Lucas 19 - Teusö Tä Waheta

Jesus anö Sakeu a nakalö noai ĩ ta

¹ Ĩ na tä kua tä, Jetikó tä uli na Jesus a lisipalo nö, ĩ hamö a hutiilö tä,

^2-3 Sakeu anö Jesus a taa pi topa apama. Sakeu anö wani tä thapo opama. Kaikana tä na sitipa kökö totoköpö, kökö täatala sinomo wi, Sakeu anö ĩ töpö simöa sinomotima. Sakeu anö Jesus a taa pi topa apama maaki, Jesus a hutiilö pamö töpö satehe epii töpö huu naitiolö ha, Sakeu a hototi ipö salo, Jesus a tapa tomöpo maama.

⁴ A tapa tomöpo mi ipö salo, a läläa toleha soatalö nö, Jesus a hasuo piale, ĩ tiso kasö ha piku tiki öpalati, ĩ tiki na a tua läa soataköma.

⁵ A tua läa soatakö noai, ĩ ha Jesus a hasuola nö, a möö nonoa nö, ‑Sakeu ai! Lope epii a ithoa kõtaloö! Huki au sai a na sa kukö taso kitäö!‑ ĩ na Jesus a kuuma.

⁶ Ĩ na Jesus a kuu ha, lope epii Sakeu a ithoa haia kõtalo nö, a pi mönahapalo opa nö, Jesus a kai kõa soatasolöma.

⁷ Jesus a kai koonö pa, Jesus a na töpö satehe epii töpö nokapalo noai ĩ töpö aiki, ‑Hö. Wi na Jesus a pi kuu salo, wanisala tä thaa sinomo wi, ĩ a wani hai sai a na a kuo pia kulati?‑ ĩ na ĩ töpö kupalotima.

⁸ Ĩ na ĩ töpö kupaloti tä, Sakeu a öpa hatukupalo nö, Jesus a na a hapalo nö, ‑Pata! Pi naka. Töpö matipö mi ipii, ĩ töpö na wani sa tä thapo asale, ĩ ai sa tökö hẽtu totoki, ai sa tökö hẽtu thaa hö̃töli, ĩ na sa kua pia salo. Ai tä hai ĩ sitipa sa kökö thomönini, ĩ a na pe epii sitipa sa kökö totoa hö̃töki pia salo‑ ĩ na Sakeu a kuuma.

⁹ Ĩ na Sakeu a kuu ha, Jesus aiki, ‑Sakeu a hai, ĩ Abraão a hai ĩ tolewö tä naiwö. “Teusö a pitili” Abraão a pi kuu kua noai na, ĩ na Sakeu a pi kuu kua hö̃töoö. Önö kutenö, Sakeu a, kama ai töpö, ĩ na töpö kui töpönö wanisala tä thaa noai, huki ĩ tä na Teusö a hĩso mataso ke. Teusö anö ĩ töpö täa koni ke. Ĩ töpö hai, ĩ Teusö ulupö töpö kupaso keö!

¹⁰ Sanöma töpönö wanisala tä thaahe nö, töpö monöa soaso noai, sanöma sa kupaso noai, ĩ sanö ĩ sa töpö tae kotio pa, sa töpö täa koanani, ĩ na sa töpö thama pia salo, sa huu kipili‑ ĩ na Jesus a kuu totioma.

Wa tä thapole, ĩ tä palamanöö!

¹¹ Ĩ na tä kua tä, Jetusalẽi tä uli ha Jesus a ateo opa waikia kutenö, Jesus a na töpö huu naio wi ĩ töpö aiki, ‑Huki Teusö a kaikanamo wi ĩ tä kupo hãto pia kule‑ ĩ na töpö pi kuuma. Ĩ na töpö pi kuu ha, Jesus anö uni ta wäsäma.

¹² Ĩ na a kuuma: ‑Ai pata tä hai ĩ pelupö a hai, kaikana tä kupaso pia salo, tiko tä uli hamö a huu piama. “Ĩ tä uli hamö sa hulolö nö, ai töpönö sa kaikanapalö noai ha, sa huo kõki solö nö, hi tä uli ha sa kaikanamo kõo solöpökö o!” ĩ na a pi kuu salo, a huu piama.

