Lucas 8 - Teusö Tä Waheta

Jesus a na suö töpö solo töpö nokapaloti noai ĩ töpö

¹ Ĩ na tä kua tä, sai pö hö̃kökö öpii sai pö kulati, ĩ tä uli pata hamö Jesus a huti pamö, Teusö anö sanöma töpö simöa totio wi, ĩ ta topa apöle ĩ ta wäsä hätäpotima. Ta wäsä hätäpoti pamö kama kai a hua sinomoti noai, ĩ 12 töpö kui töpö nokapalotima.

² Suö töpö na sai töpö sapäkoti noai, Jesus anö ĩ sai töpö sasupalö noai ĩ suö töpö, suö töpö salia apati noai, Jesus anö ĩ töpö temöa komanö noai ĩ töpö, ĩ na suö töpö kui, Jesus a na ĩ ai töpö suö nokapalo naitioma. Maria a, Matalena a hilo kua naine, ĩ a na sai töpö satehe epii, 7 töpö kuo noai, ĩ sai töpö sasupalö noai ĩ a,

³ Etoosisö kaikana tä na Kusa a kalipalo sinomoti noai, ĩ a hai ĩ pusopö Joana a, Susana a, ai suö töpönö wani tä na Jesus a pasiliapalati noai, ĩ töpö satehe epii töpö, ĩ na suö töpö kui, Jesus a na ĩ töpö nokapalo naitioma.

Mo säsäha sinomo wi ĩ a

⁴ Ĩ na tä kua tä, sai pö satehe epii sai pö kua selekelati, ĩ sai pö ha töpö kulati, ĩ töpönö Jesus a möö taso pia salo, Jesus a kule ha, ĩ ha ĩ töpö satehe epii töpö waloiki nö, töpö kokamonasoma. Töpö kokamo opaö ha, Jesus anö uni ta wäsäma. Ta wäsä nö, ĩ na a kuuma:

⁵ ‑Hikali a na mo säsäha sinomo wi, hikali a hamö mo säsähamö hulasolöma. Mo säsäha tä, piliso kasö ha ai mo kelasoö ha, sanöma töpönö mo katika apatima. Ĩ ha, salo pö katä wi ĩ pönö mo oalöma.

⁶ Ĩ na tä kua tä, tä uli maa mapöo opa pa, masita tä uli ösö pateteo opa pa ai mo kelo nö, masita tä uli hãsitio opaö ha, mo wai ãkea hö̃tösoma maaki, mo wai häwäsoma.

⁷ Ĩ na tä kua tä, mösököpölemö tipö kuo opa pa ai mo kelasoma, mösököpölemö tiki patalo nö, tä paimia apa kutenö, mösököpölemö tikinö mo wai häwäsoma.

⁸ Ĩ na tä kua tä, tä uli topa apa pa ai mo kelasoma, mo ãkelo nö, pili mokö sätäa haia asaköma. Mokö sätäa haia asataiki nö, mokö sĩko opii mokö pala soatama‑ ĩ na Jesus a kuuma. Ĩ na a kuu nö, ‑Kamakönö sa hini pi topa wi, ĩ ta hini totihoheö!‑ ĩ na a kuuma.

Jesus anö ĩ uni ta kateha noai ĩ ta

⁹ Ĩ na Jesus a kuuma, Jesus a kai a hua sinomo wi ĩ töpö aiki, ‑Wi na ta kuu wi ĩ wa ta wäsä ke?‑ ĩ na töpö kuuma.

¹⁰ Ĩ na töpö kuu ha, ‑Pi naka. Teusö anö sanöma makö simöa totio wi, sutu ha ĩ ta wäsä makoka paio maama maaki, huki kamakö na ĩ sa ta wäsä makoka pia kule. Teusö a simöo totio wi, ai tiko töpö na ĩ sa ta wäsä makoka totio mai kitä. Ĩ töpö na uni sa ta wäsä päoö. Ĩ töpö na uni sa ta wäsä päo salo, töpö pi wi na takömo nö, töpö mamo tetea kule maaki, tä tapa totio mi. Pili töpö sömöka taa kule maaki, ta hini makoka totio mi.

