१ तिमोथि 1 - याक्खा1 कानिङ् मुक्ति पिखुबा एङ्गा निङ्वाफुमा नुङ् एङ्गा आसा खिरिस्ट येसुङा कायाना लोॽवामाङ् का खिरिस्ट येसुगा सेगुम्पाक पावालङा 2 ना छेप्फा बिस्वासपे आका जेप्पागा आत्मिक आच्या तिमोथि छेप्मासिम्मेङ्॥ निङ्वाफुमा पा नुङ् एङ्गा हाङ्बा खिरिस्ट येसुङा न्दा आनुगाराहा, दाया नुङ् हाङ्हाङ् पिक्कानि॥ मेन्हा चेॽया चिन्खुबाचिभाङ् थाङ्थाङ् वायानि 3 का माकेडोनिया बाङ्ना ठोङ्बे खेक्सासाङ्निङ् लुॽनेन्ना लोॽवा न्दा एफिसासपेॽमाङ् वाया॥ न्हाङा न्नाबे मेन्हा चेॽया चिन्खुबाचि ङ्वान्ने ङ्खाचि ङ्खाॽलाहा चेॽया चिन्मा म्बिन्चिन॥ 4 ङ्खाचि उइलेहा केङ्ताप्लिक नुङ् एकेङ्गे-एकेङ्गेहा छोङ्ताप्लिकका चेॽयाबे निङ्वा पिॽमा म्बिन्चिन॥ खाॽलाहा चेॽयाङा गो बिस्वास चोक्माहोङ् आमायामाहा निङ्वाफुमागा योजानाबे साङ्का नुङ् खिमा-तुमाहा चेॽया से तावाहा॥ 5 कानिङ् चिन्दुम्चिम्हा मुक्खे चेॽया च्हेन लुङ्मातुक्मा ओम, ना च्हेन उचुन्ना निङ्वा, उचुन्ना बिबेक नुङ् जेप्पागा बिस्वासभाङ् तामेॽना॥ 6 ङ्खाॽनिङ्गो इखिङ् याॽमिचिङा खा चेॽया म्मुन्दिक्सुहोङ् तुम्बिला मेॽनिङ्हा चेॽयाबे आल्माले न्जोगानेसा॥ 7 ङ्खाचि ब्यावास्था चिन्खुबा लेङ्मा ङ्योङ्मे, ङ्खाॽनिङ्गो ङ्खाचिङा न्जेक्तुहा, जेप्पा ओम ङ्गायाहा चेॽया उङ्चिङामाङ् ङ्ङास्वानिन॥ 8 कानिङ् था वान्ने, ब्यावास्थाबेॽहा घाक चेॽया येन्खुबागा लागि ब्यावास्था उचुन्ना ओम॥ 9 न्हाङा कानिङ् खा चा था वान्ने, ब्यावास्था उचुन्हा काम चोक्खुबा, उचुन्हा याॽमिचिगा लागि मेन्ना, ङ्खाॽनिङ्गो ब्यावास्थाबेॽहा चेॽया मेङ्खेम्खुबाचि नुङ् चेॽया मेयेन्खुबाचि, निङ्वाफुमा पोटि निङ्वा मेम्बिखुबाचि नुङ् पापिचि, आपाबित्तारा नुङ् इसिॽहा निङ्वा वाखुबाचि, उङ्चि पा-मा सिखुबाचि, याॽमि सिखुबाचि, 10 ब्याभिचार चोक्खुबाचि, बाबुङा बाबुनुङ् ब्याभिचार चोक्खुबाचि, याॽमि इन्चाखुबाचि, लेम्चाखुबाचि, मेन्हा गाबाहि पिखुबाचि नुङ् जेप्पाहा चेॽयागा बिरुद्दाबे काम चोक्खुबाचिगा लागि ओम॥ 11 कानिङ् चिन्नेनिन्हा खा चेॽया च्हेन कानिङ् आसिक पिखुबा निङ्वाफुमागा माहिमित नुसालानुङ् तोङ्मेहा॥ न्हाङा खा नुसाला खेम्मेॽमागा लागिमाङ् उङा का सेगामाङ्ना ओम॥ निङ्वाफुमाङा उलुङ्मा तुक्ताहागा लागि नुनिङ्वा 12 खा काम चोक्मागा लागि का साक्ति पिखुबा खिरिस्ट येसु एङ्गा हाङ्बा का नुनिङ्वा पिवाङ्॥ उङा का बिस्वास चोगाङ्होङ्माङ् खा काम चोक्मेतामाङ्॥ 13 ओन्दाङ् इमा गो का उका निन्दा चोक्खुबा, बिस्वासिचि तुखि पिखुबा न्हाङ् काङान काखुबा सायाङ्॥ ङ्खिङ्बेला काबे बिस्वास म्मायान न्हाङ् ङ्खा घाक आन्जानबे चोगुक्साङ्, ङ्खोङ्माङ् का दाया तोक्तुङ्॥ 14 न्हाङा एङ्गा हाङ्बागा प्याक आनुगाराहा आका हिङ्लुङ्बे पियाङ्॥ खिरिस्ट येसुबे तोक्तुङ्ना बिस्वास नुङ् लुङ्मा तुक्माना निङ्वा उङामाङ् का पियाङ्ना ओम॥ 15 “खिरिस्ट येसु पापि याॽमिचि हिङ्मेॽमागा लागि ना कायुङ्लेनबे ताया” खा चेॽया बिस्वास योग्या नुङ् घाकङा था तोक्मा पोर्ने जेप्पाहा चेॽया ओम॥ न्हाङा ङ्खा पापिचिबे का घाक हाक्निङ् पापिङान॥ 16 ङ्खाॽनिङ्गो खिरिस्ट येसुङा उङ्बे बिस्वास न्जोग्वाहोङ् मेन्सिमाना हिङ्लुङ् तोक्खुबाचिगा लागि उङ् इखिङ् धाइर्या चोङ्मेॽना बाङ्ना सोॽमेमागा का लोॽवाना घाक हाक्निङ् पापि याॽमि उङा दाया चोगाङ्॥ 17 हाकु साधाइ राज्या चोक्खुबा, हेॽनिङ्चा मेन्सिखुबा नुङ् निमा मेयामाना एको सेॽना निङ्वाफुमागा साधाइ आदार नुङ् माहिमा लेङ्नुङ्नि, आमेन॥ 18 आच्या तिमोथि, प्याक ओन्दाङ् ङ्गा उतुम्बे आगाम्बानि न्जोक्ताब्याघा लोॽवामाङ् खा काम न्दा जिम्मा पिॽमासिमेॽनेन॥ ङ्खा आगाम्बानिगा चेॽया न्दा आप्चेङ् लोॽवा चालाचोगु, न्हाङ् हाङ्बागा लागि उचुन लाडाइ चोक्मा यागानि॥ 19 ङ्खिङ्बेला न्दा ङ्गा बिस्वास नुङ् बिबेक म्मासिन॥ इखिङ् याॽमिचिङा उङ्चिगा बिबेकपे निङ्वा म्बिनिन्होङ् उङ्चिगा बिस्वासमाङ् म्मासिक्सु॥ 20 ङ्खाचिबे हुमेनियास नुङ् आलेक्जेन्डार ओम्चि॥ उङ्चिङा निङ्वाफुमा इसिॽमा लेप्निचुनिभोङ् का ङ्खाचि साइतानगा उमुकपे सुम्पे चोगुक्सुङ्चिङ्हा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.