Lucas 23 - Teusö Tä Waheta

Pilatosö a pata na ĩ töpönö Jesus a hilaki

¹ Ĩ na töpö kupaloma, töpö hila sototole ĩ töpö pewö öpapalo nö, Pilatosö a pata na Jesus a hilakö tasomae.

² Ĩ a pata na Jesus a hilakötöhe nö, a namo simökö nö, ‑Hi anö juteu samakö pewö wanisalapalama pi topa apamaö! “Sesa kaikana tä na sitipa kökö totoa tihöö!” ĩ na a kuumaö! “Kaikana saö! Teusö anö sa simöpalö noai, Cristo sa sai a hilo wi ĩ sa saiö!” ĩ na a kuu naiomaö!‑ ĩ na töpö pewö kupaloma.

³ Ĩ na töpö kupaloö ha, Jesus a na Pilatosö a pata aiki, ‑Juteu töpö na wa kaikanamo totio wi ĩ wa?‑ a kuu ha, ‑Awai. Wa kuuhe, ĩ sa saiö!‑ Jesus a kuu hö̃töoma.

⁴ Ĩ na Jesus a kuuma, Teusö a täpä sinomo wi ĩ pata töpö, ai töpö pewö sototoa naine ĩ töpö, ĩ na töpö kui töpö pewö na Pilatosö aiki, ‑“Hi anö wanisala tä thaa maa noai kitäö!” ĩ na sa pi kuu kuleö!‑ ĩ na Pilatosö a kuuma.

⁵ Ĩ na Pilatosö a kuu kule maaki, töpö hapalo satimo opati nö, ‑Kaliléia tili töpö na Jesus anö ta wäsä somataö, hi juteu tili töpö pewö na ta wäsä nömöo soataö, ĩ na ta wäsä kua noai, ĩ tänö töpö pewö isi waniho opa thaliö!‑ ĩ na töpö kupalo opama.

⁶ Ĩ na töpö kuu ha, ‑Jesus a hai, kaliléia tili tä?‑ ĩ na a kuu ha,

⁷ ‑Awai‑ töpö kuu hö̃töoö ha, ‑Kaliléia tili töpö na Etoosisö a pata kaikanamo pasiotioöö!‑ ĩ na Pilatosö a pi kuu nö, Jetusalẽi tä uli na Etoosisö a pata hamamo manu kulati, ĩ a pata na Pilatosö anö Jesus a simöpalöma.

Etoosisö kaikana tä na Jesus a hila nömökö taso noai ĩ ta

⁸ Etoosisö a pata na Jesus a simöpali ha, Etoosisö a pi pata mönaha apama. Jesus a kuati noai, Etoosisö a patanö ĩ ta hininöma salo, Jesus a möö pi topa apatima. ‑Sa mamo tetela tä, Jesus anö tä aipama apa nö toapököö!‑ ĩ na a pi pata kutima.

⁹ Ĩ na a pi pata kuti nö, Jesus a waloki ha, Jesus a na Etoosisö a patanö ta hini läoma. Ta hini läoma maaki, Jesus a huo hö̃töo maama.

¹⁰ Ĩ na tä kua tä, Teusö a täpä sinomo wi ĩ pata töpö, Moisés a kai wäsä sinomo wi ĩ töpö, ĩ na kilii töpö pewö sototole, ĩ töpö aiki, ‑Jesus anö wanisala tä tha apa thaliö!‑ ĩ na töpö kupalo opatima.

¹¹ Ĩ na töpö kupalo opatima, Etoosisö a pata, kama hai ĩ sotatu töpö pewö, ĩ na töpö kui, Jesus a na ĩ töpö hapalo pi wasöa apa nö, Jesus a peama apa asama. A peama apa asa nö, kaikana tänö haloi ösö toita apii ösö halopo sinomo wi ĩ ösö tälö nö, Jesus a halomaköma. Ĩ ösönö Jesus a halomakö nö, Pilatosö a pata na a simöa kõköma.

