2 Timotée 1 - Nogálɔ ná mammana ya Gɛɔyɔ

Mbédíígí

¹ Yɔmɔ́ɔ Póolo, apótɛlɛ ba Yésu Kilítu go ndɛ́ga ya Asaŋa, na gɛnóɛ́ gá go dóogonyo gɛɔyɔ gɛ́ɛgɛ Asaŋa a mbaá dáná, gɛ́ɛgɛ dɛ bɛananamɔ́ naá gobálada na Yésu Kilítu,

² ŋgaá bédíígíe moɔnɔ́ bamɛ ba odɛ́má Timotée: Ŋgáa Asaŋa Isée na Yésu Kilítu Daadáa bɛcɔ́, bá go boogo, bá go ɛ́na mahana, bá go fáa buumbénú.

³ Mbéhiigi Asaŋa mɔ́ɔnyɔ mmo búlugenyemú na odɛ́má yɔ́ɔyɔ yó lɔ́mɔ́ yó do koománɛ́náa aŋa biisée kɔ́nɔ́ɔ bá biisée bámɛ bá mbaá mo yɔgɔ́nɛ́nɔ́ɔ, mmo béhiigi tɔ́nɔ gɛcamɛna giimée gɛ́ɛgɛ ko buŋemú naá yɔmɔ́ mbósógólí aŋa budúgú aŋa siisíi.

⁴ Ndɛ́ kanɛ go bófoolio biósino báhɔ, gɔ́ɔ ndɔ́mɔ́ na gɛantá gá ncaná gá go gɔnɔ go ɛ́na go goŋaá mbɛ́ɛmba dácɛ na bɛyaŋa.

⁵ Ndɛ́ kanɛ go bófoolio mammana yahɔ ya gioliminyo, gioliminyo gɛ́ɛgɛ yigúédíi kɔ́nɔ́ɔ Lóyisi na yigúédíi ba go go bíene Énisi, bá mbaá lɛ na gɛ́. Godɔ́ɔdɔ o lɛ́ tɔ́nɔ na gɛ́, kɛmana nɔ́ɔnɔ.

⁶ Boóma moánɛ bɔ́ ko úncuginyemú caá, gáyɛ́ŋánáa pááná yɛ́ɛyɛ Asaŋa a lɔ́mɔ́ go fáalú aŋa gɔ́ɔgɔ ndɔ́mɔ́ go dáláalú ɛmbɔ́gɔ go odóɛ.

⁷ Ɛɛ́ɛŋ, Asaŋa a lɛ́ kanɛ go có fáa Giliíli mɔ́ɔnyɔ a có íyenyemú bafoáfoa, kanɛ́ a lɔ́mɔ́ Giliíli mɔ́ɔnyɔ a có fáananamɔ́ bogaaga, gɛnɔ́ɔ́nɛ́nɔ́ na go íyime go bɔ́gɔ́lɔ,

⁸ o do nóá kanɛ́ odóɛ go go oya bɔ́ɔbɔ bo núunemú Daadáa bɛcɔ́ ɛ́na akɛ́ go yɔmɔ́ɔ mɔ́ɔnyɔ ndɔ́mɔ́ naá ncíbo ya gɛaŋɔ́ go ufíno yɛ́hɛ́. Olímínyóo go ɔ́bɛgɔnɔ olɔŋɔ namɛ go busío bá Gɛnɔ́gɔ́ gá Cɔ́mɔ go bogaaga bɔ́ɔbɔ Asaŋa a fáananamɔ́.

⁹ Mɔ́ɔ a mbaá có sódío, a báá gɔnɔ́ có dɔ́ŋɛnɔ goŋaá dɛ bɛ́ɛmba bɛ́hɛ́; caá akɛ́ go meŋiigíe mɛ́cɔ́, gɔ́ɔ a mbaá ŋaáa nɔ́ɔ, kanɛ́ bó lɔ́mɔ́ go kɛsɛ́ná yɛhɛ́ ya moatɛ́ na niibo nɛ́hɛ́ gɔ́ɔ a mbaá ŋaáa nɔ́ɔ. A mba có fáá niibo ná ndiemi gá Yésu Kilítu cí ɛ gá lɛ́ ɛ dɛ bɛ́ɛ́mbá gedíelú.

¹⁰ Godɔ́ɔdɔ, niibo moánɛ nɛ́ á bóloodío dalaŋanyɛ na goúle gá Usódí bɛcɔ́ Yésu Kilítu. A mba mánɛ́gɛ́ná nigúe, a báá gɔnɔ́ sénigie gise gá gɛɔyɔ gá kanɛ mmanɛ́náa na Gɛnɔ́gɔ́ gá Cɔ́mɔ.

¹¹ Go go dúmbenye Gɛnɔ́gɔ́ gá Cɔ́mɔ gɛ́ɛgɛ, gɔ́ɔ Asaŋa a mbaá tílímínyée udúmbí dogálɔ, Apótɛlɛ gɔnɔ́ uhúúnínyí.

¹² Go busío bá ndiemi tɔ́nɔ gɔ́ɔ ŋgɔ́bɛgɔnɔmɔ́ godɔ́ɔdɔ. Kanɛ́ cɛ nóánánáa odóɛ, goakɛ́ ŋgíyimene mɔ́ɔnyɔ mmbaá ágá odɛ́má yámɛ gɛ́hɛ́, kɔnɔ go íyimene bese goŋaá a lɛ́ na bogaaga bá go beŋe buimée bɔ́ɔbɔ a mmbaá ncoóo gó ɛ́da húme naá buisí bá mesúgidinye.

¹³ O mbɔ ɔ́bɔ́ naá nyuudé námɛ bɛmammana bá dogálɔ. Bɛ́ gɔ́lɔ́ɔmɔ́ go gieninye gáhɔ, go ɔyɔ na bɛ́ naá gioliminyo na naá gɛnɔ́ɔ́nɛ́nɔ́, mɔ́ɔmɔ dɛ bɛananamɔ́ naá gobálada gɛ́cɔ́ na Yésu Kilítu.

¹⁴ Go bogaaga bá Gimmúmpúu gá Giliíli mɔ́ɔnyɔ a lɔ́mɔ́ naá bɛɛcɔ́ɔ, beŋé bisi bá moóma bɛ́ɛbɛ bá mbaá go íŋéné.

¹⁵ Go íyimene nɔ́ɔ goŋaá biimée báaba naá gigísi gá cí gá Esíi bá lɛ́ pídíelú nnyimé, naá olɔŋɔ yábɔ́ Figele na Ɛlɛmosɛ́nɛ.

¹⁶ Naá boayá bá Onɛsɛfɔ́ɔlɛ, ŋgáa Daadáa a dúfie ncíbo yɛhɛ́ ya batɔ busi bɛ́hɛ́, goakɛ́ a mba lɛ́ bɛcamɛna biimée a mboboonyo odɛ́má, a lɛ́ kanɛ go nóa odóɛ namɛ gɔ́ɔgɔ mbaá lɔmɔ́ naá ncíbo ya gɛaŋɔ́.

¹⁷ Moánɛ, gɔgɔ́ aŋa a lɔ́mɔ́ boláalú naá Olóma, a lɛ́ bííŋénéelú go go púmbe a báá ncó kíde.

¹⁸ Ŋgáa Daadáa a ŋa goŋaá a dáŋaba busi bɛ́hɛ́ naá buisí bá mesúgidinye. Go íyimene o dómbana mɔtɔ uŋkimée buelí bɔ́ɔbɔ a á ná ŋanánáa go busío bámɛ naá Ɛ́fɛsɛ.