Marcos 5 - Teusö Tä Waheta

Kusi kökö na sai töpö lisipamanö noai ĩ ta

¹ Ĩ na tä kua tä, kosoto u pökatö ha sietasa tili töpö pililali, ĩ hamö töpö pökatöa soatakö lasoma.

² Töpö pökatöa soatakilö nö, töpö söposöpalo nö, nomawö töpö titio sinomoti pa a wani kuoma, Jesus a na a wani ekua läköma.

³ A wani ekuo läle, sai tänö ĩ a wani saliama sinomotima. Nomawö töpö titiomö kuo sinomo wi hamö, ĩ hamö a wani piliomö kuoma. Ai töpönö söpala ösö totokönö a wani õkatima maaki, a wani õka tomöpoti maama.

⁴ Söpala ösökö pata ha a konona a wani tititioma maaki, ĩ a waninö söpala ösökö wania kotioma. Söpala ösö totonö a poko wani õkatioma maaki, totokö huitia konanöma. A wani lotete epö salo, ai töpönö a wani utitipama maama.

⁵ A wani utitipama mi ha, nomawö töpö titio pamö a lalupalo kai wani hutii, ki hamö, maa makö pata hamö a lalupalo kai wani hutii, mumai ha a hutii, wakalai ha a hutii, ĩ na ĩ a wani kuatima. Maa ma namo patanö kama ösö wani hikiko pätioma.

⁶ Ĩ na a wani kuati tä, pai hamö Jesus a huu talalö nö, a wani läläa läiki nö, ‑Kaikana wa pata‑ a pi wani kuu nö, a mãi wani poa läköma.

^7-8 A mãi wani poa läki ha, ‑Sai wa wani! A lisia kopaloö!‑ ĩ na sai tä wani na, ĩ na Jesus a kuuma. Jesus a kuu ha, a mãi wani pole, ĩ a wani lalupalo nö, ‑Jesus ai! Ösö hamö Teusö a kule, ĩ pelupö waö! Ĩ ka pi wa tä thaamö huu ke? Teusö a na kawa aiki, “Hi sa wani peama pasipa mai kitäö!” ĩ na a kuu totihoö!‑ ĩ na a wani lalupalo pola nö, ĩ na a wani kuuma.

⁹ A wani lalupalo kuu ha, ‑Wi na wa hilo kuaö?‑ Jesus a kuu ha, ‑Sai samakö satehe epö salo, Satehei tili samakö hiloöö!‑ a wani kuu nö,

¹⁰ ‑Tiko tä uli hamö hi sai töpö simöpa tihöö!‑ a wani ku upama.

^11-12 ‑Ki hamö, heu tä palökö ha kusi kökö satehe epii kökö iapolali, ĩ kökö õsimö ha samakö thaa nömököö!‑ ĩ na sai töpö ku upatima.

¹³ Töpö ku upati ha, ‑Awai. Kusi kökö na pö kuikiö!‑ Jesus anö töpö noa thaö ha, sai töpö ekua hö̃töiki nö, ki hamö, kusi kökö õsimö ha töpö lisia nömöpasoma. Töpö lisia nömöpalo nö, satehe epii kökö, 2.000 kökö, ĩ na kökö kui kökö läläa timöpalo nö, kosoto u pata ha kökö kea soapasoma. Kökö kea soapalo nö, kökö nasi pewö tua soapasoma.

¹⁴ Kökö nasi pewö tua soapasoö ha, kusi kökö na töpö kalipalo sinomo wi, ĩ töpö läläa soalö nö, ai töpö na, ‑Ki hamö Jesus a waninö sai töpö thaki ha, kusi kökö nasi pewö tupaso keheö!‑ ĩ na ĩ töpö kupalotima. Sai pö satehe epii, sai pö hö̃kököa apöle, ĩ pö sai ha ta wäsä naio soatama. Ki hamö sai pö kuo sololo opa pa tä wäsä naio soatama. Kusi kökö wanisalama wi, ĩ ta wäsä hätäpoö ha, ai töpö hulasolö wi, ‑Kamisa solo. Sa tä möö! Kusi kökö isi waniama noai, ĩ sa tä möpöö!‑ töpö kuu kai hua soasolöma.

¹⁵ Jesus a na töpö hua soalolö nö, sai töpönö a wani saliama sinomo noai, ĩ a wani talalömae. A polemo mai ha, a wani temö öpii, kama hai ĩ haloi ösö na a wani haloa soaiki nö, a wani lotioma. A wani lotia tä, ai töpönö a wani talalö nö, töpö kilia apösoma.