¹² A simöa kõkö noai ĩ tä wakala na soatawö, Etoosisö a pata, Pilatosö a pata, ĩ na kilii töpö noimaso kua kõa soataköma. Töpö wanihasotima maaki, ĩ tä wakala soatawö, töpö noimaso kõa soataköma.

Pilatosö a pata na Jesus a kua kõa kule

¹³ Ĩ na tä kua tä, Teusö a täpä sinomo wi ĩ pata töpö, ai juteu pata töpö nai soatawö, juteu töpö pewö, ĩ na töpö kui, Pilatosö a patanö ĩ töpö pewö kokamoa totimanö nö,

¹⁴ ‑Kamisa na Jesus ma hilaköso nö, “Jesus anö töpö pewö isi wanihapalama apati thaliö! Wanisala tä thaa toitio wi ĩ a totiwöö!” ĩ na makö kuu asa kule maaki, “Pitili maköö!” ĩ na sa pi kuu pasia maneö!

¹⁵ Ĩ na Etoosisö a pi pata kuu naia maneö! Hiki. Kamisa na ĩ a patanö Jesus a simöa sapa kõa saipale ta. Wanisala tä thaa wi ĩ tä noa na töpö säpamo sinomo wi, Jesus anö ĩ tä wanisala thaa maama matatä.

¹⁶ Önö kutenö, Jesus sama soa päpalö nö, sa hula kopalöpököö!‑ ĩ na Pilatosö a pata kuuma.

¹⁷ [Ĩ tä inama pewö hamö juteu töpö pásökoamo tä, titita wi a sai ha töpö titile, Pilatosö a patanö ĩ ai tä atupama kõo sinomoma. ‑Ĩ a wani lisia kopamanöö!‑ Pilatosö a pata na ĩ na juteu töpö kuu ha, ĩ ai tä atupama kõo sinomoma.]

¹⁸ ‑Jesus sa hula kopalöpököö!‑ Pilatosö a pata kuu ha, ‑Jesus a säpalöö! Pahapásö wa wani hula kõa pasipalö nö, kamisamakö na a wani lisia kõa pasipamanöö!‑ ĩ na töpö lalupalo kuutoma.

¹⁹ Pahapásö a waninö ai jetusalẽi tili töpö pi lulumaki ha, kaikana tä na töpö hölapaloö, Pahapásö a waninö ai tä säpali, ĩ na a wani kua noai, ĩ tä noa na sai a lototoa apöle, ĩ a sai õsimö ha pata töpönö Pahapásö a wani titikö noai, töpö lalupalo opati pole, ĩ töpönö ĩ a wani lisipama pi topa apa kõoma.

²⁰ ‑Pahapásö a wani lisia kopamanö nö, Jesus a hulapa kõo tihöö!‑ ĩ na töpö kupaloti kule maaki, Pilatosö a patanö Jesus a hulapa pi topa apa kõa salo, ĩ töpö na a hapalo kõoma.

²¹ A hapalo kõoma maaki, ‑Hii ti pakalai ti ha Jesus a pi hĩtaköö! Hii ti pakalai ti ha Jesus a pi hĩtaköö!‑ ĩ na töpö lalupalo opöla nö, ĩ na töpö kuutoma.

²² Ĩ na töpö kuutoö ha, ‑Ĩ ka pi tä noa nakö?‑ ĩ na polakapi Pilatosö a kuu pi kua waikipasoma maaki, Pilatosö aiki kõtawö, ‑Ĩ ka pi tä noa nakö? Wanisala tä thaa wi ĩ tä noa na töpö säpamo sinomo wi, Jesus anö ĩ tä wanisala thaa maama. Önö kutenö, sa soa päpalö nö, sa hula kopalöö!‑ ĩ na Pilatosö a pata kuu kõoma.