¹¹ Pi naka. Ĩ na uni ta kuo ke. Mo säsäha kua wi na, ĩ na Teusö ta wäsä kua hö̃töoö.

¹² Piliso ha mo kea kulaso noai na, ĩ na Teusö tä kai a hini wi, ĩ na ai töpö kua päoö. Ĩ töpö na Teusö ta wäsäma maaki, Sai tä sai pata aiki, “Ĩ töpönö Jesus a kai a hini totio nö, ‘Jesus a pitili’ ĩ na töpö pi kuu matimöö! Ĩ na ĩ töpö pi kuu ha, Teusö anö ĩ töpö täa kõa läli kitäö!” ĩ na Sai tä pi pata kuu salo, töpö namo kea haia soataki. Töpö namo kea haiki ha, “Sa ta hini maa haito opa saiö! Päla. Sa tä wani a hini wani ipö saiö!” ĩ na töpö kuu.

¹³ Ĩ na tä kua tä, tä uli maa mapöo opa pa ai mo kea kulaso noai na, ĩ na Teusö ta hini wi, ĩ na ai töpö kuaö. Ĩ töpönö Teusö a kai a hini nö, töpö pi topa haiatalo opaö. Töpö pi topa haiatalo opaö maaki, mosö wai nasökili maa kuo noai na, ĩ na ĩ töpö õsi hamö Teusö ta hinipo mi ha, ĩ töpönö Teusö tä kai a hula soaki. “Teusö a kai hai, ĩ pitili tä sai a” ĩ na ĩ töpö kuu somama maaki, wanisala tä thaa wi ĩ tä na Sai tä sai patanö ĩ töpö simökö nö, töpö wapaö ha, ĩ töpönö Teusö tä kai a hula soaki.

¹⁴ Ĩ na tä kua tä, mösököpölemö tipö kuo opa pa mo kea kulaso noai na, ĩ na ai töpö kuaö. Ĩ töpönö Teusö ta hini kule maaki, waiha, “Pälaö! Huki Teusö sa ta hini wani ipö saiö!” ĩ na ĩ töpö kuu kuki. “Wi na sa kua pätaköö!” töpö pi kuu sinomoö nö, nii tä, wani tä, ĩ na tä kui tä na töpö pi tapomo sinomo sisaö ha, Teusö ta hini pi topa wi, ĩ tä matasoö. “Ipa wani tökö satehe epii ipa tökö kuo nö toa sö ö̃” ĩ na töpö pi kuu, “Sa puko opa nö toa nö alu kuikö ö̃” töpö pi kuu, ĩ na ĩ töpö pi ku upati salo, Teusö tä kai a hini wania apötasoö.

¹⁵ Ĩ na ĩ ai töpö kua pasia kule maaki, ai töpönö Teusö tä kai a sua totia asali. Masita tä topa apa pa mo kea kulaso noai na, ĩ na ĩ töpö kua asaö. Ĩ töpö õsi na Teusö a kai a keköma, ĩ töpönö Teusö ta hula mai, ta hini totio soatioö. Ta hini totio soatio nö, töpö topa apa wi ĩ tä palasoö‑ ĩ na Jesus a kuu totiatalo opatima.

Koa taka sii hĩtata hatukua kule na, ĩ na Teusö a kai na töpö pi hatukua kuki kitä

¹⁶ Ĩ na Jesus a kuu nö, ai uni ta wäsä nö, ‑Koa wa taka sii hilimanö nö, wöö a õsimö ha wa taka sii titia mai kitä. Hii tiki komo ha wa taka sii hĩta mai kitä. “Ai töpö lisipasoma, taka sii wakala apapököö!” wa pi kuu nö, hoka apa pa wa taka sii hĩtataö.

¹⁷ Koa taka sii hĩtata hatukua kule na, ĩ na Teusö a kai na sanöma töpö pi hatukua kuki kitä. Huki töpö pi moti ipö maaki, waiha töpö pi hatukupaso kitä.

