Pilemon 1 - Yakan

¹ Sulat inin amban aku, si Paul duk amban Timoteo, pungtinaꞌite bi masandel pu si Isa Almasihin. Kinalabusu ku tuꞌu peggeꞌ nuhut ku pu si Isa Almasi. Pasampay kami sulat inin si kaꞌu, Pilemon. Bagay kami kew duk saweꞌ kami maghinang si Tuhan.

² Pasampay kami isab sulat inin pu Appiya, pungtinaꞌite bi dende peggeꞌ sandel iye duk pu Arkippus, saweꞌte bi kuweꞌ dalil sundalu maghinang pu si Almasi duk si meꞌ masandel pu si Isa Almasi magtipun maluꞌu si lumaꞌnun.

³ Karayaw kaꞌam luwal ipat Samate bi Tuhanin duk Panuhutanten bi, Isa Almasi, duk karayaw isab pasanyangde ateybin.

Magsukul si Paul duk māku-māku si Tuhan

⁴ Bang ku ngampun-ngampun si Tuhan subahatte kew isab duk luwal ku magsukul si Tuhan

⁵ peggeꞌ takaleku weꞌ kalasahannu kēmon meꞌ aꞌa masandel pu si Isahin duk sandel du kew teꞌed pu si Isa, Panuhutanten bi.

⁶ Māku-māku ku si Tuhan karayaw kite bi meꞌ masandel pu si Isahin magdambuwaꞌ du dem atey supaya ngalalem kataꞌuten bi duk tasabutte bi du kēmon mahāp tepe si kitehin bi sabab magdambuwaꞌ kite bi duk Almasi.

⁷ Kēgan ku teꞌed, Bagay, duk asig dem ateykun sabab lasanu si meꞌ pagkasinun. Kēgan ku isab peggeꞌ pinasinna isab weꞌ nu meꞌ aꞌa masandel pu si Isa Almasihin.

Māku-māku si Paul para pu si Onesimus

⁸ Manjari, bisan du niyaꞌ kapatutku amban Isa Almasi duk bahani du ku ngandaꞌak kaꞌu ine-ine subey hinangnu, gaꞌi ku ngandaꞌak.

⁹ Saguwaꞌ pasambat ku hadja si kaꞌu peggeꞌ malasa ku si kaꞌu duk peggeꞌ aku, si Paul, aꞌa bahiꞌ ne ku duk kuweꞌitu tiyaꞌ pe ku diyalem kalabusu peggeꞌ nuhut ku pu si Isa Almasi.

¹⁰ Māku ku si kaꞌu sabab Onesimus. Kuweꞌ ne iye anakku, duk aku manjari samane ne peggeꞌ binoꞌo iye weꞌ ku sandel pu si Isa sābuku tuꞌu dem kalabusu.

¹¹ Matuꞌuhin Onesimus inin gaꞌ niyaꞌ gunane si kaꞌu saguwaꞌ kuweꞌitu niyaꞌ teꞌed gunane si kaꞌu duk si aku isab.

¹² Papiyuku balik si kaꞌu Onesimus kinalasahanku teꞌedin.

¹³ Sinna ku bang tuꞌu pe iye naweꞌan aku supaya ku tatabanganne gantiꞌnu tiggelanku tuꞌu dem kalabusu sabab pagmahalayakku aka-aka mahāpin.

¹⁴ Saguwaꞌ gaꞌi ku mabayaꞌ nganggagahan kaꞌu nabangan aku. Kabayaꞌankun tabangannu ku amban bayaꞌnu. Hangkan gaꞌ niyaꞌ hinangku bang gaꞌi kew pasulut.

¹⁵ Hatu hangkan pinasapeꞌ Onesimus amban kaꞌu daddaliꞌ supaya tiggelanne ellum luꞌu ne iye si kaꞌu.

¹⁶ Matuꞌuhin banyagaꞌnu hadja iye saguwaꞌ kuweꞌitu langkew pe iye amban banyagaꞌ peggeꞌ pungtinaꞌite bi ne iye kinalasahan peggeꞌ saliꞌ kite bi sandel pu si Isa Almasi. Aku malasa ku teꞌed si iye saguwaꞌ pasōng lasanu si iyehin peggeꞌ banyagaꞌnu iye duk pungtinaꞌinu isab sabab sandel ne iye pu si Isa, Panuhutanin.

¹⁷ Manjari, bang magbagay pe kite manamal, Pilemon, tayimaꞌun iye kuweꞌ panayimaꞌnu akuhin.

¹⁸ Bang niyaꞌ dusene si kaꞌu atawa niyaꞌ utangne si kaꞌu, listahun si ēnku.

¹⁹ Aku ne manulat inin: Aku, si Paul, magbayedin. Gaꞌi ne subahatku weꞌ hadje utangnu si akuhin peggeꞌ sabab aku du hangkan niyaꞌ umulnu salama-lama.

²⁰ Aweꞌ, Bagay, kabayaꞌankun weꞌ tabangannu ku peggeꞌ sandel kite saliꞌ-saliꞌ pu si Isa Almasi, Panuhutanten. Pasinnahun ateykun peggeꞌ magpungtinaꞌi kite sabab Isa Almasi.

²¹ Sinulat inin weꞌ ku peggeꞌ kabugtuꞌanku weꞌ asipnu du ku. Kataꞌuhanku weꞌ tabangnun labi pe amban pinākukun.

²² Niyaꞌ pe pākuku si kaꞌu. Memesanun ku andang bilik peggeꞌ ngase-ngase ku weꞌ sambungan Tuhanin du pināku-pākubin duk lumuwas du ku.

Meꞌ bissā si panambusan

²³ Epapras, saweꞌku tuꞌu dem kalabusu isab peggeꞌ tuhutne Isa Almasi maboꞌo bissā weꞌ essebne kaꞌam.

²⁴ Duk maboꞌo bissā du isab sa miyaꞌan disi Markus, duk Aristarkus, si Demas duk si Lukas, meꞌ saweꞌku matuꞌu maghinang si Tuhanin.

²⁵ Karayaw weꞌ luwal kaꞌam ipat Isa Almasi, Panuhutanten bi. Wassalam