¹³ A huu pia tä, ĩ anö töpö kalipalama sinomo wi ĩ ai töpö satehei, ĩ 10 töpö kui töpö nakalö nö, 10 oto kökö sitipa totoaköma. Kökö totoakö nö, “Pei. Ki töpönö sa kaikanapalö taso noai ha, sa huu kõo kitä. Sa huu kõo paio mi tä, hi oto ma kö sitipa tälöhe, ĩ ma kö sitipa simomanöö!” ĩ na a kuuma. Ĩ na a kuu nö, a hulasolöma.

¹⁴ A hulasolö noai ha, töpö kua hisa noai, ĩ ai töpönö a pi mi ipö salo, ĩ töpönö ai töpö simöa haipalö nö, “‘A kaikanapa tihöö! Kamisamakö na ĩ a kaikanamo maapököö!’ ĩ töpö na ĩ na makö kuutöö!” ĩ na töpö kuuma.

¹⁵ Ĩ na töpö kuuma maaki, a hulasolö noai, ai töpönö ĩ a kaikanapalö tasoma. A kaikanapalö noai ha, a waloa koiki nö, töpö kalipalama sinomo noai ĩ töpö na oto kökö sitipa totoakö noai, ĩ töpö nakalö nö, “Sitipa sa kö totokipili, ĩ wa kö sitipa simoa waikimani ke?” ĩ na a kuuma.

¹⁶ Ĩ na a kuu ha, ai tä aiki, “Sami au sitipa sa tälili, ĩ sa kö simomanöma, satehei ĩ 10 kökö kua hö̃töa kuleö!” ĩ na a kuuma.

¹⁷ Ĩ na a kuu ha, “Aitaköö! Wa topa. Ĩ sami sitipa na wa kalipalo makoka apama kutenö, satehei ĩ 10 sai pö na töpö kule, ĩ töpö pewö na wa kaikanamo kuköpöö!” ĩ na kaikana tä kuuma.

¹⁸ Ĩ na a kuuma, a waloa nömökö noai ĩ aiki, “Au sa kö simomanöma, huki 5 kökö kua kule” ĩ na a kuuma.

¹⁹ Ĩ na a kuu ha, “Topa. 5 sai pö ha töpö kule, ĩ töpö pewö na wa kaikanamopököö!” ĩ na kaikana tä kuu nömöoma.

^20-21 Ĩ na a kuu nö, ai tä waloa nömöiki nö, “Kaikana ai. Noa wa tä totoa mi päla tä maaki, wani wa tä täa sinomoö. Hikali a ha wa mo tösa mane maaki, hikali a ha nii tä kule, ĩ wa tä nii täa sinomo opaö. Ĩ na wa kuaö ha, pe epii wa patamo opa kutenö, kawa na sa kili ipama. Sa kili ipa salo, kamisa na au sitipa wa totopali, watata ösönö ĩ sa sitipa wai halopalö nö, sa halo wai sosamaköma. Hiki. Au sitipa kua soa kule” ĩ na a kuuma.

²² Ĩ na a kuu ha, kaikana tä aiki, “Kamisa na wa kalipalo tomöpo mi ipö. Wa kuuhe, ĩ pitili wa. Pe epii sa patamo opaö. Sitipa sa totoa mai maaki, wani sa tä täa sinomoö. Hikali ha nii sa tä tösa mai maaki, nii sa tä täa sinomoö.

²³ Ĩ na sa kuati wi ĩ wa tä taa waikioma maaki, wi na wa pi kuu salo, sitipa kökö titita wi ĩ a sai ha ipa sitipa wa kö titia mai ha, ipa sitipa wa kö simoma maama? ‘Sitipa kökö simo totio noai, kaikana tä kopi ha, ĩ sa kökö sitipa möma kõopöö!’ wa pi kuu maa noa” ĩ na kaikana tä kuuma.

²⁴ Ĩ na a kuu nö, kama hai ĩ töpö kalipalama wi ĩ ai töpö na, “Hi a waninö sitipa sami wai po pole, ĩ a wai sutalö nö, kökö satehei, ĩ 10 kökö sitipa po asale, ĩ a na ĩ a sitipa sami wai totoköö!” ĩ na a kuuma.