¹⁸ Önö kutenö, Teusö ta wäsä tä, a sömöka taa totikiö! Teusö a kai ha wa sömöka taa totiköma, kawa na Teusö anö ta hinimoma hö̃töo kitä. Ta hinimoma hö̃töoö ha, pe epii wa ta hinini kitä. Teusö a kai ha wa sömöka taa wani tä, wani ipii Teusö wa kai hini waikia kule maaki, Teusö wa tä kai a hini maa kõo haiatalo opa kitä‑ ĩ na Jesus a kuuma.

Jesus a hai ĩ töpö

¹⁹ Ĩ na tä kua tä, Jesus a hai ĩ pöpönö a, poose töpö, ĩ na töpö kui töpö waloa haikö solöma maaki, ai töpö satehe epii töpö hö̃sönia apa ha, Jesus a na kama hai ĩ töpö walo totio maama.

²⁰ Töpö walo totio mi ha, Jesus a na ai töpö aiki, ‑Sai a hõo na au nao a, au hoose töpö, ĩ na kilii töpö öpa kulaiö! Kawa na ĩ töpö hapalo pi topa apa kulaiö!‑ ĩ na töpö kuu ha,

²¹ Jesus aiki hö̃töwö, ‑Ai töpönö Teusö a kai a hini totiatalo opati wi, ĩ töpö na, “Ipa nao a. Ipa hoose töpö” ĩ na sa kuu hö̃töoö‑ ĩ na Jesus a kuuma.

Jesus anö ipoko tä pata wasulö noai ĩ ta

²² Ĩ na tä kua tä, kosoto tuu kasö pata ha kutiata a kane, ĩ ösö ha Jesus anö kama kai a hua sinomo wi ĩ töpö kai titiki nö, ‑Makö pi pökatökiilö nököö!‑ ĩ na a kuuma. Ĩ na a kuu ha, töpö pi helulua mötalia soatasolöma.

²³ Töpö pi huulö pamö Jesus a mia pasia soataköma. A mitia tä, ipoko tä pata hululua läpalo nö, kutiata õsimö ha pola pata kea soataköma. Pola pata kea soatakö nö, maa tuu kasö manöka waikitaalö nö, ösö mãi õpa piaö ha,

²⁴ Jesus a na töpö nokapalo sinomo wi ĩ töpönö Jesus a naa kõa soatamanö nö, ‑Jesus a pata ai! Makö nasi tupo pialeö!‑ ĩ na töpö kuuma. Ĩ na töpö kuu ha, Jesus a hoköa soatalo nö, ipoko tä pata simöa kõoö ha, ipoko tä matalo nö, kosoto u pata kalipalo mai ha, tuu pata kua kõo soataköma.

²⁵ Tuu pata kua kõo soataiki ha, Jesus anö töpö nokapalamati wi ĩ töpö na, ‑“Teusö anö makö noama kitäö!” ĩ na makö pi kuu mai‑ ĩ na Jesus a kuuma. Ĩ na Jesus a kuu ha, töpö kilia apölo nö, ‑Hi witi pili a sai totiwö kuno mai? Ipoko tä patanö a hapalo hinii, maa tuu supa supamo wi ĩ tänö a hapalo hinii, ĩ na tä kua apati nö kiliawö‑ ĩ na töpö kuu hẽtupasoa soa pälasoma.

Kusi kökö na sai töpö lisipamanö noai ĩ ta

²⁶ Ĩ na tä kua tä, Kaliléia tä uli ha kosoto tuu pata kule, ĩ tuu pökatö pata hamö sietasa tili töpö pililali, ĩ hamö töpö pi pökatölasolöma.

²⁷ Töpö pi pökatölolö nö, töpö söposöa soatasoma, ai tä õsi na sai töpö titile, ĩ töpönö a wani peama sinomo wi, sai pö hö̃kököi sai pö kulati hamö ĩ a wani kuoma, Jesus a na ĩ a wani waloa läköma. Haloi ösö halopo mai ha a wani huu sinomotima. Sai a na a pilio totio mai ha, nomawö töpö tititamö kua sinomo wi hamö, ĩ hamö a wani piliomö kutioma.

