याहुदा 1 - याक्खा1 का याकुबका उनुन्छा, येसु खिरिस्टका सेवाक याहुदाङा, ना छेप्फा निङ्वाफुमा पाङा काचिहा, उङा उलुङ्मा तुक्तुचिहा नुङ् येसु खिरिस्टङा जोगाचोगुचिहा याॽमिचिगा लागि छेप्मासिमेङ्ना॥ 2 निङ्वाफुमाङा न्निङ्दा प्याक उलुङ्मा तुक्तिगानि, प्याक हाङ्हाङ् पिइगानि न्हाङ् प्याक किर्पा सोॽमेतिइगानि॥ मेन्हा चेॽया चिन्खुबाचि 3 आलुङ्मा तुक्नेनिन्हा काम्निभाकचि, कानिङ् घाकङा तोक्तुम्ना मुक्तिगा उतुम्बे तुक्नुङ् छेप्मा मिन्नुङ्नेनिन॥ ङ्खाॽनिङ्गो ङ्खा हाक्निङ्चा निङ्वाफुमाङा उका याॽमिचि साधाइगा लागि पियाहा बिस्वासका उतुम्बे, न्ना बिस्वास जोगाचोगामासानुमभोङ् छेप्मा उचुन एताङ्॥ 4 इजाङ्बाङ्निङ् प्याक ओन्दाङ्माङ् दान्डा तोक्मा लाइक्हा कोइ-कोइ याॽमिचि स्वाक न्निङ्लुम्बे ङ्ङुयाब्यामा॥ ङ्खाचिङा निङ्वाफुमा आदार न्जोग्वानिन॥ हाकु निङ्वाफुमाङा कानिङ् आनुगाराहा चोगाहाङा घाक इसिॽहा काम चोक्मा लेङ्मेहाभोङ् उङ्चि ङ्गामे॥ न्हाङा एङ्गा एको सेॽना मालिक नुङ् हाङ्बा येसु खिरिस्ट इन्कार न्जोग्वा॥ 5 न्निङ्दा खा घाक चेॽया था वायाहोङ्चा का फेरि इमा लुॽमासिमेॽनेनिन॥ हाङ्बाङा उका याॽमिचि मिस्राभाङ् लोन्दुराचि, ङ्खाॽनिङ्गो मिस्राभाङ् लोन्दुराचिहा उका याॽमिचि माध्येबे बिस्वास मेन्जोक्खुबाचि हेक्साङ् नास चोगुचि॥ 6 न्हाङा उङ्चिङा न्दोक्तुहा चोक्तोकपे मेवाले उङ्चि वामाना ठोङ् नाॽनाखुबा वालोक्दुतचि उङा निरिक्का लेन सोम्मागा लागि हेॽनिङ्चा लोम्मा ङ्यानिन्नुङ्गा थुन्दुचिहोङ् कुइम्नाबे छेक्तुक्सुचिहा॥ 7 ङ्खाॽलामाङ् सादोम, गामोरा नुङ् ङ्खाचिगा यो-खेहा साहारचिबेॽहा याॽमिचिङा छिप्पाकेकेक्हा ब्याभिचारगा काम न्जोगु॥ ङ्खाचि हेॽनिङ्चा मेन्सिमाना मिबे दान्डा ङ्ङाङ्दुहोङ् याॽमिचिगा लागि साङ्खालाम न्लेक्सामाहा॥ 8 ङ्खाॽलामाङ् कानिङ् सेम्माङ्बे “खाॽला चोक्माहा चोक्तोक तोक्तुम्ङाहा” काखुबाचि नुङ् निङ्वाफुमा आदार मेन्जोक्खुबा याॽमिचिङा इसिॽहा काम न्जोग्वाहोङ् उङ्चि सालुङ् आसुद्दा न्जोग्वाचि, उङ्चिङा हाङ्बागा चोक्तोक इन्कार न्जोग्वा न्हाङ् वालोक्दुतचिगा बिरुद्दाबे न्जेङ्मे॥ 9 ङ्खाॽनिङ्गो घाक हाक्निङ् माडा वालोक्दुत मिखाएलङा चा मोसागा लासका उतुम्बे दियाबालासनुङ् लुखुसा चायाचिनिङ् उङ् आप्दिक एम्मा ङ्यासुन्होङ् खाॽला से लु, “हाङ्बाङा न्दा दान्डा पिक्कानि॥” 10 ङ्खाॽनिङ्गो खा याॽमिचिङा गो उङ्चिङा आमायि ङ्ङासुनिन्हा चेॽयागा निन्दा न्जोग्वाहोङ् आप्दिक ङ्ङेन्द्वाचि, न्हाङ् ङ्खाचिगा आमाना साक्ति च्हेन बुद्दि मेॽनिङ्हा पोसुचिगा लोॽवाना, न्हाङ् ङ्खाॽलाना बुद्दिङा न्जोगुहा कामङामाङ् ङ्खाचि नास न्लेङ्मेहा॥ 11 धिक्कार ङ्खा याॽमिचि! इजाङ्बाङ्निङ् ङ्खाचि उनुन्छा सिखुबा कायिन लोॽवा न्जोङ्मे॥ याङ्गा लागि बालामङा चोगुहा लोॽवा इसिॽहा कामगा लाम्बु न्लाम्मे, न्हाङ् कोराहाङा लोॽवा बिरोध न्जोग्वाचि॥ ङ्खाचि चा कोराहा लोॽवा नास न्लेङ्मेहा॥ 