Galáatɛ 1 - Nogálɔ ná mammana ya Gɛɔyɔ

Mbédíígí

¹ Yɔmɔ́ɔ Póolo mɔ́ɔ nnyó ɔ́ŋɛnɔmɔ́ kálata yɛ́ɛyɛ; ndɛ́ apótɛlɛ caá akɛ́ naá goiyide gá batɔ, ɛ́na lí gá mɔtɔ, kanɛ́ ndɔ́mɔ́ go goiyide gá Yésu Kilítu na Asaŋa Isée mɔ́ɔnyɔ a mbaá mo fúfúné naá kadɛ́gadɛ́ɛ ya begúe.

² Bolimóní bámɛ báaba háalá bá á bénebígínyée namɛ go go nyó ɔ́ŋɛnɔ kálata yɛ́ɛyɛ, bɛɛnyɔ́ɔ biimbó bá boolímínyí bɛ́ɛbɛ naá Galáatɛ, go go nyó oyana dɛ amɔ́:

³ Ŋgáa Asaŋa Isée bɛcɔ́, na Daadáa Yésu Kilítu bá nyó boogo, bá nyó fáa buumbénú.

⁴ Kilítusu a mba bííŋéné mɔ́ɔ moatɛ́ moatɛ go go có sódio go bɛlɔgɔ bɛ́cɔ́. Bó mbaá lɛ nɔ́ɔnɔ goŋaá a có dúgune naá bobɛ́ bá cí yɛ́ɛyɛ. A mba ŋaáa nɔ́ɔ go go hóogio ndɛ́ga ya Asaŋa Isée bɛcɔ́.

⁵ Nigúmi nɛ́ bɛ́ɛmba na Asaŋa go bɛcamɛna biimée. Aamɛnɛ.

Sótáa ya Gɛnɔ́gɔ́ gá Cɔ́mɔ

⁶ Mbékúke makɔ́nɔ́, mbɔ́dɔ yɛnyɔ́ ya go fíidie Asaŋa nnyimé fɛaŋɔ, mɔ́ɔ mɔ́ɔnyɔ a lɔ́mɔ́ nyó dɔ́ŋɛ́nɔ́ɔlú go niibo ná Kilítusu, no báá biené gɛnɔ́gɔ́ gá cɔ́mɔ gíncoó.

⁷ Bó fóanɛna aŋa gɛnɔ́gɔ́ gá cɔ́mɔ gíncodío gɛ́ lɛ́ hɔ́ɔ, asáa gɔgɔ́ gɛ́ dɛ báá. Kanɛ́ batɔ ba lɛ́ hɔ́ɔ naá kadɛ́gadɛ́ɛ yɛnyɔ́ go go nyó bueŋeŋye, bá fúmbe go néŋgelidie Gɛnɔ́gɔ́ gá Cɔ́mɔ gá Kilítusu.

⁸ Mammana, mɔtɔ, akɛ́ a bɛ́ɛmba bɛɛcɔ́ɔ moatɛ́ moatɛ, akɛ́ a bɛ́ɛmba ɛ́ŋgɛlɛsɛ ba go ɛ́da go úle naá mmoɛná, a amɔ́ a nyó dúmeninye cɔ́mɔ incoó kóka na Gɛnɔ́gɔ́ gá Cɔ́mɔ gɛ́ɛgɛ bɛɛcɔ́ɔ dɛ mbaá nyó dúménínyée, a háanana na ɛyɔmɛnɔ.

⁹ Mbáá ná go oyɛda nɔ́ɔnɔ cóá, gɔ́ɔ kɔnɔmɔ́ fitie caá, mɔtɔ a amɔ́ a nyó dúmeninye cɔ́mɔ incoó kóka na Gɛnɔ́gɔ́ gá Cɔ́mɔ gɛ́ɛgɛ no mbaá bɛáa, a háanana na ɛyɔmɛnɔ.

¹⁰ Kanɛ́ godɔ́ɔdɔ, púmbemú nnyimé ya batɔ lí, yɛ́ɛyɛ ya Asaŋa o? Púumbemú goŋaá batɔ bá ŋgɛ́na bese lí? Mammana, aáŋa gɔ́ɔ bó lɔ́mɔ́ goŋaá batɔ bá gɔnɔ ŋgɛ́ná bese, gásɛ́ cɛ báá gɔnɔ́ uyogóní ba Kilítusu.

Asaŋa i í iyídé Póolo goŋaá a bɛ́ɛmba apótɛlɛ

¹¹ Bolimóní, ŋgaá nyó oyáná daŋɛ́daŋɛ caá Gɛnɔ́gɔ́ gá Cɔ́mɔ gɛ́ɛgɛ mmbaá nyó dúménínyée, gɛ́ dɛ ɛ́dá go úlene naá mɔtɔ.