²⁸ Ĩ a waninö Jesus a huu talalö nö, Jesus a na a waloiki nö, ‑Kaikana tä pata ai!‑ a pi wani kuu nö, a kili salo, a mãi wani poa läköma. A mãi wani poa läiki nö, a wani lalupalo pola nö, ‑Jesus ai! Ösö hamö Teusö a kupoli, ĩ a hai ĩ pelupö waö! Ĩ ka pi wa tä thaamö huu ke? Sa peama tihöö!‑ ĩ na a wani lalupalo pola nö, ĩ na a kuuma.

²⁹ Sai tänö a wani simöa kõataloti nö, a wani lotetepama apatima. A wani lotete epö ha, ai sanöma töpönö a wani huöa pi topatima maaki, a wani huöa tomöpa maama. Söpala ösö totokönö a wani õkatioma maaki, ĩ a waninö ĩ söpala ösö totokö huitima sinomotima. Ĩ söpala ösö totokö huitipali ha, sanöma töpö piliomö kuo mao pamö sai tänö a wani simöa sinomotima. Önö kutenö, ‑A lisia kopaloö!‑ ĩ na Jesus anö ĩ sai tä noa thama. Ĩ na sai tä noa thaö ha, ‑Sa peama läo hãto tihöö!‑ Jesus a na ĩ na a wani kuuma.

³⁰ Ĩ na a wani kuu ha, ‑Wi na wa hilo kuaö?‑ Jesus a kuu ha, ĩ a wani na sai töpö satehe epii töpö titia kutenö, ‑Satehe tili samakö a hiloöö!‑ ĩ na a wani kuu hö̃töoma.

³¹ Ĩ na a kuu hö̃töo nö, ‑Hi tä komo hamö töpö pea soatio wi, ĩ hamö samakö simöpa tihöö!‑ ĩ na sai töpö kuuma.

³² Ĩ na töpö kuu nö, ki hamö, heu tä palökö ha kusi kökö satehe epii kökö ia kai holepalo polali, ĩ kökö satehe epii kökö holepalo kutenö, ‑Ki kusi kökö holepalo polali, ĩ kökö õsi ha samakö thaa nömököö!‑ ĩ na sai töpö kuuma. Ĩ na töpö kuu ha, ‑Awai. Ki kusi kökö na pö kua naikiö!‑ Jesus anö töpö noa thama.

³³ Ĩ na töpö noa thaö ha, sanöma tä na ĩ sai töpö lisia kopalo nö, kusi kökö õsi ha töpö lisia nömöpaso lasoma. Töpö lisia nömöpasoö ha, kusi kökö pewö läläa timönonö nö, kosoto u pata ha kökö pewö pata kea soapaso kölöma. Kökö pewö kepalo kölö nö, kökö pewö nasi tua soapaso kölöma.

³⁴ Kökö pewö nasi tua soapaso kölö ha, ĩ kökö na töpö kalipalo sinomo noai, ĩ töpö läläa soatalolö nö, sai a satehe epii sai pö hö̃kököa apöle, ĩ pö sai ha ta wäsä soata tasoma. Sai pö kuo sololo opa pa ta wäsä naio soatama.

³⁵ Kusi kökö wanisalama pole, ĩ ta wäsä hätäpoö ha, ai töpö satehe epii töpö hulasolö wi, ĩ töpö aiki, ‑Kusi kökö isi waniama taso noai ĩ sa tä möö tasokö o‑ ĩ na ĩ töpö kuu kai hupa soatama. Jesus a na ĩ töpö kuu kai hua soatalolö nö, sai töpönö a wani saliama sinomo noai, ĩ a wani na sai töpö lisia kopaso noai, ĩ a wani talalöma. A polemo mai, a wani temö öpii, kama hai ĩ haloi ösö halolö nö, ĩ na a wani kuati tä, Jesus a kotö ha ĩ a wani lotioma. A wani lotia tä, ai töpönö a wani talalö nö, a wani temö öpö salo, töpö kilia apösoma.

³⁶ Ĩ ha kusi kökö isi waniho taa totio taso noai, ĩ töpönö tä pewö a wäsä läoma. ‑Jesus anö ĩ a wani totia kopali keö!‑ ĩ na töpö kutima.

