1 Timóteo 1 - Teusö Tä Waheta

¹ Paulo sa. Teusö anö makö täapa kõo läo wi ĩ a, Jesus Cristo a na makö mamo läo sinomo wi ĩ a, ĩ na töpö kui töpönö sa noa thaa nö, sa simöa totio noai, ĩ sa.

² Timóteo wa na hi waheta sa tä simöpali ke. Kamisanö Teusö ulupö wa thapalöma kutenö, ‑Ipa ulu wa totiwöö!‑ ĩ na kawa na sa kuu kuleö! Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Timóteo a totiapala apöö! A pea tä, ma totiapala apaö! A pi honipo mapamanö nö, ma pi topapalama apaö!‑ ĩ na sa kuu.

‑Teusö ta wäsä holisimo wi, ĩ töpö wasulöö!‑

³ Masetônia tä uli hamö sa huu pia tä, ‑Hi Epesu tä uli ha a kua haikiö!‑ ĩ na kawa na sa kuu kua noai na, ĩ na kawa na sa kuu kõa kule. Epesu tä uli ha ai töpönö holisi ta kateha polai, ĩ töpö na, ‑Ta holisia apöle, ĩ ta katehati maikiö!‑ ĩ na wa kuu!

⁴ ‑“Ĩ na nö patapö töpö kuamaö!” töpö holisi kuu wi, ĩ ta kateha maikiö!‑ ĩ na wa kuu! ‑Ĩ nö patapö ma töpö satehe epii ma töpö a hilapalati maikiö!‑ ĩ na wa kuu! Ĩ töpönö nö patapö töpö a katehati kuköma, töpö pewö hapalo isi wanihio soa päataloti kitä. Töpö hapalo isi waniho soa päatalo opati nö, Teusö a pi kuu totile, ĩ tä na ĩ töpö pi hatukupo mai kitä. ‑Teusö ta pitili‑ ĩ na makö pi kuu totia tä, Teusö a pi kuu wi, ĩ tä na makö pi hatuka sisapasoö.

⁵ Ai ma töpö wanipo mai, ma töpö pi ipa sisa kuköpö, wa noa thali ke. Pili makö õsi topa totia tä, ai ma töpö pi ipa kuki kitä. ‑Sa tomöpo mi‑ makö õsi pi kuu mi kutenö, ai ma töpö pi ipa kuki kitä. ‑Teusö ta pitili‑ ĩ na makö pi kuu pitilia apa tä, ai ma töpö pi ipaö.

⁶ Ĩ na ai töpö kupo mi kutenö, töpö kai monösoma. Töpö kai monöno nö, töpö hapalo osemo soa päatalo opaalöma.

⁷ Moisés anö pata töpö noa thaa noai, ĩ töpönö ĩ ta kateha pi topa apa wi maaki, ĩ ta hini mi ipö. Ĩ töpönö ĩ ta kateha apa kulai maaki, töpö pi moti soawö.

⁸ Moisés anö töpö noa thaa noai, ĩ ma ta kateha makoka apa tä, ĩ ta topa apöle kitä. Ĩ ma tä taö öpaö.

⁹ Noa thaa wi, witi pili töpö na ĩ ta hinimoma totio sinomoö? Töpö topapalo opöle, ĩ töpö na kuno mai. Töpö wanisala apa wi ĩ töpö, hiopö tä thaa sinomo wi ĩ töpö, pata töpönö töpö noa thaa noai, ĩ ta hini mi ipii ĩ töpö, Teusö a na, ‑Päla‑ töpö kuu wi ĩ töpö, ‑Teusö ta pitili mi‑ töpö pi kuu wi ĩ töpö, ĩ na töpö kui töpö noa thaa wi, ĩ ta hinimoma sisaö. Pö̃ a säpali, pöpönö a säpali, ai tä säpali, ĩ na töpö wani kua wi ĩ töpö,

¹⁰ tiko tä suö na peanopö a pi wani saimo opaö, ĩ na tä kua tä, pusopö a lö kui, tiko tä wano na ĩ a pi saimoö, ĩ na ĩ töpö kuati wi ĩ töpö, ai kama wano töpö mamopalo wi ĩ töpö, ai töpönö ai sanöma töpö thomönö nö, töpö läkälölö nö, töpö kalipalama apa wi ĩ töpö, ai töpö holisi wäo wi ĩ töpö, ĩ na töpö kua wi ĩ töpö noa thaa wi ĩ ta hinimoma hö̃töoö. Ta wäsä makoka wi ĩ tä na töpö pi pälamo nö, wanisala tä thaa sisa wi ĩ töpö pewö na noa thaa wi ĩ ta hinimoma totio sisaö.

¹¹ Teusö anö ta topa apöle ĩ ta totokö noai, ĩ ta wäsä tä, ĩ ta makoka apaö. Ta topa apöle ĩ ta totokö nö, ‑Ta wäsä sinomoö!‑ ĩ na kamisa na ĩ na Teusö a kuu kipili. Teusö a liähä äpii, ĩ a na, ‑Aitaköö!‑ ai töpö kuu sinomo wi ĩ anö ta topa apöle ĩ ta totoköma.