²⁵ Ĩ na a kuu ha, “Kaikana ai. Ĩ na kuno mai. Ĩ anö 10 kökö sitipa po waikia asa kuleö!” ĩ na töpö kuuma.

²⁶ Ĩ na töpö kuu ha, kaikana tä aiki hö̃töwö, “‘Ai tänö wani tä thapo opöle, ĩ wani tä na pata tänö ai tä makeki kitäö! Ĩ na tä kua tä, ai a wani moi ipö pasi salo, kama hai ĩ wani tä wani ipii tä wai po pole, pata tänö ĩ tä wai täli kitäö!’ ĩ na sa kuu alu kuleö!” ĩ na a kuu nö,

²⁷ “Sa kaikanamo piale, ai töpönö ĩ tä pii pasio maa noai, ĩ töpö nakalötöö! Ma töpö nakalö nö, kamisa mamo tetela tä, ĩ töpö sälöheö!” ĩ na kaikana tä kuuma‑ ĩ na Jesus anö uni ta wäsä nö, ĩ na a kuuma.

Jetusalẽi tä uli ha Jesus a lisipaso noai ĩ ta

²⁸ Ĩ na Jesus a kuu nö, Jetusalẽi tä uli hamö a hua kõo soatasolöma.

²⁹ A hua kõo soataalö tä, Petöpasié tä uli, Petânia tä uli, ĩ na tä uli kule ha, ĩ ha Jesus anö töpö kai atetasoma. Töpö kai atelo nö, Olipa tiki tä heuma ha töpö kai sokeaalö tä, Jesus anö kama kai a hua sinomo wi ĩ ai polakapi töpö simöa tolehelöma.

³⁰ Töpö simönö nö, ‑Ki ha sai pö kulali, ĩ hamö makö lisipalo nö, jumẽtu a okalo õkale, ĩ a hõo pata na ai tiko töpö tikäo taö mai ha, ĩ jumẽtu ma taa soatalali kitäö! Ĩ ma pata talalö nö, ma pata kusöpalö nö, ma pata täaki solöö!

³¹ Ma pata täli ha, ai tä aiki, “Wi na makö pi kuu salo, ma kusöa kule?” a kuu ha, “Ipa kaikana tänö a naka kulaiö!” makö kuu!‑ ĩ na Jesus anö töpö noa thama.

³² Ĩ na Jesus anö töpö noa thaö ha, töpö hulasolöma, ĩ na Jesus a kuu noai ĩ na ĩ tä pewö kuo toleo totio hö̃töoma. Sai pö kulali hamö töpö waloikilö nö, jumẽtu a okalo pata taa soatalalöma.

³³ A pata taa soatalalö nö, a pata kusöa tä, a pata thapo wi ĩ töpö aiki, ‑Wi na makö pi kuu salo, ma kusöa kule?‑ töpö kuu ha,

³⁴ ‑Ipa kaikana a patanö a naka kulaiö!‑ töpö kuu hö̃töoma.

³⁵ Ĩ na töpö kuu hö̃töo nö, Jesus a na jumẽtu a okalo pata tälölöe nö, jumẽtu a hõo na kama töpö hai ĩ haloi ösö hãsokopo wi ĩ ösö lukökö nö, ĩ tä hösöka ha Jesus a tikäa soatamaköma.

³⁶ Ĩ na tä kua tä, töpö satehe epii töpö aiki, ‑Kaikana tä sai pata huu polatiö!‑ töpö pi kuu salo, kama töpö hai ĩ haloi ösö hãsokopo wi, ĩ ösökö paa toleha läatalalöma.

³⁷ Ĩ na tä kua tä, Olipa tiki tä heu ha Jesus a timöpo pia tä, a nokapaloti wi ĩ satehe epii ĩ töpö huu naitioolöma. Töpö huu naitioolöpö hamö töpö pi mönaha apii töpö lalupalo opa nö, ‑Teusö a totiatalo opawöö! Ma tä tapa pole, ĩ tä topa apa.

³⁸ Teusö ai. Kawanö kaikana wa tä simönö noai, ĩ a pata totiapalaö! Hi tä hẽtu hamö töpö kulali, ĩ töpö pi topapalotipököö! “Teusö a totiatalo opa asawöö!” makö pewö kuupököö!‑ lope epii ĩ na töpö kupalo opatima.

