Lucas 22 - Teusö Tä Waheta

Juteu pata töpönö Jesus a säpa pi topa apa

¹ Ĩ na tä kua tä, juteu töpö kokamo nö, ĩsa ãi hölö maa noai, ĩ ãi oalöpö, ĩ pásökoa tä wakala ateo opa waikioma.

² Önö kutenö, Teusö a täpä sinomo wi ĩ pata töpö, Moisés a kai wäsä sinomo wi ĩ töpö, ĩ na töpö kui töpönö Jesus a säpa pi topa apama maaki, ai töpö pewö na ĩ töpö kili salo, ‑Wi na Jesus ma säa thapalöpö?‑ ĩ na töpö kuuma.

Jutasö a waninö Jesus a monima pia salo

³ Ĩ na tä kua tä, 12 töpönö Jesus a kai a hua sinomo noai, ĩ ai tä hai, Jutasö Isökatiosisö a hilo wi, ĩ a õsi na Sai tä sai pata titiköma.

⁴ A titiki ha, Teusö a täpä sinomo wi ĩ pata töpö na Jutasö a ekuiki nö, ‑Kamakö na Jesus sa totoköpöö!‑ ĩ na a kuuma.

⁵ Ĩ na Jutasö a kuu ha, ĩ pata töpö pi mönaha apa nö, ‑Jesus wa totopi wi ĩ tä noa na sitipa sama kö totoa hö̃töki kitäö!‑ ĩ na töpö kuuma.

⁶ Ĩ na töpö kuu ha, ‑Awai‑ Jutasö a kuu nö, ‑Ai töpö satehe epii töpö mamo tetea mai ha, Jesus sa totoköpökö o!‑ ĩ na a pi kuuma.

Pásökoa tä wakala ha Jesus anö kama hai 12 töpö kai iapalo noai ĩ ta

⁷ Ĩ na tä kua tä, töpö pásökoamo tä, oweha a tialöpö, ĩsa ãi hölö mai, ĩ ãi oalöpö ĩ tä wakala kuköma. Ĩ tä wakala na oweha pö ose wai sä sinomotima.

⁸ Ĩ tä wakala kuki ha, Jesus anö Pedro a, João a, ĩ na kilii töpö simönö nö, ‑Hi pásökoa tä wakala na oweha ma oalöpö, makö hulolö nö, nii tä, oweha a löpö, ĩ na tä kui tä pi makekötöö!‑ ĩ na töpö noa thama.

⁹ Ĩ na töpö noa thaö ha, ‑Witi hamö samakö huu lasopö?‑ töpö kuu ha,

¹⁰ ‑Jetusalẽi tä uli ha makö lisipalo nö, ĩ ha maa tuu pi po pole, ĩ a na pö nokalolöö! Makö nokasolöma, kama sai pö na a lisipo kõo pa,

¹¹ ĩ ha pata tä pata kule, ĩ a pata na ĩ na makö kuu! “Ipa pata tä aiki, ‘Kamisa, sa kai a hua sinomo wi ĩ töpö solo, pásökoa tä wakala na samakö iapalopö, witi ha ĩ a sai sai?’ ĩ na ipa pata tä kuu kulaiö!” makö kuu!

¹² Ĩ na makö kuu ha, sai a hösöka ha a sai kai pehai a sai kule, ĩ pata tänö ĩ a sai namo simöki kitä. Mesa tiki, ia kai lota wi ĩ tiki, ĩ na tiki kui tiki hĩta soatale kitä. Ĩ ha nii tä, oweha a löpö, ĩ na tä kui tä pi makekötöö!‑ ĩ na Jesus anö töpö noa thama.

¹³ Ĩ na töpö noa thaö ha, töpö hua hö̃tösolöma, Jesus a kuu totio noai, ĩ na tä pewö kuo totioma. Ĩ na tä pewö kua toti ha, ĩ ha pásökoa tä na töpö iapalopö, ĩ nii tä, oweha a löpö, ĩ na tä kui tä makeköma.

