Deuteronomio 1 - Ja yab'al ja Dyosi

Ja jas yala ja Moisesi

^1-5 Ja Moisesi, sk'uman sb'a sok ja israelenio jumasa ja yajni ti aye' sb'a Cades-barnea, ja kristyano jumasa Moabita, ja it ti ajyiye sb'a ch'ayan lu'um Araba, sb'a sti' sat ja lu'um Suf. Ti'xta mojan tiw tey ja chonab' jumasa it sb'a Parani, Tofel, Laban, Haserot sok Dizajab. Man b'a wits Horeb sb'a oj ajyuk k'otel ja b'a lu'um Cades-barnea, t'ilan oj ajyuk b'ejyel juluche (11) k'ak'u, ja' oj i'xuk ja sb'ejlal ja wits Seiri. Ja Moisesi, alb'i chab' tajb'e (40) jab'il wa'n yaljel yab' ja kristyano jumasa Man yajni elye ja sb'a Egipto. B'a yajtab' june ja yixawil Sebati, ja sb'a jab'il jaw ja a'ji yi'e ja yab'al ja Dyos ja israelenio jumasa yuj ja Moisesi. Ja yajni ti aye' sb'a b'eji, ye'n elye slekil ja Moises b'a tiro'aneli. Ja sb'a chonab' Hesboni, mi b'ob' yuj ja Sihon ja ma ay xchol yuj ja amorreo jumasa, jach'ni b'a chonab' Astarot it tey sb'a sts'e'el Edre'i, mi cha b'ob' yuj ja Og ja ma ay xchol yuj sb'a Basani. Jaxa Moisesi, ti yal yab' ja israelenio jumasa ja yajni ti aye' b'a stojol wa xjak ja k'ak'u b'a niwan ja' Jordani:

⁶ —Ja yajni teytik b'a wits Horebi, jach' yala jastal it ja Dyos kujtiki: Ja we'nlexi jelxa alb'iyexta ja b'a k'ul iti,

⁷ ja'yuj tuluwik ja wa najexi, ti la wajyex b'a yaxk'ul b'ay ja amorreo jumasa, sok b'a lu'um jumasa iti: B'a yaxk'ul Araba, b'a loman yaman jumasa, b'a takin lu'um k'inal b'a ko'el k'inal b'a sti' niwan paman ja' b'a slu'um ja cananeo jumasa sok b'a Libano, man b'a niwan ja' Eufrates.

⁸ Ka'axik i'ajikan ja lu'um jawi, ke'n kaloj yabye oj ka'yi'e ja ma ek' paxta a wujilexi, ja' ye'nle ja Abrahami, ja Isaak sok ja Jacobi. Cho kaloj yabye ojni ya'wi'ex ja we'nlexa, yuj ja yintilex ni'a.

Ja ma'tik niwak ya'tel yuj ja israelenio

^9-12 Ja Moisesi ti cho yala'a: —Ja k'ak'u jumasa jawi, ja Dyosi, jel jitsan ya pojxuk ja wa wintilexi. Ja'yuj ke'n jk'ana yi a yil'ex lek sok a ya pojxanik lek yuj ja janek' ayex ajyi. Ti cho jak jk'ujol mi oj b'ob' jk'el kechan ke'n ja wa wokolexi.

¹³ Ja'yuj kala a wabyex b'a jujune k'ole tsa'awik winike b'a ma wa sna'awe t'unuki sok ma' chi'n k'inal ay b'a oj och niwan ya'tele yuj ja kristyano jumasa, cho jach'ni oj b'ob' skoltayone ja ke'ni.

¹⁴ —Ja we'nlexi jel lek a wabyex ja jastal iti.

¹⁵ Ja'yuj jtsa'a ja winike jumasa ma wax kila wa sna'awe t'usani, sok ja ma yilunejxa t'usan yamani, ye'n ka'yi'e niwan ja ya'tele' a wujilex, ay ma ka' b'a sk'ab' jun mil (1,000) kristyano jumasa; ay ma ka'yi jo' tajb'e (100); ay ma ka'yi chab' tajb'e lajune (50); ay ma ka'yi lajune (10). Sok ay ma ka'yi spetsanil b'a jun k'ole.

^16-18 —Ja k'ak'u jawi, kala wabyex ja we'nlex jasunk'a oj ja k'u'lukexi. Jaxa jwes jumasa kala yabye a wajuke lajan b'a spetsanile jun xta lajan, a'nima mi jas yi'oj ma ay yi'oj, israelenio, ma mi israelenio'uk, mi ma oj xiwuk sok mi ma oj xiwke yuj, sok ja jas wa sk'ana oj sk'u'luke'i Dyos oj koltajuke yuj. Cho kala wabyex ta ay k'a jun wokol b'a jel niwan waxa wilawex awik ek' jan ki ke'na, b'a ke'n oj jk'ele.

Ja lajchawe k'ela lu'umi

¹⁹ —Tsa'an yala kab'tik ja Dyos oj b'i elkotik ja b'a wits Horebi, ti b'i oj wajkotik b'a yaxk'ul b'aye ja amorreo jumasa. Jel la xiwtik ja ek' jk'utstik snajtil ja takin lu'um k'inal, man k'otik b'a lu'um Cades-barnea.

^20-21 Ti kala wabyex tiw ya'ta ki'tik ja Dyos ja yax k'ul b'aye ja amorreo jumasa; cho julb'esex ochanik yamawik ja lu'umi, jach'ni ja jastal yalunej ja Dyosi.

²² Jaxa we'nlexi a walawex kab' ja lek oj jek k'eluman b'ajtan, b'a jach' oj yil jastal ja lu'umi, b'ay ja lek ja b'ej oj i'xuki, sok jastik chonab'il ja oj ta'tik ochi.