³⁷ Ĩ na töpö kuti ha, ta hini noai, ĩ töpö kili ipa salo, Jesus a na ĩ töpö pewö aiki, ‑Ipa tä uli ha a kuo tihöö! Tiko hamö a hua kononöö!‑ ĩ na töpö pewö kuuma. Ĩ na töpö kuu ha, kutiata a na Jesus a titia koiki nö, a hua konasolöma.

³⁸ A huu kõo pia tä, sai töpönö a wani saliama sinomo noai ĩ a wani aiki, ‑Kawa na sa huu naioköö!‑ Jesus a na ĩ na a wani kuuma. Ĩ na a kuuma maaki, ‑Naiö!

³⁹ Au ai töpö na a hua pasia kononöö! Wa hua pasia kononö nö, Teusö anö wa temöa komanipili, ĩ tä pewö a wäsätöö!‑ ĩ na Jesus anö a noa wani thama. Ĩ na a noa thaö ha, sai pö satehe epii sai pö hö̃kököa apöle, ĩ hamö a wani hua kononö nö, ĩ sai pö pewö hamö a huu hätäpo nö, Jesus anö a wani temöa komanö noai ĩ tä pewö a wäsä hätäpotima.

Jaitu anö Jesus a naka noai ĩ ta

⁴⁰ Ĩ na tä kua tä, Jesus a pökatöa konasolöma, Jesus a kõo taa noai, ĩ töpö pi mönahapalo opa läoma.

⁴¹ Ĩ ha Jesus a na Jaitu a pata waloa haiköma. Juteu töpö kokamo sinomo wi ĩ a sai pö ha Jaitu a kaikanamo sinomo wi, ĩ a. Jesus a na ĩ a waloa haiki nö, Jesus a talalö nö, ‑Kaikana sa maaki, hi a hai, kaikana tä sai‑ a pi kuu salo, Jesus a kotö ha a mãi poa läköma. A mãi poa läiki nö, ‑Ipa sai a na wa huu mi salo‑ ĩ na a kuuma.

⁴² Kama hai ĩ pete a sami moko a wai na 12 inama tä kua waikia wi, ĩ a wai noma piaö ha, pö̃ Jaitu anö Jesus a nakama. A nakaö ha, ĩ hamö Jesus a hua soatasolöma. A huulö pamö, Jesus a na töpö satehe epii töpö pakäho opatiilöma.

Suö tänö Jesus a höpöpalöma, a toa kõo soataso noai ĩ ta

⁴³ Jesus a na töpö pakäho opa pole, Jesus a na ĩ töpö huu naionö pamö, ĩ hamö ai suö tä huu naionöma. Satehe epii, 12 inama tä kua waikia kule maaki, a wani kupo soatioma. Töpö toma kõo wi ĩ töpönö ĩ suö tä temö pima maaki, a wani mapo maama. A wani salia satia apatima. A salia apa soa päla nö maaki, töpö ononotama wi ĩ töpö na kama hai ĩ wani tökö pewö totoa asa päköma. Wani töpö pewö totoa asakö noai ha, a ononopo kõo maama. A salia satimo opatima.

⁴⁴ A salia satimo soa tä, Jesus a na a hua hailolö nö, Jesus a na a nasö hulia haikitö nö, ‑Jesus a hai ĩ haloi sa ösö höpöa kuköma, sa temöa konaso kitä‑ a pi kuu salo, haloi ösö kasö höpöama. Jesus a hai ĩ ösö kasö höpöa päoma maaki, a kupo maa kõa soatasoma.

⁴⁵ Jesus a hai ĩ haloi ösö höpöpalöma kutenö, Jesus aiki, ‑Witi pili anö ipa haloi ösökö höpöpali ke?‑ ĩ na a kuuma. Ĩ na a kuu ha, ‑Kamisanö kuno maiö!‑ ĩ na töpö pewö kuu hö̃töoö ha, Pedro aiki, ‑Jesus a pata. Kawa na töpö satehe epii töpö pakäho opa kule nökö. “Witi pili anö ipa haloi ösökö höpöpali ke?” wa ta kuuwö‑ ĩ na a kuuma.