Jesus a uni na töpö iapalo wi ĩ ta

¹⁴ Nii tä, oweha a löpö, ĩ na tä kui tä makea waikikö noai ha, Jesus a waloiki nö, Jesus anö kama hai ĩ 12 töpö simöa wi ĩ töpö kai loiki nö,

¹⁵ Jesus aiki, ‑Sa pea paio mai ha, kamakö na hi makö pásökoamo pole, ĩ tä na sa iapalo pi topa apa naio thaliö!

¹⁶ “Makö pásökoamo pole, ĩ tä na sa iapalo kõo haita mai kitä. Waiha Teusö a kaikanamo totio wi ĩ tä kupo kõa tä, sa iapalo kõo sisa pia salo” ĩ na sa kuu kule‑ ĩ na Jesus a kuuma.

¹⁷ Ĩ na Jesus a kuu nö, thomo thomo puu pi täa soatalö nö, Teusö a na, ‑Hapa. Wa toita apö. Hi thomo thomo wa puu totopi ke‑ ĩ na a kuuma. Ĩ na a kuu nö, kama hai ĩ töpö na, ‑Ika. Tuu pewö koalöheö!

¹⁸ “Teusö a kaikanamo totio pia wi ĩ tä walo paio mi tä, hi thomo thomo sa thomo puu koa kõo paio mai kitä” ĩ na sa kuu kule‑ ĩ na Jesus a kuuma.

¹⁹ Ĩ na Jesus a kuu nö, ĩsa ãi täa soatalö nö, Teusö a na, ‑Hi ĩsa wa ãi totopi ke. Wa totiatalo opawö‑ a kuu nö, ĩ ãi nakasipalö nö, kama kai a hua sinomo wi ĩ töpö na ĩ tä totoma soatama. Ĩ ãi totoa soatakö nö, ‑Hi ãi hai, pili sa sai. Makö noama pia salo, pili sa sai waniapo piale, ĩ tä uni. Ĩ ma ãi oa pola nö, “Hi ãi hai, Jesus anö samakö noamapö ĩ tä uni” ĩ na makö pi kuu sinomoö!‑ ĩ na Jesus a kuuma.

²⁰ Ĩ na Jesus a kuu nö, töpö ia matalo nö, thomo thomo puu pi täa nömötalö nö, ‑Hi kamisa iä. “Kamisanö makö täapa totio kõo läo kitäö!” ĩ na Teusö a kuu totioma kutenö, kamisa iä pö kupaso kitä. Sa iä pö kupaso salo, makö täapa totio läo kõo kitä‑ ĩ na Jesus a kuuma.

²¹ Ĩ na a kuu nö, ‑Kamisa na a monimo pole, hisa ha ĩ a ia naia kule.

²² Teusö aiki, “Ĩ na tä kua totio kitä” ĩ na a pi kuu waikioma salo, sanöma sa kupaso noai, ai töpönö ĩ sa säa hö̃töpali kitä maaki, kamisa na a monimo pole, Teusö anö ĩ a peama hö̃töo kitä‑ ĩ na Jesus a kuuma.

²³ Ĩ na a kuu ha, kama töpö hapalo hẽtupaso nö, ‑Hisa makö lole, ĩ witi ai anö Jesus a monima kule?‑ ĩ na töpö kupaloma.

Witi pili a hai ĩ pata tä sai?

²⁴ Ĩ na töpö kuu nö, töpö hapalo kõo hẽtupaso nö, ‑Hi makö lole, ĩ makö hai, ĩ witi pili hai ĩ pata tä sai?‑ ĩ na töpö kuu kai lotioma.

²⁵ Ĩ na töpö kuu kai lotio pa, Jesus aiki, ‑Kaikana töpönö kama hai ĩ töpö simöa sinomoö. “Ĩ pata tä topa” ĩ na pata töpönö kama hai ĩ töpö pi thama pi topa sinomoö.

