Lucas 24 - Teusö Tä Waheta

Jesus a temöa konaso noai ĩ ta

¹ Ĩ na tä kua tä, mota mapo wi ĩ tä wakala hasua waikikö noai ha, ĩ tä hena tä sai tä, suö töpönö tuu nisamö toita apii tuu thakö noai, Jesus a titio taso pamö ĩ tuu kai ekua henaköma.

² Töpö ekua henaki nö, Jesus a titilati, ĩ hamö töpö waloa henakitö nö, maa ma patanö taka lakö noai, taka hãkoa kõa waikipalö noai taka tapama.

³ Suö töpönö ĩ tä talalö nö, töpö lisia soatalolö nö, tä möma maaki, Jesus pata tä nomawö makeo noai, ĩ tä pokeoma.

⁴ Jesus a paa mi ha, töpö pi wi na takömo opama. ‑Wi na taköö?‑ suö töpö pi kuu kai öpapalo soa tä, polakapi wano tökö tapamoa soa pätasoma. Kama töpö hai ĩ haloi ösö wakala apama.

⁵ Ĩ tökö taa nö kililali salo, suö töpö mãi poa soataköma. Ĩ ha wano töpö aiki, ‑Wi na makö pi kuu salo, hi thaka taka ha a temö öpii, ĩ ma tae pasia pikitia kule? Hi taka hai, nomawö tä titio wi, ĩ taka pasiwö ta pi kuu mai.

⁶ Hi taka ha Jesus a titia maneö! A temöa kõa waikilo nö, a hua kõa waikisolömaö! Kaliléia tä uli na a hupaloti pola nö, ĩ tä kamakö na a kuu noai, ĩ tä na makö pi hatukua maa kule ta o?

⁷ Pi naka. Ĩ na a kuuma: “Töpö wanisala apii ĩ töpö na sanöma sa kupaso noai, ai töpönö ĩ sa namo simökö nö, sa totoki kitäö! Ĩ töpö wanisala apii ĩ töpönö sa tälö nö, hii ti pakalai ti pesokö ha sa sätämakö nö, sa säpamani pia saloö! Sa säpamanöma, polakapi tä mumi matalo nö, ĩ ai hena tä soatawö sa temöa kõa soatasopö saö!” ĩ na kamakö na Jesus a kuu waikiomaö!‑ ĩ na suö töpö na ĩ na ĩ wano tökö kuu ha,

⁸ suö töpö pi hatuka apa soataiki nö, ‑Hai. Awiö! Ĩ na a kuu kipili nökö‑ töpö pi kuuma.

⁹ Ĩ na töpö pi kuu nö, töpö sapa kopalo nö, 11 töpönö Jesus a kai a hua sinomo noai ĩ töpö, ĩ töpö na ai töpö kua naitio noai ĩ töpö, ĩ na töpö kui töpö pewö na suö töpönö ĩ tä pewö a wäsä soatama.

¹⁰ Maria Matalena a, Joana a, Tiago a hai ĩ pöpönö Maria a, ai suö töpö huu naio noai ĩ töpö, ĩ na suö töpö kui töpö kotapolö nö, Jesus anö kama hai ĩ 11 töpö simöa totia asalö noai ĩ töpö na ĩ suö töpönö tä pewö a wäsä totioma.

¹¹ Tä pewö a wäsä totioma maaki, ‑Suö töpö kuu päta kuleö! Pitili ta mai kitäö!‑ ĩ na Jesus a hai ĩ 11 töpö kule, ĩ töpö kuuma.

¹² ‑Ta holisimo päoköö!‑ ĩ na töpö kuu kule maaki, Pedro a öpa soataiki nö, a läläa soatalolö nö, Jesus a titio noai, ĩ hamö a waloa soataikitö nö, a mãi poa soataikitö nö, watata ösökö toita apii ösökönö Jesus a halo ala noai ĩ ösökö ala taa sisalalöma. Jesus a tapa mai ha, ĩ ösökö taa sisalalö nö, ‑Kilatiha!‑ a pi kulo nö, a kõa soatasolöma.

Emausö tä uli na töpö koonö tä, ĩ töpö na Jesus a tapamo noai ĩ ta

¹³ Ĩ tä wakala na, Jesus a na töpö nokapaloti wi, Emausö tä uli hamö ĩ ai polakapi töpö konasolöma. Motokö kaöpo tä, Jetusalẽi tä uli ha wa husolo nö, wisa täi ha Emausö tä uli ha wa waloa soatakö tasoö.

