Titus 1 - Yakan

¹ Sulat inin amban aku, si Paul. Aku inin daraꞌakan Tuhanin duk kawakilan ku weꞌ Isa Almasi dinaꞌak magmahalayak lapalnen. Tapeneꞌ ku dinaꞌak pī si meꞌ aꞌa bakas pineneꞌ weꞌ Tuhanin nabangan siye supaya pasōng sandelde si iyehin, duk supaya isab pasōng kataꞌuhande toloꞌ mabennalin, iye toloꞌ āgamaten bi.

² Tapeneꞌ ku isab noloꞌan siye duk du ase-asede umul gaꞌ niyaꞌ tamanannen. Umul miyaꞌan bakas pananggup Tuhanin masa awwalley gaꞌ pe pinapanjari dunyahin duk gaꞌi magdustaꞌ Tuhanin.

³ Manjari pagtaꞌabut ne ellew pangeddewnen pinaguwaꞌ ne weꞌ ne lapalnen. Lapalne inin pinangandel si aku dinaꞌak minahalayak weꞌ Tuhan manimbul kitehin bi. Duk iye ne inin minahalayakkun.

⁴ Pasampayku sulat inin si kaꞌu, Titus. Kuweꞌ anakte kew lasiyaꞌ peggeꞌ saliꞌ du kite sandel pu si Isa Almasi. Karayaw kew luwal ipat Samate bi Tuhanin duk Isa Almasi manimbul kitehin bi. Karayaw isab pasanyangde dem ateynun.

Meꞌ hinang si Titus laꞌi si Kerete

⁵ Inambanan kew weꞌ ku luꞌu si pūꞌ Kerete supaya tahatulnu meꞌ manggaꞌ maꞌubusin, duk supaya kew isab makapeneꞌ meꞌ aꞌa hinang bahiꞌ si meꞌ aꞌa masandel pu si Isa Almasihin si kēmon kalahat-lahatan si pūꞌ Kerete. Esseb-essebun panoloꞌku si kaꞌuhin:

⁶ bahiꞌin subey gaꞌ niyaꞌ sallaꞌ-sallaꞌne duk subey dambuwaꞌ hadja andanen. Meꞌ anaknen subey sandel pu si Isa Almasi, duk subey gaꞌi tuwas kōkden duk subey siye gaꞌi nganduhulan napsuden.

⁷ Peggeꞌ bang aꞌahin nakuraꞌ si langgal duk pinangandel si iye hinang Tuhanin subey gaꞌ niyaꞌ sallaꞌ-sallaꞌne. Subey iye gaꞌi abbuhan duk gaꞌi mura panas kōknen. Subey iye gaꞌi maginuman duk gaꞌi bingis duk gaꞌi napsuhan si sīn.

⁸ Bang niyaꞌ aꞌane subey siye addatanne teꞌed duk subey kasinnahanne kēmon mahāpin. Subey iye taꞌu mages dinen duk subey iye bentel. Subey iye nuhut Tuhanin dambūs-būs ateynen duk subey gaꞌi ūtanne napsunen.

⁹ Subey teꞌed iye pateteg si lapal kapangandelanin, iye bakas panoloꞌ si iyehin. Manjari taꞌu du iye magtoloꞌ si meꞌ sinduwehin toloꞌ mabennalin duk taꞌu isab iye nambungan meꞌ aꞌa manguntarahan toloꞌ inin duk akahanne siye bang ine kasalaꞌanden.

¹⁰ Peggeꞌ ekka meꞌ aꞌa tuwas kōkden duk gaꞌi nuhut toloꞌ, lagiꞌ ne meꞌ saweꞌbi sinduwe masandel pu si Isahin bakas manuhut āgama Yahudihin. Meꞌ aꞌa miyaꞌan gaꞌ niyaꞌ kagunahan bissāden duk akkalande hadja aꞌahin.

¹¹ Subey siye pagesnu peggeꞌ ekka meꞌ magtewtey-anakin sasew sabab pagtoloꞌde manggaꞌi subey panoloꞌden. Duk magtoloꞌ hadja siye duk siye makasangka sīn.

¹² Dambuwaꞌ pagkaside, aꞌa langkew bangsa Kerete bakas magpaꞌin, “Meꞌ bangsa Kerete inin luwal siye magdustaꞌ, bingis siye kuweꞌ hayep talun, dahagaꞌ siye, duk bulasan pe siye.”

¹³ Toꞌo pinaꞌinne miyaꞌan. Hangkan hep sagdahun meꞌ aꞌa magtoloꞌ miyaꞌan supaya siye kahagad si toloꞌ mabennalin.

¹⁴ Pagesun siye duk ne gaꞌi asipde meꞌ kissa-kissa meꞌ Yahudi manggaꞌi matoꞌohin duk supaya gaꞌi ne tuhutde meꞌ pangandaꞌakan hinang-hinang manusiyaꞌin hadja. Meꞌ aꞌa mangahinang pangandaꞌakan miyaꞌan tinayikutan weꞌ de toloꞌ mabennalin.

¹⁵ Bang aꞌahin sutsi pagateynen bisan ine-ine sutsi du si iye. Saguwaꞌ si aꞌa manggaꞌi sutsi pagateynen bu gaꞌ pe iye sandel pu si Isa Almasi, gaꞌ niyaꞌ sutsi si iye peggeꞌ laꞌat du dem ateynen duk pikilannen duk gaꞌi pagpaꞌilne hāp duk laꞌatin.

¹⁶ Meꞌ aꞌa miyaꞌan, paꞌinde weꞌ kataꞌuhande Tuhanin saguwaꞌ hinangden gaꞌi magsaliꞌ duk bissāden. Makabunsi-bunsi siye duk gaꞌi siye nuhut toloꞌ, gaꞌi siye kapaghinangan hāp.