Judas 1 - Teusö Tä Waheta

¹ Tiago a hai ĩ poose Jutasö sa. Jesus Cristo anö sa kalipalama sinomo wi ĩ sa. Kamakö hai ĩ pö̃ Teusö anö makö nakalö noai, ĩ makö pi ipa wi, Jesus Cristo anö ĩ makö noama sinomo wi, ĩ makö na hi sa tä waheta simöni ke.

² Teusö a na kamakö a wäsä nö, ‑Ĩ töpö na wa pi honipo opa nö, töpö totiapala apatii, töpö pi topapalama apaö, töpö pi ipaö, ĩ na wa kuapököö!‑ Teusö a na ĩ na sa kuu.

Teusö ta wäsä holisimo wi ĩ töpö

³ Ipa pö! ‑Teusö anö makö pewö täapa kõo läo wi, ĩ tä pi na sa tä waheta sãököpalö nö, kamakö na ĩ sa tä waheta simöni pia salo!‑ ĩ na sa pi kuu soata tä, ‑Ai töpönö ai tiko ta wäsä hãtoa pikia kuleö!‑ ĩ na sa pi kuu nö, ‑“Ai tiko ta wäsä wi, ĩ ta hini pikio tihöö! Pö kasiapalo totihoö! Teusö ma thapo wi ĩ makö na Teusö anö pitili tä sai totoa waikikö noai, ĩ ta hini sisaheö!” kamakö na sa kuu totio pia salo, kamakö na ĩ sa tä waheta simöa pia kuleö!‑ ĩ na sa pi kuu totioma.

⁴ Kamakö pi aiki, ‑Hisa ha ai töpö lisipaso noai, ĩ töpönö Teusö a thapoö‑ ĩ na makö pi thama waikioma maaki, ĩ töpö holisimoti päokö. Ĩ töpönö wanisala tä thaa pi topa apati päo salo, ĩ na ĩ töpö kuti päoö: ‑Kamakö pewönö wanisala ma tä thaa noai, Teusö anö ĩ tä noa maa waikipamanöma kutenö, huki sa tä thaa pi topa wi ĩ sa tä thaapököö!‑ ĩ na ĩ töpö kutii. Kamakö hai ĩ Jesus Cristo pata tänö makö simöa pasio wi, ĩ töpönö ĩ a kai a peama nö, a hosalöma. Sutu ha Teusö tä waheta aiki, ‑Ĩ töpö holisimo opati nö, wanisala tä tha apati wi, ĩ sa töpö peama kitäö!‑ ĩ na Teusö tä waheta kuu waikioma kutenö, huki wanisala tä thaa pasia soatile, ĩ töpö na, ‑Makö wanisala apatiwöö!‑ ĩ na Teusö anö ĩ na töpö noa thaa kule. Teusö anö ĩ töpö peama totio kitä.

⁵ Sutu ha esitu tili töpö hai ĩ tä uli na isöhaeu töpö kuo naio noai, Teusö anö ĩ töpö täa konönöma. Ĩ töpö täa konönöma maaki, waiha Teusö a na ĩ ai töpö mamo teteo mai, ĩ töpö aiki, ‑Teusö a pitilimo opa nö kiliawö‑ ĩ na ĩ töpö pi kuu pasio maa noai, Teusö anö ĩ töpö säpalöma. Ĩ ma tä taö waikia kule maaki, kamisanö makö pi tapomoma pi topa kuleö!

⁶ Ĩ na tä kua tä ‑Hisa ha makö kutiki nö, hi tä uli ha makö kalipalo sisaöö!‑ ĩ na Teusö anö ãju töpö noa thaa waikita noai ha, ĩ ai ãju töpönö Teusö a kai a hini totio mi salo, ĩ tä uli hosalö nö, tiko tä uli hamö ĩ töpö hulasolöma. Tiko tä uli hamö ĩ töpö huu ha, Teusö anö söpala ösö totonö ĩ töpö õkapalö nö, hi tä komo ha mumi mumi tä pata kuo pa, ĩ hamö Teusö anö ĩ töpö thaköma. Ĩ töpö thapa kõo mai kitä. Waiha töpö pepalo sinomo opati kuköpö tä uli ha Teusö anö töpö simöpa piale, ĩ tä wakala kupo paio mi tä, mumi mumi tä kuo pa Teusö anö ĩ ãju töpö õkama thaköma.

