Atos 9 - Teusö Tä Waheta

Saulu anö Jesus a thapo wi a kupaso noai ĩ ta

¹ Ĩ na tä kua tä, Jesus pata ta hini sinomoti wi, Saulu anö ĩ töpö wanipo nö, ‑Ĩ sa töpö säpamanöpöö!‑ a kuu nö, Teusö a täpä totio wi, ĩ pata tä na Saulu a ekuiki nö,

² ‑Tamaasöku tä uli pata ha sa hulolö nö, Jesus a thapo wi ĩ sa töpö talalö nö, suö töpö solo sa töpö õkapamanö nö, hisimö, Jetusalẽi tä uli pata hamö sa töpö suaki solö nö, ĩ na sa töpö thama pia salo‑ ĩ na Saulu a kuuma. Ĩ na a kuu nö, ‑Tamaasöku tä uli ha juteu töpö kokamo sinomo wi, ai sai pö ha töpö kokamo seteko wi, ĩ töpö na waheta wa tökö simöpalöö! Kamisa na ĩ waheta wa tökö simöpalöpököö! Ĩ wa tökö simöpalöma, ĩ töpö aiki, “Naiö! Töpö suaalö tihöö!” ĩ na ĩ töpö kuu mai kitäö!‑ ĩ na Saulu a kuuma.

³ Ĩ na Saulu a kuu ha, ‑Awai!‑ ĩ na pata tä kuu hö̃töoö ha, Saulu a alulö nö, Tamaasöku tä uli pata ha a ateo tä, hutu mosökö ha ta pata wakala apii, Saulu a na ĩ ta pata ithoa läpaköma.

⁴ Ĩ ta pata ithoa läpaki ha, masita ha Saulu a kea soasoma. A kea soalo nö, Saulu a paa tä, ‑Saulu ai. Wi na wa pi kuu salo, sa peamatii?‑ ĩ na ta kuu soatasoma.

⁵ Ĩ na ta kuu ha, ‑Pata. Ĩ witi wa?‑ Saulu a kuu ha, ‑Kawanö sa peamati wi, ĩ Jesus sa. A hoköpaloö!

⁶ Tamaasöku tä uli pata ha wa talalo nö, ki ai tä aiki, kawa na ĩ a waloiki nö, “Ĩ na wa kuapököö!” ĩ na ĩ a kuu kitäö!‑ ĩ na ta kuu soatama.

⁷ Ĩ na ta kuu pole, Saulu a na töpö huu naine, ĩ töpönö ĩ ta hini naia kule maaki, pili töpö mamo sainö sanöma tä tapa totio mi kutenö, töpö kilia apölo nö, töpö hapalo mai, töpö öpaha pasitioma.

⁸ ‑A hoköpaloö!‑ ta kuu ha, Saulu a hoköpalo nö, a mamo kasö mia mane maaki, lope epii a mamo huu maa soatapöma. A mamo huu maa soatapi ha, ai töpönö a tutulölö nö, Tamaasöku tä uli pata hamö a kai talaso tasoma.

⁹ A kai talalotö nö, 3 tä mumi kui tä mumi kupo tä, tä tapa mai, a ia mai, a amisio mai, ĩ na Saulu a kua pi kupotima.

¹⁰ Ĩ na Saulu a kua pi kupoti tä, Tamaasöku tä uli pata ha a pilile, Jesus a thapo wi, ĩ Ananiasö a hilo wi, ĩ a na Jesus pata tä tapamonasoma. Ananiasö a manimo tä, Jesus a tapamo maama. A mio mai ha, a mamo tetea soatia tä, Jesus a tapamonasoma. A tapamono nö, a hapaloma. A hapalo nö, ‑Ananiasö‑ a kuu ha, ‑Ö! Kaikana ai. Ka pi tä?‑ a kuu hö̃töoma.

¹¹ A kuu hö̃töoö ha, ‑A hoköpaloö! Ki ha, Tiso salilii tiso kolo kule, ĩ tiso ha Jutasö a sai pö kule, ĩ hamö a alulöö! Ĩ hamö wa walotaikitö nö, “Tasu tä uli ha a piliamö kuo wi, ĩ Saulu a hilo wi, hisa ha ĩ a kua kule?” ĩ na wa kuu! Ki sai a ha kamisa na Saulu a hapalo waikilati kitä‑ ĩ na Jesus a kuuma.