²³ Ĩ na a pata kuu kõa kule maaki, pe epii töpö lalupalo opati nö, ‑Hii ti pakalai ti ha a pi wani hĩtaköö!‑ töpö kuu satimo opati ha,

²⁴ ‑Awai‑ ĩ na Pilatosö a kuu kõa hö̃tösoma.

²⁵ A kuu kõa hö̃tölo nö, ai töpö hölapalamaö, ai tä säpali, ĩ na a wani kuati noai, ĩ tä noa na a wani titia hö̃tökö noai, ĩ töpö pewönö ĩ a wani naka noai, Pilatosö a patanö ĩ a wani lisia kopamanöma. Jesus a hulapa kõo mai ha, ‑Ĩ töpö pewönö Jesus a thama pi topa wi, ĩ töpö pewönö ĩ tä thama totiopö‑ ĩ na Pilatosö a pata kuuma.

Simão a waninö hii ti pakalai ti pata maonönö noai ĩ ta

²⁶ Ĩ na tä kua tä, sotatu töpönö Jesus a kai huu soalö pamö, pölösö ha siteni tä Simão a wani huu läo noai, ĩ a wani waloa läköma, sotatu töpönö ĩ a wani hua lälö nö, ĩ a wani na hii ti pakalai ti pata maomakö nö, ‑Peiö! Jesus a na a huu naionöö!‑ ĩ na a noa wani thama.

Hii ti pakalai ti ha Jesus a pi hĩtakö noai ĩ ta

²⁷ Ĩ na tä kua tä, Jesus a na töpö satehe epii töpö nokaalöma. Suö töpö kai pewö nokaalöma. Ĩ suö töpö nokaalö pamö pe epii töpö pi ota apaimataso salo, töpö lalupalo opa nö, Jesus a na töpö ö̃köpaloma.

²⁸ Ĩ suö töpö ö̃köpaloö ha, Jesus a nomöhöpalo nö, a mamo tetepa sapa koiki nö, ‑Jetusalẽi tilisoma pö! Sa nö ö̃köpo maikiö! Kamakö, kamakö hai ulu töpö, ĩ na makö kui makö na pasiwö pö ö̃kö totio pasioö!

²⁹ Pi naka. Waiha ĩ na tä kua kitäö! “Ulu tä kupo mi ipii, ĩ töpönö ulu tä thapa pasio maa noai, ulu tä satiapalama pasio ma apa noai, ĩ töpö topa apa asa kuleö!” ĩ na tä kuu wi tä kupaso kitä.

³⁰ Ĩ tä, töpö pewö pepalo opati salo, maa makö na töpö hapalo nö, “Kamisamakö hẽtu ha maa makö soa hẽtua nö toikö sa” ĩ na töpö kuu kitäö! Töpö kuu nö, “Samakö patilia sosa totikiö!” ĩ na heuma tökö na töpö kupalo naio kitäö!

³¹ Hii tiki liä tä, wani ipii tiki wakö umöo sinomoö. Tiki siliki ipö tä, lope epii tiki wakö umöa haitaki. Ĩ na ĩ tä kua kua wi na, ĩ na ai töpö kua hö̃töoö. Huki sa pea kule maaki, waiha pe epii juteu makö pepalo opa kuki kitä‑ ĩ na Jesus a kuuma.

³² Ĩ na tä kua tä, ‑Jesus ma säpali salo, wanisala tä thati noai, polakapi ĩ ma tökö wani säa naia soapalöö!‑ ĩ na sotatu töpö noa thaö ha, Jesus a kai huulö tä, polakapi ĩ tökö kai huu naioma.

³³ Ĩ töpö pewö kai hulolö nö, He manokosi tä uli ha töpö kai waloikitö nö, ĩ ha hii ti pakalai ti ha Jesus a pi hĩta soatakömae. Ĩ polakapi töpönö wanisala tä thatala apati noai, ai tiko tiki na ĩ töpö pi hĩta sätäa naia soataköma. Jesus kate a poko kuamö kule hamö ai tä pi hĩtamö thaki, hai a poko kuamö kule hamö ai a pi hĩtamö thaki, ĩ na töpö pi hĩta sätäa polaka thaköma.