²⁶ Ĩ na pata töpö kuati kule maaki, ĩ na makö kua naio maapöö! Ai kaikana wa kupasoma, hĩsa tä simöo mi ipii, ĩ a kua kua wi na, ĩ na wa kua hö̃töopöö! Ai pata tänö ai tä wani simöa sinomo wi, ĩ a wani kua kuati wi na, ĩ na pata wa maaki, ĩ na wa kua hö̃tötiopö.

²⁷ Witi pili a hai ĩ pata tä sati ipö? A lole, ĩ a iapalo asa wi ĩ pata tä hãtowö? Ai tänö nii tä thati nö, ĩ nii tä totoma sinomo wi ĩ a hai ĩ pata tä hãtowö? Ma. A ia kai lole, ĩ a hai, ĩ pata tä asawö. Ĩ na tä kua kule maaki, nii tä totoma wi, ĩ a kua kua wi na, ĩ na kamisa kua kua hö̃töoö.

²⁸ Sa pepalo opa thali maaki, kamisa na makö nokapalo mapo maama.

²⁹ Kamisa na ipa hao aiki, “Ĩ töpö na a kaikanamo totihoö!” ĩ na a kuu kua noai na, ĩ na kamakö na kamisa aiki, “Ai töpö na makö kaikanamopöö!” ĩ na sa kuu kua hö̃töa kule.

³⁰ Sa kaikanamo totiköma, kamakö solo makö pewö iapalo kõpö. Lotami ti na kaikana tä loo sinomo wi, ĩ tiki na makö lotiki nö, makö kaikanamo nö, Isöhaeu a pelupö töpö, ĩ 12 töpö kui töpö kuo noai, ĩ ola töpö pewö na ma tä makokama läapalo kuki kitä‑ ĩ na Jesus a kuuma.

Sai tä sai patanö Pedro a peama pia salo

³¹ Ĩ na Jesus a kuu nö, Pedro a na a hapalo nömöo nö, ‑Simão ai. Pi naka. Sai tä sai pata aiki, “Jesus a kai a hua sinomo wi ĩ sa töpö wapa pi topa kuleö!” ĩ na a pi kuuma. Ĩ na a pi kuu salo, ĩsa ãi saösa kua wi na, ĩ na Sai tä sai patanö makö thama pia salo. Makö peama pia salo.

³² Sai tä sai patanö makö wapa kitä maaki, Teusö a na sa hapalo nö, “Kamisa na Pedro a mamo teteo mapo maapöö!” ĩ na sa kuu hö̃töo kitä. Ĩ na sa kuu ha, kamisa na wa mamo tetea totia koiki nö, kamisa na wa nokapalo totia apa kõköma, au noi töpönö sa thapo naio wi, ĩ töpö pi lotetea totimaköö!‑ ĩ na Jesus a kuuma.

³³ Ĩ na Jesus a kuu ha, ‑Pata! Kawa na sa nokapalo mapo mai kitäö! Titita wi ĩ a sai ha wa huu tä, ĩ ha sa huu naio kitäö! Wa säpamo kuköma, sa säpamo naiso kitäö!‑ ĩ na Pedro a kuuma.

³⁴ Ĩ na Pedro a kuu ha, ‑Pedro ai. “Huki kalaka a komö halu paio mai ha, kawa aiki, ‘Jesus sa tai mi ipö’ ĩ na satehei, ĩ 3 wa kuu pi kupaso kitä” ĩ na sa kuu kule‑ ĩ na Jesus a kuuma.

Töpö wanisala apii töpö peama thama wi na, ĩ na Jesus a peama thama hö̃töo pia salo

³⁵ Ĩ na a kuu nö, ‑Kamisanö makö simönö nö, “Sitipa kökö pi, nii tä pi, sãtália tökö, ĩ na tökö kui ma tökö poolö maikiö!” ĩ na makö noa thaa kipili. Pokei makö simönöma tä, makö huulö pamö makö oio hãtoma? Haloi ösö na makö honimo hãtoma?‑ ĩ na Jesus a kuu ha, ‑Ma‑ töpö kuu hö̃töoma.

