Lucas 18 - Teusö Tä Waheta

‑Samakö noamaö!‑ ĩ na makö kuu kõatalo opapököö!

¹ Ĩ na Jesus a kuu nö, ‑Makö pi otapalo mai, Teusö a na pö hapalo sinomoö!‑ ĩ na Jesus a kuu pia salo, ĩ uni ta wäsäma.

² Uni ta wäsä nö, ‑Ai töpö pilia tipötöa apölati ha, ĩ ha tä makokama läo sinomo wi, ĩ a pata kuoma. Teusö a na a kili mi ipö, ai sanöma töpö na a kili naio mi ipö, ĩ na ĩ a pata kuama.

³ Ĩ na tä kua tä, ĩ tä uli pata na suö tä hai ĩ peanopö a nomaso noai ĩ a sino opii a kutio naioma. Tä makokama sinomo wi ĩ a na ĩ suö tä wäomö läläpati nö, “Kamisa na ai tänö wanisala tä thati pole, ĩ a na wa hapalo mi salo” ĩ na suö tä kuu kule maaki,

⁴ ĩ pata tänö a hini maama. A hini mi päla tä maaki, ĩ suö tä walo walomo opati ha, pata tä aiki, “Teusö a na sa kili mi, sanöma töpö na sa kili mi, ĩ na sa kua kule maaki,

⁵ hi suö tä walo walomo opati salo, ĩ a na ai tänö wanisala tä thati pole, ĩ a na sa hapalo läo kitä. Ĩ suö sa hini mi ha, a walo walomo opa nö, sa waipa pasitio tihöö!” ĩ na a pi pata kulasoma‑ ĩ na Jesus a kuuma.

⁶ Ĩ na Jesus a kuu nö, ‑Uni sa ta wäsähe, ĩ ma ta hinini ke? Tä makokama sinomo wi ĩ a pata wanisala apa wi ĩ a kuu noai ĩ ta hini totihoö!

⁷ Ĩ a pata wanisala apa wi maaki, ĩ a patanö suö tä hini nö, a noama kuköma. Teusö anö töpö saia asalö noai, ai töpönö ĩ töpö peama apati wi, Teusö anö ĩ töpö peama hö̃töo kitä. Teusö anö töpö sailö noai ĩ töpö aiki, “Häö. Makö pepalo wi tä tetepo waikia kuleö! Teusö anö makö hini hãto mikö” ĩ na töpö pi kuti kule maaki, ĩ töpönö Teusö a naka satimo opati ha, Teusö anö ĩ töpö noama mai kitä ta o?

⁸ Teusö anö ĩ töpö noama nö, tä makokama läapalo haita kitä. Töpö noama kitä maaki, sanöma sa kupaso noai, hi masita tä uli na sa huu kõa tä, “Teusö anö makö noama hãto mai kitä” ĩ na sanöma töpö pi kuu hãto kitä. Waiha sa huu kõa tä, “Teusö a pitili” töpö pi kuu totio wi, ĩ töpö kule kitä?‑ ĩ na Jesus a kuuma.

Teusö a na a hapaloma maaki, a makokoa pasio maa noai ĩ ta

⁹ Ĩ na tä kua tä, ‑Sa totiatalo opa asatiowö. Ai töpö pewö wanisala apa pasitiowö‑ töpö pi kuu wi, ĩ töpö na Jesus a hapaloma. Uni ta wäsä nö, a hapalo nö,

¹⁰ ‑Teusö a na polakapi töpö hapalo pia salo, Teusömo sinomo wi a sai pata hamö töpö lisipaso lasoma. Ai tä hai, ĩ patiseu tä kuoma. Ai tä aiki, kaikana tä pata na sitipa kökö totoköpö, ai töpö na kökö naka sinomoti wi ĩ a kuo pasioma.

¹¹ Teusömo sinomo wi a sai pata na ĩ töpö lisipalo nö, patiseu tä öpapalo nö, Teusö a na a hapalo hãtomoti nö, “Teusö ai. Ai sanöma töpö kua kua wi na, ĩ na sa kua kua pasio mi ipö kutenö, kawa na, ‘Aitaköö!’ ĩ na sa kuu sinomo opaö. Ai töpö thomömoö, wanisala tä thatala apaö, ai tiko tä suö na töpö mamoö, ĩ na ai töpö kua kuati wi na, ĩ na sa kua pasio mai kitä. Kaikana tä hai ĩ sitipa kökö nakata wi ĩ a öpalati, ĩ a wani kuati wi na, ĩ na sa kua hö̃töo mi ipö.