³⁴ [Ĩ töpö pewö pi hĩta tä, Jesus aiki, ‑Hapa. Hi töpönö sa pi hĩtake, ĩ tä na ĩ töpö pi hatukuo ma apapawö. Töpö pi moti ipö kutenö, sa pi hĩtake, ĩ wa tä noa mapamanö nö, ĩ töpö na a hĩso hãto tihöö!‑ a kuuma.] Ĩ na tä kua tä, ‑Witi pili töpönö Jesus a hai haloi ösö täa asalöpö?‑ ĩ na ai töpö kuu nö, maa makö ose wai ha tä sãökökö noai, ĩ makö wai säsäkö nö, ai töpönö Jesus a hai haloi ösö täa asalöma.

³⁵ Ĩ ha satehe epii töpö mamo tetela tä, Jesus a na juteu pata töpö hapalo pi wasöa apatima. Töpö hapalo nö, ‑Ki anö ai töpö noama läo sinomopili maaki, kama noao sapao kõo mi salo. Teusö anö a saia totilö nö, ĩ a simönö noai, ĩ Cristo a hilo wi, ĩ a kutenö, a noma piale, ĩ kama noao sapao kõo mai a!‑ ĩ na töpö kupalo pi wasöa apatima.

³⁶ Ĩ tä, Jesus a na sotatu töpö hapalo pi wasöa naioma. Jesus a na tuu pi wasu upii tuu pi totokö nö,

³⁷ ‑Juteu töpö na wa kaikanamo wi ĩ wa kutenö, wa peati pole, ĩ tä na kama wa noamo sapamo kõo pasiopököö!‑ ĩ na töpö ĩkapalo kuutoma.

³⁸ Ĩ ha hii ti pakalai ti ha Jesus a pi hĩtale, Jesus a hẽtu ha hii ti ola tolehele, ĩ ha, Hi a hai, juteu töpö na a kaikanamo totio wi ĩ a ĩ na tä kuu wi tä sãökama pi sätämaköma.

³⁹ Ĩ na tä kua tä, wanisala tä tha apati noai, ĩ töpö pi hĩta sätäle, Jesus a na ĩ ai a wani hapalo pi wasöa soatalo opati nö, ‑Teusö anö wa simönö noai, ĩ Cristo wa hilo wi ĩ wa sai ta o? Ĩ wa totiwö aköna, kama wa noamo sapamo kõo, samakö noama naioö, ĩ na wa kua kipi ta. Hi ti na makö noma piale, ĩ tä na makö noama pola pi, wa pi kuu maiki‑ ĩ na a wani kuuma.

⁴⁰ Ĩ na a wani kuu ha, ai tä pi hĩta sätäle, ĩ aiki, ‑Ĩ makö pewö peama pasia kule maaki, Teusö a na wa kili ma apapa wikö a!

⁴¹ Kawa, kamisa, ĩ na kilii makönö wanisala ma tä thatala apati noai, ĩ tä noa na makö pepalama kule maaki, hi Jesus anö wanisala tä thaa pasio maama‑ ĩ na a kuu nö,

⁴² Jesus a na, ‑Jesus ai. Wa huu kõa tä, wa kaikanamo totio piale, ĩ tä, kamisa na wa pi motöpo mai, sa totiapala totio solöpököö!‑ ĩ na a kuuma.

⁴³ Ĩ na a kuu ha, ‑“Tä uli toita apii, ĩ tä uli ha Teusö a thapo wi ĩ õsi töpö kulei, huki ĩ hamö kamisa na wa kua naiki kitäö!” ĩ na sa kuu kuleö! Pitili sa‑ ĩ na Jesus a kuuma.

