João 11 - Teusö Tä Waheta

Lásatu a nomaso noai ĩ ta

¹ Ĩ na tä kua tä, Lásatu a salia apama. Lásatu a, pese Maria a, pese Marta a, ĩ na töpö kui, Petânia tä uli na töpö pilioma.

² Pese Maria anö Jesus pata tä huu wi ĩ a ami hõo ha tuu hälälä toita apii, tuu noa apii, tuu lökö nö, pili a hunukunö tä sanöma kõo noai, ĩ a. Kama hai ĩ pese Lásatu a salia apama.

³ Lásatu a salia apaö ha, pese töpönö Jesus a na ai tä simönö nö, ‑“Au noi tä salia apölaliö!” ĩ na Jesus a na ĩ na wa kuu!‑ ĩ na Lásatu a hai ĩ pese töpö kuuma.

⁴ Ĩ na töpö kuu ha, Jesus a na ĩ a waloikitö nö, ta wäsä tasoma. Ĩ ta wäsä pole, Jesus anö ĩ ta hininö nö, a hapalo hö̃töo nö, ‑“Lásatu a nomasopö, a salia pasia kule” ĩ na a pi kuu tihöö! “Teusö a totiatalo opa asawöö!” ĩ na Teusö anö töpö pi thama pia salo, Lásatu a salia apa päa kule. “Teusö a hai ĩ pelupö a totiatalo opa asawöö!” ĩ na töpö pi thama päo pia salo, Lásatu a salia apa päa kule‑ ĩ na Jesus a kuuma.

⁵ Jesus anö Marta a, poose Maria a, pese Lásatu a, ĩ na kili töpö pi ipama maaki,

⁶ Lásatu a salia apa wi, Jesus anö ĩ ta hininö nö, Lásatu a kuo pa a huu soata mai, polakapi tä mumi hasupamanöma.

⁷ Polakapi tä mumi hasupamanö nö, kama kai a hua sinomoti wi, ĩ töpö na, ‑Jutéia tä uli pata na makö hua kononö nököö!‑ a kuu ha,

⁸ ‑Jesus ai. Ĩ hamö a huulö tihöö! Hi wisa ha, juteu töpönö wa säpa pi topa apa salo, maa manö wa säsä pi topa noa thali ta wa pi kuu mai. Wi na wa pi kuu salo, ĩ tä uli hamö wa huu pi topa kõa kule? Ĩ tä uli hamö a huu pi topa kõo tihöö!‑ ĩ na töpö kuuma.

⁹ Ĩ na töpö kuu ha, ‑Tä halulo nö, tä wakala lape epö kutenö, ĩ tä wakala a na wa huulö pamö, wa wäkäpa mai, wa huu soatiolö kitä.

¹⁰ Mumai ha kawa na wakala tä kua mi kutenö, wa wäkäpa päoö‑ Jesus a kuuma. ‑Wakalai ha wa huu makoka kua wi na, Teusö anö wa simöa wi ĩ wa ta hininöma, ĩ na wa huu makoka kua hö̃töo kitä‑ ĩ na Jesus a pi kuu salo, ĩ na a kuuma.

¹¹ Ĩ na Jesus a kuu nö, ‑Kamakö hai ĩ noi tä Lásatu a mikölöma maaki, ĩ a na sa waloikitö nö, sa naa komani kitä‑ Jesus a kuu ha,

¹² kama kai a hua sinomoti wi, ĩ töpö aiki, ‑Jesus ai. Lásatu a mitia manu kule, a salia apa kule maaki, a ononoa kotaso kitäö!‑ ĩ na töpö kuuma.

¹³ Jesus ta hini makokoa totio maama kutenö, ĩ na töpö kuuma. Lásatu a noma waikilaso noai, Jesus anö ĩ tä taö waikia päla nö maaki, ‑Lásatu a mikölömaö!‑ ĩ na a kuuma. Ĩ na a kuu ha, ‑Lásatu a mia pätia kule‑ ĩ na ĩ töpö pi kuu pasioma.

¹⁴ Ĩ na töpö pi kuu pasioö ha, ‑Lásatu a noma totisomaö!‑ ĩ na Jesus a kuu makokoa toitasoma.

¹⁵ Ĩ na a kuu nö, ‑Lásatu a noma tä, ĩ hamö sa kuo maa noai maaki, sa pi mönaha kule. Ĩ hamö sa kuo maama kutenö, “Jesus a pitilimo opaö. Jesus a hai, ĩ Teusö a ulupö” waiha ĩ na makö pi thama kitä. Önö kutenö, sa pi mönaha kule‑ ĩ na Jesus a kuu nö, ‑Pei. Lásatu a na makö pewö ekua soataiki nököö!‑ Jesus a kuuma.

