go indenye gá ambaná yɛ́cɔ́ naá pɛ́ ya buumbénú.»

⁸⁰ Moádɔmbɔ́ a mba lɛ́ a goma, giliíli gɛ́hɛ́ gɛ́ bégíndenye tɔ́nɔ. A mba gɛ́gáa naá giolóo gá bodɛ́agadɛ́ go ɛ́da héme naá buisí bɔ́ɔbɔ a mbɛɛ́ ɛ́dá bédúfie naá batɔ naá gɛdɔŋɔ gá Ɛ́sɛlahɛ́ɛlɛ.