João 15 - Teusö Tä Waheta

Upa toto ola tipöa kua wi na, ĩ na Jesus a na makö tipöa kua hö̃töoö

¹ Ĩ na tä kua tä, Jesus a hapalo kõo nö, ‑Upa mokö lalo wi, ĩ toto kua wi na, ĩ na sa kua hö̃töo asaö. Upa toto na sanöma tä kalipaloti wi, ĩ a kalipaloti kua wi na, ĩ na ipa hao a kalipalo kua hö̃töoö.

² Ola toto tipöo kua wi na, ĩ na kamisa na töpö uni tipöa kua hö̃töa. Ai ola toto na ai mo lalo pasio mi ha, ĩ toto ola päpalö nö, toto ola hosa thata wi na, ĩ na kamisa na töpö kokale, ĩ ai tä tomöpo mi tä, ĩ na ipa hao anö ĩ a wani hosa thata hö̃töoö. Ai toto ola na mo lalo asa wi, ĩ toto ola na mokö siko lalotama apa pia salo, ĩ toto na ai toto kau kapisopö paale, ĩ toto kau päta pätama sinomotii. Ĩ na tä kua kua wi na, ĩ na makö kuaö. Kamisa na töpö kokale, ipa hao anö pe epii ĩ töpö totiama pia salo, ola toto na sanöma tä kalipalo kua wi na, ĩ na kamisa na töpö kokale, ĩ töpö na ĩ na ipa hao a kalipalo kua hö̃töoö.

³ Kamakö na wanisala tä kokakö noai, ĩ wanisala sa tä hosa waikilöma. Kamakö na sa ta wäsäti noai, ĩ tänö makö totiama waikioma‑ ĩ na Jesus a kuuma.

⁴ Ĩ na a kuu nö, ‑Kamisa na makö kokapalo toitioö ha, kamakö õsi na sa kokapalo hö̃töo soatio kitä. Kolo toto na ai toto kolo kapisopö paa mi tä, ĩ toto na ai mokö lalo mi kui na, kamisa na ĩ na makö koka kua mi tä, toitai ma tä thati mai kitä.

⁵ Upa toto kolo kui na, ĩ na sa kuö hö̃töwö. Ĩ upa toto ola pakala kua kua wi na, ĩ na kamakö kua hö̃töoö. Kamisa na wa koka soatia, kawa na sa koka hö̃töa soatia, ĩ na makö kuati tä, pe epii toitai wa tä thaa soatio kitä. Kamisa na makö kokapalo mi tä, toitai ma tä thaa mai kitäö!

⁶ Toto ola hosalöma, toto hotea kulaso wi na, kamisa na wa kokapalo pasio mi tä, ĩ na wa hotea kulaso kitä. Ĩ toto ola hoteso noai ha, koa taka na ĩ toto saa thapi kitä.

⁷ Kamisa na makö koka totia soatia, kamakö na sa kai a koka totia hö̃töa soatia, ĩ na makö kua soatia tä, ma tä pi ipa wi, Teusö a na ĩ ma tä nakaö ha, Teusö anö tä totoa hö̃töki kitä.

⁸ Pe epii toitai ma tä thati tä, “Jesus a hai ĩ pö̃ Teusö a totiatalo opa asawöö!” ĩ na ma töpö pi thama kitä. Pe epii toitai ma tä thati tä, sa kai a hua sinomoti wi, ĩ makö sai kupaso kitä.

⁹ Ipa hao anö sa pi ipa sinomo kua wi na, ĩ na kamisanö makö pi ipa kua hö̃töoö. Kamisa na pö kokapalo soatioö! Kamisa na makö kokapalo soatio kuköma, kamisanö makö pi ipa kitä.

¹⁰ “Ĩ na a kua totihoö!” ipa hao a kuu wi, ĩ sa ta hini makoka totiatala apa salo, ipa hao a na sa kokapalo soatioö. Sa kokapalo soatio kutenö, ipa hao anö sa pi ipaö. Ĩ na makö kua hö̃töoö. “Ĩ na pö kua totihoö!” sa kuu wi, ĩ ma ta hini totio tä, kamisa na makö kokapalo soatio kitä. Kamisanö makö pi ipa soatio kitä‑ ĩ na Jesus a kuu nö,

¹¹ ‑Kamisa pi topa kua wi na, ĩ na makö pi thama pia salo, ĩ sa ta wäsä ke. Makö pi topapalo opapö, ĩ sa ta wäsä ke.

¹² “Kamisanö makö noima kua wi na, ĩ na pö noimaso kua totihoö!” ĩ na makö noa thaö.

¹³ Au noi wa töpö noama pia salo, wa säpamonasoma, ĩ wa töpö noima satia apa wi, ĩ wa.

¹⁴ “Ĩ na pö kua totihoö!” sa kuu pole, ĩ ma ta hini totioö ha, ipa noi makö.