¹² Mammana, bó do báá mɔtɔ mɔ́ɔ a mbaá gɛ́ túmbínyée, ɛ́na lí, a báá gɛ́ kúúnényée, kanɛ́ a lɔ́mɔ́ Yésu Kilítu mɔ́ɔ moatɛ́ moatɛ a mbaá gɛ́ ndincíe.

¹³ Moánɛ no mbɔ ɔ́bɔ́nɔ́ɔ bó oya mbɔ́dɔ yɛ́ɛyɛ mmbaá lɛ ŋgɔyɔ cóá gɛcamɛna gɛ́ɛgɛ mmbaá lɔmɔ́ mbienene gioliminyo gá Beyúdene. No íyimene na kasɛ́á mbɔ́dɔ ya bɛgaŋɛna mmbaá lɔmɔ́ nnuigenye biimbó bá boolímínyí Asaŋa, ŋgɛ́da púmbe pɛ́ ya go bɛ́ gada.

¹⁴ Mmba lɛ́ koma naá gioliminyo gá Beyúdene, tómbana boɔmɛ bá ogɛlɛ yámɛ, mmba lɛ́ na gɛlola mbó dómbana go go gaŋɛmɛdana go ndoŋá sá biisée bá biisée kɔ́nɔ́ɔ bɛ́cɔ́.

^15-16 Kanɛ́ Asaŋa a mba ŋgiyídé ká lɛ́ cɛ bébíéné, a báá tɔ́ŋɛ́nɔ́ go gɛnɔ́gɔ́ gɛ́hɛ́ gá odɛ́má, goŋaá mmo yɔgɔnɛnɔ. Aŋa a mbɛɛ́ ɛ́ná bese, a báá ndincíe Moɔnɔ́ bɛhɛ́ goŋaá túmeninye báaba bá lɔ́mɔ́ bá dɛ bɛ́ɛ́mbá Beyúdene Gɛnɔ́gɔ́ gá Cɔ́mɔ gɛ́ɛgɛ gɛ́ núunemú Moɔnɔ́ bɛhɛ́, cɛ mbá fúmbe go bɛa témbuginye ya mɔtɔ.

¹⁷ Cɛ mbáá fúmbe akɛ́ go ɛ́da naá Yolósalɛmɛ go go ɛ́na báaba bá mbaá lɔmɔ́ baapótɛlɛ naá busío gámɛ; kanɛ́ mmbaá dómbá go ɛ́da naá Elebíi, mbáá lɛ gó gɔnɔ nco gunde naá Damáasɛ.

¹⁸ Naá nnyimé ya nnyómá ɛ́dadɔ́, gɔ́ɔ mmbɛɛ́ ɛ́dá naá Yolósalɛmɛ go go lumene na Sɛ́fasɛ; dɛ báá ŋaáa medúgú buinyo nɛhɛ́.

¹⁹ Ndɛ́ kanɛ go ɛ́na apótɛlɛ uncodío, goana Sáakɛ ondimóní ba Daadáa.

²⁰ Boóma bɔ́ɔbɔ nnyó ɔ́ŋɛnɔmɔ́ bɔ́ɔbɔ, naá busío bá Asaŋa, ŋgaá nyó oyáná caá, bó lɛ́ mammana.

²¹ Naá nnyimé hɔ́ɔlɔ́, gámɛ go ɛ́da naá bigísi bá cí bá Silíi na bá Silisíi.

²² Kanɛ́ biimbó bá bakɛlɛ́tɛnɛ bá Yudée, bɛ́ mbaá ŋá bɛ́ gá lɛ́ bɛ́ dɛ ŋgɛ́ná.

²³ Bɛ́ mbaá lɔmɔ́ goana bɛ́ ɔ́bɔnɔ bó oya bá amɔ́: «Mɔtɔ mɔ́ɔnyɔ a mbaá lɔmɔ́ a có séesenye cóá, mɔ́nyɔ́ɔ godɔ́ɔdɔ a ná lɔ́mɔ́ go dúmenye Gɛnɔ́gɔ́ gá Cɔ́mɔ gɛ́ɛgɛ a mbaá lɔmɔ́ a lɛ́galɛga go gada.»

²⁴ Gɔ́ɔ biimbó bá bakɛlɛ́tɛnɛ bɛ́ɛbɔ bɛ́ ɛ́damɔ́ go búlugenye Asaŋa go busío bámɛ.