¹⁶ Jesus a kuu ha, kökö poakapaso noai ĩ ai a na, ‑Sísimu‑ töpö kuuto wi, ĩ Tomé aiki, ‑Awai. Jesus a na makö pewö nokalolö nököö! Kamakö solo makö pewö säpamoa soa pätasopököö!‑ a kuuma.

¹⁷ Ĩ na tä kua tä, Petânia tä uli na Jesus a waloki ha, ĩ ha töpö hapalo nö, ‑Maa maka pata ha Lásatu a nomawö titikö noai, 4 tökö mumi hasua kua waikikömaö!‑ ĩ na töpö kuuma.

¹⁸ Jetusalẽi tä uli na Petânia tä uli atepa apa soata kule.

¹⁹ Ĩ tä uli na Lásatu a nomaso noai, ĩ tä uli atepa apa soata kutenö, ĩ tä uli hamö juteu töpö satehe epii töpö asulöma. Lásatu a nomasoma kutenö, pese Marta a, pese Maria a, ĩ na kilii töpö pi topapalama päo pia salo, töpö asulöma.

²⁰ Ĩ na tä kua tä, ‑Jesus a huu kulaliö!‑ Marta anö tä kuu hininö nö, Jesus a na a hua lälasolöma. Marta a hua asa pälasolö noai ha maaki, Maria a kuo hisa pasioma.

²¹ Jesus a na Marta a paa lälotö nö, ‑Pata! Hisa ha wa kuoma aköna, ipa sao a noma maa noa kipi.

²² Hisa ha wa kuo maa päo noai maaki, huki Teusö na wa hapalo nö, “Ĩ na wa tä thamaö!” ĩ na wa kuu ha, Teusö anö wa hinia totia hö̃töli kitä‑ ĩ na Jesus a na ĩ na Marta a kuuma.

²³ Ĩ na a kuu ha, ‑Au sao a temöa konaso kitä‑ Jesus a kuu ha,

²⁴ ‑Awai. Hi masita tä uli mapo pia tä nomawö töpö temöa konaso wi, ĩ tä, ipa sao a temöa naia konaso kitä‑ ĩ na Marta a kuu ha,

²⁵ Jesus aiki, ‑Sanöma töpö nomasoma maaki, kamisanö sa töpö temöma kõo wi, ĩ sa. Kamisa na sanöma töpö aiki, “Wa pitili” ĩ na ĩ töpö pi kuu wi, ĩ töpö nomasoma maaki, kamisanö ĩ sa töpö temöma kõo kitä.

²⁶ Kamisa na, “Wa pitili” ĩ na wa pi kuu asa wi, ĩ wa temii, wa õsi palimi asai, ĩ wa õsi noma mai kitä. “Ĩ pitili tä sai haö!” wa pi kuu kule?‑ ĩ na Marta a na ĩ na Jesus a kuuma.

²⁷ Ĩ na a kuu ha, ‑Awai, pata! Pitili wa haö! Teusö anö kamisamakö na wa kaikanamoma wi, ĩ wa. Teusö pelupö wa. “Masita tä uli na wa simöpali kitäö!” Teusö a kuu noai, ĩ wa‑ ĩ na Marta a kuuma.

Jesus a ö̃köso noai ĩ ta

²⁸ Ĩ na Marta a kuu nö, poose Maria a na a kotapolö nö, a nakalö nö, ‑Makö pi hatukama sinomoti wi, ĩ a huu kulaiö! Wa naka polaiö!‑ Marta a kuuma.

²⁹ Ĩ na a kuu ha, Jesus a kulati ha Maria a hua soatasolöma.

³⁰ Ĩ töpö sai pö na Jesus a walo totio mai ha, Marta a pao läo taso noai ha, ĩ ha Jesus a öpa haio soa tasoma.

³¹ Maria a pi topapalamapö ĩ juteu töpönö, lope epii Maria a hua soatasolö wi, ĩ tä taa nö, Maria a na ĩ töpö nokasolöma. ‑Lásatu a titilali hamö Maria a hua hãtosolö alu keheö! Ĩ hamö a ö̃kö hãtolaso pia alu kuleö!‑ töpö pi kuuma.

