2 Bibɔrb Aabɔr 33 - Uwumbɔr aagbaŋ

Juda Aabɔr Manase aabɔr

¹ Manase nan ye ŋibin kipiik ni ŋilee aanii le ki jin Juda aanaan, le ki koo Jerusalem aatiŋ ni ki joo waanib ki ti saa ŋibin piiŋmu ni ŋiŋmu.

² Uwumbɔr aanib aah nan tur koo ŋitimbol ŋi ponn ni aan u jenn nyan ŋaanib na, ŋitimbol ngbaan aabimbin yɔl yɔl na le Manase nan gaa, le ki tun Uwumbɔr titunwanbir.

³ U nan ki gir maa tiwaadir ti ute Hesekia nan ber na. U nan maa ŋiwaa aatork aabimbin ke bi li dooni liwaal Baal nima chee, le ki naan liwaapii Asera aanaŋ, ki dooni iŋmabi.

⁴ U nan maa ŋiwaa aatork aabimbin Uwumbɔr Aadichal li ponn ni Uwumbɔr len ke bi ga li dooni u nima chee n‑yoonn mɔmɔk na.

⁵ U nan maa kitork aabimbin ŋi pu bi ga li dooni iŋmabi na Uwumbɔr Aadichal aachin ŋilee na ponn ni.

⁶ U nan di ujapɔtiib toor kitork ki di see mmii ni, Hinom Aafataŋ ni. U nan tun tibɔɔr ni beebee aanyɔk aatuln, ki chaa binib bi bui ke bi nyi fen aabɔr na, ni binib bi len bitekpiib chee tibɔr na chee. U nan tun Uwumbɔr titunwanbir sakpen le ki fiin waaŋuul.

⁷ U nan naan liwaal libaa siin Uwumbɔr Aadichal li ponn ni Uwumbɔr nan bui David ni ujapɔɔn Solomonn ke: “Jerusalem ni, do chee na, Maadichal limina ponn ni, le ye nin chee m nyan Israel aanibol kipiik ni ŋilee aapepel mɔmɔk ni ke binib li dooni mi na.

⁸ Le Israel aanib yaa ga kii maamɔkm ni ikaal i mɔmɔk maatutunn Moses nan di tii bi na kan, maan kii ke binib jenn nyan bi kitiŋ ki m nan di tii biyaajatiib na ni.”

⁹ Manase nan cha binib tun titunwanbir ti jer ŋitimbol ŋi Uwumbɔr aanib nan tur koo ŋi ponn ni aan u jenn nyan ŋaanib na aah nan tun pu na.

Manase aah kpeln waabimbin pu na

¹⁰ Uwumbɔr nan sak Manase ni waanib, tɔ, bi nan yii, kaa ŋun.

¹¹ Kina pu na, Uwumbɔr nan cha Asiria aatɔb aajab aaninkpiib dan nan koo Juda aatiŋ ni. Bi nan chuu Manase, le ki di ijapiin saar lɔk lɔk u, ki di tikululn baa u, le ki di u buen Babiloŋ aatiŋ ni.

¹² Waafalaa ni, le u sunn ubaa taab, ki fenn toŋ Udindaan Uwumbɔr, ki gaŋ u ke u ter u.

¹³ Uwumbɔr nan kii waameel ki cha u gir kun Jerusalem ki ti ki joo waanib. Nimina le nan cha Manase bee ke Uwumbɔr le ye Udindaan.

¹⁴ Nee aapuwɔb le Manase nan moo maa tɔŋ lelee aagoln na pu, David Aatiŋ aawipuul aapepel wɔb, ki nyan libuul libaa ni kifataŋ ni, Gihonn aayayak aanyunbun chee, ki di toŋ ŋŋangan wɔb ki ti saa mbisamɔb mu bi yin mu ke Ijan Aabisamɔb na, ni kitiŋ ngbaan aapepel li bi yin li ke Ofel na chee. U nan ki ban butɔb aajab ni uninkpel ubaabaa kaan Juda aatim mumɔk pɔɔ ki kpa tijawan mu ponn ni na.

¹⁵ U nan nyan ŋiwaa ni liwaal li u nan naan siin Uwumbɔr Aadichal ni na li ponn ni, ki ber ŋiwaa aatork aabimbin ŋi nan bi ligongoln li pu Uwumbɔr Aadichal si na, ni ŋi mu bi Jerusalem aapepel ŋiken na; u nan di tiwan ngbaan nyan kitiŋ ngbaan aagbaan ki ti di ni mee.

¹⁶ U nan ki toor baah nan dooni Uwumbɔr kitork aabimbiln li pu na, le ki toor kimɔbaan ni idoon aapiin aatork li pu. U nan bui Juda aanib mɔmɔk ke bi li dooni bima Israel yaab Aadindaan Uwumbɔr.

¹⁷ Tɔ, binib ngbaan nan beenin toor kitork ŋipepel ŋiken ni, bi mu nan tee toor tii Uwumbɔr baanja la.

Manase aanaan aah doo pu na aabɔr

¹⁸ Tiwan nimɔk gur aan Manase nan ŋa na, ni limeel li u nan mee Uwumbɔr na, ni bibɔnabr aah nan di Israel yaab Aadindaan Uwumbɔr aayimbil tuk u tibɔr ti na mɔmɔk bi Israel yaab Aabɔrb aatun Aagbaŋ ni.

¹⁹ Ubɔr ngbaan aameel, ni Uwumbɔr aah nan kii li pu na, ni waah nan tun titunwanbir ti ki nin kpeln waabimbin na, ni tibɔbir ti u nan ŋa na, ni waah nan maa tiwaadir ti na, ni liwaapii Asera aanaŋ ti u nan naan na, ni ŋiwaa ŋi u nan dooni na, mɔmɔk mu bi Uwumbɔr aabɔnabtiib aagbaŋ ni.

²⁰ Manase nan kpo, le bi sub u libɔrdichal ni, le ujapɔɔn Amonn nab waanaan pu.

Juda Aabɔr Amonn aabɔr

²¹ Amonn nan ye ŋibin moninko ni ŋilee aanii le ki jin Juda aatiŋ aanaan, le ki koo Jerusalem aatiŋ ponn ni ki joo waanib ki ti saa ŋibin ŋilee.

²² Amonn nan bi ke ute Manase na, le ki tun Uwumbɔr titunwanbir, ki dooni ŋiwaa ŋi ute nan dooni na.

²³ Tɔ, uma aa nan tee sunn ubaa taab ke ute na ki fenn toŋ Uwumbɔr. U nan kpaan ye utunwanbirdaan ki jer ute.

²⁴ Amonn aaninkpiib nan nyan upuwɔb le ki kpokl ki ku u libɔrdichal ponn ni.

²⁵ Juda aanib nan ku binikurb bi nan ku Amonn na, le ki di ujapɔɔn Josia kaan Juda aanaan.