Jesus a nomaso noai ĩ ta

⁴⁴ Ĩ na tä kua tä, motokö hẽtupo tä, ĩ tä uli pewö hamö mumi mumi tä pata waloa soa pätaköma. Mumi mumi tä pata waloa soa pätakö nö, motokö kaöpo opa tä, tä pata wakala kõo soa pätaköma.

⁴⁵ Ĩ tä, Teusömo wi a sai õsimö ha watata ösökö pata supei, ösökö pata katöle, ĩ kama mötali ösökö kaka saimoa päpasoma.

⁴⁶ Ĩ tä, lope epii Jesus a hapalo nö, ‑Hapa! Sa õsi tälöö! Kamisa õsi täa konöö!‑ ĩ na Jesus a kuu nö, ĩ ha a noma soatasoma.

⁴⁷ Jesus a kuati noai, ai sotatu tänö ĩ tä tati nö, ‑Teusö a totiatalo opati nö kiliawö‑ a pi kuu nö, ‑Hi Jesus anö wanisala tä thaa maa noai ĩ a totiwöö! Pitili saö!‑ ĩ na a kuuma.

⁴⁸ Ĩ na tä kua tä, Jesus a pi hĩtale, ai töpö satehe epii töpönö ĩ tä möö pi topa apa salo, hii ti pakalai ti ha Jesus a pi hĩta pa, töpö kokamonasoma. Ĩ töpönö Jesus a kua noai ĩ tä taa nö, kama töpö pi ota apa salo, kama töpö kotopö säo kõo pola nö, töpö konasolöma.

⁴⁹ Ĩ töpö satehe epii töpö konasolö noai ha, Jesus a hai ĩ noi töpö pewö, Kaliléia tä uli ha Jesus a hupalo somatia tä, Jesus a na suö töpö nokapalo soma noai ĩ suö töpö nokapalo soatile ĩ töpö suö, ĩ na töpö kui, pasökö tömö ĩ töpö öpa haipalo nö, Jesus a na töpö mamo teteo haitioma.

Thaka taka ha Jesus a nomawö titikö noai ĩ ta

^50-52 Ĩ na tä kua tä, Atimatéia tä uli ha juteu töpö pililati, ĩ tä uli ha José a pilio naio noai, ĩ anö Pilatosö a pata na Jesus pili tä nakama. José a hai, juteu pata töpö kokamo sinomo wi ĩ ai a kuo naio soatama. José a topa apama. A makoka apatima. ‑Jesus ma säpamanöpöö!‑ ĩ na juteu pata töpö kuuma maaki, ĩ na José a kuu naio maama. Teusö a kaikanamo toitio wi, José anö ĩ tä walo tatima.

⁵³ Ĩ anö Jesus pili tä nakalö nö, Jesus a nomawö ithoa kopamanö nö, watata ösökö toita apii ösökönö Jesus a halo kolilipalö nö, maa makö ha nomawö töpö titiopö ĩ thaka taka thakö noai, ĩ taka na ai nomawö tä titio paio maama taka na José anö Jesus a titiköma.

⁵⁴ Mota mapo wi ĩ tä wakala kupo kõo pia tä, Jesus a titiköma.

⁵⁵ Kaliléia tä uli ha Jesus a hupalo somatia tä, Jesus a na suö töpö nokapaloti noai ĩ töpö nokapalo soatile ĩ töpö hulolö nö, ĩ töpö suö mamo tetela tä, José anö Jesus a titiköma.

⁵⁶ Ĩ suö töpönö ĩ tä möö nö, töpö kõa soatapo nö, Jesus a nomawö hulukupali pia salo, tuu nisamö toita apii, tuu tapu upii, ĩ tuu thakömae. Ĩ tuu thakö nö, mota mapo wi ĩ tä wakala kuiki nö, ‑Ĩ tä wakala ha pö kalipalo ti!‑ ĩ na Teusö tä waheta kuuma kutenö, ĩ suö töpö mota mapo paioma.