Filemom 1 - Teusö Tä Waheta

^1-2 Paulo sa. Jesus Cristo sa kai a wäsä sinomoö ha, sa õkapalö noai, ĩ sa. Jesus a thapo naio wi, ĩ Timóteo a solo, hi waheta sama tä simöpali ke. Ipa noi tä Pilemõ ai! Cristo a na wa kalipalo naio sinomo wi ĩ wa. Kawa, kawa sai pö ha töpö Teusömo sinomo wi ĩ töpö, ĩ na kilii makö na hi waheta sama tä simöni, Apiasoma wanö Cristo wa thapo naio wi ĩ wa na hi sama tä waheta simöa naini, sotatu töpö kasiapalo kua wi na, ĩ na samakö kasiapalo kua hö̃töle, ĩ na samakö kua kua wi na, ĩ na Akipu wa kua kua naio wi, ĩ wa na hi sama tä simöa naini, ĩ na makö kui makö na hi waheta sama tä simöni ke.

³ Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Pilemõ a kule ha, ĩ ha ai töpönö wa thapo wi, noa mi ĩ töpö pewö totiapala apaö! Ĩ töpö pi topapalama apaö!‑ ĩ na sa kuu.

Pilemõ anö Jesus a thapo wi ĩ a

^4-5 Pilemõ ai! ‑Teusö a thapo wi, Pilemõ anö ĩ töpö pewö pi ipa thaliö! “Jesus Kaikana a pitili” Pilemõ a pi kuu totio thaliö!‑ ĩ na sa ta kuu hini kule. Ĩ na sa ta kuu hini kutenö, Teusö a na, ‑Aitaköö!‑ ĩ na Teusö a na sa kuu sinomo nö,

⁶ ‑Hapa. “Jesus a pitili” ĩ na Pilemõ a solo, ĩ na samakö pewö pi kuu ösöha kutenö, Cristo a na samakö koka naia tä, Cristo anö samakö totiapala apati wi, ĩ tä na samakö pi hatuka totimaköö!‑ ĩ na Teusö a na, ĩ na sa kuu.

⁷ Ipa noi täö! Wa töpö pi ipa salo, sa pi mönaha apaö. Sa pi topa apaö. Jesus a thapo wi ĩ wa töpö pi ipa nö, ĩ wa töpö pi mönahapamanöma. Sa pi mönahapalama apa naia kule.

‑Onésimo a täa thaa konöö!‑ Paulo anö Pilemõ a noa thaa noai ĩ ta

⁸ Pilemõ ai! Önö kutenö, Cristo anö sa simönöma salo, ‑Ĩ na a kua totihoö!‑ ĩ na kamisanö wa noa thaa kili mai kitä maaki,

⁹ wa pi ipa päo salo, wa noa thaa mai kitäö! ‑Ĩ na wa kua mi salo!‑ ĩ na sa kuu päoö. Pilemõ ai! Paulo sa. Patasipö sa wani. Cristo sa wäsätima kutenö, sa õkama wani tititia kule.

¹⁰ Hisa ha sa tititia tä, Cristo a na Onésimo sa pi hatukupamanöma kutenö, ‑Onésimo hai, ipa ulu a‑ ĩ na sa kuu. Kawa na, ‑Onésimo a na ĩ na wa kuapö!‑ ĩ na sa kuu pia kule.

¹¹ Ĩ a hai, wa pasilipo wi ĩ a kuo maama maaki, huki wa pasilipo wi ĩ au tä kupaso ke. Ĩ anö sa pasilipo naioö.

¹² Kamisanö ĩ sa pii hö̃töa kule maaki, kawa na ĩ sa simöpa pia kõa kule.

¹³ Cristo sa ta wäsä sinomoti ha, hi sai a lototole, ĩ a sai ha sa titimakömae. Ĩ a sai ha sa titia soa tä, ‑Hisa ha Pilemõ a kua naia mi kutenö, Onésimo anö sa pasilipopöö!‑ ĩ na sa pi kuu nö, ‑Kamisa na a kua naikiö!‑ ĩ na Onésimo na ĩ na sa kuu pi topama.

¹⁴ Ĩ na sa kuu pi topama maaki, kawa aiki, ‑Awai. Kawa na Onésimo a kuo naiopö!‑ ĩ na wa kuu paio mi tä, ‑Kamisa na a kua naitikiö!‑ ĩ na Onésimo a na ĩ na sa kuu mai kitä. Ĩ na tä kuaö ha, ‑Paulo anö sa noa thaa päo salo, “Awai. Paulo a na Onésimo a kua naiopököö!” ĩ na sa kuu päo hö̃töo kitä‑ ĩ na wa pi kuu aköna, ‑Häö! Ĩ na kuno mai‑ sa pi kuu totia hö̃tötalopi. Kamisanö wa noa thaa mai ha, kawa pi saimo nö, ‑Paulo a na Onésimo a kuo naitiopöö!‑ ĩ na wa pi kuu ha, tä topa sisaa.