¹² Ĩ na a kuu nö, ‑Saulu a na Ananiasö wa hilo wi, ĩ wa uni tapamonasoma. Wa uni tapamono nö, Saulu wa mamo huu topa komaköpö, Saulu wa mamo höpöama‑ ĩ na Ananiasö a na uni tä na ĩ na Jesus Kaikana a kuuma.

¹³ Ĩ na Jesus a kuuma ha, ‑Kaikana ai. Naiö! “Wa thapo wi, Saulu anö ĩ töpö peama apati sai thaliö!” ĩ na töpö satehe epii töpö kuu thali nökö‑ ĩ na Ananiasö a kuuma.

¹⁴ A kuu nö, ‑Ki ha, Teusö a täpä sinomo wi, ĩ pata töpö aiki, “Ai töpönö Jesus a naka nö, ĩ a na töpö hapalo sinomo wi, ĩ töpö õkapalölöö!” ĩ na Saulu a na, ĩ na pata töpö kuuma thali nökö‑ ĩ na Ananiasö a kuuma.

¹⁵ Ĩ na a kuuma maaki, Jesus pata tä aiki, ‑A alulöö! Kamisanö Saulu sa kalipalama pia salo, kamisanö ĩ sa saia waikili kipili. Sa saia waikilöma kutenö, juteu töpö a hilo pasio mai ĩ töpö, ĩ töpö hai ĩ kaikana töpö, isöhaeu töpö, ĩ na töpö kui töpö na Saulu a alulö nö, sa wäsä kuki kitä‑ ĩ na Jesus pata tä kuu nö,

¹⁶ ‑“Kawanö sa wäsä totioö ha, ai töpönö pe epii wa peama kitäö!” Saulu a na ĩ na sa kuu kitä‑ ĩ na Ananiasö a na ĩ na Jesus a Kaikana kuuma.

¹⁷ Ĩ na Jesus a kuu ha, ĩ a sai hamö Ananiasö a hulolö nö, a lisipalo nö, Saulu a höpöa nö, ‑Ipa Saulu ai. Ki piliso hamö wa huima tä, kawa na Jesus a Kaikana tapamonaso noai, kawa na ĩ anö sa simöpali ke. Wa mamo huu topa kõki, Teusö a õsi kua tolele, kawa na ĩ a kua totiki, ĩ na wa thamapö, Jesus anö sa simöpali ke‑ ĩ na Ananiasö a kuuma.

¹⁸ Ĩ na a kuu tä, salaka ösö kui na, pili a mamokö ha ĩ na tä kui tä kelasoma, Saulu a mamo höpöpöo opama maaki, a mamo topa kõo soataköma. A mamo topa kõo soataiki nö, a hoköpalo nö, ĩ na tä kua tä, a mai õhomamonasoma.

¹⁹ A mai õhomamono nö, a ia kõo nö, a lotetea apa kopasoma. Satehe epii tä mumi ha, Tamaasöku tä uli pata ha Jesus ta hua sinomo wi, ĩ töpö na Saulu a kutioma.

Tamaasöku tä uli pata ha Saulu anö Jesus a wäsäti noai ĩ ta

²⁰ A kutiki nö, juteu töpö kokamo sinomo wi ĩ sai pö hamö Saulu anö Jesus a wäsä hätäpo soa nö, ‑Jesus a hai, ĩ Teusö a ulupö pasiwö‑ ĩ na a kutima.

²¹ Ĩ ta kuu hini wi, ĩ töpö aiki, ‑Kilia apawö. Jesus a nakati wi, Jetusalẽi tä uli pata hamö ĩ töpö pewö mapamani pia salo, ĩ töpö säpamati noai, hi ĩ a. Jesus a nakati wi, ĩ töpö õkapalö nö, Teusö a täpä sinomo wi ĩ pata töpö na ĩ töpö sulölö pia salo, hisa ha a walokö noai, hi ĩ a‑ ĩ na töpö kutima.

