João 18 - Teusö Tä Waheta

Jesus a na Jutasö a waninö sotatu töpö kai walokö noai ĩ ta

¹ Ĩ na tä kua tä, Teusö a na Jesus a hapalo matalo nö, Jesus a, kama kai a hua sinomoti wi ĩ töpö, ĩ na töpö kui töpö hua kononö nö, Setötõ tuu pökatö wai hamö hikali a paa laso pamö töpö hulasolöma.

² Ĩ na tä kua tä, ĩ a hikali na Jesus anö kama hai ĩ töpö kai huu sinomotima kutenö, Jutasö anö Jesus a monima piale, ĩ aiki, ‑Ĩ tä hikali na Jesus a huu hãtoa waikia lasoa‑ a pi kuuma.

³ Ĩ na tä kua tä, Teusö a täpä sinomo wi ĩ pata töpö, patiseu töpö, ĩ na töpö kui töpönö, sotatu töpö, Teusömo wi a sai na töpö läapalo sinomo wi ĩ töpö, ĩ na töpö kui Jutasö a na ĩ ai töpö simönöma. Ĩ töpö simöni ha, hikali a na Jesus a kuo laso pamö Jutasö anö ĩ töpö kai hua haia soatasolöma. Ĩ töpönö koa taka sii hili wi ĩ tä, asakosi halo, poo kökö, hii tiki, sokopi kökö, ĩ na tökö kui tökö kai hua haia soatasolöma.

⁴ Töpö hua haia soatasolö ha, Jesus a pi tao opa salo, ‑Ĩ na tä kua kitä‑ a pi kuu waikia tä, ĩ töpö na a paa lälo nö, ‑Ĩ witi pili ma taeti kule?‑ a kuu ha,

⁵ ‑Nasaté tili Jesus sama taeti kule‑ töpö kuu ha, ‑Hi ĩ sa waikiwö‑ Jesus a kuuma. Jutasö anö Jesus a monima pole, ĩ töpö na ĩ a wani öpa tikilio naioma.

⁶ ‑Ĩ sa waikiwö‑ ĩ na Jesus a kuu ha, töpö kililo nö, ĩ tä töpö tekukua kotalo nö, töpö kelasoma.

⁷ Ĩ tökö soatawö, ‑Ĩ witi pili ma taeti kule?‑ Jesus a kuu kotasoö ha, ‑Nasaté tili Jesus sama taeti kule‑ töpö kuu ha,

⁸ ‑“Hi ĩ sa waikiwö” ĩ na sa kuu waikio ke nökö‑ Jesus a kuu nö, ‑Kamakönö sa taeti waikia manu kule, ipa töpö hula kopalöö!‑ ĩ na Jesus a kuuma.

⁹ ‑Kamisa na wa töpö totopipili, ĩ sa töpö pewö noama hö̃töa soatia kule‑ pö̃ a na Jesus a kuu noai, ĩ na ĩ tä kuo toleo totiatalo hö̃töopö, ‑Ipa töpö hula kopalöö!‑ Jesus a kuuma.

¹⁰ Ĩ na tä kua tä, Simão Pedro anö, poo a po pole, ĩ a po läkäa soatalö nö, Teusö a täpä totio wi ĩ pata tä na a kalipalo sinomo wi, ĩ a sömöka wani pasopalöma. Kate a poko kuamö kule hamö a sömöka kule, ĩ a sömöka pasopalöma. Mauku a hiloma.

¹¹ Ĩ a sömöka pasopali ha, ‑Au poo a titia kõköö!‑ ĩ na Jesus anö Pedro a noa thaa nö, ‑“Wa pea totiopökö” kamisa na ĩ na ipa hao a kuu totioma maaki, “Jesus a peama tihöö!” pö pi kuu tihöö! “Wa peapököö!” ipa hao anö sa noa thaa waikioma kutenö, “Awai. Sa peama päoö!” sa kuu kuleö!‑ Jesus a kuuma.

Sotatu töpönö pata tä na Jesus a tälölöö

¹² Ĩ na tä kua tä, ĩ sotatu töpö, ĩ sotatu töpö simöa sinomo wi ĩ a, Teusömo wi a sai ha töpö läapalo sinomo wi ĩ töpö, ĩ na töpö kui töpönö Jesus a huöa soatalö nö, a poko õka soatakö nö,

¹³ Anásö a pata kuo taso pamö a täa soatalölömae. Anásö a pata hai, Kaipasö hai ĩ pĩsi a. Ĩ tä inama na, Teusö a täpä totio wi ĩ Kaipasö a pata kuoma.

¹⁴ Kaipasö aiki, ‑Ai töpönö sami ai tä säa sisapalöpököö! Sami ai tä säa sisapalöma, kamakö pewö säpa naio mai kitä‑ ĩ na Kaipasö anö töpö noa thaa noai, ĩ a.

