2 Bibɔrb Aabɔr 31 - Uwumbɔr aagbaŋ

Hesekia aah nan ki gir toor Uwumbɔr aadiim pu na

¹ Njim ngbaan aah jer doo na, Israel aanib mɔmɔk nan buen Juda aatiŋ mɔk ni, le ki ti gbaa wiil ŋiwaatakpal, ki gbaa wɔi liwaapii Asera aanaŋ, ki ber ŋiwaa aatork aabimbin ni tiwaachur mɔmɔk. Bi nan ŋa Juda aatim mu gur na ni mu kina la. Bi nan ŋa kina Benjaminn, ni Efraim, ni Manase aapepel ni, le ki nin gir kun.

² Ubɔr Hesekia nan ki gir cha bitotoorb ni Liifai yaab aabimbin sil, le bimɔk kpa baatun ŋi bi tun na. Ŋima le nan ye kitork ki bi joo seer mmii ni na, ni kimɔbaan aatork, ki kpee Uwumbɔr Aadichal ni aadoon, ki tii Uwumbɔr idoon ni kipak, ni Uwumbɔr Aadichal ni aapepel mɔk ni aatun.

³ U nan nyani ubaa aawakor le tii aan bi joo toor kichakpiik ni, ni kijook mɔk aatork ki bi joo seer mmii ni na, ki kpee Likpaakool daal, ni Uŋmapɔɔn Aajim aatork, ni njim muken na aatork, Uwumbɔr Aakaal aah mɔk pu na.

⁴ Ubɔr nan ki tuk Jerusalem aanib ke bi li joo ni ipiin i ye bitotoorb ni Liifai yaab yaan na, aan bi ŋmaa kan mpaan ki li ŋani Uwumbɔr Aakaal aah ban pu na.

⁵ Ubɔr aah tii limɔboln ngbaan na, libuul ngbaan ni, le binib ngbaan di baajan aajikaabim, ni ndaan, ni olif aakpan, ni tisiir, ni tisar aajikaar tiken na, ni baah kpa tiwan ni mɔmɔk, ki yakr ni kipiik kipiik ki nyan nibaabaa tii Uwumbɔr na buen.

⁶ Binib bi mɔmɔk nan koo Juda aatim ni na nan joo ni baanaa ni ipiih mu yaan kina la, le ki ki joo ni ipiin i wiir sakpen na, ki nan di i tii Bidindaan Uwumbɔr.

⁷ Ŋmataa ponn ni le ipiin ngbaan nan piin ki fuur ni, ki joo kina ki ti saa iŋmal inaa i paan na.

⁸ Ubɔr Hesekia ni waaninkpiib aah kan ke bi tii sakpen na, le bi pak Uwumbɔr, ki pak waanib Israel yaab mu.

⁹ Ubɔr nan baa bitotoorb ni Liifai yaab ipiin ngbaan pu,

¹⁰ le Utotoorninkpel Asaria, u nan ye Sadok aayaabil na bui u ke, “Binib ngbaan aah piin ki joo ni ipiin ngbaan Uwumbɔr Aadichal ni na, tijikaar pam bi le ti ji, le ti gur na wiir sakpen a. Uwumbɔr aah ŋa tinyoor ŋa waanib pu na le cha ti kpa nimina mɔmɔk.”

¹¹ Ubɔr nan cha bi toor tijikaar aadir Uwumbɔr Aadichal aapaan ni,

¹² le ki di ipiin ngbaan ni baah nyan tiwan nibaabaa ni kipiik kipiik mɔk ni tii Uwumbɔr na mɔmɔk ŋa ti ponn ni, ke nibaa taa bii ti. Bi nan di Liifai aanii u bi yin u ke Konania na le di kiir ti, le unaal Simei ter u.

¹³ Bi nan nyan Liifai yaab binib kipiik le bi tun lituln, u ni unaal taab. Bima le nan ye Jehiel, ni Asasia, ni Nahaf, ni Asahel, ni Jerimof, ni Josabad, ni Eliel, ni Ismakia, ni Mahaf, ni Benaya. Ubɔr Hesekia ni Utotoorninkpel Asaria le nan cha nimina mɔmɔk ŋa.

¹⁴ Imna aajapɔɔn Kore, u nan ye Liifai aanii ki ye Uwumbɔr Aadichal aabisamɔb mu bi yin mu ke Liwipuul Aabisamɔb na aaninkpel na le nan ye u gaal ipiin i bi joo nan tii Uwumbɔr na, le ki yakr i tii.

¹⁵ Bitotoorb aah nan koo ntim mumɔk ni na, Liifai yaab le nan ter u mbamɔm waatuln ngbaan ni. Liifai yaab bi nan ter u na sɔ: Edenn, ni Miniaminn, ni Jesua, ni Semaya, ni Amaria, ni Sekania. Bi nan yakr tijikaar dee dee ki tii biŋeen aatɔtiib Liifai yaab biken ki ŋeer baatun aah ye pu na,

¹⁶ baa nan yakr ti itaŋaal pu. Bi nan yakr ti tii uja u ye ŋibin piitaa ni ipaar ki kpa lituln iwiin mɔmɔk Uwumbɔr Aadichal ni, ki joo cha waasisii aah ye pu na la.

¹⁷ Bitotoorb tun baatun itaŋaal la, le Liifai yaab bi nan ye ŋibin moninko ni ipaar na tun ŋiker ŋiker pu.

¹⁸ Naah nan ye ke bi gor ki li bi chain aatuln ni n‑yoonn mumɔk bi yin bi na, bi nan ŋmee bi ni bipuutiib, ni baabim, ni bi mɔmɔk koo bi chee na aayimbil bil la.

¹⁹ Biyidam nan bi bitotoorb bi koo ntim mu bi nan di mu tii Aaronn aayaabitiib na, ni mu aamoŋmɔpaan ponn ni, ki yakr tijikaar tii bijab bi mɔmɔk ye bitotoorb aamaal ni aanib na, ni umɔk bi Liifai yaab aataŋaal ni na.

²⁰ Ubɔr Hesekia nan tun tiwan ni tok ki piir Udindaan Uwumbɔr aasui na, Juda aatim mɔmɔk ni.

²¹ Waah nan joo usui mɔmɔk tii Uwumbɔr ki joo limɔkiir tun Uwumbɔr Aadichal ni aatuln ki dii nkaal mbamɔm na, le u nan nyaŋni waatuln mɔk ni.