⁴⁶ Ĩ na a kuuma maaki, Jesus a pi hatuka apa salo, ‑Kamisanö ai sa tä toa kõo hãtomani keö! Önö kutenö “Ai tänö sa höpöpali keö!” ĩ na sa kuu kuleö!‑ ĩ na Jesus a kuu kõoma.

⁴⁷ Ĩ na Jesus a kuu kõoö ha, ‑Jesus a pi hatuka apa salo, kamisanö sa höpöpalöhe, ĩ tä taö waikia alu kuleö!‑ ĩ na ĩ tä suö pi kuu nö, a kili ipa salo, a satitimo pola nö, Jesus a kotö ha a mãi poa soataiki nö, ai töpö pewö mamo tetela tä, ‑Kamisanököö! Sa salia apa salo, au haloi sa ösö höpöpali keö! Sa ösö höpöpalöma, sa toa totia apa konaso keö!‑ ĩ na ĩ suö tä kuuma.

⁴⁸ Ĩ na a kuu ha, Jesus aiki, ‑Naka ai. “Jesus a lotete epö salo, kama hai ĩ haloi sa ösö höpöa päpali ke maaki, sa toa konaso kitäö!” ĩ na wa pi kuuhe, ĩ tänö wa toa konaso keö! A pi topai a hua kononöö!‑ ĩ na Jesus a kuuma.

Jesus anö Jaitu a hai ĩ pete a temöa komanö noai ĩ ta

⁴⁹ Ĩ na Jesus a kuuma, a hapalo soa tä, juteu töpö kokamo sinomo wi ĩ a sai ha Jaitu a pata kaikanamo sinomo wi, ĩ a hai ĩ sai a na töpö kuo wi, ĩ ai tä paa lälasoma. A paa lälo nö, Jaitu a pata na, ‑Au thäwö a noma totia apa hisa waikiloheö! Jesus a naka tihöö!‑ ĩ na a kuuma.

⁵⁰ Ĩ na a kuu kule maaki, Jesus anö ĩ ta hini nö, Jaitu a pata na, ‑A pi honipo tihöö! “Jesus a lotete epö salo, ipa thäwö a temöa komani kitäö!” ĩ na wa pi kuu tä, sa wai temöa hö̃töa komani kitäö!‑ ĩ na Jesus a kuuma.

⁵¹ Ĩ na Jesus a kuu nö, Jaitu a sai pö ha töpö kopo nö, ‑Ai pö lisipo tihöö! Pedro a, João a, Tiago a, moko tä hai ĩ pö̃ a, pöpönö a, ĩ na makö kui makö lisia sisapasopököö!‑ ĩ na Jesus anö töpö noa thama.

⁵² Ĩ ha töpö pewö ö̃kötima. Töpö pewö ö̃köpalo opati kule maaki, Jesus aiki, ‑Pö ö̃kö tihöö! Moko tä nasi tuo maaheö! Tä mia päa alu kuleö!‑ ĩ na a kuuma.

⁵³ Ĩ na a kuu ha, ‑Hö. Ĩ na a pi moti kuu tihöö! Tä nasi tua totiköma ta pi kuu mai‑ ĩ na töpö kuuma.

⁵⁴ Ĩ na töpö kuuma maaki, moko tä ami ha Jesus a ami walia soataiki nö, ‑Naka ai! A hoköpaloö!‑ ĩ na lope epii ĩ na Jesus a kuuma.

⁵⁵ Ĩ na Jesus a kuu ha, moko tä temöa kõo soatalo nö, a hoköa kõo soatasoma. A hoköa kõo soatasoö ha, ‑Hi moko tä ösö potepamanöö!‑ ĩ na Jesus anö töpö noa thama.

⁵⁶ Ĩ moko tä hai ĩ pö̃ a, pöpönö a, ĩ na kilii töpö aiki, ‑Kilatiha! Naka wai noma totisoma maaki, Jesus anö a temöa totia komani keö!‑ ĩ na töpö kuu ha, ‑Ai töpö na pö wäo tihöö!‑ ĩ na Jesus anö töpö noa thama.