2 Bibɔrb Aabɔr 32 - Uwumbɔr aagbaŋ

Asiria yaab aah nan faan Jerusalem yaab pu na

¹ Ubɔr Hesekia aah nan ŋa Uwumbɔr aah mɔk pu na ti doo na aapuwɔb, le Asiria aabɔrkpaan Senakerib dan nan koo Juda aatiŋ ni. Bi nan gob ntim mu pɔɔ ki kpa tijawan na, le ki bui waajab ke bi tur ŋigon lir ki koo.

² Hesekia aah kan ke Senakerib ban u tak Jerusalem mu na,

^3-4 le u ni waaninkpiib kpokl ke bi kiir nnyun, mu taa ki nya lipaal aan Asiria yaab yaa nan peeni Jerusalem kan, bi taa kan nnyun. Bininkpiib ngbaan nan di kinipaak nyan le ki ti biin uyayak aanyunbun mɔmɔk pu, le nnyun aa ki ŋmaa puu nyan i ponn ni.

⁵ Ubɔr Hesekia nan moo toor Jerusalem aagoln le ki maa tidifɔfɔŋ li paab, ki ki maa ligoln liken lima ngbaan aapuwɔb, ki moo tii kitiŋ ngbaan mpɔɔn. U nan ki ŋa tikpaatunn ni kijaak aapen mu pam.

⁶ U nan di bijab bi mɔmɔk bi kitiŋ ngbaan ni na ŋa bijab aayidam aaŋaal ni, le ki bui ke bi mɔmɔk kuun dan kitiŋ ngbaan aapaan mu bi kaabisamɔb chee na. U nan bui bi ke,

⁷ “Cha nisui li dɔ aan ni li joo kin kin man, ki taa li san Asiria aabɔrkpaan, bee bijab bi u loln bi pu nsan na ijawaan. Ti kpa mpɔɔn ki jer waah kpa pu na.

⁸ U kpa unibɔn aapɔɔn la, le tima kpa Tidindaan Uwumbɔr u ga ter timi aan ki to butɔb tii timi na.” Binib ngbaan nan kan ntaakpapɔɔn baabɔr aah len pu na chee.

⁹ Nee aapuwɔb, le Senakerib ni waajab nan laa beenin bi Lakis aatiŋ ni, le u di ntuun mue tun Hesekia ni Juda aanib bi nan bi u chee Jerusalem aatiŋ ni na chee ke:

¹⁰ “Min Asiria aabɔrkpaan Senakerib le baa nimi ke ni ye ba cha ni kpa lipobil ke ni li beenin koo Jerusalem aatiŋ ki bijab gob ki na ponn ni.

¹¹ Hesekia bui nimi ke Nidindaan Uwumbɔr ga nyan nimi timi aapɔɔn ni, Hesekia ŋmanni nimi le ki ga cha nnyunyuu ni nkon ku nimi.

¹² Uma le nan ye unii u ber Uwumbɔr aatork aabimbin ni tiwaachur, ki fenn bui Juda ni Jerusalem aanib ke bi li seer tulalee aayon ki dooni Uwumbɔr, kitork aabimbiln libaa baanja pu na.

¹³ Naa nyi min ni n‑yaajatiib aah nan ŋa ŋitimbol ŋiken aanib pu na aa? Litimbol libaa aawaa nan ŋmaa gaa ŋaanib Asiria aabɔrkpaan chee lii ii?

¹⁴ Bayoonn aan ŋitingban ŋimina mɔmɔk aawaa ŋman ki gaa ŋi ti chee? Kina pu na, ba cha ni dak ke nimi Aawumbɔr ga ŋmaa gaa nimi lii?

¹⁵ Tɔ, taa cha Hesekia ŋmann nimi ki di nimi yenn kina. Taa ŋun tii u man. Litimbol libaa aawaal aa kee ŋman ki gaa laanib Asiria aabɔrkpaan ubaa chee lii. Kina pu na, nimi Aawumbɔr wee mu aan ŋmaa gaa nimi lii.”

¹⁶ Asiria aajab aaninkpiib nan len tibɔr ti bir ki jer kina na, Dindaan Uwumbɔr, ni waatutunn Hesekia pu.

¹⁷ Kigbaŋ ki ubɔrkpaan ngbaan nan ŋmee na nan seei Israel yaab Aadindaan Uwumbɔr. Mu nan len ke, “Ŋitimbol aawaa aa gaa ŋaanib maapɔɔn ni lii, le Hesekia Aawumbɔr mu aan ŋmaa gaa waanib m chee lii.”