²³ Ja ke'n lek kab' ja jas a walawexi, ja'yuj jtsa'a lajchawe ja ma waj sk'eli, ka el jujune b'a jujune' k'ole.

²⁴ Ye'n waj sk'el'e ja yax k'ul jumasa, k'otie man b'a loman Escol.

²⁵ Ti b'a lu'um jaw yi'aje jujuntik tek'ul, ti yalwe kab'tik ja lu'um b'a oj ya'ki'tik ja Dyosi, jel b'i lek.

²⁶ —B'a'ya, ja we'nlexi a k'okowex ja yab'al jumasa ja Dyosi, mi a k'ana oj wajanik.

²⁷ Spakaxil a kulanex Ch'ak kumxanik b'a wa najex a tajb'anex ja Dyosi. Ek a k'ujolex yuj mis k'anawex ja Dyosi, ya elanik b'a Egipto kechan ita b'a oj sch'ay a na'jelex ja amorreo jumasa.

²⁸ Jel xiwyex ja yajni a wabyex yab'alil jastal ja swinkil ja chonab' jawi, yuj ja jel cha'anik sok jel b'i tsatse'i, jaxa chonab'ilei, joyb'anub'al sok cha'anil ts'akab'. Jel cha axwiyex ja yajni a wabyex ti aye' tiw ja cha'anil kristyano jumasa yintil ja Anaki.

²⁹ —Jaxa ke'n wax na'a kala wabyex: Ch'ab'ananik. —Mok xiwanik.

³⁰ Ja Dyos kujtiki, ye'n b'ajtan ay kujtik ye'nani oj skoltayotika, jach'ni ja jastal skoltayotik ja eltik b'a Egipto, cho sje'a ki'tik ti oj wajtik b'a takin lu'um k'inal.

³¹ Ja'yuj man ili, ye'n yi'ajotik jani, lajan sok telub'al yi'ajotik jani, sok mini jas wax ek' jb'ajtika. Ja ke'ntiki, ye'nani jtatika.

³² Jachuk mixa k'ana oj ja k'u'ukex ja ye'n,

³³ b'ajtanxa stsa'unej ja lu'um b'a oj ya'wi'exi. B'a tojxta ti oj yi'ex och tiwi, ti wa'n sje'jel jan a wi'ex ja wa b'ejexi; b'a a'kwali wa'n ajlel jan yuj jun k'ak', jaxa b'a sat k'ak'u smusuwotikon sok jun nole ason.

Ja Dyosi, ya'yi wokol ja israelenio

^34-35 —Yajni yab' ja Dyos ja jas wa'nex yaljeli jel tajki, yuj ja mini jun sb'e ja jas waxa k'ulan we'nlexi. Ja'yuj wa xkala wabyex mini jun ma oj ochuk a wujilex ja we'nlex ja b'a lu'um kalo yab' ja ma ek' paxta a wujilexi.

³⁶ Kechan ye'n ja Caleb sk'u'ani, ja'yuj ti yala ja Dyosi, kechan ye'n oj ochuk ja b'a lu'um jawi. Jach'ni ja yintil jumasa spetsanil ja lu'um b'a sb'ejtese'i ojni sb'ajuke'a.

³⁷ —Yuj a mul we'nlex ja'yuj tajki jmok ja Dyos ja ke'n, ti yala kab'a: Cho mini a we'n, mi oj ochan ja b'a lu'um jawi.

³⁸ Ye'n ja Josue oj sje'yi b'a oj wajuk ja kristyano, oj cho ya'yi ja lu'um ja israelenio jumasa, ye'n ja' wa koltaya ja' yuj tsatsal k'ujolan.

³⁹ —Ja Dyosi, cho yala kab'i: Ja israelenio jumasa ek' k'ujole oj japjuk yi'e ja yal yuntikile sok ja sche'ume yuj ja ma mi lek wax iljiye yuji. Mini t'un jachukuk ja jastal ek sk'ujole'i, yuj ja yal yuntikile'i, ye'n oj ochuke ja b'a lu'um k'inal wa xkala, ye'n oj ka'yi'e ja lu'um jawi, a'nima yal untikuke'to. Ala yabye jachuk ja israelenio jumasa,

⁴⁰ cho ala yabye a kumxuke b'a takin lu'um k'inal b'a sb'ejlal ja niwan paman ja' it jel yakili.

⁴¹ —Ja ke'n ch'ak kal a wabyex spetsanil ja iti, cho jach'ni ja we'nlexi, jakni a k'ujolex a ta'a ni'a mulex sok ja Dyosi. Ja'yuj a walawex oj ochanik ja b'a lu'um jawi, jach'ni ja jastal yalunej ja Dyosi. A wi'ajex ja wa tujk'anub'exi, niwan a k'ujolex mi wokoluk oj k'e'anik ja b'a witsi;

⁴² ja Dyosi, yala kab' oj kala wabyex mi b'i oj b'ob' a wujilex, ja ye'n mi oj skoltayex oj ni ch'ayanika.

^43-44 —B'aya Ja we'nlexi jel tsats ayex waxa wabyex, mini a wi'ajex niwan ja jas yala ja Dyosi. K'e'yex ja b'a witsi b'a oj tiro'ananik sok ja amorreo jumasa, jaxa ye'nle'i mini ya'a sb'aje b'a'ana ye'nani chak mil wanuke'a. Lajane sok jastal ja chajnul chab'i, man b'a Seir yi'aj ja patikex man Horma.

⁴⁵ Ja yajni kumxiyexi, wa'nex ok'el ja och a wawex yi ts'akatal sok ja Dyosi, jaxa ye'ni mini yi'a niwana,

⁴⁶ ja'yuj jitsan k'ak'u ti kanyex b'a Kades ja we'nlexi.