Mateus 28 - Teusö Tä Waheta

Jesus a temöa konaso noai ĩ ta

¹ Ĩ na tä kua tä, mota mapo wi tä wakala hasutasoö ha, ĩ hena tä, tomĩku tä wakala kuki ha, ĩ hena tä sai tä, Maria Matalena a, ai Maria a, ĩ na töpö kui töpönö Jesus a titikö noai ĩ taka möömö hulasolöma.

² Ĩ taka ha töpö walo pia tä, masita tä uli lakö lakömo opa läo soatama. Ĩ tä, Teusö pata tä hai ĩ ãju tä ithopalolö nö, maa manö thaka taka kasöle, pasökö tömö ĩ ma pata thaa soataiki nö, ĩ ma hõo ha a loa soataköma.

³ Tä sami samimo opa wi ĩ tä möamö kui na, ĩ na ĩ ãju tä möamö kuoma. Kama hai ĩ haloi ösö ausio opama.

⁴ Ĩ na tä kuaö ha, ĩ taka na töpö läapalo haluti noai ĩ töpö kilia apölasoma. Pe epii töpö kilia apölasoma kutenö, töpö satitimo opa nö, töpö kelo nö, nomawö töpö kuö toti ipii töpö paama.

⁵ Ĩ na tä kua soa tä, suö töpö na ĩ ãju tä aiki, ‑Pö kilipalo tihöö! Hii ti pakalai ti ha a säpalipili, ĩ ma möömö huu ke maaki,

⁶ ĩ a titia soa maneö! A temöa kõa waikiloheö! “Sa temöa konaso kitäö!” a kuu waikioma kutenö, a temöa totia konaso keö! Hapo. A pakö noai, ĩ ha ma tä mööso nökö. Hiki. A paa maneki.

⁷ Önö kutenö, pö hua kononöö! Jesus a kai a hua sinomoti wi ĩ töpö na makö wäo nö, “Jesus a temöa konasoma thai. Kaliléia tä uli pata ha a huu pia kuleö! Ĩ tä uli ha Jesus ma taa konanö taso kitäö!” ĩ na makö kuu! Sa kuu pole, ĩ tä na pö pi motöpo koonö tihöö!‑ ĩ na ĩ ãju tä kuuma.

⁸ Ĩ na ĩ ãju tä kuu ha, ĩ suö töpö pi mönahapalo opaö, töpö õsi pi kilihiapalo opaö, ĩ na ĩ suö töpö pi kuapaloma. Ĩ na ĩ suö töpö pi kuapaloma kutenö, ĩ ha töpö hua kõa soatalolö nö, Jesus a kai a hua sinomo wi ĩ töpö na ta wäsä pi topa apa salo, töpö läläa koonöma.

⁹ Töpö läläälö pamö, Jesus a paa lälo nö, ‑Makö topa kule? Toitai pö kuikiö!‑ ĩ na a kuuma. Ĩ na a kuu ha, Jesus a na ĩ suö töpö ekua soataiki nö, Jesus a pi ipa salo, pili a konona ami pewö hãsokapala soata nö, ‑Jesus ai. Kaikana wa waikiwö. Teusö wa ulupöö!‑ ĩ na töpö kupalotima.

¹⁰ Ĩ na töpö kupaloti ha, Jesus aiki, ‑Pö kilipalo tihöö! Pö hua kononöö! Kamisa kai a hua sinomo wi, ĩ töpö na, “Ipa hoose töpö” sa kuu wi, ĩ töpö na makö hapalo nö, “Kaliléia tä uli pata ha pö hua kononöö! Ĩ ha Jesus ma taa konani kitäö!” ĩ na makö kuu!‑ ĩ na Jesus anö ĩ suö töpö noa thama.

‑Jesus a nomawö thomönömaö!‑ töpö holisi kuu noai ĩ ta

¹¹ Ĩ na tä kua tä, suö töpö huu koonö tä, thaka taka na töpö läapalo haluti noai, ĩ ai töpö kononö nö, Teusö a täpä sinomo wi ĩ pata töpö na tä pewö a wäsäma.

