१ युहान्ना 1 - याक्खाहिङ्लुङ् पिखुबा चेॽया 1 कायुङ्लेन लेङ्मा हाक्निङ् ओन्दाङ् नाहाङ्तो वायाना, आनिङ्गा नाभाकङा खेप्सुम्ङाना, आनिङ्गा मिकङा निसुम्ङाना न्हाङा उचुन सोम्ङाना नुङ् आनिङ्गा मुकङा तोक्तिम्ङाना हिङ्लुङ् पिखुबा चेॽयागा उतुम्बे कानिङ् छेप्मासिइवाङ्॥ 2 जोबो न्ना चेॽया सालुङ्बे पार्काट लेक्सा, कानिङ् निसुम्ङा न्हाङ् कानिङ् गाबाहि पिवाम्चिम्ङा, न्हाङा न्निङ्दा चा खेम्मेॽमेनेनिन॥ न्ना मेन्सिमाना हिङ्लुङ् निङ्वाफुमा पानुङ् वाया, न्हाङ् कानिङ्बे पार्काट लेक्सा॥ 3 कानिङ्नुङ् न्निङ्गा साङ्गाति लेङ्निभोङ् कानिङ् इहा निसुम्ङा, खेप्सुम्ङा ङ्खा न्निङ्दा लुमेॽनेनिन॥ आनिङ्गा साङ्गाति निङ्वाफुमा पा नुङ् उका उच्या येसु खिरिस्टनुङ् वान्ने॥ 4 आनिङ्गा आनान्दा पुरा लेङ्निभोङ्माङ् खा चेॽया न्निङ्दा छेप्मासिमेॽनेनिन्हा॥ निङ्वाफुमा ओम्ना 5 कानिङ् निङ्वाफुमागा उच्याभाङ् खेप्सुम्ङाहा न्हाङ् कानिङ् न्निङ्दा खेम्मेॽनेनिन्हा सालेन खा ओम, निङ्वाफुमा ओम्ना ओम, न्हाङा उङ्बे मिॽयाङ् चा कुइम्ना बाङ्ना मान्ना॥ 6 कानिङ् एङ्गा साङ्गाति निङ्वाफुमानुङ् वेॽना काइवा, ङ्खाॽनिङ्गो कुइम्नाबे लामिॽवाहाभोङ् गो कानिङ् लेम्चाखुबा नुङ् जेप्पाहा चेॽयाबे लाम्खुबा मेतिसिन्हा॥ 7 ङ्खाॽनिङ्गो निङ्वाफुमा ओम्नाबे वेॽना लोॽवा कानिङ् चा ओम्नाबे लामिॽवाहाभोङ्, कानिङ् कानिङ्बे साङ्गाति लेङ्मे, न्हाङ् उका उच्या येसुगा हेलिङा कानिङ् घाक पाप पाहाङ् सुद्दा चोङ्मेहा॥ 8 कानिङ् आफाइ “कानिङ्बे पाप मान्हा” काइवाहाभोङ्, कानिङ् आफाइङा आफाइ धोका पिवाम, न्हाङ् कानिङ्बे सात्याता मान्ना॥ 9 कानिङ् एङ्गा पाप सुइकार चोगुमभोङ् उङा एङ्गा पाप छेमा पिमे, न्हाङ् घाक इसिॽहा चेॽयाभाङ् सुद्दा चोङ्मेहा, इजाङ्बाङ्निङ् उङ् बिस्वास योग्या नुङ् धार्मोतिना॥ 10 कानिङ् पाप न्जोगुक्सुम्ङान्हा काइवाहाभोङ् निङ्वाफुमा कानिङ् लेम्चाखुबा चोग्वाम, न्हाङ् निङ्वाफुमागा चेॽया कानिङ्नुङ् ङ्वामेन्हा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.