¹⁴ Emausö tä uli hamö ĩ töpö polakapi koonö pamö, Jesus a kuati noai, ĩ ta kateha kõtioolöma.

¹⁵ Ĩ ta katehati tä, Jesus a waloa haikötö nö, ĩ töpö na a huu naitiolöma.

¹⁶ A huu naitiolöma maaki, Teusö anö ĩ töpö pi motömaköma kutenö, ĩ töpönö Jesus a tai mio opama. ‑Jesus a hãtowö‑ ĩ na töpö pi kuu maama.

¹⁷ Ĩ na tä kua tä, Jesus aiki, ‑Ĩ ka pi ma ta katehati ke?‑ ĩ na a kuu ha, ĩ töpö öpa opia soataiki nö, töpö pi ota apöpalo nö,

¹⁸ Kleiopasö aiki, ‑Jetusalẽi tä uli na wa kuoma maaki, huki tä kuati noai, ĩ wa tä taö pasio mikö?‑ ĩ na a kuu ha,

¹⁹ ‑Ĩ wi na tä kua totioma?‑ Jesus a kuu ha, ‑Pi naka. Nasaté tili Jesus sama katehati ke. “Jesus anö Teusö a kai wäsä sinomoti noai ĩ a. Teusö a kai wäsä tä a hapalo tao opa sinomoö. Jesus a lotete epö kutenö, tä aipöama apa sinomoö” ĩ na töpö pewö pi kutima. Ĩ na Teusö a pi kuu naio noai kitä.

²⁰ Ĩ na tä kua tä, Teusö a täpä sinomo wi ĩ pata töpö, pata töpönö makö simöa sinomo wi ĩ töpö, ĩ na töpö kui töpönö Jesus a namo simökö nö, a säpamanöma. Hii ti pakalai ti ha a sutimakö nö, a säpamanöma.

²¹ “Isöhaeu makö pewö noama nö, makö täapa kõo läo totio piale, ĩ a hai, Jesus a sai hãtowö” ĩ na samakö kupaloti tä, a säa pikipalömae. A säpalö noai, polakapi tä mumi hasua waikipasoma.

²² Ĩ na tä kua tä, Jesus a na samakö nokapalo sinomotipili, huki ĩ ai töpö suönö samakö pi wi na takömoma apama. Tä halu tä, ĩ töpö suö hua henanonö nö, Jesus a nomawö titio taso pamö töpö suö waloa henakitö nö,

²³ Jesus a nomawö tapa mi salo, töpö kõa soatapolö nö, “Jesus a titikö noai, ĩ taka poke epö thaiö! Jesus sama tapa maa keö! Ãju sama töpö taa sisalali keö! ‘Jesus a temöa kõo waikiloheö!’ ĩ na ĩ ãju töpö kuu keheö!” ĩ na ĩ suö töpö kuuma.

²⁴ Ĩ na ĩ suö töpö kuu ha, kamisamakö hai ĩ ai töpö hua nömöa soatalolö nö, “Taka poke epö thaiö!” suö töpö kuu noai, ĩ taka poke taa nömönanö nasoma. Ĩ töpönö Jesus a nomawö titia tapa laso maama‑ ĩ na Jesus a na ta wäsä nö, ĩ na ĩ töpö kuuma.

²⁵ Ĩ na töpö kuu ha, ‑Makö pi motio opapa wi. Teusö a kai wäsä sinomo noai, ĩ ma ta hini haiatalo mi ipö saloö!‑ ĩ na Jesus a kuu nö,

²⁶ ‑Teusö a kai wäsä sinomo noai, ĩ töpö aiki, “Teusö anö a kaikana asapalö noai, waiha ĩ kaikana tä pea totio kitäö! A pea totio paio nö, a kaikanamo totiki kitäö!” ĩ na töpö kuu waikioma salo, ĩ kaikana tä peatima matatä‑ ĩ na Jesus a kuuma.

²⁷ Ĩ na Jesus a kuu nö, ĩ töpö na Jesus anö Moisés a kai wäsä somaö, Teusö a kai wäsä sinomo noai, ĩ töpö kai wäsä nömöoö, ĩ na Jesus anö ĩ ta wäsä thamatima. Moisés a, Teusö a kai wäsä sinomo noai ĩ töpö, ĩ na töpö kui töpönö uni ta thaae nö, Jesus a katehatimae. Jesus a katehati noai, ĩ tä sãökama. Jesus a katehati noai, Jesus anö ĩ tä sãökama wäsä totioma. Ĩ tä na Jesus anö, töpö huti pole, ĩ töpö pi hatukumanöma.