³⁶ Ĩ na töpö kuu ha, ‑Pokei makö huu soma kipili maaki, huki kamakö na töpö pewö noi mai kitä. Önö kutenö, au sitipa wa kökö pi thapo pole, ĩ tä tälölöö! Au solai a silölöö! Ai wanö poo wa thapo mi salo, au wa ösö hãsokopo wi, ĩ wa ösö totokö nö, ĩ tä noa na au poo a tälöö!

³⁷ Ĩ na sa kuu kule: “Wanisala tä thaa wi, pata töpönö ĩ töpö peama thama wi na, ĩ na hi a peama thama naio soata kitäö!” ĩ na Teusö tä waheta kuu wi, kamisa katehati alu kule. Pitili ta. Huki pata töpönö sa peamapö sa‑ ĩ na Jesus a kuuma.

³⁸ Ĩ na a kuu ha, ‑Kaikana ai. Hisa ha polakapi poo kökö kua kuleö!‑ ĩ na töpö kuuma. Ĩ na töpö kuu ha, ‑Pei. Ĩ na pätawöö!‑ Jesus a kuu hö̃töoma.

Olipa tiki tä heuma ha Teusö a na Jesus a hapalo noai ĩ ta

³⁹ Ĩ na Jesus a kuu nö, Olipa tiki tä heuma hamö a huu sinomoma kutenö, ĩ hamö a hua kõa soatasolöma. A hua soatasolö ha, kama kai a hua sinomo wi ĩ töpö nokasolöma.

⁴⁰ Töpö nokaalö tä, ‑Ki hamö makö waloikitö nö, Teusö a na makö hapalopököö!‑ Jesus a kuu nö, ĩ hamö töpö waloikitö nö, Jesus aiki, ‑Teusö a na pö hapaloö! “Sai tä sai patanö samakö wapa wi ĩ tä na samakö noamaö! Wanisala sama tä thaa matimöö!” ĩ na pö kuu!‑ ĩ na Jesus a kuuma.

⁴¹ Ĩ na a kuu nö, tole tömö a huu sokatasoma. Maa ma säsälöma, maa ma kea tolehea kutakö taso wi na, ĩ na Jesus a huu kua tasoma. Ĩ na Jesus a huu kutalo nö, pili a maekonö a hĩta thaiki nö, Teusö a na a hapaloma.

⁴² A hapalo nö, ĩ na a kuuma: ‑Hapa. “Sa noma piale kawanö ĩ sa noama pi topa tä, sa noamaö!” ĩ na sa kuu kule. Sa noma pasilo nö, sa hoteso wi, ĩ sa tä pii mi. Sa noma wani ipö maaki, “Wa noma päloö!” wa kuu ha, “Ö̃kö. Awai” ĩ na sa kuu hö̃töa pätaloiö!‑ ĩ na Jesus a kuuma.

⁴³ [Ĩ na a kuu nö, ĩ tökö soatawö, Teusö a hai ĩ ãju tänö Jesus a lotetepamani pia salo, a ithopalo nö, a tapamonasoma.

⁴⁴ A tapamono nö, Jesus a pasilipalöma. A pasilipalöma kutenö, pe epii Jesus a pi ota apati nö, Teusö a na a hapalo loteteo satio opama. Teusö a na a hapalo lotetea satia apaö ha, iä iä tä kui na, ĩ na Jesus a sopi kui tä päsä päsämotima.]

⁴⁵ Ĩ na tä kua tä, Teusö a na Jesus a hapalo matalo nö, a öpa kotalo nö, kama kai a hua sinomo wi ĩ töpö na a ekua kotaköma, töpö mioma. Töpö pi wanisala apa kutenö, töpö mitioma.

⁴⁶ Töpö mitioö ha, ‑Wi na makö pi kuu salo, makö mitia kule? Makö hoköpalo nö, Teusö a na pö hapaloö! “Sai tä sai patanö samakö wapaö ha, wanisala sama tä thaa matimöö! Önö kutenö samakö noama totihoö!” ĩ na pö kuu‑ ĩ na Jesus a kuuma.