¹⁸ Bininkpiib ngbaan nan teen mpɔɔn pu le ki di tibɔr ngbaan len Hiibru aaliin ni ke Jerusalem aanib bi nan ka ligoln ngbaan pu na ŋun aan ijawaan chuu bi, ki cha bitaakpab yɔl. Bi nan ŋa kina ke ni taa li pɔɔ bi aan bi nyaŋ kitiŋ ngbaan.

¹⁹ Bi nan len Jerusalem yaab Aawumbɔr pu tibɔr ke baah len ŋitimbol ŋiken aawaa ŋi unibɔn di uŋaal naan na la.

²⁰ Le Ubɔr Hesekia ni Amos aajapɔɔn Aisaya u nan ye Uwumbɔr aabɔnabr na nan mee Uwumbɔr ki wii ban nterm u chee.

²¹ Uwumbɔr nan tun waatuun le mu ti ku Asiria aajab ni baaninkpiib. Le ubɔrkpaan ngbaan nan di inimɔɔn gir kun Asiria. Nwiin mubaa daal le u nan bi waawaadiik ni, le ujapɔtiib bibaa buen ti di baajaak aajum ku u.

²² Kina le Uwumbɔr nan gaa Ubɔr Hesekia ni waanib bi bi Jerusalem ni na Asiria aabɔrkpaan Senakerib, ni baadim biken chee lii. U nan cha binib ngbaan bi nsuudoon ni ŋitingban ŋi mann gob bi na chee.

²³ Binib pam nan dan Jerusalem ki joo ni ipiin nan tii Uwumbɔr ni Hesekia, le Hesekia nan kan liyimbil ŋitimbol mɔmɔk chee ki joo cha.

Hesekia aabunbunn ni waagaak aabɔr

²⁴ N‑yoonn mumina le Ubɔr Hesekia nan buŋ ki ti gur siib u kpo. U nan mee Uwumbɔr, le Uwumbɔr tii u limɔkl ke u ga ki pɔɔk.

²⁵ Le Hesekia aagaak nan nyaŋ u aan waa ŋmaa doon Uwumbɔr waah ŋa pu tii u na, le Juda ni Jerusalem aanib kan kina aatafadaan.

²⁶ Tɔ, kookoo na, Hesekia ni Jerusalem aanib nan sunn bibaa taab, le Uwumbɔr aa nan ki daa binib ngbaan aatafal ki ti saa buyoonn Hesekia kpo na.

Hesekia aawangol ni waapak aabɔr

²⁷ Hesekia nan kpaln uwankpadaan, le unii mɔk gur nyuŋni u. U nan cha bi maa tidir ti u joo waasalmaa, ni tikunabr, ni ŋitakpanyaan, ni tulalee tiib, ni kijaak aapen, ni tiwanbankaan niken ŋani na.

²⁸ U nan ki cha bi maa tidir ti u joo waajikaar, ni ndaan, ni olif aakpan siini na; ki maa waanaa aanaakɔr; ki gob ipiih aah ga li doo nin chee na.

²⁹ Ki kpee nimina mɔmɔk pu na, Uwumbɔr nan tii u tiwakor, ni liwangol liken sakpen, le u maa ntim sakpen.

³⁰ Ubɔr Hesekia le nan ŋa nkool kiir Gihonn aayayak aanyunbun na aasan, ki jee nnyunsan ki cha mu puu ti koo libuul libaa ni, Jerusalem ponn ni. Hesekia nan kan linyaŋ waatuln mɔmɔk ni,

³¹ le Babiloŋ aaninkpiib aah nan dan ke bi nan baa ki bee budabu tun iwaan aatuln kitiŋ ngbaan pu na, Uwumbɔr di Hesekia lii ke u ŋa ubaa aageehn. U nan ŋa kina ke u tɔŋ u ki lik waabimbin la.

Hesekia aanaan aah doo pu na aabɔr

³² Tiwan nimɔk gur aan Ubɔr Hesekia nan ŋa, ni waah nan di ubaa tii Uwumbɔr pu na bi Amos aajapɔɔn Aisaya u nan ye Uwumbɔr aabɔnabr na aabɔkpiirkaan aagbaŋ ni, ki ki bi Juda ni Israel yaab Aabɔrb aatun Aagbaŋ ni.

³³ Hesekia nan kpo, le bi di u sub nnaan aacheek ni, paacham aapepel ni. Juda ni Jerusalem aanib mɔmɔk nan tii u kinyuŋ sakpeŋ waakun yoonn. Ujapɔɔn Manase le nan gaa waanaan ki ye ubɔr.