Atos 11 - Teusö Tä Waheta

Kohonéliu töpö kua noai, Pedro anö ĩ ta wäsäti pole ĩ ta

¹ Ĩ na tä kua tä, ‑Juteu töpö pasi mai ĩ töpönö Teusö ta hini naiomaö!‑ ĩ na ai juteu töpö kuuma. Jesus anö töpö simönö noai ĩ töpö, ai töpönö Jesus a thapo noai, Jutéia tä uli pata hamö ĩ töpö pilile ĩ töpö, ĩ na kili töpönö, ĩ na tä kuu wi ta hinima.

² Ĩ na tä kua tä, Jetusalẽi tä uli pata ha Pedro a kõo tä, ai juteu töpönö Jesus a thapo wi ĩ töpönö a päsäpa läoma.

³ ‑Sanöma makö isi ola ösö hosamo mai ha, Teusö ma thapo mai kitä‑ ĩ juteu töpö kuu sinomoma. Pedro a na ĩ töpö hapalo nö, ‑Töpö isi ola ösö hosamo maa noai, ĩ töpö na wa hamamo nö, ĩ töpö na wa iapalo silia apa thaliö!‑ ĩ na töpö kuu läoma.

⁴ Ĩ na töpö kuu ha, Pedro a hapalo hö̃töoma. Kohonéliu a sai pö ha töpö kua noai, ĩ tä pewö a wäsä hö̃töoma.

⁵ Ĩ na a kuuma: ‑Jopi tä uli ha Teusö a na sa hapalo tä, uni sa tä tapama. Sawana tökö kui, hi tä hẽtu ha ĩ sawana tökö kuoma, kamisa kuo pa ĩ sawana tä ola õkala tä, tökö ithosoma.

⁶ Ĩ tökö ithosoma, ĩ tä õsimö ha sa tä möö ha, salo pö hiima, ulu tä uli ha salo pö hupalo wi ĩ pö, masita tä uli ha salo pö holea pasio wi ĩ pö, salo pö katä wi ĩ pö, ĩ na kilii kökö pewö titioma.

⁷ Ĩ na tä kua tä, “Pedro ai. A öpaikiö! Mi salo wa kökö säpalö nö, kökö oalöö!” ĩ na ta kuuma.

⁸ Ĩ na ta kuu ha, “Pata tä. Naiö! Pö wani samii sa pö oa tai mi saiö!” ĩ na sa kuu hö̃töoma.

⁹ Ĩ na sa kuu hö̃töoö ha, ta pata hapalo kota nö, “Teusö anö pö ausipalö noai, ĩ pö na ‘Sami’ a kuu tihöö!” ĩ na ta kuuma.

¹⁰ “Mi kökö oalöö! Mi kökö oalöö! Mi kökö oalöö!” ĩ na kamisa na ĩ na ta kuu pi kupasoma, ĩ tökö soatawö, ĩ salo pö kai ösöa kõo soasolöma.

¹¹ Ĩ na tä kua soa tä, sa kuta pasio wi, ĩ a sai ha sa kua tä, 3 töpö kui töpö waloköma. Sesatéia tä uli ha ĩ töpö kuo wi, ĩ töpö simöpalö kölöma, töpö waloköma.

¹² Ĩ töpö waloki ha, Teusö a õsi kua tolele, ĩ a hapalo nö, “Pedro ai. Ĩ töpö na a noka soatalolöö!” a kuuma. Ĩ na a kuu ha, sa noka soasolöma. Jopi tä uli ha Jesus a thapo wi, ĩ 6 töpö kui töpö noka naipasoma. Samakö noka naipalo nö, Kohonéliu a sai pö ha samakö waloikitö nö, samakö lisipoma.

¹³ Samakö lisipoö ha, Kohonéliu a hapalo läo nö, “Kamisa sai pö ha ãju tä öpa tä, ĩ sa talalöma. Ĩ ãju tä aiki, ‘Jopi tä uli ha ai wa töpö simöpalö nö, Simão Pedro a nakalötöö!

¹⁴ Kawa na Pedro anö ta wäsä piale, ĩ wa ta hini ha, Teusö anö wa täa kõa läli kitäö! Au ai töpö täapa kõo läo naio kitäö!’ ĩ na ĩ ãju tä kuu kipiliö!” ĩ na Kohonéliu a kuu kipili.

¹⁵ Ĩ na Kohonéliu a kuu ha, sa hapalo kõo pia tä, somi tä Teusö a õsi kua tolele, ĩ a ithopalo nö, kamakö na a kua kukö noai na, ĩ na Kohonéliu töpö na ĩ na Teusö a õsi kua tolele, ĩ a kua kua hö̃tököma.

¹⁶ Ĩ töpö na Teusö a õsi kua tolele, ĩ a kuki ha, Jesus Kaikana a kuu noai, ĩ tä na sa pi hatukulasoma. “João anö maa tuu na makö mãi õma waikioma maaki, kamisanö Teusö a õsi kua tolele, ĩ a na makö uni mãi õma satia kitäö!” ĩ na Jesus a kuu noai, ĩ tä na sa pi hatukulasoma.

¹⁷ Jesus Cristo a lö kui ĩ pata ma tä täli ha, Teusö anö kama õsi kua tolele, kamakö na ĩ a õsi thakö noai, tiko töpö na ĩ a õsi thaa naiköma ta pi kuu mai. Ĩ tiko töpö na Teusö anö kama õsi thaa pi topa tä, Teusö sa wasu läo kitä ta o? Teusö sa wasu läo mai kitä. Önö kutenö, tiko töpö na Teusö anö kama õsi thakö noai, ĩ tä, “Ĩ na kuno mai” sa pi kuu maama‑ ĩ na Pedro a kuu totio opama.