¹² Sa Teusömo makokoa asa kutenö, ai tä wakala na sa iapalo mi, ĩ na tä kua tä, ai polakapi tökö wakala maa kutalo nö, ĩ hena tä sa iapalo mi, ĩ na ĩ tä semana pewö hamö ĩ na sa kua sinomotii. Ipa noa sa tä täa kuköma, kawa na ĩ sa tä noa ose wai totoa sinomo pasioö” ĩ na Teusö a na ĩ na ĩ patiseu tä kutima.

¹³ Ĩ na patiseu tä kuti tä, kaikana tä na sitipa kökö totoköpö, kökö naka sinomo wi ĩ a öpalati, Teusö a na ĩ a hapalo nömöoma. Teusö a na a kili salo, a nono mai ha, “Häö. Sa wanisala apati sai taköö!” ĩ na a pi kutima kutenö, kama kotopö säo nö, Teusö a na a hapalo nö, “Teusö ai. Wanisala sa tä thaa sinomo pasio wi ĩ sa. Önö kutenö, kamisa na a pi honipo totioö! ‘A pea pasi päoö’ a pi kuu tihöö!” ĩ na ĩ a wani kutima‑ ĩ na Jesus anö ta wäsä nö, ĩ na a kuuma.

¹⁴ Ĩ na a kuu nö, ‑“Wanisala sa wani totia kopalöö!” a wani kuu noai, toitai ĩ a wani kõa asasolöma. Teusö anö ĩ a totia asa kopalöma. Ĩ na tä kua tä, “Sa totiatalo opa asa waikileö!” ĩ na a pi kuu pasio noai, Teusö anö ĩ a totipa pasio kõo maama. Teusö a na a tomöpo mi ipii ĩ a kõa pasisolöma‑ ĩ na Jesus a kuuma. Ĩ na a kuu nö, ‑Önö kutenö, “Sa toita apö asa waikiwö” wa pi kuu tä, Teusö anö wa komoapalama apa kitä. Ĩ na tä kua tä, “Teusö a na sa tomöpo mi sai” ĩ na wa pi kuu tä, Teusö anö wa hösökapalama asa kitä‑ ĩ na Jesus a kuu totioma.

Jesus anö ulu töpö totiapala noai ĩ ta

¹⁵ Ĩ na tä kua tä, ai töpö aiki, ‑Ulu töpö na Jesus a ami waliköma, Teusö anö ĩ ulu töpö totiapala apa kitäö!‑ ĩ na töpö pi kuu nö, Jesus a na ĩ töpönö ulu töpö kai waloköma. Töpö kai waloki ha, Jesus a kai a hua sinomoti wi ĩ töpö aiki, ‑Ulu töpö kai walo tihöö!‑ ĩ na töpö kuuma.

¹⁶ Ĩ na töpö kuu ha, Jesus anö ulu töpö nakalö nö, kama hai ĩ töpö na, ‑“Ulu töpö kai walo tihöö!” makö kuu maikiö! Kamisa na ulu töpö huupöö! Hi ulu töpö kua kua wi na, ĩ na Teusö anö töpö simöa wi, ĩ na ĩ töpö kua kua hö̃töoö.

¹⁷ “‘Sa simöa totioö!’ Teusö a na ĩ na ulu töpö wai kuu kua wi na, ĩ na wa kuu kua hö̃töo mi tä, Teusö a kaikanamo totio wi ĩ hamö wa kuo mai kitä” ĩ na sa kuu pitilimo opa kuleö!‑ ĩ na Jesus a kuuma.

Wani wa tä pii sisa tä, Jesus wa thapo haio mai kitä

¹⁸ Ĩ na tä kua tä, ai pata tä aiki, ‑Jesus ai. Samakö pi hatuka totipamani wi ĩ wa toita apö. Wa totiatalo opawö‑ ĩ na a kuu nö, ‑Sa õsi palimipasopö tä na wi na sa kua pasiopö?‑ ĩ na a pata kuuma.