³² Ĩ na tä kua tä, Jesus a öpalali hamö Maria a waloikitö nö, Jesus a talalö nö, masita tä ha a loa soataiki nö, masita tä ha a maeko hĩta thaiki nö, a hapalo soata nö, ‑Pata! Hisa ha wa kuoma aköna, ipa sao a noma maa noa kipi‑ Maria a kuuma.

³³ Ĩ na Maria a kuu ha, Jesus anö Maria a ö̃kö talalö nö, Maria a na töpö nokapalo pole, ĩ töpö ö̃kö naine, ĩ töpö taa naio nö, Jesus a pi ota apötasoma. A pi honipo opama.

³⁴ Ĩ tä, ‑Witi ha ma titiköma?‑ ĩ töpö na Jesus a kuuma. A kuu ha, ‑Pata! Hapo! Tä mööso‑ töpö kuu ha,

³⁵ Jesus a ö̃kösoma.

³⁶ A ö̃kösoö ha, ‑Hiki. Ma tä taa nökö. Jesus anö ĩ a wani pi ipa hãto nö kilia noa a‑ ĩ ai juteu töpö kuuma maaki,

³⁷ ai töpö aiki, ‑Hi anö ai tä mamo höpöpö öpö tä, a mamo huu topa komaki kipili maaki, wi na a pi kuu salo, Lásatu a salia apa tä, a ononopa kõo maama? A ononoa kopalöma aköna, a noma maa noa kipi‑ ĩ na ai töpö kuuma.

Lásatu a noma totisoma maaki, Jesus anö ĩ a wani temöa komanö noai ĩ ta

³⁸ Ĩ na tä kua tä, Jesus a pi honipo opa kõo nö, Lásatu a nomawö titio pa, Jesus a walotaköma. Maa maka ha Lásatu a titile, ĩ ma päka na maa ma kasöoma.

³⁹ Maa ma kasöa tä, ‑Ma thaa kopalöö!‑ Jesus a kuu ha, ‑Pata! Tä hĩthani ipö waiki kitä ta wa pi kuu mai. Lásatu a titikö noai, 4 tä mumi kua waikile ta wa pi kuu mai‑ ĩ na Lásatu a hai ĩ pese Marta a kuuma.

⁴⁰ Ĩ na a kuu ha, ‑“‘Teusö a pitili’ ĩ na wa pi kuu tä, Teusö a lotete epii, a wakala apii, ĩ wa tä talali kitäö!” ĩ na sa kuu alu kipili nökö‑ ĩ na Jesus a kuuma.

⁴¹ Ĩ na tä kua tä, maa ma kasöle, ĩ töpönö ĩ ma pata pulumanöma. Ĩ ma pata pulutama tä, Jesus a nonoa soataiki nö, ‑Hapa. Kawanö sa hinini ke. Sa hini kutenö, “Aitaköö! Kawa totiatalo opaö” sa kuu kule‑ ĩ na Jesus a kuu nö,

⁴² ‑Kawanö sa hini sinomo wi, ĩ sa tä taö waikia kule maaki, “Teusö anö Jesus a simönö noai, ĩ a totiwö” ĩ na sa töpö pi thama pia salo, ĩ töpö sömöka tala tä, “Hapa. Kawanö sa hinini ke” ĩ na sa kuu hasulua apa ke‑ ĩ na Jesus a kuuma.

⁴³ Ĩ na Jesus a kuu nö, a komö nö, ‑Lásatu ai! A lisia kopaloö!‑ a kuuma.

⁴⁴ Ĩ na a kuu ha, Lásatu a lisia kopasoma. Watata ösökönö nomawö tä halo õka kolilipa sinomo wi, ĩ watata ösökönö Lásatu a nomawö halo õka kolilia waikipalöma. Ai watata ösökönö pili a ami pewö õka kolilipa soa, ai watata ösönö pili a he õka kolilipa naia soa, ĩ na a õka koliliama kuö soai, a lisia kopasoma. A lisipo kõa tä, ‑A kusöa kopalöö! A huu konöpököö!‑ ĩ na ĩ töpö na Jesus a kuuma. Ĩ na tä kuama.

Jesus a säpali pia salo

⁴⁵ Ĩ na tä kua tä, Maria a na juteu töpö noimomö huu noai, ĩ töpö aiki, ‑Teusö anö Jesus a simönö noai, ĩ a totiwö. Ĩ a pitilimo opaö‑ ĩ na ĩ töpö satehe epii, ĩ na ĩ töpö pi kuuma. Lásatu a temöa komanö noai, ĩ tä taa nö, ‑Jesus a pitilimo opa nö kiliawö‑ ĩ na ĩ töpö pi kuu nö, Jesus a hini totikömae.