²² Ĩ na töpö kutima maaki, Saulu a hapalo lotetea apa nö, Tamaasöku tä uli ha juteu töpö pililati, ĩ töpö na, ‑Ĩ naköö! Ĩ naköö! Jesus a kaikanapalö noai, ĩ a‑ ĩ na Saulu a kuu totio opaö ha, juteu töpö hapalo hö̃töo maama.

²³ Ĩ na tä kua tä, satehe epii tä mumi matalo nö, juteu töpö aiki, ‑Saulu ma wani säpalöpöö!‑ ĩ na töpö hãtomo nö, töpö kuuma maaki, ai tänö ĩ ta wäsäö ha, Saulu anö ĩ ta hini hö̃tölöma.

²⁴ Saulu a säpali pia salo, Tamaasöku tä uli sika pata ha tä pata hokolole, ĩ ha töpö lisito sinomo wi, ĩ sami taka holele, ĩ taka ha juteu töpö läapalotima. Wakalai ha töpö läapalotii, mumai ha töpö läapalotii, ĩ na töpö kuatima.

²⁵ Töpö läapalotima maaki, mumai ha Saulu a kai a huati wi, wöö a pata ha ĩ töpönö Saulu a titiki nö, tä pata hokolole, ĩ ai tä hẽtu pata hamö Saulu a pi ithoamö thaa kopamanöma.

Jetusalẽi tä uli pata hamö Saulu a hulasolö noai ĩ ta

²⁶ Saulu a pi ithoamö thaa kopamani ha, Jetusalẽi tä uli pata hamö a hua soasolöma. A hua soalolö nö, ĩ hamö Jesus ta hua sinomo wi, ĩ töpö na Saulu a kuo pi topama maaki, Saulu a na ĩ töpö kili ipama. ‑Saulu anö Jesus ta hua wi, ĩ a mai kitä‑ ĩ na ĩ töpö pi kuuma.

²⁷ Ĩ na töpö pi kuuma maaki, Jesus anö töpö sailö noai, ĩ töpö na Pahanapé anö Saulu a hilakölö nö, a hapalo nö, ‑Piliso na töpö huima tä, Saulu anö Jesus a Kaikana tapama thaliö! Saulu a na Jesus a hapaloma thaliö! Ki ha, Tamaasöku tä uli ha a kili mai, Jesus a wäsätima thaliö!‑ ĩ na Pahanapé a kuu läoma.

²⁸ Ĩ na Pahanapé a kuu läoma, ĩ na tä kua tä, ĩ töpö na Saulu a kua naiki nö, Jetusalẽi tä uli pewö hamö a huti pamö

²⁹ a kili mai, Jesus a Kaikana wäsätima. Juteu töpönö köteeku töpö kai hini wi, ĩ töpö na Saulu anö ta wäsäö ha, Saulu a na ĩ juteu töpö hapalo nomöho opa hö̃töoma. Töpö hapalo hö̃töo nö, Saulu a säpa pi topama.

³⁰ Saulu a säpa pi topa wi, Jesus a thapo wi ĩ töpönö ĩ ta hininö nö, Sesatéia tä uli hamö Saulu a hilakötö nö, Tasu tä uli hamö a simöpalöma.

³¹ Ĩ na tä kua tä, Jutéia tä uli pata, Kaliléia tä uli pata, Samatia tä uli pata, ĩ na tä uli kui tä uli pewö hamö Jesus a thapo wi, ai töpönö ĩ töpö peama kõo maama. Pea mai, töpö lotetea apöpasoma. Jesus a Kaikana hini totiatalo opaö ha, Teusö a õsi kua tolele, ĩ anö ĩ töpö õsi lotetea apöpamanö nö, töpö satehea apöpamanöma.

Enéias a toa komanö noai ĩ ta

³² Ĩ na tä kua tä, Pedro a pata hupalo hätäpoti tä, Lita tä uli hamö Teusö a thapo wi ĩ töpö pilile, ĩ töpö na Pedro a hama huu kölöma.

³³ A talalo nö, Enéias a hilo wi, ĩ a talalöma. Enéias a wani kõheo sinomo wi a wani kutenö, a pilio soatioma. A wani huatalo mai ha, 8 tökö inama kui tökö inama hasua kua waikipasoma.