¹⁹ Ĩ na a pata kuu ha, Jesus aiki hö̃töwö, ‑Wi na wa pi kuu salo, “Wa totiatalo opawö” kamisa na wa kuu kule? Ai sanöma tä toita apii tä kua mai kitä. Teusö a toita apö sisawö‑ ĩ na Jesus a kuuma.

²⁰ Ĩ na a kuu nö, ‑Moisés a patanö nö patapö töpö noa thaa noai, ĩ wa ta taö öpa waikia kule nökö. “Tiko tä suö na a sakapalo hãto tihöö! Ai sanöma tä säpa hãto tihöö! A thomömo hãto tihöö! A hapalo holisimo hãto tihöö! Hao a, nao a, ĩ na kilii töpö kai a hini totihoö!” ĩ na Moisés anö nö patapö töpö noa thama‑ ĩ na Jesus a kuuma.

²¹ Ĩ na Jesus a kuu ha, pata tä aiki, ‑Wa kuu pole, ĩ sa ta hini sinomoö. Sa ose tä, Moisés a kai a kuu wi ĩ sa tä pewö a hini soatama, huki sa ta hini soatioö‑ ĩ na a pata kuuma.

²² Ĩ na pata tä kuu pole, Jesus anö ĩ ta hini nö, ‑Sami wa tä thama mai ha, wa kua soa kule. Ai töpö hai ĩ wani tä honi ipii, ĩ töpö na au wani wa tökö pewö totoköma, hi tä hẽtu hamö au wani tä kua apa hö̃töa soalali kitä. Töpö honimo opati wi ĩ töpö na au wani tökö pewö totokö nö, kamisa na a noka soapaloö!‑ ĩ na Jesus a kuuma.

²³ Ĩ na Jesus a kuu ha, pe epii ĩ pata tänö wani töpö thapo opama kutenö, a pi pata honipo opama.

²⁴ A pi pata honipo opöle, Jesus anö ĩ tä tapa nö, ‑Teusö a kaikanamo totio wi ĩ hamö wani tä thapo opa wi ĩ töpö lisipo haio mai kitä.

²⁵ Makusa tä päka wai hamö kamelu a pata lisipaso kitä ta o? Ĩ tä kua kua wi na, wani wa tä thapo opa wi, Teusö a kaikanamo wi ĩ hamö ĩ na wa lisipo kua hö̃töo mai kitä‑ ĩ na Jesus a kuuma.

²⁶ Ĩ na Jesus a kuu noai, ai töpönö ĩ ta hininö nö, ‑Ĩ na wa kuu ha, Teusö anö ĩ witi pili a täa konöpö? Teusö a kaikanamo wi ĩ hamö ĩ witi pili a lisipasopö?‑ ĩ na töpö kuu ha,

²⁷ ‑Sanöma töpönö tä thama tai mi ipii, Teusö anö ĩ tä thama taö öpa asa kitä. Teusö a kaikanamo wi ĩ hamö sanöma töpö lisipo tai mi kitä maaki, Teusö anö töpö lisipama taö öpa sisaö‑ ĩ na Jesus a kuuma.

²⁸ Ĩ na Jesus a kuu ha, Pedro aiki, ‑Kawa na samakö nokapalo sinomo pia salo, kamisamakö hai ĩ sama töpö takölöma‑ ĩ na a kuuma.

²⁹ Ĩ na Pedro a kuu ha, ‑“Teusö a simöo totio wi ĩ wa tä pi ipa salo, au sai wa takölöö, au husopö a, au hepala töpö, au hoose töpö, au hao a, au nao a, au ulu töpö, ĩ na töpö kui wa töpö takölöö, ĩ na wa töpö taa thakölöma,

³⁰ huki töpö satehe epii wa töpö täa satia apa hö̃töli kitä. Huki satehe epii wa töpö täa satia apa hö̃tölö nö, Teusö a na wa kononö nö, wa õsi palimipo totio wi ĩ wa tä täa hö̃töli kitä” kamakö na ĩ na sa kuu kule. Pitili sa‑ ĩ na Jesus a kuuma.

