Efésios 3 - Teusö Tä Waheta

Cristo ta hinimoma paio maa noai, kamakö na huki ĩ ta hasulua asapamanö noai ĩ ta

¹ Önö kutenö, juteu makö pasi mi ipii ĩ makö na Cristo sa ta wäsäti wi, ĩ tä noa na titita wi a sai ha sa titia kule.

² Teusö anö makö noima nö, makö totiapala apa pia salo, kamakö na sa simönöma. Cristo sa ta wäsätipö, Teusö anö sa simönöma. Ĩ ma tä taö waikile kitä.

³ Sanöma makönö ma tä taö paio maa noai, Teusö anö kamisa na ĩ ta hasulua asapamanöma. Ĩ ta hasulupamanö noai, hi waheta tä na wani ipii ĩ sa ta wäsä waikio ke.

⁴ Ĩ waheta ma tä möö nö, kamisa na Teusö anö Cristo ta hasulupamanö noai, ĩ tä na sa pi hatuka apöle, ĩ ma tä taö öpa kuki kitä.

⁵ Teusö anö ĩ ta hasulupamanö noai, ai nö patapö töpö na ĩ ta wäsä pasio paio maama. Huki Teusö anö samakö simöa asalö noai ĩ samakö, Teusö sama ta wäsä sinomo asa wi ĩ samakö, ĩ na samakö kui, ĩ samakö na Teusö a õsi kua tolele, ĩ anö ĩ ta hasulua asapamanö nö, kamisamakö na ĩ ta wäsä asama.

⁶ Ta hasulupamanö noai, pi na ĩ ta kua. Juteu samakönö Teusö sama thapo sisa mai kitä. Cristo ta topa apöle, ĩ ma ta hinia waikilöma tä, pi na makö kuaö. Teusö anö sanöma makö na tä toita apii tä totoma wi, juteu samakönö ĩ sama tä täli, juteu makö pasi mai maaki, ĩ makönö ĩ ma tä täa hö̃töli, ĩ na makö pewö kuatii. Cristo ma thapo wi ĩ makö pewö. Juteu samakö, juteu makö pasi mai ĩ makö, ĩ na makö kui makö pewö hai, Cristo makö uni pewö. Ĩ makö pewönö Cristo ma thapo ösöha kutenö, juteu samakö, juteu makö pasi mai ĩ makö hö̃töwö, ĩ na makö kui makö na Teusö aiki, ‑Kamakö hai, ipa ulu makö kupasoma, makö totiatalo opati kitäö!‑ ĩ na kamakö pewö na ĩ na Teusö a kuu.

⁷ Teusö a lotete epii, ĩ tänö Teusö anö sa totiapala sinomo wi, kamisa na ĩ tä totopöma kutenö, Cristo ta topa apöle, ĩ tä na sa kalipalamati kule. Cristo ta topa apöle, ĩ sa ta wäsä sinomotipö, sa simönöma.

⁸ Teusö a thapo wi ĩ töpö pewö na sa komoapalo satia apati wi maaki, Teusö anö sa totiapala apa nö, juteu töpö na kuno mai, juteu makö pasi mai ĩ makö na Cristo ta wäsätipö, sa simönöma. Tä noa apii, kamakönö ĩ ma tä tai mi ipii, Cristo anö kamakö na ĩ tä pewö totomati wi, ĩ sa ta wäsä sinomotipö, Teusö anö sa simöpalöma.

^9-10 Teusö anö tä thama pia wi ĩ tä hatukupo paio maama maaki, ai töpö pewö na ĩ sa ta hatukupamanöpö, Teusö anö sa simönöma. Teusö anö tä pewö thaa noai ĩ anö nö patapö töpö na tä hatukupama paio maama. Teusö anö ãju töpö simöa sinomo wi ĩ töpö na ĩ ta hasulupama hö̃töo paio maama. Jesus Cristo a thapo wi, Teusö anö ĩ töpö möma totio nö, ‑Ĩ tä pewö na Teusö a pi mosawio opapawö‑ huki ĩ na Teusö anö kama hai ĩ ãju töpö pi thamatii.

¹¹ Somi tä sai tä Teusö anö tä thama pi topa soata noai, huki Kaikana Jesus Cristo a na ĩ tä thama totioma.

¹² Jesus Cristo a na makö kokale, ‑Cristo a pitili‑ ĩ na ĩ makö pi kuu totia kutenö, Teusö a na makö hapalo kili mai, ‑Kamisa na Teusö a sömöka taa waikia kuleö!‑ ĩ na makö pi kuu totioö.