‑Jesus sa tai mi ipöö!‑ Pedro a kuu noai ĩ ta

¹⁵ Ĩ na tä kua tä, Simão Pedro a, Jesus a kai a hua sinomoti wi ĩ ai tä, Jesus a na ĩ na kilii töpö nokalolö nö, Teusö a täpä totio wi ĩ pata tä hai ĩ sai a na töpö walokö tasoma. Töpö waloikitö nö, Jesus a kai a hua sinomoti wi, pata tänö ĩ a taö öpama kutenö, pata tä sai pö sika na tä hokale ha, ĩ ha Jesus a kai lisipo tä, Jesus a kai a hua sinomoti wi ĩ a lisia tikilia naipasoma.

¹⁶ Sai a päka holeo pa Pedro a öpa haitioma. Jesus a kai a hua sinomoti wi, pata tänö ĩ a taö öpa noai, ĩ a lisia sapa kotalo nö, sai a päka holeo pa suö tä läapalo pole, ĩ a na a hapalo nö, õsimö hamö Pedro a kai lisia sapa nömöpasolöma.

¹⁷ A kai lisipo pia tä, sai a päka holeo pa suö tä läapalo pole, Pedro a na ĩ aiki, ‑Jesus wa kai a hua sinomoti wi wa hãtowö?‑ ĩ na a kuu ha, ‑Ma. Ĩ sa pasi mai kitä‑ Pedro a kuu hö̃töoma.

¹⁸ Ĩ na tä kua tä, töpö pewö wati ipö salo, ĩ tä sai na töpö kalipalo sinomo wi ĩ töpö, töpö läapalo sinomo wi ĩ töpö, ĩ na töpö kui töpönö koa taka thakö nö, ĩ taka kasö na töpö öpa sototoiki nö, töpö pomopaloma. Ĩ ha Pedro a öpa tikilia naiki nö, a pomo naioma.

Jesus a kuati wi, Jesus a na juteu pata tänö ĩ ta hini noai ĩ ta

¹⁹ Ĩ na tä kua tä, Teusö a täpä totio wi, ĩ pata tänö Jesus a hapalama nö, ‑Kawa kai a hua sinomoti wi, wi na ĩ töpö kua totioö? Wa ta wäsä sinomo wi, wi na ĩ ta kua totia?‑ a kuuma.

²⁰ A kuu ha, ‑Hoka apa pa ĩ töpö pewö na sa ta wäsä sinomoti thali. Juteu töpö kokamo sinomo wi, ĩ a sai na sa ta wäsätii, Teusömo wi a sai ha sa ta wäsätii, ĩ na sa ta wäsä kuati thali. Sa ta wäsä hãtomo maa thaliö!

²¹ Önö kutenö, wi na wa pi kuu salo, kawanö sa huama kule? Sa ta wäsäti ha, töpö sömöka taa pasitio noai, ĩ wa töpö huama mi salo. Sa ta wäsätipili, ĩ töpönö ĩ ta taö waikile kitä‑ Jesus a kuuma.

²² Ĩ na Jesus a kuu ha, töpö läapaloti wi, ĩ ha ĩ töpö öpa sototole, ĩ ai tänö Jesus a moikömö na tä tĩathoa soatakö nö, ‑Teusö a täpä totio wi, ĩ pata tä na, ĩ na wa kuu kili maapa wi‑ ĩ na a kuu ha,

²³ Jesus aiki hö̃töwö, ‑“Jesus a hapalo wanisala hãto alu kule” wa pi kuu salo, hi töpö öpa sototole, ĩ töpö pewö na ĩ ta kateha totioö! Sa kuuhe, ĩ pitili ta maaki, wi na wa pi kuu salo, sa sä ke?‑ ĩ na Jesus a kuuma.

²⁴ Ĩ na Jesus a kuuma, Teusö a täpä totio wi, ĩ pata tä Kaipasö a na Anásö a patanö Jesus a õkama simöpalöma.

‑Jesus sa tai mi‑ Pedro a kuu kõo noai ĩ ta

²⁵ Ĩ na tä kua tä, Simão Pedro a öpatiki nö, a pomoti tä, ‑Jesus a kai a hua sinomoti wi, ĩ wa hãtowö?‑ töpö kuu ha, ‑Ma. Ĩ sa pasi mai kitä‑ Pedro a kuu hö̃töoma.

²⁶ A kuu ha, Teusö a täpä totio wi ĩ pata tä na töpö kalipalo sinomo wi, Pedro anö ĩ ai tä sömöka wani pasopalö noai, ĩ a wani na, ‑Ipa ai tä‑ a kuuto wi, ĩ aiki, ‑Ki hikali a na Jesus a na wa huu naio hãto kipili?‑ a kuu ha,

²⁷ ‑Naiö!‑ Pedro a kuu kõoma. Ĩ tä soatawö kalaka a komöa soatasoma.

Pilatosö a pata na Jesus a kai walokö noai ĩ ta

²⁸ Ĩ na tä kua tä, Kaipasö a sai pö ha töpö kuoma, homa tili pata tä sai pö pata hamö Jesus a noka nömömanönömae. Tä halu waikioma. Ĩ tä wakala na juteu töpö pásökoamo nö, töpö iapalo waikio piaö ha, homa tili pata tä sai pö na ĩ töpö lisipo maama. ‑Makö iapalo pia tä, tiko töpö sai pö na lisipaso wi, ĩ tä kua pasia mai kitä‑ juteu töpö pi kuu salo, homa tili pata tä sai pö ha ĩ töpö lisipo maama.

