2 Bibɔrb Aabɔr 36 - Uwumbɔr aagbaŋ

Juda Aabɔr Joahas aabɔr

¹ Juda aanib nan nyan Josia aajapɔɔn Joahas le ki kaan u nnaan Jerusalem ponn ni.

² Joahas nan ye ŋibin moninko ni ŋitaa aanii le ki jin Juda aanaan ki bi Jerusalem ponn ni, ki joo kitiŋ ki ti saa iŋmal itaa.

³ Ijipt Aabɔr Neko nan chuu u tinaagbiir, ki cha Juda aanib pan tikunabr ti aanyunyuun ga pii njikaabim bɔtɔ piitaa ni kipiik ni biŋmu, ni salmaa ti aanyunyuun ga pii njikaabim kuruwaa piitaa ni kipiik ni biŋmu na, ke lampoo aamombil.

⁴ Ubɔr Neko nan di Joahas aakpel Eliakim le kaan Juda aanaan, le ki kpeln waayimbil ki yin u ke Jehoyakim. Ubɔr Neko nan di Joahas buen Ijipt aatiŋ ni.

Juda Aabɔr Jehoyakim aabɔr

⁵ Jehoyakim nan ye ŋibin moninko ni ŋiŋmu aanii le ki jin Juda aanaan, le ki koo Jerusalem ni, ki joo kitiŋ ki ti saa ŋibin kipiik ni libaa. U nan tun Udindaan Uwumbɔr titunwanbir.

⁶ Babiloŋ Aabɔr Nebukadnesar nan dan nan koo Juda aatiŋ ni, le ki chuu Jehoyakim, ki buu u tikululn ki di buen Babiloŋ aatiŋ ni.

⁷ Nebukadnesar nan yoor Uwumbɔr Aadichal ni aawangol libaa ki di buen waabɔrdichal ni, Babiloŋ aatiŋ ni.

⁸ Tiwan ni mɔmɔk Jehoyakim ŋa na, ni waatunwanbir, ni tiwan ni sukr ponn ni na mɔmɔk bi Israel ni Juda Aabɔrb aatun Aagbaŋ ni. Ujapɔɔn Jehoyachinn le nan nab waanaan pu.

Juda Aabɔr Jehoyachinn aabɔr

⁹ Jehoyachinn nan ye ŋibin kipiik ni ŋiniin le ki jin Juda aanaan, le ki koo Jerusalem ponn ni ki joo kitiŋ ki ti saa iŋmal itaa ni iwiin kipiik. U mu nan tun Uwumbɔr titunwanbir.

¹⁰ Unaalan yoonn, le Ubɔr Nebukadnesar nan chuu Jehoyachinn tinaagbiir di buen Babiloŋ aatiŋ ni, le ki yoor Uwumbɔr Aadichal ni aawangol mu buen. Nebukadnesar nan di Jehoyachinn aatewaa Sedekia kaan Juda aanaan, Jerusalem ponn ni.

Juda Aabɔr Sedekia aabɔr

¹¹ Sedekia nan ye ŋibin moninko ni libaa le ki jin Juda aanaan, le ki koo Jerusalem ponn ni, ki joo kitiŋ ki ti saa ŋibin kipiik ni libaa.

¹² U nan tun Uwumbɔr titunwanbir, kaa ŋun suuna tii Uwumbɔr aabɔnabr Jeremia u nan len Uwumbɔr aamɔboln na.

Jerusalem aah lir pu na

¹³ Sedekia nan nyan Ubɔr Nebukadnesar, u nan cha u puu Uwumbɔr aayimbil pu ke u ga li si uchaŋ ni mbamɔm na aapuwɔb. U nan kpa tafalaaŋun, le ki yii, kaa kpeln waabimbin ki fenn dan Israel yaab Aadindaan Uwumbɔr chee.

¹⁴ Ki ki kpee na, Juda aasalolm, ni bitotoorb, ni binib ngbaan nan dii ŋitimbol ŋi mann goln bi na aah tun titunwanbir sakpen ki dooni ŋiwaa na aabimbin. Bi nan ŋa kina le ki bii Uwumbɔr Aadichal li Uwumbɔr ubaa ŋa li chain na.

¹⁵ Uma Uwumbɔr u ye biyaajatiib Aadindaan Uwumbɔr na nan beenin tun waabɔnabr ke bi nan sak waanib. U nan ŋani kina ke u cha bi ni Waadichal ŋmar la.

¹⁶ Tɔ, binib ngbaan nan ŋani Uwumbɔr aatuun ngbaan mbɔnyun, kaa gar waamɔboln, ki laa waabɔnabr ngbaan, ki ti saa n‑yoonn mu Uwumbɔr aaŋuul fii waanib pu ki ti nyaŋ, aan baa ki ŋmaa kan ŋŋmarm na.

¹⁷ Kina pu le Uwumbɔr nan cha Babiloŋ aabɔr buen ti tak bi. Ubɔr ngbaan nan ku Juda aanachipɔm, hali ki ti kpaan ku bibaa Uwumbɔr Aadichal ni. Waa nan san ubaa kinimbaak, waa nan san bi laa diin na, ni bi por na, kaa san uja, bee upii, bee ubun, bee u kpa laafee na kinimbaak. Uwumbɔr di bi mɔmɔk ŋa uŋaal ni.

¹⁸ Babiloŋ aabɔr nan yoor Uwumbɔr Aadichal aawan; u nan yoor Uwumbɔr Aadichal aamombil, ni ubɔr ni waaninkpiib aawangol, ki di ni mɔmɔk buen Babiloŋ aatiŋ ni.

¹⁹ U nan see Uwumbɔr Aadichal, ni kitiŋ ngbaan lii; u nan see kaabɔrdichal mɔmɔk ni laawangol lii, le ki gbaa wiil kitiŋ ngbaan aagon.

²⁰ U nan di binib bi mɔmɔk aa kpoi na buen Babiloŋ ni, le bi ti bi nima ki tun linaagbiituln tii u ni uyaabitiib ki ti saa n‑yoonn mu Pesia Aanaan nyan paacham na.

²¹ Kina pu na, Uwumbɔr aah nan cha waabɔnabr Jeremia len pu na gbiin ke, “Kitiŋ ngbaan ga doon nkuun ki ti saa ŋibin imonko itaa ni kipiik, ki teen Likpaakool daal aafuur li bi nan yii kaa kal fuur na.”

Ubɔr Sairus bui ke Juu yaab gir kun

²² Sairus aah nan ye Pesia aabɔr pu na aajan aabiln ni, le Uwumbɔr nan cha waabɔnabr Jeremia aah nan len pu na gbiin. U nan cha Ubɔr Sairus siin nkaal mumina ki cha bi ŋmee mu, ki di tun waanaan mɔmɔk ni ke bi karn mu mpɔɔn pu ke:

²³ “Pesia aanaan Aabɔr Sairus le siin nkaal mue. Uwumbɔr u ye paacham Aadindaan na, uma le ŋa mi dulnyaa wee mɔmɔk aajojoor, le ki tii mi lituln ke m maa lidichal, Jerusalem aatiŋ ki bi Juda aatiŋ ni na tii u. Tɔ, ni mɔmɔk bi ye Uwumbɔr aanib na, li cha man nima, aan Nidindaan Uwumbɔr li bi ni chee.”