³⁴ Ĩ na a wani kupaloti tä, Pedro a pata hapalo nö, ‑Enéias a wani! Jesus Cristo anö wa toa komani ke. A hoköpaloö! Wa paa wi, ĩ au tökö õka kopalöö!‑ ĩ na Pedro a pata kuu ha, a wani hoköa soatasoma.

³⁵ A hoköa soatalo nö, Lita tä uli ha töpö pilile ĩ töpö, Satõ tä uli ha töpö pilile ĩ töpö, ĩ na kilii töpö pewönö Enéias a wani talalö nö, ĩ töpönö Jesus a naka läa soalöma. Jesus a naka soalö nö, Jesus a thapoma.

Tapita a temöa konaso noai ĩ ta

³⁶ Ĩ na tä kua tä, Jopi tä uli ha suö tä hai, ĩ Tapita a hilo wi, ĩ a kuoma. ‑Tapita a‑ juteu töpö kuu pasio wi, köteeku töpö kai pasiwö, ‑Tokasö a wani‑ ĩ töpö kuu pasioö. Tokasö a hai, Jesus a thapo wi ĩ a kuoma. Ĩ a noio opa sinomotii, toitai tä thaa sinomoö, wani tä na töpö honimo opati tä, ĩ töpö täpä sinomoö, ĩ na ĩ a kua sinomotima.

³⁷ Ĩ na a kua tä, a salipalo nö, a nomasoma. A nomasoö ha, ai töpönö a nomawö salupalö nö, sai a hösöka ha a nomawö pi alaköma.

³⁸ A alaköma tä, Jesus a thapo wi, Pedro a pata na ĩ töpönö polakapi töpö simönöma. ‑Lita tä uli ha Pedro a kua kulaiö!‑ ĩ na tä kuu hininö nö, Lita tä uli atepa apa kutenö, Pedro a na ĩ töpö simönöma. Ĩ na tä kua tä, töpö simönö noai, ĩ töpö waloikitö nö, ‑Kamisamakönö wa nakamö huu ke‑ ĩ na Pedro a na ĩ na ĩ töpö kuuma.

³⁹ Ĩ na töpö kuu ha, Pedro a nokalolö nö, a waloikitö nö, sai a hösöka hamö Pedro a kai tupolö nö, ĩ ha suö töpö hai ĩ peanopö töpö noma waikilaso noai, Pedro a na ĩ töpö suö sototatima. Tokasö a nomasoö ha, töpö ö̃kö kai sototatima. Töpö ö̃kö kai sototati nö, Tokasö anö haloi ösökö tiäpalö noai, Pedro a na ĩ töpö suönö ĩ ösökö möma hätäpotima. Haloi ösökö hototii, ai ösökö lapei, ĩ na ösökö kui, ĩ ösökö satehe epii ösökö möma hätäpotima.

⁴⁰ Ĩ na tä kua tä, Pedro a patanö ĩ töpö pewö atupamanö nö, pili a maekonö a hĩta thaiki nö, Teusö a na a hapaloma. Teusö a na a hapalo paio nö, nomawö tä pi alale ha, ĩ ha Pedro a öpa nomöhötalo nö, ‑Tapita ai. A hoköpaloö!‑ ĩ na Pedro a kuu ha, a mamo tetea kopasoma. A mamo tetea kopalo nö, Pedro a talalö nö, a loa sononoa kopasoma.

⁴¹ A loa sononoa kopasoö ha, Pedro a ami totokö nö, a söpöa konöma. A söpöa konö nö, Jesus a thapo wi ĩ töpö, suö töpö sinoa kopaso noai ĩ töpö, ĩ na töpö kui, Pedro anö ĩ töpö naka kõo nö, suö tä temii ĩ a möma kõoma.

⁴² Suö tä temöa komani wi, Jopi tä uli pewö hamö ĩ ta wäsä hätäpoö ha, Jesus a Kaikana thapo wi, ĩ töpö satehe epii töpö kupasoma.

⁴³ Ĩ na tä kua tä, salo ösö na Simão a kalipalo sinomo wi, ĩ a sai ha Pedro a kutioma. Ĩ ha a kutia tä, satehe epii tä mumi matasoma.