²⁹ Önö kutenö, homa tili pata tä hai, ĩ Pilatosö a pata lisia kopalo nö, ‑“Hi a wani wanisala apa pasioö” makö kuu pole, ĩ anö ĩ ka pi tä thaa totioma?‑ Pilatosö a pata kuu ha,

³⁰ ‑Ĩ anö wanisala tä thaa maama aköna, kawa na sama wani hilapala solöa mana pi‑ töpö kuuma.

³¹ Töpö kuu ha, ‑Kamakönö a noka komanönöö! Kamakö hai ĩ pata töpönö töpö noa thaa noai, ĩ ma tä waheta möö paio nö, “‘Ĩ na pö kua ti!’ pata töpönö töpö noa thaa thali maaki, ĩ na hi a wani kua satimo opa kutenö, a wanisala apaö. Önö kutenö, ma wani säpalö nököö!” ĩ na makö kuupököö!‑ ĩ na Pilatosö a kuuma. A kuu ha, ‑“Ai tä säpa maikiö!” ĩ na homa tili pata töpönö makö noa thama kutenö, kama samakönö Jesus sama säpa mai kitäö!‑ ĩ na ĩ juteu töpö kuuma.

³² ‑Sa säpamonaso pia wi, ĩ na tä kua kitä‑ Jesus a kuu waikio noai, ĩ ta pitilio opa kuköpö, ‑Homa tili töpönö hii ti pakalai ti ha a säpalöpöö!‑ ĩ na juteu töpö pi a kuu nö, ‑Kamisamakönö kuno maiö!‑ töpö kuuma.

³³ Ĩ na töpö kuuma, kama sai pö ha Pilatosö a lisia kotalo nö, Jesus a naka soatalö nö, ‑Juteu töpö na wa kaikanamo wi, ĩ wa?‑ a kuu ha,

³⁴ ‑Kama wa pi saimo nö, wa kuu ke? Ai töpönö kawa na ĩ ta wäa hãtokömakö?‑ Jesus a kuu ha,

³⁵ ‑Wi na wa pi kuu totia kule? Kama sa pi saimo päo mai kitä. Juteu sa pasi mai kitä. Au ai juteu töpö, Teusö a täpä sinomo wi ĩ pata töpö, ĩ na töpö kui töpönö kamisa na wa namo simökömae. Wi na pili wa kua totioma?‑ Pilatosö a kuuma.

³⁶ A kuu ha, ‑Hi masita tä uli na töpö kule, ĩ töpönö sa kaikanapa maama. Ĩ töpönö sa kaikanapalöma aköna, kamisa na töpö nokapaloti wi, ĩ töpö waitilimo opöla pi. “Juteu pata töpö na Jesus a namo simöki pia salo” ipa töpö pi kuu nö, töpö waitilimo pola pi. Sanöma tä kaikana kua wi na, ĩ na sa kua pasio mai kitä‑ Jesus a kuuma.

³⁷ Ĩ na Jesus a kuu ha, ‑Ĩ na wa kuu manu kule, kaikana wa totihiwö?‑ Pilatosö a kuu ha, ‑“Kaikana wa” kama wa kuu ke‑ Jesus a kuu nö, ‑Pitili sa ta wäsä sisapö, sa kupalo nö, hi masita tä uli na sa huma. Ai sanöma töpö pitilimo totio opa wi ĩ töpönö sa hini kitä‑ Jesus a kuu ha,

³⁸ ‑“Pitili ta” wa kuu pole, ĩ ka pi wa ta kateha kule?‑ Pilatosö a kuuma. Ĩ na Pilatosö a kuu nö, atu hamö juteu töpö sototole, ĩ hamö a lisia kotalo nö, ĩ töpö na a hapalo nö, ‑Hi a wanisala mi ipöö! A wanisala mi kutenö, “A säpalöö!” sa kuu mai kitä‑ ĩ na Pilatosö a kuu nö,

Jesus a namo simökö noai ĩ ta

³⁹ ‑Pi naka. Ĩ tä inama pewö na makö pásökoamo tä, titita wi a sai na töpö titile, ĩ ai ma tä saili ha, ĩ sa tä kusöa kopamanö nö, sa tä atupama sinomo kõo thali. Önö kutenö, hi a kaikanamo wi, juteu makö na ĩ sa atupamanöpö? “Awai” makö kuu kitä?‑ ĩ na Pilatosö a kuuma.

⁴⁰ Ĩ na Pilatosö a kuu ha, ‑Ma. Ĩ aiki, kuno mai. Pahapásö a atua kõa pasipamanöö!‑ töpö lalupalo pola nö, töpö pewö a kuuma. Pahapásö a lö kui, homa tili pata töpö na a waitilimo sinomo noai, ĩ a.