Jutasö anö Jesus a monima noai ĩ ta

⁴⁷ Ĩ na Jesus a hapalo kuu soala tä, töpö satehe epii töpö waloa läköma. Jesus a kai a hua sinomo wi, ĩ ai tä aiki, ĩ Jutasö a hilo wi, ĩ a huu tolehepalo nö, Jesus a na a waloa somataiki nö, noi töpönö ai töpö hũko ususa kua wi na, ĩ na Jutasö anö Jesus a hũko ususa thama läoma.

⁴⁸ A hũko ususa thama läoö ha, Jesus aiki, ‑Jutasö ai. Wa monimopa wi, sanöma sa kupaso noai, ĩ sa hũko ususa totiapala apa nö kilile?‑ ĩ na Jesus a kuuma.

⁴⁹ Ĩ na a kuu ha, Jesus a kotö ha kama hai ĩ töpö öpale, ĩ töpönö tä pewö taa nö, ‑Poo anö hi sama töpö säpökö?‑ töpö kuuma.

⁵⁰ Ĩ na töpö kuu noai, ĩ ai tänö poo a läkälö nö, ai tä sömöka wani pasopalöma. Teusö a täpä totio wi ĩ pata tä na ai a kalipalo sinomo wi, ĩ kate a poko kuamö kule hamö a sömöka kuamö kule, ĩ a sömöka wani pasopalöma.

⁵¹ A sömöka pasopali ha, ‑Ĩ na pätawöö!‑ ĩ na Jesus a kuu nö, ĩ a sömöka na a ami walia kõo soataiki nö, a sömöka topa kõo soataköma.

⁵² A sömöka topa kõo soatakö nö, Teusö a täpä sinomo wi ĩ pata töpö, Teusömo wi a sai ha töpö läo sinomo wi ĩ töpö, ai juteu pata töpö, ĩ na töpö kui töpönö Jesus a läkäaalö piale, ĩ töpö na Jesus a hapalo nö, ‑Sa läkäli pia salo, kamisa na poo kökö, hii tiki, ĩ na ma tä kai huu kua saio noa. Töpö waitili ipii töpö thomömo sinomoti wi, ĩ ai sa mai kitä ta pi kuu mai.

⁵³ Ĩ tä wakala pewö hamö Teusömo wi a sai ha kamakö na sa kuo naio sinomo kipili maaki, sa läkäpo maapili maaki, huki kamakönö sa thama pia wi ĩ tä waloki ke. Mumi mumi tä na Sai tä sai pata kuati pole, ĩ a sainö sa thama totio pia kule‑ ĩ na Jesus a kuuma.

‑Jesus sa tai mi ipöö!‑ Pedro a kuu kõpa noai ĩ ta

⁵⁴ Ĩ na tä kua tä, ĩ töpönö Jesus a huölöe nö, Teusö a täpä totio wi ĩ pata tä sai pö ha Jesus a kai hua soatasolöma. A kai huu waikiolö tä, ĩ töpö noa hamö, pai hamö Pedro a huu haitiolöma.

⁵⁵ Ĩ töpö pewö hulolö nö, pata tä sai pö ha töpö waloikitö nö, sapono a mötali ha koa taka säpa nö, ĩ taka kotö ha töpö loa sokea soaköma. Ĩ ha Pedro a loa naiköma.

⁵⁶ Ĩ koa taka kotö ha Pedro a lotia tä, pata tä na ai moko tä kalipalo sinomo wi ĩ anö Pedro a talalö nö, Pedro a na a mamo teteiki nö, ‑Ki a lole, Jesus a na a huu naio sinomo wi ĩ a‑ ĩ na moko tä kuuma.

⁵⁷ Ĩ na moko tä kuu ha, ‑Suö ai! Naiö! Jesus sa tai mi‑ ĩ na Pedro a kuuma.

⁵⁸ Ĩ na tä kua tä, waiha ai wano tänö Pedro a möö nö, ‑Jesus a na makö nokapalo sinomo wi ĩ ai waö!‑ ĩ na a kuu kule maaki, ‑Naiö! Jesus a na sa nokapalo sinomo wi ĩ sa pasi mai kitäö!‑ ĩ na a kuuma.