⁴⁶ Ĩ na ai töpö kuama maaki, ai töpönö Jesus a wanipoti nö, patiseu töpö na ĩ töpö alulö nö, ‑Jesus anö Lásatu a temöa komani keheö!‑ töpö kuu nö, Jesus a kuati noai, ĩ ta wäsä tasoma.

⁴⁷ Ĩ ta wäsäö ha, Teusö a täpä sinomo wi ĩ pata töpö, patiseu töpö, ĩ na töpö kui töpönö pata töpö kokamo sinomo wi, ĩ töpö nakalö nö, ‑Wi na makö kuapö?‑ töpö kuu nö, ‑Jesus anö tä aipama apa nö kiliawö.

⁴⁸ Ma wani wasu mi tä, “Jesus a pitilimo opaö. Jesus a hai, ĩ pata tä asawöö!” ĩ na ĩ töpö pewö pi kuu nö, Jesus a hini totia asakö matimöö!‑ ĩ na patiseu pata töpö kuu nö, ‑“Teusö anö Jesus a kaikanamoma wi, ĩ a” ĩ na Jesus a na ĩ na töpö pewö pi kuu ha, homa tili pata töpö waloikiso nö, Teusömo wi a sai wania soapalö solöö, juteu makö mapamani, ĩ na makö thama solö kitäö!‑ ĩ na ĩ töpö kuuma.

⁴⁹ Ĩ na töpö kuu ha, Teusö a täpä totio wi ĩ pata tä Kaipásö, ĩ tä inama ha Teusömo wi, ĩ a sai ha ĩ a patamo pole, ĩ a hapalo nö, ‑Ma tä tai mio opapawö.

⁵⁰ Makö pewö noamapö, sami tä nomaso wi ĩ tä topa. Ĩ a noma paio mai ha, makö pewö mataso matimö ta pi kuu mai. Önö kutenö, ma säpamanöpöö! Sami ĩ a säpamonasoma, makö pewö säpamo maapököö!‑ ĩ na a kuuma.

⁵¹ A pi saimo päo nö, ĩ na a kuu maama. Ĩ tä inama ha, Teusömo wi ĩ a sai ha a patamo asa kutenö, ‑Jesus anö juteu töpö pewö täapa kõo läo pia salo, a säpamonaso kitä‑ ĩ na a kuu kuköpö, ĩ uni ta.

⁵² ‑Juteu töpö sino aiki kuno mai, Teusö ulupö töpö pewö selekepaso wi, ĩ töpö täapa kõo naio läo pia salo, Jesus a nomaso kitä. Ĩ töpö pewö täapa kõo läo nö, ĩ töpö kokapali pia salo, a nomaso kitä‑ ĩ na a kuu kuköpö, ĩ uni ta.

⁵³ Ĩ na a pata kuu ha, ĩ tä wakala ha soatawö, ‑Jesus ma säpamanöpöö!‑ ĩ töpö kuu kuköma.

⁵⁴ Ĩ na tä kuaö ha, hoka apa pa juteu töpö kule, ĩ hamö Jesus a huu maama. A alulö nö, pokei tä uli kotö ha tä uli pata kulati, ĩ tä uli na Epötaĩ uli a hilo wi, ĩ tä uli kulati, ĩ tä uli ha a talalotö nö, ĩ hamö kama kai a hua sinomoti wi, ĩ töpö solo töpö kutioma.

⁵⁵ Ĩ na tä kua tä, juteu töpö pásökoamo ateo tä, sai pö sololoi, ĩ tä uli ha töpö pilile, ĩ ai töpö satehe epii töpö asulöma. Töpö pásökoamo paio mai ha, Teusö a na töpö õsi ausipamo pia salo, Jetusalẽi tä uli ha töpö asulöma.

⁵⁶ Ĩ hamö töpö talalotö nö, Jesus a möti nö, Teusömo wi ĩ a sai ha töpö öpapalo tä, töpö hapalo hẽtupaso nö, ‑Wi na makö pi kuu kule? Hi tä sai na Jesus a pásökoamo naio hãto pia kule?‑ ĩ na töpö kuuma.

⁵⁷ Ĩ na tä kua tä, Teusö a täpä sinomo wi ĩ pata töpö, patiseu töpö, ĩ na töpö kui töpönö Jesus a huölöpö, kama hai ĩ töpö noa thaa nö, ‑Jesus wa talali salo, kamisamakö na ĩ wa ta wäsäö!‑ ĩ na pata töpö kuuma.