¹⁶ Töpö kili ipa tä, Jesus anö a wani toa komanö noai, ai töpönö ĩ tä taa totio noai, ĩ töpönö ĩ ta wäsäö, kusi kökö isi waniho taa totio noai ĩ ta wäsäö, ĩ na tä pewö a wäsä kua läoma.

¹⁷ Ta wäsä läo nö, Jesus a na, ‑Ipa tä uli ha a kuo tihöö! Tiko hamö a hua kononöö!‑ ĩ na töpö pewö kuuma.

¹⁸ Töpö kuu ha, kutiata a na Jesus a titio pia tä, sai töpönö a wani saliama sinomo noai, ĩ a wani aiki, ‑Kamisa solo. Kawa na sa huu naiopököö!‑ ĩ na Jesus a na a wani ku upama.

¹⁹ A ku upa kule maaki, ‑Naiö! Au ai töpö na a kõa pasilolöö! Au ai töpö na, “Sai töpönö sa saliama sinomo kipili maaki, Teusö Kaikana ta patanö töpö hosali kipiliö! A totiatalo opa thaliö!” wa kuupököö!‑ ĩ na Jesus anö a noa wani thama.

²⁰ A noa wani thaö ha, a wani konasolöma. A kononö nö, Tekápolisö tä uli pewö hamö a wäo nö, ‑Sai töpönö sa saliama sinomo kipili maaki, Jesus anö töpö hosali kipiliö!‑ ĩ na a wani kutima. Ĩ na a wani kuu wi, ai töpönö ĩ ta hininö nö, ‑Kilatiha! A isi wani waniho opama maaki, a wani toa totia kotaso noa‑ ĩ na ai töpö pewö kuuma.

Jaitu a pata waloa haikö noai ĩ ta

²¹ Ĩ na tä kua tä, kutiata a na Jesus a pökatöa konasolöma. A pökatöa kononö nö, kosoto u kasö pata ha a huu soa tä, Jesus a na töpö satehe epii töpö waloa läköma.

²² Töpö waloa läiki nö, Jaitu a pata waloa haiköma. Kaikana tä kutenö, juteu töpö kokamo sinomoti wi, ĩ a sai pö ha Jaitu a pata simöo sinomotima. Jesus a huu soa tä, Jaitu a pata waloa haiki nö, Jesus a talalö nö, ‑Kaikana sa maaki, hi a pata hai ĩ kaikana tä sai pata‑ a pi kuu salo, Jesus a kotö ha a mãi poa läköma.

²³ A mãi poa läiki nö, Jesus a na, ‑Ipa thäwö a wai noma pia sailaliö!‑ a kuu nö, ‑Hapo. Ipa wai na a ami walikiö! Wa ami waliköma, ipa wai temöa kõa soatasopököö!‑ ĩ na a pata ku upaö ha,

²⁴ ĩ a pata na Jesus a nokasolöma. A kai huu soatioima tä, Jesus a na töpö satehe epii töpö hua nainonö nö, Jesus a na töpö pakäho opama.

Jesus hai ĩ haloi ösö höpöa hãtopalö noai ĩ ta Suö tä salia apa noai ĩ a

²⁵ Ĩ hamö suö a huu naionöma. Satehe epii, 12 tä inama kua waikia kule maaki, suö tä iä mapo haio maama.

²⁶ Töpö ononotama wi ĩ töpö satehe epii töpönö a timö wani pima maaki, a wani salia satimo opatima. Ĩ töpönö a wani peama apama. A salia apa soa päla nö maaki, töpö ononotama wi ĩ töpö na kama hai wani tä pewö totoa asa päköma. Kama hai wani tä pewö totoa asakö noai ha maaki, a toö kõo maama. A salia sipa soasolöma.

^27-28 A salia sipa soa tä, töpö satehe epii töpö huulö pamö a wani huu naionö nö, Jesus a na a wani hua hailolö nö, Jesus a na a nasö wani hulia haiköma. A nasö wani hulia haiki nö, ‑Jesus hai ĩ haloi sa ösö höpöa pätama, sa toa konaso kitä‑ a pi wani kuu salo, haloi ösö höpöa hö̃töoma.

²⁹ Haloi ösö höpöa päpalöma maaki, a kupo maa kotasoma. ‑Sa kupo maa kõa nö topaloe‑ ĩ na a pi wani kuu soatasoma.

³⁰ Suö tä pi wani kuu soa tä, Jesus aiki, ‑Sa lotetea apöle, ĩ tänö ai tä toa kõa hãtopaso ke‑ ĩ na Jesus a pi kuu nö, satehe epii töpö mötali ha a öpa nomöhöpalo nö, ‑Witinö ipa haloi ösökö höpöa hãtopali ke?‑ ĩ na Jesus a kuuma.