¹³ Önö kutenö, ‑Kamakö na Cristo sa ta wäsäö ha, ai töpönö sa peama pole, ĩ tä na pö pi ota hãto tihöö!‑ ĩ na kamakö na sa kuu kule. Makö pasilipoti wi, ĩ tä pi na sa pea kule. ‑Epesu tili töpö toita apö‑ ĩ na ai sa töpö thama pia salo, ai töpönö sa peama kule maaki, kamakö na Cristo sa ta wäsä satimo opati kule.

Pe epii Cristo anö makö pi ipa totio wi, ĩ ma tä taö kuköpököö!

¹⁴ Önö kutenö, pili sa maekonö sa loa hĩtaiki nö, kamakö hai ĩ pö̃ Teusö a na sa hapaloö.

¹⁵ Hi tä hẽtu hamö Teusö a na töpö kupoli ĩ töpö, hi masita tä uli pewö hamö sanöma makö pewö kule ĩ makö, ĩ na makö kui, Teusö a na, ‑Ipa hao a‑ ĩ na makö pewö kuu. Kamakö pewö na Teusö aiki, ‑Ipa ulu töpö‑ ĩ na a kuu hö̃töoö. Önö kutenö, ‑Teusö ulupö töpö‑ ĩ na Teusö anö makö hila thaköma.

¹⁶ Teusö a na kamisa aiki, ‑Hapa Teusö. Hi tä hẽtu ha wa kupoli, ĩ wanö tä toita apii wa tä thapo polali, ĩ tä kua apa kutenö, kawa õsi kua tolele ĩ anö epesu tili töpö na lotetea apa wi ĩ wa tä totokö nö, töpö õsi lotetea totia apöpamanöö!‑ ĩ na sa kuu.

¹⁷ Ĩ na sa kuu nö, ‑Ĩ wa töpö õsi lotetepamani ha, “Cristo a pitili” ĩ na ĩ töpö pi kuu kuki ha, ĩ töpö õsi na Cristo a kuo totio soatiopököö!‑ ĩ na sa kuu. Ĩ na sa kuu nö, ‑Komo hamö hii ti nasökili kua apa tä, pili ti lototo kuo wi na, ĩ na Cristo anö samakö noima apa wi ĩ tä na ĩ töpö pi kua soatioö ha, ĩ na ĩ töpö õsi lotetea kuo hö̃töopöö!

¹⁸ Ĩ na ĩ töpö pi lotetea apa kua hö̃töo nö, ĩ töpö pi hatukupasopököö! Kawanö samakö pewö thapo wi ĩ samakö pewö pi hatukua totipasopököö! Pe epii Cristo anö samakö pewö pi ipa soatio wi ĩ tä na samakö pi hatukuköpöö!‑ ĩ na Teusö a na ĩ na sa kuu.

¹⁹ Ĩ na sa kuu nö, ‑Cristo anö epesu tili töpö pi ipa wi, ĩ töpönö ĩ tä taö kuköpököö!‑ ĩ na sa kuu. Sanöma makönö ĩ ma tä taö totia apa mai kitä maaki, sa kuu päa alu kule. Cristo anö makö pi ipa wi ĩ ma tä taö kuköma, kamakö õsi ha Teusö a kua totiki kitä. Teusö a toita apii a kuati wi na, ĩ na makö pewö toita apii makö kua naiki kitä.

²⁰ Ĩ na tä kua tä, kamakö õsi na Teusö a lotetea apöle, ĩ tä kalipalo soatio kutenö, Teusö anö makö pasilia totipali kitä. Kamakö aiki, ‑Samakö pasilipalöö!‑ Teusö a na ĩ na makö kuu nö, ‑Wani ipii Teusö anö sa pasilia hãtopali kitä‑ ĩ na makö pi kuu kule maaki, pe epii Teusö anö makö pasilipa taö totio opa kitä.

²¹ Önö kutenö, Teusö a na, ‑Wa totiatalo opatiwö‑ ĩ na Cristo ma thapo wi, makö kokamo sinomo wi, ĩ na ĩ makö pewö kuu soatiopököö! Hi masita tä uli maa päpaso noai ha maaki, ĩ na makö kuu mapo maapököö! Ĩ naköö! ‑Teusö ai. Wa totiatalo opatiwöö!‑ ĩ na makö kuu soatiopököö!