Teusö anö sa totiapala noai ĩ ta

¹² Kamakö hai ĩ Jesus Cristo pata tä na, ‑Aitaköö!‑ ĩ na sa kuutoö. Jesus sa kai a wäsä tä, ĩ anö sa loteteapalama sinomo thali. ‑Paulo anö sa kai a hula kõo mai kitäö! Sa kai a wäsä satimo opaalö kitäö!‑ Jesus a pi kuu salo, ‑Sa kai a wäsä sinomoö!‑ ĩ na kamisa na Jesus a kuuma. A kuuma kutenö, ‑Aitaköö!‑ ĩ na sa kuu sinomoö.

¹³ Jesus sa kateha wanisala apaö, Jesus a thapo wi ĩ sa töpö peamaö, sa höla apaö, ĩ na sa kuati kipili maaki, ‑Ĩ na wa wani kuaö ha, wa peama hö̃töo kitä‑ Teusö a kuu hö̃töo pasio maama. ‑Sa kai a wäsä sinomoö!‑ ĩ na a kuu pasioma. ‑Jesus ta pitili‑ ĩ na sa pi kuu pasio mi tä, sa pi moti ipii sanö wanisala sa tä thaa sinomoti kipili maaki, sa pi wani moti ipö ha, ‑Ĩ na a wani kua päoö. Wa wani peama hö̃töo kitä‑ Teusö a pi kuu maama. Kamisa na a pi honipo opa nö, sa pasilipalöma.

¹⁴ Sa wanisala apama maaki, kamakö hai ĩ Jesus pata tänö sa totiapala satia apa hö̃töoma. Sa totiapala apa nö, Jesus sa thapoma kutenö, ‑Jesus ta pitili ipö‑ ĩ na pata tänö sa pi thamatima. Ai sa töpö pi ipa wi, ĩ na sa õsi thaa naipalöma.

¹⁵ ‑Wanisala tä thaa wi, ĩ töpö täapa kõo läo pia salo, hi masita tä uli ha Jesus Cristo a huma‑ tä kuu wi, ĩ pitili tä sai a. ‑Ĩ ta pitilia apa‑ makö kuupökö. Ai töpö pewönö wanisala tä tha apa kule maaki, wanisala sa tä thaa satia apa wi ĩ sa.

¹⁶ Ĩ töpö na sa wanisala satia apa kule maaki, pe epii sa wanisala hasua satia apa kutenö, kamisa na Jesus a pi honipo nö, sa pasilipalöma. ‑Pe epii Paulo a wanisala apama maaki, Jesus Cristo anö a peama soata maa noa. Ö̃kö ta o. Ĩ na Jesus a kuaö ta o‑ ĩ na Jesus Cristo anö ai töpö pi thama pia salo, sa pasilipalöma. ‑Wanisala sa tä thatala apa noai maaki, Jesus sa thapo kuköma, sa palimipaso kitäö! Jesus anö Paulo a totiapala kua noai na, ĩ na sa totiapala kua hö̃töo kuki kitäö!‑ ĩ na Jesus anö töpö pi thama pia salo, sa totiapala thama apama.

¹⁷ Ai tiko pata tä sai kua mai ha, ĩ Teusö sami a kua sisale, ĩ a pata lö kui, ai töpö pewö na a pata kaikanamo mapo mi ipö, a pata noma mi pikiwö, a tapamo mi ipö pikiwö, ĩ a pata na, ‑Aitaköö! Teusö a lotete epö sisawöö! A pata toita apö sisawöö!‑ ĩ na makö pewö kupalo sinomopököö! Ĩ naköö!

¹⁸ Pösa ai. Ĩ na kamisanö Timóteo wa noa thaa kule. ‑Ĩ na Timóteo a na ĩ na wa kuu!‑ Teusö a kuu waikioma kutenö, ĩ na sa kuu tolea hö̃töa kule. Teusö a kuu waikiopili, ĩ tä ha wa pi tapoiki nö, a kasiapaloö! Wasu töpö säpaso tä, töpö kasiapalo kua wi na, ĩ na Teusö ta wäsä holisimo wi ĩ töpö na ĩ na wa kasiapalo kua hö̃töoö!

¹⁹ Wa kasiapalo nö, ‑Jesus ta pitili‑ ĩ na wa pi kuu satimoö! ‑Ĩ naköö! Wanisala sa tä thaa mai, toitai sa kutioköö!‑ ĩ na pili wa õsi kuu tä, ‑Päla pasiwöö!‑ a pi kuu tihöö! Ai töpö aiki, ‑Ĩ na sa kuapököö! Toitai sa kuopököö!‑ ĩ na kama töpö õsi pi kuuma maaki, ‑Päla‑ töpö pi kuu sapa kõoma kutenö, ‑Jesus ta pitili‑ ĩ na ĩ töpö pi kuu maa kopasoma.

²⁰ Ĩ na Imeneu a, Alesiãtöti a, ĩ na kilii, ĩ na ĩ töpö kuama. Sai tä sai pata na ĩ sa töpö totokö nö, ‑Sai tä sai patanö ĩ töpö peamapöö!‑ ĩ na sa pi kuuma. ‑Töpö peamaö ha, töpö pi hatukua satia kopalo nö, Teusö a na ĩ töpö hapalo hiopöa kota mai kitä‑ ĩ na sa pi kuu nö, ‑Sai tä sai patanö ĩ töpö peamapöö!‑ ĩ na sa pi kuuma.