²⁸ Ĩ töpö pi hatukuma pamö, ‑Tole hamö hi a huu pia kulatiö!‑ ĩ na Jesus anö töpö pi thamaö ha,

²⁹ ‑Tä wisa waikileö! Kamisamakö sai pö ha a kua naia paia pätaikiö!‑ ĩ na töpö kuu ha, ĩ töpö na Jesus a lisia naipasolöma.

³⁰ A lisia naipasoma, ĩ töpö na a ia naio pia salo, ĩsa ãi tälö nö, Teusö a na a hapalo nö, ĩ ãi kakapalö nö, ĩ töpö na ãi totoköma.

³¹ Ĩ töpönö Jesus a tai mio opama maaki, Jesus anö ĩsa ãi totoki ha, ĩ tä Jesus a taö kõo soataköma. Jesus a taö kõo soataki ha, ĩ tökö soatawö Jesus a motöa soataköma.

³² A motöa soataki ha, töpö hapalo haitio nö, ‑Piliso hamö makö huti pola nö, Jesus anö Teusö tä waheta na makö pi hatukamati tä, makö pi wakala apati kipii nökö‑ ĩ na ĩ töpö kuuma.

³³ Ĩ na töpö kuu nö, Jetusalẽi tä uli ha töpö hua sapa kõo soatasolöma. Töpö sapa kõo soatalolö nö, Jetusalẽi tä uli na Jesus a kai a hua sinomoti noai ĩ 11 töpö, ai töpö, ĩ na töpö kui töpö kokamo polati, ĩ tä taa soalalö tasoma.

³⁴ Ĩ ha töpö kokamone, ĩ töpö aiki, ‑Ta wäsä noai ĩ pitili taö! Pata tä temöa konasoma thaiö! Simão a na a tapamonasoma thaiö!‑ ĩ na töpö kuuma.

³⁵ Ĩ na töpö kuu ha, polakapi töpö kopoe, ĩ töpönö tä pewö a wäsä hö̃töoma. Piliso hamö töpö huti pola nö, Jesus anö Teusö tä waheta wäsäti nö, sai a na ĩsa ãi totoa tä, ‑Hi a hai, ĩ Jesus a totiwöö!‑ Jesus anö ĩ töpö pi thama noai, ĩ tä pewö a wäsäma.

Kama kai a hua sinomo noai ĩ töpö na Jesus a tapamoa asaso noai ĩ ta

³⁶ Ĩ töpönö tä pewö a wäsä soala tä, töpö loa sototole, ĩ töpö mötali ha Jesus a tapamoa soatalo nö, ‑Makö kilipalo mai, toitai pö kuikiö!‑ ĩ na Jesus a kuuma.

³⁷ Ĩ na a kuu kule maaki, töpö kilipalo opaö, töpö pi honipo opaö, ĩ na töpö kua pola nö, ‑Hi Jesus a õsi hãto päwö‑ ĩ na töpö pi kuuma.

³⁸ Ĩ na töpö pi kuu ha, ‑Ĩ ka pi tä na makö pi honipo opati kule? “Jesus a temö kõo hãto maa noai kitäö!” makö pi kuu salo, makö pi honipoti hãtoa kule?

³⁹ Hiki. Sa amiki möö nökö. Ĩ sa soawö. Sa höpöa nökö. Ĩ sa kuo soa pola sö. Õsi sa mai kitä. Õsi tä thuu tupö wani kua naia mai kitäö! Sa möö totioö, sa höpöaö, ĩ na makö kua nö, “Ã ãi. Ĩ Jesus tä wani kuo soama pi kuu mai” ĩ na makö pewö kuupököö!‑ ĩ na Jesus a kuuma.

⁴⁰ Ĩ na a kuu nö, a ia wi ĩ a ami, a huu wi ĩ a ami, ĩ na a amiki mömo kua soatama.

⁴¹ Jesus a ami pewö mömo soata nö toaö ha, töpö pi mönahapalo opa kule maaki, töpö pi honipo opa nö, ‑Hi Jesus a sai totiwöö!‑ töpö pi kuu tomöpo maama. Ĩ na töpö kuu totio mi kutenö, Jesus aiki, ‑Hisa ha nii tä kua kule?‑ ĩ na a kuu ha,

⁴² ĩ töpönö salaka a see noki wai totoköma.