⁵⁹ Ĩ na tä kua tä, waiha koa taka säa kõköma tä, ai tä aiki nömöwö, ‑Hi a lole, ĩ kaliléia tili tä pasi kutenö, Jesus a nokapalo totio wi ĩ a pasiwö‑ ĩ na ai tä kuu ha,

⁶⁰ ‑Wa ta kateha pole, ĩ sa tä tai mi ipö‑ ĩ na Pedro a kuu hö̃töoma. Ĩ na a kuu hö̃töa tä, kalaka a komöa soatasoma.

⁶¹ Kalaka a komö tä, ĩ tökö soatawö, Jesus a nomöhöpalo nö, Pedro a na a mamo tetea soataköma. A mamo tetetaki ha, Pedro a pi hatuka apa soasoma. ‑Huki kalaka a komö halu paio mai ha, “Jesus sa tai mi ipö” ĩ na satehei, ĩ 3 wa kuu pi kupaso kitäö!‑ ĩ na Jesus a kuu noai, ĩ tä na Pedro a pi hatukua soatasoma.

⁶² A pi hatukupaso salo, a atua kõpalolö nö, a pi otatalo opa nö, a ö̃köpalo opati tasoma.

Jesus a na töpö hapalo pi wasöa apa nö, a sä sälähäa läo noai ĩ ta

⁶³ Ĩ na tä kua tä, Jesus a na töpö mamo lätio noai, Jesus a na ĩ töpö hapalo pi wasöa apa läo nö, a sä sälähäa läoma.

⁶⁴ A mamo sosamakö nö, a sä läoma. A sä läo nö, ‑Witi pili anö wa sä ke? Teusö anö wa pi pata hatuka apömanöma salo, a pi pata mosaia apöpaloö! Witi pili anö wa sä ke?‑ ĩ na töpö kuu pi wasöa apama.

⁶⁵ Ĩ na töpö kuu nö, töpö hapalo kõo nö, Jesus a kateha wanisala apatima.

Juteu pata töpö na Jesus a walomakö noai ĩ ta

⁶⁶ Ĩ na tä kua tä, tä halusoö ha, juteu pata töpö, Teusö a täpä sinomo wi ĩ pata töpö, Moisés a kai wäsä sinomo wi ĩ töpö, ĩ na töpö kui töpö kokamo nö, tä makokama totio sinomo wi, ĩ töpö na Jesus a kai waloa henaköma.

⁶⁷ A kai waloa henaköma, pata töpönö tä makokama totio sinomo wi ĩ töpönö Jesus a huama lätioma. A nakalö nö, Jesus a huamatima. ‑Teusö anö wa simöpalö noai ĩ wa sai totiwö? Cristo wa sai?‑ ĩ na töpö kuu ha, Jesus aiki, ‑“Awai. Ĩ sa sai totiwöö!” ĩ na sa kuu hö̃töa kule maaki, “Pitili wa saiö!” ĩ na makö pi kuu hãtoa mia kuiö!

⁶⁸ Kamakö na kamisanö sa tä hini kuköma, makö huo mai kitä.

⁶⁹ Huki Teusö pata tä lotete epii a kaikanamo totile, ĩ kate a poko kuamö kule hamö sa loamö kuköma, sanöma sa kupaso noai ĩ sa kaikanamo naio soatio pia salo‑ ĩ na Jesus a kuuma.

⁷⁰ Ĩ na Jesus a kuu ha, ‑“Teusö pelupö saö!” ĩ na wa kuu alu kule?‑ ĩ na töpö kuuma. Töpö kuu ha, ‑Ĩ na kama makö kuu kuleö!‑ ĩ na Jesus a kuuma.

⁷¹ A kuu ha, ‑Jesus a kateha nömöo wi ĩ ai ma tä wani naka maapöö! Kama a kuuhe, kama makönö ĩ ma ta hinia waikili keö!‑ ĩ na töpö kupaloma.