¹⁸ Ĩ na Pedro a kuu totio opaö ha, ĩ juteu töpönö Pedro a päsäpa matasoma. Teusö a na, ‑Aitaköö!‑ töpö kuu nö, ‑“Tiko töpö maaki, ĩ töpö aiki, ‘Hö. Wanisala sa tä thaa wani ipö kõo sai taköö! Jesus a na sa mamo teteo totioköö!’ ĩ na töpö pi kuu ha, ĩ töpö õsi palimipo naiopököö!” ĩ na Teusö a pi kuu noa‑ ĩ na ĩ töpö kupaloma.

Ãsiokia tä uli ha Jesus a thapo wi ĩ töpö hai, ĩ Cristo töpö a hilo soma noai ĩ ta

¹⁹ Ĩ na tä kua tä, Estêvão a säa waikipalö noai ha, Jesus a thapo wi ĩ töpö peamati ha, töpö selekepalo nö, pai hamö ĩ töpö hulasolöma. Penísia tä uli, Sipöti tä uli, Ãsiokia tä uli, ĩ na tökö uli kui tökö uli hamö töpö kua wäkö tasoma. Ĩ töpö huulö pa juteu töpö na ta wäsä asatioma.

²⁰ Ĩ na tä kua tä, ai töpö hai, ĩ sipöti tili töpö, siteni tili töpö, ĩ na töpö kui, Ãsiokia tä uli ha töpö waloiki nö, juteu töpö pasi mai, ĩ töpö na Jesus a Kaikana wäsä naioma.

²¹ Jesus a wäsä wi, Teusö anö ĩ töpö kai a lotetepamani ha, tä hini noai, ĩ töpö aiki, ‑Jesus a pitili‑ ĩ na töpö satehe epii töpö õsi kuu nö, Jesus a thapo wi ĩ töpö kupasoma.

²² Ĩ na tä kua tä, ‑Ãsiokia tili töpö satehe epii töpönö Jesus a thapo thaliö!‑ ĩ na Jetusalẽi tä uli pata ha Jesus a thapo wi ĩ töpönö ĩ ta kuu hininö nö, Ãsiokia tä uli hamö ĩ töpönö Pahanapé a simönöma.

²³ Ãsiokia tä uli hamö Pahanapé a waloikitö nö, ‑Teusö anö hi töpö totiapala noa‑ ĩ na a pi kuu nö, a pi mönahama. Ĩ töpö pewö na a hapalo totio nö, ‑Jesus pata ma tä hosa mai, ma hini totiatalotipököö!‑ ĩ na töpö noa thama.

²⁴ Pahanapé a topa apama. Teusö a õsi kua tolele, ĩ anö a õsi lotetepama sinomotima. ‑Jesus a pitili‑ ĩ na a pi kuu totioma. Ĩ na Pahanapé a kuama. Ĩ na a kuama ha, ĩ töpö na a hapaloö ha, ĩ töpö satehe epii töpönö Jesus a tälö nö, a thalöma.

²⁵ Töpö satehe epii töpönö Jesus a thalöma, Tasu tä uli hamö Pahanapé anö Saulu a taemö hulasolöma.

²⁶ A talalö nö, Ãsiokia tä uli hamö a hila kõkö tasoma. A hila kokötö nö, Jesus a thapo wi ĩ töpö na Pahanapé a, Saulu a, ĩ na kilii töpö kokamo naitio nö, sami tä inama na ĩ töpönö töpö satehe epii töpö pi hatukamatima. Ĩ na tä kua tä, Ãsiokia tä uli ha Jesus a thapo wi ĩ töpö hai, ĩ Cristo töpö a hilo somama.

²⁷ Ĩ na tä kua tä, Jetusalẽi tä uli pata ha Teusö a kai a wäsä wi, ĩ töpö kuoma, töpö alulö nö, Ãsiokia tä uli ha ĩ töpö walokö tasoma.

²⁸ Töpö waloikitö nö, Teusö a kai a wäsä wi, ĩ ai tä hai, ĩ Akapu a hai, Teusö a õsi kua tolele, ĩ anö ĩ a pi hatukupamani ha, ĩ a wäoma. A wäo nö, ‑Tä uli pewö pata oia apöpaso kitä‑ ĩ na Akapu a kuuma. Akapu a kuu noai, ĩ pitili ta kuoma. Waiha homa tili tä kaikana Cláudio a kaikanamo tä, hi masita tä uli pewö pata oia totia apöpasoma.

²⁹ Ĩ na Akapu a kuu ha, Jesus a thapo wi ĩ töpö aiki, ‑Sitipa ma kökö kokapalö nö, Jutéia tä uli pata ha Jesus a thapo wi ĩ töpö oi ipii, ĩ töpö na sitipa ma kökö simöpalö nököö!‑ ĩ na töpö kuu ha, ‑Awai. Ipa sitipa kökö kule, ĩ sa kökö ose totoki kitäö!‑ ĩ na ĩ töpö pewö kuu nö,

³⁰ sitipa kökö kokapalö nö, kökö simöpalöma. Pahanapé a, Saulu a, ĩ na kilii töpö na, ‑Ki hamö Jesus a thapo wi ĩ pata töpö na hi sitipa kökö totokötöö!‑ ĩ na töpö kuu nö, sitipa kökö simöpalöma.