2 Bibɔrb Aabɔr 35 - Uwumbɔr aagbaŋ

Josia aah nan jin Lakr‑jer aajim pu na

¹ Ubɔr Josia nan ban ke u nyuŋ Uwumbɔr, le ki jin Lakr‑jer Aajim Jerusalem ponn ni. Libiln aajan aaŋmal aawiin kipiik ni inaa daal le bi nan kɔr njim ngbaan aawakor.

² U nan tii bitotoorb ŋitun ŋi bi ga li tun Uwumbɔr Aadichal ni na, le ki pɔɔk bitaakpab ke bi li tun ŋi mbamɔm.

³ U nan ki di tibɔr timina le tuk Liifai yaab bi nan di bibaa tii Uwumbɔr, ki mɔk Israel aanib mɔmɔk waabɔr na ke, “Di Uwumbɔr Aakaal Aadakaa u ye chain na siin Waadichal li David aajapɔɔn, Ubɔr Solomonn maa na ni. Naan ki li chuun tu u yiini, ni tee ga li tun tii Nidindaan Uwumbɔr ni waanib Israel yaab la.

⁴ Sil man nimi aasisiiyaan, itaŋaal itaŋaal, Uwumbɔr Aadichal ni, Ubɔr David, ni ujapɔɔn Ubɔr Solomonn aah nan tii nimi ŋitun pu na.

⁵ Ni yakr yakr nibaa, aan ki cha bibaa li bi ki ŋmaa ter nimi aanib Israel yaab lidichal lidichal.

⁶ Nimi le ga kɔr Lakr‑jer Aajim aapiih ni iŋoob. Tɔ, toor nibaa man ki gor kitork ngbaan aan niŋeen aatɔtiib Israel yaab ŋmaa dii mmɔkm mu Uwumbɔr nan di tii Moses na.”

⁷ Binib ngbaan aajim pu Ubɔr Josia nan nyan ubaa aawakor ni ipiih, ni ipihbi, ni iŋoob i laa diin na ŋichur piitaa la, ni inaaja ŋichur ŋitaa le tii.

⁸ Waaninkpiib mu nan too tiwan tii binib ngbaan, ni bitotoorb, ni Liifai yaab. Le Uwumbɔr Aadichal ni aaninkpiib bimina: Utotoorninkpel Hilkia, ni Sekaria, ni Jehiel mu nan tii bitotoorb ipihbi ni iŋoob i laa diin na ŋichur ŋilee ni ikui iloob, ni inaaja ikui itaa ke bi kɔr njim ngbaan ni.

⁹ Liifai yaab aaninkpiib bimina, Konania, ni Semaya, ni unaal Netanel, ni Hasabia, ni Jeyel, ni Josabad, nan too ipihbi ni iŋoob i laa diin na ŋichur ŋiŋmu, ni inaaja ikui iŋmu le tii Liifai yaab ke bi di toor kitork.

¹⁰ Lakr‑jer Aajim ngbaan aawan mɔmɔk aah ti gor doo na, le bitotoorb ni Liifai yaab sil sil baasisiiyaan ni, ubɔr aah bui bi pu na.

¹¹ Baah kɔr ipihbi ni iŋoob i laa diin na doo na, le Liifai yaab sun i, le bitotoorb di nsin yɔk yɔk libimbiln paab;

¹² le ki yakr tiwakor ti ye ke bi di see mmii ni na tii binib ngbaan, ŋidichal, ŋidichal, aan bi toor kina aatork, Moses Aakaal aah mɔk pu na.

¹³ Liifai yaab nan pun Lakr‑jer aatork aanann mmii ni, baah siin ke bi ŋa pu na, le ki di kitork ki ye chain na ma ŋaan ŋikumbuu ni, ni ŋidaŋaakumbuu ni, ni tisapar ni, le ki tul ti mala mala tii binib ngbaan.