¹² Ta wäsäö ha, ĩ pata töpö, juteu pata töpö, ĩ na töpö kui töpö kokamo nö, ‑Ĩ na makö kuapöö!‑ töpö kuu nö, töpö läapalo noai ĩ töpö na sitipa kökö totoköma. Sitipa kökö totokö nö,

¹³ ‑“Mumai ha samakö mitia tä, ĩ thaka taka ha Jesus a kai a hua sinomo noai, ĩ töpö waloa halukiso nö, Jesus a nomawö thomöa halulölöma thaliö!” ĩ na ai töpö na, ĩ na makö kuu!

¹⁴ Ĩ na makö kuu pole, kaikana tänö ĩ tä hininöma, ĩ a pata na kamisamakö aiki, “‘Jesus a nomawö thomöa halulölöma thaliö!’ tä kuu pole, ĩ pitili ta” ĩ na samakö kuu ha, a pata hĩso mataso kitä. A pata hĩso matalo nö, “Hãu. Ö̃kö ta o” a kuu kitä. Önö kutenö, makö peama mai kitäö!‑ ĩ na töpö läapalo noai, ĩ töpö na ĩ na ĩ pata töpö kuuma.

¹⁵ Ĩ na pata töpö kuu ha, töpö läo noai ĩ töpönö ĩ sitipa kökö tälölö nö, ‑Ĩ na makö kuu!‑ ĩ na Teusö a täpä sinomo wi, ĩ pata töpö kuu noai, töpö läo noai ĩ töpönö ĩ tä holisi a wäsätimae. Ĩ tä holisi a wäsäti ha, juteu töpö na ĩ ta pala soatasoma. Huki ĩ tä holisi a wäsä wi, huki ĩ nasimö tä kua soa.

Kama kai a hua sinomo wi ĩ töpö na Jesus a tapamoa konaso noai ĩ ta

¹⁶ Ĩ na tä kua tä, Jesus a kai a hua sinomo wi, Kaliléia tä uli pata ha ĩ 11 töpö kui töpö hua kononö nö, ‑Ĩ maa makö ha makö hulolöö!‑ Jesus a kuu noai, ĩ makö ha töpö walokö tasoma.

¹⁷ Töpö waloikitö nö, Jesus a taa konanö nö, töpö mãi poiki nö, ‑Jesus ai. Kaikana wa. Teusö ulupö wa‑ ĩ na ai töpö pi kuuma maaki, ai töpö aiki, ‑Hi a hai, Jesus a hãto mai kitäö!‑ ĩ na ai töpö pi kupalo pasioma.

¹⁸ Önö kutenö, ĩ töpö pewö na Jesus a ekuiki nö, ĩ na a kuuma: ‑Hi tä hẽtu hamö töpö kupoli, ĩ töpö pewö na sa kaikanamoö, hi masita tä uli ha sanöma töpö kule, ĩ töpö pewö na sa kaikanamoö, ĩ na Teusö anö sa kaikanamoma thama waikioma.

¹⁹ Ĩ töpö pewö na sa kaikana waikipalöma kutenö, kamisanö ĩ makö noa thaa kule. Sanöma töpö pewö na makö huu hätäpo nö, sa kai hua totiatalo wi, ai töpö thalalöö! Ĩ na ma töpö thalö nö, ĩ ma töpö mãi õmananöö! Kamakö hai ĩ pö̃ Teusö a, Teusö ulupö sa, Teusö a õsi kua tolele ĩ a, ĩ na samakö a hilo kua wi, ĩ töpönö ĩ samakö thapo kutenö, töpö mãi õmananöö!

²⁰ Ma töpö mãi õmananö nö, kamisanö makö noa thaa noai, ĩ töpö na ĩ tä pewö a wäsä nö, “Ĩ ma ta hini totiatalopököö!” ĩ na pö kuu totihoö!‑ ĩ na Jesus anö töpö noa thama. Ĩ na töpö noa thaa nö, ‑Pei. Hi masita tä uli mapo paio mi tä, ĩ tä wakala pewö hamö kamakö na sa kuo naio soatio kitäö!‑ Jesus a kuuma.