Eclesiastes 1 - Ja yab'al ja Dyosi

Mini jun jastik ay sb'eja

^1-2 Jach' yala jastal it ja ma' wax yala ja yab'al ja Dyos yunin ja David it och mandaranumil b'a chonab' Jerusaleni: —Ja k'ak'u jumasa iti, mini jun sb'ej ja jas wa'n ek'eli— —Spetsanil kechan ita jun gusto'il—

³ Ja smeranil ja k'ak'u iti mi jas wax kilatika, ja jel wala a'tijitiki.

⁴ Ay ma' wa'n manxel sok ay ma' wa'n chamel, jaxa lu'umi, mini wa stukb'es sb'aja.

⁵ Ja k'ak'u, wax eljana sakb'eli jaxa b'a och k'ak'u, wax mukxi, juts'in wax waj ja b'a slugari b'a oj cho eljan ja otro k'ak'u.

⁶ Jaxa ik'i spetsanil k'ak'u wa'an sok mix jijli. Ay ti wa'n ju'u'uk b'a k'e'el k'inal, cho ay ti wa'n ju'u'uk b'a ko'el k'inal.

⁷ Ja yok ja' jumasa ti wax ch'ak waj b'a niwan paman ja'i, tsa'an wax cho waj ek'uk b'a yuk'mali b'a oj cho ya' kan libre ja paman ja'i, jaxa paman ja'i, mini wax b'ut'a.

⁸ —Jel wokol wax kab' ja oj kal jastal jel axwela sb'aj spetsanil ja iti— —Mi ma'x axwi sk'eljel— —Mi ma'x k'umb'i sk'eljel—

⁹ Ja jas ek' b'ajtani, wax cho ek' pilan majke; ja jas k'u'laxi b'ajtani, wax cho k'u'laxi pilan majke. —Ja k'ak'u iti, mi jas yajk'achil ay—

¹⁰ Ja yajni ay ma' wax k'ot wax yala: —Ja ke'n ay jas yajk'achil ki'oj—, b'a'ya, ja jawi yujni ti'xa ja mitola manxitika.

¹¹ Ja ke'ntiki, mi sb'ejuk ojto jna'tik ja jas sk'u'lane ja tuk jumasa, cho mini ja ma'tik ti tsa'an jakumi mi oj b'ob' sna'e ja jas jk'u'lantik ja ke'ntiki. —Ja ma'tik ti jakum tsa'ani, oj b'ob' sk'u'luke jastik yajk'achil—

Mix makuni ja jas wax k'u'lantiki

¹² Ja ke'n, cholomanon ja yab'al ja Dyosi, cho ochyon mandaranumil yuj ja israelenio, ti jk'u'lan mandar b'a chonab' Jerusalen.

¹³ Spetsanil ja jas wax na'a, ka'a jb'aj sok b'a jach' oj na' sb'ej ja jas wa'n ek'el b'a lu'um iti. —Ja' a'tel it ja ya'ki'tik ja Dyos ta, ja jun a'tel b'a jel tsats—

¹⁴ Ti jak jk'ujol mini jun sb'ej ay ja jas wax k'u'laxi ja b'a lu'um ita; —spetsanil jach' jastal wax k'ana oj ch'ak jyamtik sok jk'ab'tik ja ik'i—

¹⁵ Jach' jastal wax yala jun lo'il: —Mi ma' oj b'ob' sxijpuk ja jas petan k'uman ayi, cho mi oj b'ob' alxuk ja jas mey ki'ojtiki—.

¹⁶ Ja'yuj ti och jneb'a: —Ja ili, jel niwan wax yilawone. Mini jun ay ja b'a chonab' Jerusalen ja jastal jex na'a ja ke'n; mini jun ma' jel wa sna'a.

¹⁷ Ja teyon soke ja ili, ka'oj jb'aj b'a oj na' machunk'a wa sna'a t'unuki; —cho wax na'a ja jel kistal ja jastik wa sk'u'lane'i— Cho jach'ni ja jawi, yujni wax cho k'anxi yuj oj muts'xuk ja ik'a.

¹⁸ Ja smeranili, ja yajni jel wax na'xi jel wax i'xi wokol; yajni ay ma' wa sneb'a leki, jel wa sta'a ab'al k'umal—.