¹⁵ Pata tänö töpö simöa sinomo wi, pata tä pi kuu pole, ĩ töpönö ĩ tä tai mi ipö. Önö kutenö, “Kamisanö makö simöa sinomo wi, ĩ makö” ĩ na sa kuu kõo mai kitä. Ipa hao a na sa ta hinipili, kamakö na ĩ sa tä pewö a wäsä waikioma kutenö, “Kamakö hai, ĩ ipa noi makö” huki kamakö na sa kuu totio nömöoö.

¹⁶ Kamakönö sa saipa maama. Kamisanö makö saia asapalöma. “Makö saipalö noai, ĩ makönö, ‘Jesus a pitili’ ai ma töpö pi thamapöö! Ĩ na ma töpö pi thama wi, ĩ töpönö sa hosa mai, sa thapo soatio wi, sa tä pi ipaö” ĩ na sa pi kuu soatama kutenö, makö saipalöma. “Jesus a pitili” ĩ na ai ma töpö pi thama kuköma, kamakönö sa thapo kutenö, kamakö hai ĩ pö̃ a na ma tä naka wi, kamakö hai ĩ pö̃ anö ĩ tä totoa hö̃töki kitä.

¹⁷ Önö kutenö, “Makö noimasopököö” kamisanö makö noa thaa kule‑ Jesus a kuuma.

Teusö a thapo mai, ĩ töpönö makö wanipo kitä

¹⁸ Ĩ na Jesus a kuu nö, ‑Teusö a thapo mai, ĩ töpönö makö wanipoö ha, pö pi hatukuikiö! Teusö a thapo mai, ĩ töpönö sa wanipo paio kipili ta pi kuu mai.

¹⁹ Teusö a thapo mai, ĩ töpö kua kua wi na, ĩ na makö kua hö̃töoö aköna, ĩ töpönö makö noima pola pi. “Ipa töpö” ĩ na töpö pi kuu nö, makö noima pola pi. Kamisanö makö saia pälöma kutenö, Teusö a thapo pasia mane, ĩ tiko töpö pasiwö. Önö kutenö, Teusö a thapo pasia mai, ĩ töpönö makö wanipoö.

²⁰ “Töpö simöa sinomo wi, ĩ töpö hai, ĩ pata töpö mai kitä. Töpö simöa totio wi, ĩ a hai, ĩ pata tä sisawö” sa kuupili, ĩ tä na pö pi motimo tihöö! Ai töpönö sa peamatima kutenö, makö peama hö̃töo kitä. Ai töpönö sa kai a hininöma kutenö, makö kai hini hö̃töo kitä.

²¹ Kamakönö sa thapo waikia kutenö, sa thapo pasia mane, ĩ töpönö makö peama kitä. Sa simönö noai, ĩ töpönö ĩ a tai mi kutenö, makö peama kitä.

²² Ĩ töpö na sa wäo maama aköna, “Ĩ töpö wanisala apaö” Teusö a pi kuu maa noa kipi. Ĩ töpö na sa ta wäsä totioma kutenö, ĩ töpö aiki, “Teusö sa ta hini tai mi ipö salo, wanisala sa tä thaa päoma” ĩ na ĩ töpö kuu pasio mai kitä.

²³ Sa wanipo opati wi, ĩ töpönö ipa hao a wanipo hö̃töoö.

²⁴ Sa wanipo wi, ĩ töpö mamo tetela tä, ai töpö sanömanö tä thama tai mi pasii, ĩ sa tä thama asatioma. Ĩ sa tä thama maama aköna, “Ĩ töpö wanisala apaö” Teusö a pi kuu maa noa kipi. Sa tä thati asa noai, ĩ töpönö ĩ tä taa waikioma maaki, ĩ töpönö ipa hao a wanipoö, kamisa wanipoö, ĩ na töpö kua sinomoö.

²⁵ Ĩ töpö noa thaa wi, ĩ tä waheta na ĩ na tä sãököo kuoma: “Sa wanisala maama maaki, ĩ töpönö sa wanipoma” ĩ na tä waheta kuuma. Ĩ töpönö sa wanipo sinomo kutenö, ĩ na ĩ tä waheta kuu noai, ĩ pitili ta kuo toleo totioma.

²⁶ Makö pasilipo sinomo wi ĩ a waloki kitä. Teusö a õsi kua tolele, ĩ a lö kui, ĩ a. Teusö a õsi kua tolele, ĩ anö Teusö ta pitilii ta wäsä wi, Teusö a na ĩ a kutile, ĩ a waloki kitä. Teusö a na a kutio wi, kamisanö ĩ sa simöpali kitä. Ĩ anö sa wäsä kuki kitä.

²⁷ Somi tä, kamisa na makö kutioma, huki kamisa na makö nokapalo soa kule. Önö kutenö, kamakönö sa wäsä hö̃töo kitä‑ ĩ na Jesus a kuuma.