⁷ Ĩ na tä kua tä, sotoma tili töpö, komoha tili töpö, ĩ töpö sai pö kotö ha ai töpö sai pö kotötömo noai ĩ töpö, ĩ na töpö kui töpö kuo hö̃töoma. Ĩ töpönö hiopö tä thaa nö, kama töpö hai ĩ pusopö töpö na totiwö kuno mai, ai tiko tä suö na töpö mamopaloö, ĩ na tä kua tä, wano töpö pewö maaki, ai wano tä na ai wano tä mamoö, ĩ na töpö kuati noai, ĩ tä noa na Teusö anö töpö peama apama. Koa taka mapo mi ipii, ĩ takanö ĩ töpö ĩsimanöma. Ĩ töpö ĩsimanö noai, ĩ tä na pö pi tapoa totikiö! Ĩ töpö ĩsima kua noai na, waiha ĩ na Teusö anö ĩ taka patanö ai töpö ĩsima kua nömöo kitä ta pi kuu mai.

⁸ Sutu ha ĩ na töpö kuati kua noai na, ĩ na huki kamakö na töpö wäo holisimoti wi, ĩ na ĩ töpö kuati hö̃töoö. Kama töpö manimo isi waniha päo nö, kama töpönö sami sami tä thaa nö, kama töpö samia sapa kõo päpasoö. Kama töpö samia sapa kõa päpalo nö, ‑Teusö anö sa simöa pasitio mai kitäö!‑ ĩ na ĩ töpö pi kuu. Ĩ na ĩ töpö pi kuu nö, ãju töpö a kateha wanisala apatii.

⁹ Ĩ na ãju pata tä Mikeu a kua hö̃töo maama. Mikeu anö Moisés a nomawö täa pi topaalöö, Sai tä sai patanö Moisés a nomawö täa pi topa naia, ĩ na töpö kuati nö, töpö hapalo pi hĩsuha hẽtupasoti tä, Mikeu a hapalo wanisala maama. Sai tä sai pata päsäpa kili ipama. ‑Teusö anö wa päsäpa sisapököö!‑ ĩ na Sai tä sai pata na ĩ na Mikeu a kuu päoma.

¹⁰ Teusö a thapo mai, kamakö na ĩ töpönö ai tiko ta wäsäti pole, ai tä pi na ĩ töpö pi hatukupo pola nö kuno mai, ĩ ta kateha wanisala apa pasitioö. Wani ipii ĩ töpö pi hatuka hö̃töa kule maaki, salo kökö pi hatuku totio mi kui na ĩ na ĩ töpö kuö hö̃töowö. Salo kökönö tä thaa pi topa wi ĩ tä thaa päoö. Kamakö na ai tiko ta wäsäti pole, ĩ na ĩ töpö kua hö̃töoö. Ĩ töpönö tä thaa pi topa wi, ĩ tä thaa päoö. Ĩ tä thaö ha, Teusö anö ĩ töpö peama kitä.

¹¹ Ĩ töpö pea totio pasio kitä. Kaĩ anö Teusö a kai a hini totio maa kua noai na, ĩ na ĩ töpö kua nömöoö. Ĩ na tä kua tä, Palaão anö sitipa kökö pi ipa päo salo, wanisala tä thaa päo kua noai na, ĩ na ĩ töpönö sitipa kökö pi ipa päo salo, wanisala tä thaa kua hö̃töo päoö. Ĩ na tä kua tä, Koté a kuati noai na, ĩ na ĩ töpö kua nömötioö. Koté anö Moisés a kai peama asa nö hĩsuaö ha, Teusö anö Koté a peama hö̃töoma. Huki holisi ta wäsä päo wi, ĩ töpönö Teusö a kai peama hö̃töoö ha, Teusö anö ĩ töpö peama totio kitä.