¹⁵ ‑Kawa na Onésimo a kalipalo paioma, tiko hamö a asulöma maaki, kawa na a kononö nö, ĩ ha a kuo soatiopö‑ ĩ na sa pi kuu kule. ‑Tiko tä sai pö na a kuatalo paio maama kutenö, kawa sai pö ha a kua koiki nö, kawa na a kupalo naitiopö‑ ĩ na sa pi kuu kule.

¹⁶ Sutu ha Onésimo wa noa mi kalipalamati noai, ĩ a kuo paioma maaki, huki Onésimo anö Jesus a thapo naio wi, ĩ a. Önö kutenö, kamisanö Onésimo sa pi ipa wi maaki, kawanö ĩ wa pii satia apaö. Kawa na Onésimo a kalipalo sinomo kutenö, ĩ wa pii kitä maaki, huki ĩ anö Jesus a thapo salo, ĩ wa pii satia apa kitä.

¹⁷ Önö kutenö, ‑Paulo a solo, Teusö a na samakö kalipalo sinomo wi, ĩ samakö‑ ĩ na wa pi kuu waikia kutenö, kawa na sa walo tä, ‑Aitaköö! Hisa ha a kua naikiö!‑ kamisa na wa kuu kua wi na, ĩ na Onésimo a na ĩ na wa kuu!

¹⁸ Kawa na Onésimo anö wanisala tä thaa hãtopalöma? Kawa na ĩ anö noa tä totoa kõo mai ha, ĩ a kua soa hãtoakö? Ĩ na tä kuaö ha, kamisa na ĩ noa wa tä nakalöö!

¹⁹ Ĩ wa tä noa nakaö ha, sa tä noa totoa hö̃töki kitä. Paulo sanö ĩ sa tä noa totoki kitä. Ĩ na sa kuuhe, kamisa aminö sa tä sãöka ke. ‑Paulo sanö ĩ sa tä noa totoki kitäö!‑ ĩ na sa kuu ke maaki, kamisa na wa tä noa totoa kõo mai ha, ĩ na wa kua soa kule ta pi kuu mai. Pi naka. Kawa aiki, ‑Paulo anö Cristo a na sa pi hatukupamani wi, ĩ tä noa na Paulo a na sa kupaloti nö, sa kalipalo sinomotipöö!‑ ĩ na wa pi kuu aköna, wa pitilimo pi.

²⁰ Ipa Onésimo ai. Cristo wa thapo naio kutenö, sa pi topa kopamanöö! ‑Onésimo a thaa konöö!‑ ĩ na sa kuu ha, Cristo wa thapo naio kutenö, ‑Hai. Awai‑ ĩ na a kuu totihoö!

²¹ Sa pi tapoiki nö, ‑Pilemõ a hai, “Hai. Awai. ‘Onésimo wa thaa konöö!’ ĩ na Paulo anö sa noa thaö ha, Onésimo sa thaa koni kitäö! ‘Onésimo wa thaa konö nö, wa totiapala soatiopökö’ ĩ na Paulo a kuu nömöo maama maaki, Onésimo sa totiapala soatio pia salo. Paulo anö sa noa thae, ĩ sa ta hini kitäö!” ĩ na Pilemõ a pi kuu kitäö!‑ ĩ na sa pi kuu salo, kawa na hi waheta sa tä simöpali ke.

²² Ĩ na tä kua tä, Teusö a na, ‑Kamisamakö na Paulo a simöpalöö!‑ makö kuu wi, Teusönö ĩ ta hininöma, tä tetepo opa maa noai ha kamakö na sa hamamo kitä. Önö kutenö, ‑Sa hama kutapö a sai thaköö!‑ ĩ na sa kuu kule.

‑Wa topa kule?‑ ai töpö kuu wi ĩ töpö

²³ Kawa na Epapötasö a kai simöpaso ke. Kama aiki, Cristo a na ĩ a kalipalo pi topa salo, titita wi a sai ha sa titia soa tä, kamisa na ĩ a kua sätäa naitia kule.

²⁴ Kamisa na töpö kalipalo naitio wi, Marcos, Atisötaku, Temasö, Lucas, ĩ na töpö kui töpö solo, kawa na ĩ töpö kai simöa naipaso ke.

²⁵ Jesus Cristo Kaikana tä na makö a wäsä nö, ‑Ĩ töpö totiapala totioö!‑ ĩ na sa kuu. Ĩ naköö!