¹⁴ Nee aapuwɔb le Liifai yaab nin ban bibaa aanann, le ki ban bitotoorb bi ye Aaronn aayaabitiib na mu aanann. Bitotoorb ngbaan nan kpa lituln ki joo tiwakor ti ye bi di see mmii ni na, ni kitork aawakor tiken na aakpan seer mmii ni ki ti joor kijook.

¹⁵ Liifai aanii Asaf aataŋaal pu aalahngaab ni biwangbaab bimina le nan si baasisiiyaan, Ubɔr David aah nan mɔk pu na. Bima le ye Asaf, ni Hemann, ni Jedutunn u nan nabr Uwumbɔr aabɔr tii ubɔr na. Liifai yaab aah nan gor Lakr‑jer Aajim ngbaan tii Uwumbɔr Aadichal aabisamɔi aakikiib na, bima aa nan ki siir cha baatuln.

¹⁶ Kina pu na, Ubɔr Josia aah mɔk pu na, bi nan ŋa tiwan mɔmɔk liyaadaal ngbaan Uwumbɔr aadoon pu, ki jin Lakr‑jer Aajim, ki toor kitork ki bi joo seer mmii ni, kitork aabimbiln paab na.

¹⁷ Israel aanib bi mɔmɔk nan bi nima na nan jin Lakr‑jer ni boroboro u kaa kpa boroboro aanyɔk na aajim ki ti saa iwiin ilole.

¹⁸ Ki nyan Uwumbɔr aabɔnabr Samuel aayoonn na, Lakr‑jer Aajim mubaa aa kee jin ke mumina na. Njan aabɔrb na ubaa aa kee jin Lakr‑jer Aajim ke Ubɔr Josia, ni bitotoorb, ni Liifai yaab, ni Juda, ni Israel, ni Jerusalem aanib aah nan jin mu,

¹⁹ waanaan aabin kipiik ni lininiin ponn ni pu na.

Josia aanaan aah doo pu na aabɔr

²⁰ Ubɔr Josia aah tun kina tii Uwumbɔr Aadichal ki ti doo na, le Ijipt Aabɔr Neko nan di waajab buen Kakemis aatiŋ ni, Yufrates Aamɔɔl chee, ke bi ti to butɔb. Josia nan pɔɔn ubaa ke u kiir u,

²¹ le Neko yii ki tun ti bui Josia ke: “Butɔb bu aan m bi to na aa kpaa si, Juda yaab Aabɔr. Maa choo m ni sin nan jan, m cha m ni maadim le ti jan, le Uwumbɔr bui mi ke m li naa. Uwumbɔr si nchaŋ ni, kina pu na, taa laŋ maasan, naa ye kina kan, u ga kuln si.”

²² Tɔ, Josia nan neen kijaak sakpen. U nan yii, kaa pel Uwumbɔr aah nan cha Ubɔr Neko len pu na, le ki ŋa ubaa ke nifam ubaa na, ki buen butɔb ni, Megido aatiŋ ki bi taar na pu.

²³ Butɔb ngbaan ponn ni, le Ijipt yaab aapiin yur Ubɔr Josia. Le u bui waanaagbiib ke, “M kan titotonn a, di mi san man.”

²⁴ Bi nan yoor u nyan waataan aatɔroku ni, le ki ki di u ŋa uken ni nima chee, le ki di u buen Jerusalem aatiŋ ni. Nima chee le u ti kpo, le bi sub u nnaan aacheek ni. Juda ni Jerusalem aanib mɔmɔk nan wii waakun pu.

²⁵ Uwumbɔr aabɔnabr Jeremia nan naan nkpolahn tii Ubɔr Josia, le ni kpaln nkaal Israel aatiŋ ni ke uja ni upii mɔk yaa ban u wii waakpuul kan, udaan gaa nkpolahn ngbaan. Waalahn ngbaan bi ikpolahn aagbaŋ ni.

²⁶ Josia aatun mɔmɔk, waah nan di ubaa tii Uwumbɔr pu na, ni waah nan joo Uwumbɔr aakaal pu na,

²⁷ ni waapiin ki ti saa ndoon na aabɔr mɔmɔk bi Israel ni Juda aabɔrb aatun Aagbaŋ ni.