12 ङ्खाचि गो न्निङ्गा होक्ताबे चासेताखुबा किॽमालुलुहा नुङ् इसिॽहा याॽमि ओम्चि॥ ङ्खाचि न्निङ्दानुङ् चासे ङ्युङ्मेॽनिङ् ङ्खाचिङा हेकोहा याॽमिचि वास्तायि मेन्जोक्ले उङ्चिङा से न्ज्वा, ङ्ङुङ्वा॥ ङ्खाचि हिॽवाङा मुतेहेतुहा माङ्च्वा मेॽनिङ्हा खिम्फुरुम्मा लोॽवाहाचि, चुङ्नामबेॽहा एको चा उसा मेॽनिङ्हा सिङ् लोॽवाहाचि, ङ्खाचि उसामनुङ् एनाहाक्साहा हेराब्याहा सिङ्गा उथाप लोॽवाहाचि॥ 13 ङ्खाचि सामुन्दाराबेॽहा किसिॽमालुलुहा छाल लोॽवाहाचि, न्हाङ् ङ्खाचिगा काम सामुन्दारागा फिज लोॽवा छिप्पाकेकेक्हा॥ ङ्खाचि उङ्चि लाम्बु न्नाओहोङ् इङ्घोखुबा चोक्चोकि लोॽहाचि, ङ्खाचिगा लागि पातालगा कुइम्ना साधाइगा लागि युक्सामाना॥ 14 आदामगा लाम्ना पुस्ता हानोकङा चा खा याॽमिचिगा उतुम्बे खाॽला आगाम्बानि चेक्तुक्सा, “सोयानुम, हाङ्बा उका निॽमायि मेयामाहा पाबित्तारा वालोक्दुतचिनुङ् तायेॽना॥ 15 उङा खाॽलाहा घाक याॽमिचिगा निरिक चोग्वा, न्हाङ् ङ्खाचिङा न्जोगुहा इसिॽहा कामगा लागि नुङ् उका बिरुद्दाबे न्जेक्तुहा चेॽयागा दान्डा ङ्खाचि पिवाचिहा॥” 16 खा याॽमिचि काचेङ्काचेङ् काखुबाचि, आसोन्तोकि, उङ्चिगा निङ्वाबेॽहा इसिॽहा चेॽया लोॽवा चोक्खुबाचि, आफाइ काङान मिखुबाचि न्हाङ् उङ्चिगा कामगा लागि कोलेन्हा नेक्खुबा न्सामेहा॥ चेतावानि 17 ङ्खाॽनिङ्गो आलुङ्मा तुक्नेनिन्हा काम्निभाकचि, न्निङ्दा च्हेन एङ्गा हाङ्बा येसु खिरिस्टका सेगुम्पाकचिङा ओन्दाङ् लुइघा चेॽया म्मुन्दिॽयानुम्निन॥ 18 ङ्खाचिङा खाॽला लुइमिसिगा, “आखेरि सामायाबे खिजेचाखुबा याॽमि न्लोम्मे, न्हाङ् ङ्खाचिङा निङ्वाफुमा म्मुन्दिॽवाहोङ् उङ्चिङा चोक्मा म्मितुहा इसिॽहा चेॽया न्जोग्वा॥” 19 न्निङ्दा फोङ्मेखुबा याॽमिचि ङ्खाचिमाङ् ओम्चि॥ ङ्खाचि बिस्वास मेन्जोक्खुबाचि लोॽवा न्जोङ्मे, न्हाङ् ङ्खाचिबे पाबित्तारा आत्मा ङ्वामेन्ना॥ 20 ङ्खाॽनिङ्गो आलुङ्मा तुक्नेनिन्हा काम्निभाकचि, न्निङ्दा च्हेन न्निङ्गा पाबित्तारा बिस्वासपे चात्तु लेङ्साङ् ख्यानि॥ न्हाङ् पाबित्तारा आत्माबे पार्थाना चोगानि॥ 21 हाङ्बा येसुङा पिइवाघा हेॽनिङ्चा मेन्सिमाना हिङ्लुङ् कुस्वाम्गानिङ् निङ्वाफुमाङा न्निङ्दा लुङ्मा तुक्तिॽवाघाङा न्निङ्दा उका उनिङ्वा लोॽवा लेक्सिघोङ् हिङानि॥ 22 बिस्वासपे साङ्का चोक्खुबाचि दाया चोगानुम्चिम॥ 23 हेकोहा याॽमिचि नाराक्का मिभाङ् उन्दाभोक्सानुम्चिम्घोङ् हिङ्मेतानुम्चिम॥ याॽमिचि दाया चोगानुम्चिम, ङ्खाॽनिङ्गो उङ्चिगा पापङा न्निङ्दा ङ्याक्सिगान्निभोङ् होस चोगानि॥ 24 हाकु, इसाङा न्निङ्दा पापपे आमाभाङ् जोगाचोगिॽवागा, न्हाङ् खोट् मेॽनिङ्हा सुद्दा नुङ् आनान्दित चोगिॽवाघोङ् उका माहिमागा उयुम्बे तामेतिइवागा, 25 न्ना एको सेॽना निङ्वाफुमा, कानिङ् पाप पाहाङ् फोङ्खुबा येसु खिरिस्ट एङ्गा हाङ्बा ओम॥ उङ्बेॽमाङ् माहिमा, आदार, साम्मान, साक्ति नुङ् चोक्तोक उथुक नाहाङ्तो हेन्सेन न्हाङ् साधाइ-साधाइ वान्नुङ्नि॥ आमेन॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.