‑Sa säpali kitä maaki, sa temöa konaso kitä‑ Jesus a kuu kõo noai ĩ ta

³¹ Ĩ na tä kua tä, Jesus anö kama kai a hua sinomo wi ĩ töpö naka sokalö nö, ĩ töpö na a hapalo nö, ‑Jetusalẽi tä uli ha makö huu pia kule. Sutu ha Teusö a kai wäsä sinomo noai ĩ töpönö sanöma sa kupaso noai ĩ sa kateha nö, “Cristo a huu tä, ĩ na a kua kitä” ĩ na tä sãökama kuu noai, ĩ na huki Jetusalẽi tä uli ha sa waloikitö nö, ĩ na sa kua totio pia salo.

³² Juteu töpö pasi mi ipii ĩ töpö na sa namo simöki pia salo. Sa namo simöki ha, kamisa na ĩ tiko töpö hapalo pi wasöa apa nö, ĩ töpönö sa kateha wanisala apa nö, sa wanipo salo, sa nakipöma apa nö, sa sä nö,

³³ sa säa totipali pia salo. Sa säa totipali kitä maaki, polakapi tä mumi matalo nö, ĩ ai tä hena tä sa temöa konaso kitä‑ ĩ na Jesus a kuuma.

³⁴ Ĩ na Jesus a kuu kule maaki, kama kai hiniti wi ĩ töpönö ta hini tomöpo maama. ‑Hãu. Ĩ na Jesus a kuu totia alu kuleö!‑ ĩ na töpö pi kuu totio maama.

Jesus anö a höpöpö öpii, ĩ a wani toa komanö noai ĩ ta

³⁵ Ĩ na tä kua tä, Jetikó tä uli ha Jesus a ateo tä, piliso kasö ha a wani höpöpö öpii a wani loo lätioma. A höpöpö kutenö, a wani loa lätiki nö, töpö hasuo pole, ĩ töpö na a wani nako läoma.

³⁶ A wani loa lätia tä, töpö satehe epii töpö hasuo hini nö, ‑Wi na tä kuaö ha töpö satehe epii töpö a hasuo kule?‑ a wani kuu ha,

³⁷ ‑Nasaté tili tä Jesus a hasuo kulatiö!‑ ĩ na töpö kuu hö̃töoma.

³⁸ Ĩ na töpö kuu ha, a wani komö soata nö, ‑Jesus ai! Kaikana tä Davi wa ulupö tolewöö! “Ĩ na wa höpöpö wani kua päo” ĩ na a pi kuu tihöö! Kamisa na a pi honipo totihoö!‑ ĩ na a wani komö kuuto läoö ha,

³⁹ ‑A wani lalupalo tihöö!‑ ĩ na ai töpö huu tolehapalo pole, ĩ na ĩ töpönö a noa wani thaa läoma. Ĩ na a noa wani thama maaki, pe epii a wani komö lalupalo nö, ‑Davi ulupö ai! Kamisa na wa pi honipo nö, sa pasilipalöö!‑ ĩ na a komö kuu satimo opatima.

⁴⁰ Ĩ na a komö kuu satimo opati ha, Jesus a öpa opia soataiki nö, ai töpö na, ‑A wani höpöpö öpii a wani nakaki solöö!‑ a kuuma. Ĩ na a kuu ha, a wani nakaki solö ha, a wani walokö solöma. A wani walokö solö ha, Jesus aiki,

⁴¹ ‑Wi na wa thamaköpö?‑ ĩ na Jesus a kuuma. Ĩ na Jesus a kuu ha, ‑Sa mamo huu topa komaköö!‑ ĩ na a wani kuuma.

⁴² Ĩ na a wani kuu ha, Jesus aiki, ‑A mamo huu topa koikiö! “Jesus anö sa mamo wani huu topa komaki kitäö!” wa pi kuu pole, ĩ tänö wa mamo huu topa kõa pasia päki ke‑ ĩ na Jesus a kuuma.

⁴³ Ĩ na Jesus a kuu ha, a mamo huu topa apa kõa soataköma. A mamo huu topa apa kõa soataki ha, Jesus a na a wani noka soatasolöma. A nokaalö tä, ‑Teusö a totiatalo opa asatiowöö! Sa mamo huu topa komaki keheö!‑ ĩ na a kuu totiatalo opatima. A mamo höpöpö huu topa kõköhe, töpö satehe epii töpö hupalo pole, ĩ töpönö ĩ tä taa nö, ‑Teusö a totiatalo opa asatiowöö!‑ ĩ na ĩ töpö kupalo opa naioma.