³⁹ Ĩ na töpö kupaloti tä, ai patiseu töpö nokapalo naitile, ĩ töpö aiki, ‑Pata! Kawa na hi töpö satehe epii töpö nokapaloti pole, ĩ töpö na, “Ĩ na pö wani kuti tihöö! Pö lalupalo tihöö!” ĩ na wa kuu mi salo‑ ĩ na töpö kuuma.

⁴⁰ Ĩ na töpö kuu ha, Jesus aiki, ‑Teusö a na hi töpö hapalo nö, “Teusö ai. Kawanö kaikana wa tä simönini, ĩ a pata totiapalaö!” ĩ na hi töpö kuu lalupalo mi tä, hi maa mapö paale, ĩ na ĩ mapö kuu lalupalo kua pasio kitäö!‑ ĩ na Jesus a kuuma.

‑Wasu töpönö Jetusalẽi tä uli wania totipali kitä‑ Jesus a kuu noai ĩ ta

⁴¹ Ĩ na tä kua tä, Jetusalẽi tä uli ha Jesus a ateo tä, ĩ tä uli talalö nö, jetusalẽi tili töpö na a ö̃kösoma.

⁴² A ö̃kölo nö, ĩ na a kuuma: ‑Jetusalẽi tili pö! Teusö anö makö pi topapalama pi topa apa kule maaki, ĩ ma tä tai mio opapa wi. Makö pi topapalama wi, ĩ tä na makö pi hatukupo mi ipö kutenö,

⁴³ makö pea kitäö! Wasu töpönö makö säpali pia salo, kamakö sai pö kule, ĩ ha ĩ wasu töpönö makö pewö hokoloa totipalö nö, makö toköma mai kitäö!

⁴⁴ Makö pewö säli kitäö! Kama makö säli, kamakö sai pö waniapali, ĩ na ĩ wasu töpö kua kitäö! “Teusö anö a simönö noai, huki ĩ anö makö noama nö, makö täa koni kitä” ĩ na makö pi kuu tai mi ipö kutenö, waiha wasu töpönö makö sai pö pewö wania totipali kitä. Maa makö sai pö pewö maaki, makö sai pö pewö waniapali kitäö!‑ ĩ na Jesus a ö̃kö nö, a kuuma.

Teusömo wi a sai atu hamö Jesus anö töpö sasupalö noai ĩ ta

⁴⁵ Ĩ na tä kua tä, Jetusalẽi tä uli ha Jesus a waloiki nö, Teusömo wi ĩ a sai ha a lisipalo nö, noa tä na wani tä totoma sinomo wi, Jesus anö ĩ töpö sasua atua kõo soapalöma.

⁴⁶ Töpö sasupa atupa kõo pa, ĩ töpö na Jesus aiki, ‑“Ipa sai a hai, kamisa na sanöma töpö hapalo sinomo wi a sai” ĩ na Teusö a kuu noai, ĩ tä sãökama kua kule maaki, hi a sai hai, töpö thomömo wi ĩ töpö hai ĩ ma sai thama pikia kule‑ ĩ na Jesus a kuuma.

Teusömo wi a sai ha Jesus anö töpö pi hatukupamani

⁴⁷ Ĩ na tä kua tä, ĩ tä wakala pewö hamö Teusömo wi a sai ha Jesus anö töpö pi hatukamatima. Töpö pi hatukamati ha, Teusö a täpä sinomo wi ĩ pata töpö, Moisés a kai wäsä sinomo wi ĩ töpö, juteu pata töpö, ĩ na kilii töpönö Jesus a wanipo opa nö, a säpa pi topa apama.

⁴⁸ A säpa pi topa apama maaki, ai töpö pewö aiki, ‑Jesus anö Teusö a kai a wäsä taö öpa nö kiliawö‑ ĩ na töpö kupalo opati ha, Jesus a säpa pi topale, ĩ töpö aiki, ‑Wi na Jesus ma säa thaa hãtopalöpö? Jesus ma säpalöma, hi töpö pewönö makö wanipo opa matimöö!‑ ĩ na ĩ töpö kuu päoma.