¹² Makö pi kalä tä, pata u õsimö na maa ma kua hãtoa wi maanö makö pi isi wanihipama kua wi na, ĩ na makö iapaloti tä, ĩ töpö tikilia naia tä, ĩ na ĩ töpönö ĩ na makö isi wanihapala kua hö̃töoö. Makö noimo nö, makö iapalo tä, ĩ töpö iapalo naio nö, ĩ töpö pi kilio mai, ‑Kamisa ösö poteha somatasopököö!‑ ĩ na ĩ töpö pi kuu salo, lope epii ĩ töpö iapalo opa asaö. ‑Ai töpö wani oio pasio päoö‑ ĩ na ĩ töpö pi ku upaö. ‑Kamisa pötöpo sisakö‑ ĩ na ĩ töpö pi ku upaö. Ipoko tänö ilasi tä hasu hasuma haiatalo opa wi, ĩ tä ilasi kua kua wi na, ĩ na ĩ töpö kua hö̃töoö. Ĩ ilasi tä hasuoö ha, ‑Tä uli amisi ipö maaki, maa tä ke mi ipö‑ ĩ na sanöma makö kuu kua wi na, ‑Häö. Ĩ töpönö ta wäsä kule maaki, sa õsi lotetepo mi ipö sai taköö!‑ ĩ na makö kuu hö̃töoö. Ĩ na tä kua tä, ‑Huki ĩ ti na kama mokö lalo kõo pia kuleö!‑ ĩ na makö pi kuu kule maaki, ‑Hähä. Mokö lalo kõo mi ipö nö kiliwö ia!‑ ĩ na ĩ tinö makö pi thama kua wi na, ‑Ĩ töpö tomöpo mi‑ ĩ töpönö ĩ na makö pi thama hö̃töoö. Hikalimoti wi ĩ töpönö hii ti uköpalöma, ti häwäpo kua wi na, ĩ na ĩ töpö kuaö. Teusö anö ĩ töpö peama apa kitä.

¹³ Mötati tuu patanö mosi mosi tä palama kua wi na, ĩ na ĩ töpö kuatii. Ĩ na ĩ töpö kuati wi ĩ töpönö wanisala tä thati nö, ĩ töpönö hiopö tä palamaö. Sitikali a keopo wi, tiko hamö ĩ sitikali a huu keopo kua wi na, ĩ na pitili tä na ĩ na ĩ töpö hanoa kua hö̃töoö. Mumi mumi tä uli ha Teusö anö ĩ töpö simököma, ĩ tä uli ha ĩ töpö kua soatio kitä.

¹⁴ Sutu ha, somi sai tä, Adão a hai ĩ tolewö Enoki anö ĩ töpö a wäsäma. Ĩ töpö a wäsä nö, ĩ na a kuuma: ‑Sömöka taiki nökö. Teusö pata tänö kama hai ĩ ãju töpö satehe kai huu pia salo.

¹⁵ Töpö satehe kai waloiki nö, sanöma töpö naka soatalö nö, ĩ sanöma töpö pewönö wanisala tä thaa noai, Teusö anö ĩ tä pewö a kateha pia salo. Ĩ tä pewö a kateha nö, Teusö a thapo pasio mai, ĩ töpö na, “Wanisala wa tä thatii, kamisa na wa hapalo wanisala soatalo opatii, ĩ na makö kuati thaliö!” ĩ na Teusö a kuu nö, “Önö kutenö, töpö pea soatio pasio wi, ĩ tä uli ha pö kua pasikiö!” ĩ na Teusö anö ĩ na ĩ töpö noa thaa pia salo‑ ĩ na Teusö tä waheta kuu.

¹⁶ Kamakö na holisi ta wäsäti wi, ĩ töpö hapalo wanisala sinomo opaö. Ĩ töpö pi tomöwö mi ipö. ‑Ĩ tä wanisala. Ĩ tä wanisala‑ ĩ na ĩ töpö kuu sinomoö. Ĩ töpönö wanisala tä thaa pi topa wi ĩ tä wanisala thaa sinomoö. ‑Kamisanö sa tä taö öpa sisaö‑ ĩ na ĩ töpö kutii. Ĩ na tä kua tä, ‑Ai töpönö sa totiapala apa hö̃töopököö!‑ ĩ na ĩ töpö pi kuu päo nö, ĩ ai töpö na, ‑Wa totiatalo opawö‑ ĩ na ĩ töpö kuu päoö.

‑Pö pi mosaia totikiö!‑ Judas a kuti noai ĩ ta

¹⁷ Ipa noi pö! Jesus Cristo pata tänö töpö simöa somapalö noai, kamakö na ĩ töpö kuu noai, ĩ tä na pö pi hatukuikiö!