³¹ Ĩ na a kuu ha, kama kai a hua sinomoti wi ĩ töpö aiki, ‑Kawa na satehe epii samakö pakäho opa wi maaki, “Witinö ipa haloi ösökö höpöa hãtopali ke?” wa ta kuuwö‑ ĩ na Jesus a na Ĩ töpö kuuma.

³² Ĩ na ĩ töpö kuuma maaki, Jesus a mamonö tä tae hö̃töoma.

³³ A mamonö tä tae tä, suö tä aiki, ‑Jesus anö sa toa kõa waikipali ke‑ ĩ a pi wani kuu nö, a kili ipa salo, a satitimo nö, Jesus a kotopö ha a mãi poa soataköma. A mãi poa soataiki nö, Jesus a na, ‑Kamisanökö. Sa salia apa salo, kamisanö au sa ösö höpöpali ke‑ ĩ na a wani kuti nö, tä pewö a wäsä totioma.

³⁴ Ta wäsä totioö ha, ‑“Jesus anö sa toa komani kitä” wa pi kuuma salo, wa toa konaso ke. A kili mai, a kopolöö! Wa salia maneö!‑ ĩ na Jesus a kuuma.

Jaitu a pete a temöa komanö noai ĩ ta

³⁵ Ĩ na Jesus a kuu pola tä, Jaitu a kaikana sai pö ha töpö kuo noai, ĩ töpö waloa läköma. Töpö waloa läiki nö, Jaitu a pata na, ‑Au thäwö a noma totia apa hisaloheö! Jesus a naka tihöö!‑ ĩ na töpö kuuma.

³⁶ Töpö kuuma maaki, Jesus anö ĩ ta hini nö, Jaitu a pata na, ‑A pi honipo tihöö! A pi topaikiö! “Jesus a lotete epö kitä” a pi kuu totihoö!‑ ĩ na Jesus a kuuma.

³⁷ A kuu nö, ‑Ai pö noka tihöö!‑ ai töpö na a kuu nö, Pedro, Tiago, Tiago a poose João, ĩ na töpö kui töpö na a hapalo asa nö, ‑Makö huu pätaö!‑ ĩ na Jesus anö ĩ töpö noa thama.

³⁸ Töpö noa thalö nö, kaikana sai pö hamö töpö taa soalalotö nö, Jesus anö töpö satehe epii töpö ö̃kö lalupalo hininö tasoma.

³⁹ Töpö ö̃kö lalupalo hininötö nö, a lisipalo nö, ‑Wi na tä kuaö ha makö ö̃kö lalupalo opati kule? Moko tä nasi tuo maahe. Tä mia pätia alu kuleö!‑ ĩ na Jesus a kuuma.

⁴⁰ Ĩ na a kuu ha, ‑Hö. Pi moti wani kuti ti! Tä nasi tua totiki alu ke pi kuu mai‑ ĩ na töpö kuuma. Ĩ na töpö kuu ha, Jesus anö ĩ töpö pewö atupamanöma. Moko tä hai ĩ pö̃ a, pöpönö a, Jesus a na töpö huu naine ĩ töpö, ĩ na töpö kui, moko tä kuo pa ĩ töpö lisia asapasoma.

⁴¹ Töpö lisia asapalo nö, moko tä ami ha Jesus a ami walia soataiki nö, ‑Talitá kumi‑ ĩ na Jesus a kuuma. Kamakö kai sai ha a hapaloma aköna, ‑Naka ai! A öpa kopaloö!‑ ĩ na a kuu noa kipi.

^42-43 Ĩ na a kuu ha, moko a hĩso ukua kono nö, a öpa kõa soatalo nö, a huu kõo soatama. A huu kõo soataö ha, ‑Tä aipa apa nö kiliawö‑ töpö pi kuuma. Ĩ na tä kua tä, Jesus aiki, ‑Hi moko tä na nii tä totoköö!‑ a kuuma. A kuu nö, ‑Pö wäo tihöö!‑ ĩ na Jesus anö töpö noa thaa totilöma. ‑Hi töpö wäo ha, “Jesus anö sa toa komani kitä” ai töpö pi kuu nö, Teusö ta hini wani ipö maaki, kamisa na ĩ töpö satehe epii töpö walokö matimöö!‑ ĩ na Jesus a pi kuu nö, ‑Pö wäo tihöö!‑ töpö noa thaa totilöma. Ĩ moko tä temöa konaso noai, ĩ tä na 12 inama tä kuo waikioma.