⁴³ Jesus anö ĩ a noki asawösö wai täa hö̃tölö nö, ĩ töpö mamo tetela tä, a noki asawösö wai oa soatalöma.

⁴⁴ A asawösö wai oa hö̃töalö nö, ‑Kamakö na sa kuo naitiopili, ĩ tä, ĩ na sa kuu kipili: “Moisés a, Teusö a kai a wäsä sinomoti noai ĩ töpö, ama ta thaa sinomo noai ĩ töpö, ĩ na töpö kui töpönö tä sãökökö nö, sa wäsä sinomotima. Sa wäsä nö, ‘Teusö anö a simöpa piale, ĩ na ĩ a kuati kitäö!’ ĩ na töpö kuuma. Töpö kuu noai, ĩ pitili ta totii kuo totio kitäö!” ĩ na kamakö na ĩ na sa kuu tolea totiatalo opati kipili nökö‑ ĩ na Jesus a kuuma.

⁴⁵ Ĩ na a kuu nö, kama hai töpö na Jesus anö Teusö tä waheta taöma totio pia salo, töpö pi hatukamama.

⁴⁶ Töpö pi hatuka totimanö nö, ‑Pi naka. Ĩ na Teusö tä waheta kuu: “Teusö anö Cristo a simöni wi, ĩ a pea totio nö, a nomano nö, polakapi tä mumi matalo nö, ĩ tä hena tä, a temöa kõa soataso kitäö!

⁴⁷ A temöa konasoma, Jetusalẽi tä uli ha töpö kule, ĩ töpö na ta wäsä somataö, ĩ tä uli pewö pata hamö sanöma töpö pilio setekepa apii, ĩ töpö pewö na ĩ ta wäsä nömöoö, ĩ na ta wäsä hätähäa setekea totipali kitäö! Ta wäsä setekeo pola nö, ‘‑Wanisala sa tä thaa noai, ĩ sa tä thaa kota wani ipöö! Teusö a na sa pi wasio naia kuleö!‑ ĩ na wa kuu ha, wanisala wa tä thaa noai, Jesus anö ĩ tä noa thaa waikipalöma kutenö, wanisala wa tä thaa noai, Teusö anö ĩ tä noa hosa waikilömaö!’ ĩ na ĩ tä uli pewö hamö ĩ na ĩ ta wäsä setekea totipalöpököö!” ĩ na Teusö tä waheta kuu‑ ĩ na Jesus a kuuma.

⁴⁸ Ĩ na a kuu nö, ‑Kamakönö ma tä möö taso noai, ĩ makönö ta wäsä totiataloö!

⁴⁹ “Ĩ sa tä totoki kitäö!” ĩ na ipa hao a kuu noai, kamakö na ĩ sa tä simöpa pia kuleö! Önö kutenö, ipa hao anö tä totoa piale, ĩ tänö makö lotetepama paio mi tä, hi Jetusalẽi tä uli ha pö kua paikiö!‑ ĩ na Jesus anö töpö noa thama.

Hi tä hẽtu ha Jesus a konasolö noai ĩ ta

⁵⁰ Ĩ na Jesus anö kama hai töpö noa thaa nö, Petânia tä uli hamö ĩ töpö kai hulasolöma. Ĩ ha töpö kai waloikitö nö, Jesus a poko sononoa soataikitö nö, ‑Teusö anö makö totiapala haio sinomo wi, ĩ sa tä pii kuleö!‑ ĩ na a kuuma.

⁵¹ Ĩ na a kutalo nö, a hoköa soatasoma. Hi tä hẽtu hamö Teusö anö a täa kõa soatalöma.

⁵² A täa kõa soapölö ha, ‑Jesus a hai ĩ kaikana tä sai totiwöö! Teusö anö a simöa totipalö noai ĩ a totiwöö!‑ ĩ na töpö kuu nö, Jetusalẽi tä uli hamö töpö pi mönaha kai hua sapa konasolöma.

⁵³ Töpö hua sapa kononö nö, Teusömo wi a sai ha ĩ töpö kutiki nö, Teusö a na töpö hapalo soatio nö, ‑Teusö ai. Wa totiatalo opawö‑ ĩ na töpö kutima.