¹⁸ Ĩ töpönö ta wäkö nö, ‑Ĩ tökö pewö pata mapasoö, ĩ tä wakala maa naia soapasoö, ĩ na tä kua pia tä, wanisala tä thaa pi topa apa sinomo pasitio wi, Teusö ma thapo wi ĩ makö na ĩ töpö hapalo pi wasöa apa pasio kitä‑ ĩ na Jesus anö töpö simöpa soma noai, ĩ na ĩ töpö kuuma.

¹⁹ Ĩ töpö hapalo pi wasöa soatalo opatii, ĩ töpönö Teusö a õsi kua tolele, ĩ a thapo mi. Teusö a õsi kua tolele, ĩ anö ĩ töpö simöa mi kutenö, kama töpö pi saimo päo nö, wanisala tä thaa pi topa päo wi, ĩ tä thaa päoö. Ĩ töpönö makö selekea nö hĩsua apöpamani.

²⁰ Ipa noi pö! Jesus ma ta hinia totilö nö, Jesus ma tälö nö, ĩ ma thapo wi, ĩ makö kupasoma. Jesus ma thapo wi, ĩ tä toita sati ipö asawö. Jesus ma thapo wi ĩ makö kupasoma kutenö, ma tä palama sinomoö! Ĩ na tä kua tä, Teusö a na pö hapalo sinomo kuikiö! Teusö a na makö hapalo pola tä, Teusö a õsi kua tolele, ĩ anö makö pi hatukua soapamanöpököö!

²¹ Kamakö na Jesus Cristo pata tä pi honipo opa salo, makö totiapala apa kitä. Makö totiapala apa kutenö, makö õsi temöo soatio wi, ĩ makö õsi palimipo wi, Cristo anö ĩ tä totoki kitä. Cristo anö ĩ tä totoa piale, ĩ ma tä möö läo nö, ‑Teusö anö sa pi ipawö‑ ĩ na makö kuu sinomopököö! Teusö ma pii hö̃töo soatiopököö!

²² Ai töpö aiki pasiwö, ‑Kui. Teusö ta pitili hãto mai kitä‑ ĩ na ĩ töpö pi kuu wi, ĩ töpö na pö pi honipo totihoö!

²³ Koa taka pata hili soatio wi, ĩ tä uli ha ĩ töpö huu pia tä, ĩ ma töpö täapa kõo läo nö, ai töpönö hiopö tä thaa pi topa sinomo wi, ĩ töpö na pö pi honipo naioö! Makö pi honipo päla nö maaki, pö pi mosaia totikiö! Ĩ töpönö wanisala tä thaa wi, ĩ töpö manu kui, makö samimananö matimöö!

Kama sai pö na Teusö anö makö walo komakö laso kitäö!

^24-25 ‑Teusö a totiatalo opa asawöö!‑ ĩ na makö kuupö. Teusö a kui na, ĩ na ai pata tä kui, tä kua satia mai kitä. Kamakö täapa kõo läo wi, ĩ a hai, ĩ Teusö a. Jesus Cristo pata tä säpamonasoma kutenö, Teusö anö makö konöma. Cristo ma hosa pia tä, Teusö a lotete epö kutenö, makö pi hatukupama taö öpa läo kitä. Makö pi makokapamani, makö pi mönahapamani, ĩ na Teusö anö makö thama taö öpaö. Önö kutenö, Teusö a wakala apii a kupoli, ĩ tä uli hamö makö toita apö, makö pi topapalo opatii, ĩ na makö kui, Teusö anö ĩ makö waloa komakö laso kitä. Teusö a wakala apö. Ĩ a lö kui, pata tä sai sisawö. A lotete epö. Teusö anö töpö simöa sinomo wi ĩ a. Hi masita tä uli kupo paio mi tä, ĩ na Teusö a kua sinomoti noai, huki ĩ na a kua soaö. Waiha ĩ na a kua sinomo soatio kitä. Kamakö hai ĩ Jesus Cristo pata ma tä thapo kutenö, Teusö a kuati wi, ĩ tä na, ‑Aitaköö!‑ ĩ na makö kuupö. Ĩ na ta kua totia kuleö!