Ezequiel 1 - Ja yab'al ja Dyosi

^1-3 Ja jb'i'ili, Ezequiel ja yuninon ja Buzi, ja ka'teli pagre'il. I'jiyon b'a Babilonia ti lutjiyon tiwi, lajan i'jiyon sok ja mandaranum Joaquini sok i'ji jitsan israelenio jumasa. Ek' jo'e jab'il ti sk'umanon ja Dyosi, kab' lek wax ya'ki ja yipi cho sje'a ki ja jastik ojto ek'uki. Ja ke'n ti mojan ayon sok ja niwan ja' Quebari. B'a jo'e yajtab' ja yixawil Tamuz b'a jab'il jun tajb'e lajune. Ja k'ak'u jawi, b'ob' kil sjama sb'aj ja satk'inali

⁴ sok wa'n mojxel jan jun tsatsal wokol. Jak jun tsatsal ik' b'a k'e'el k'inal jak sok jun nole niwan ason b'a wax lijpi. Ja ason jawi, wax ya lijpuk b'a spetsanil ek'e, b'a yoj snalan ja ason jawi, wax el jun k'ak' jel tsats wax lijpi jastal jun tak'in b'ats'ub'al yi yal sts'ub'il tak'in.

⁵ Tsa'an el jan chane oj slaj jastal chante ma winik mini b'a wax ilxi'a.

^6-14 Ja yechmale'i toj xijan; ja yoke'i, jach' jastal yok wakax ay set ja yechi, wax lijpi jastal bronce b'ats'ub'al yal ts'ub'il tak'in. B'a jujune ay chane swech'e, jaxa b'a schanil sts'e'el b'a yib' swech'e'i, ay sk'ab'e jastal sk'ab' winik. Ja b'a chab' swech'e'i, lich'an yujile wax ya'we sta' sb'aj, jaxa pilan chab'e'i, ja wa spotsowe sok ja sb'ak'tele'i. Ja chanwane it oj slaje jastal chante' ma winiki, cho ay chane sate. Ja spatane'i, oj slaj jastal winik; b'a stojol sk'ab'i, lajan sok sat choj; b'a spakaxil sk'ab'i lajan sok sat wakax, jaxa b'a spatik ja it jumasa lajan sok sat aguila. Yujni ja yespiritu ja Dyosi, wax a'ji b'ejyuke juts'in, ja'yuj jel juts'in wax wajye ek' b'a tuktukil lajan sok wax ijlab'ani jastal tsantselawi. Ti'ni b'a sti' sata Mini sutu sb'aj b'a oj sk'el spatika. Ja it jumasa oj slaj'e jastal chante ma winik, wax lijpiye jastal chakal k'ak' b'a wa'n ajlel; wax ilxi ja b'a snalan ja ye'nle'i wa'n ajlel wa snika sb'aj b'a spetsanil, ma lajan sok jastal jun k'ak' b'a jex lijpi b'a wax el nich k'ak'.

¹⁵ Yajni ti wa'non sk'eljeli, kila ja b'a lu'um ay jun setan b'a jujune ja ye'nle'i.

¹⁶ Ja chane setan jawi junxta yab'al, sok wax lijpi jastal ja tsamal ton jumasa. Spetsanil ja ye'nle'i lajan sok cho ay pilan b'a yojole'i, b'a jach' wa stojb'es b'aj jastal jun k'anal.

¹⁷ Ja jawi, wax b'ob' ya' majke chikan b'a, sok mi oj kumxuk spatik.

¹⁸ Wax b'ob' ilxuk ja b'a setanal ja chane setan jawi ay b'a sjoyanal ay sat. Ja jawi, jel ya xiwkon.

^19-21 B'aya yuja tey soke ja yespiritu ja Dyos schanwanile ja it lajan sok jastal chante sok winiki, cho jach'ni ja b'a setan jumasa, ja'yuj jel juts'in wax a'ji wajuke ja b'a wa sk'anawe'i: ja b'as sti' sate, b'a k'e'el k'inal, ma b'a spatike.

²² Ja b'a s'olome ja it jumasa it oj slaj jastal chante sok winiki, ay jas ay b'a jex lijpi, lajan sok jastal smakb'al kristal.

^23-25 B'a yib'el ja smakb'al jawi, ja it jumasa lajan sok splanta chante sok winiki, wa snika sb'aje sok wa slich'awe el spetsanil chab'e ja swech'e'i, b'a wax ya'we sta' sb'aj, b'a jel tsats wax ab'xi ja spumuljeli, lajan sok ja jastal jel tajkel ja ja' b'a niwan paman ja'i. Yajni wax k'otye tek'ani, wax ya'we ko'uk ja swech'e'i. Jaxa pilan chab' swech'e'i, ja makan sok ja sb'ak'tele'i. Ja'yuj ja b'a sti' ja smakb'al jawi wax ab'xi ja tsatsal ik', lajan sok yuj ti jijlel tiw jitsan soldado. —Lajan sok ja sk'umal ja Dyos it jel ja yipi—

²⁶ Ja b'a wax ajyi kajan it toj kristali ajyi jun ton jel tsamal, ja splanta jach' jastal b'a wax ajyi ja mandaranumi. Ja b'a chonab' jawi, wax b'ob' ilxuk jastal jun winik.

^27-28 B'a k'e'el k'inal yuj ja snalani, jach' wax lijpi jastal ja tak'in it wax ja'axi'i; b'a mas ko'el yuj ja snalani, jach' wax lijpi jastal ja k'ak'i. —Lajan sok jastal wax ilxi ja k'intum ja yajni wax ek' ja ja'i— Ja'yuj ti jna'a ja wa'non yiljel spetsanil ja stsamalil ja Dyosi, ti ko'yon mek'ana asta man sta'a ja lu'um ja jpatani, b'a jach' wa'non stoyjel. Ja'yuj ti kab' jun k'umal wa sk'umanona.