2 Bibɔrb Aabɔr 30 - Uwumbɔr aagbaŋ

Baah nan gor bibaa ki kiir Lakr‑jer Aajim pu na

^1-3 Binib ngbaan aa nan ŋman ki jin Lakr‑jer Aajim njan aaŋmal ni ke baah ti ji pu na. Naah nan ye pu na le ye ke bitotoorb pam aa nan toor bibaa, le binib pam mu aa nan kuun dan Jerusalem ni. Nima pu le Ubɔr Hesekia ni waaninkpiib, ni Jerusalem aanib kii tii tɔb ke bi ji mu ŋmalee ni. Le ubɔr ngbaan nan tun tuk Israel ni Juda aanib mɔmɔk. U nan chuu ubaa mbamɔm le ki ŋmee tigbann tii Efraim ni Manase aanibol, ke ŋi dan ki nan ji Lakr‑jer aajim ki nyuŋ bima Israel yaab Aadindaan Uwumbɔr, Uwumbɔr Aadichal ni, Jerusalem aatiŋ ponn ni.

⁴ Ubɔr ni waanib aasui nan piin baah kpokl pu na pu,

⁵ le bi yin Israel yaab mɔmɔk ki nyan Dann aatiŋ ki bi ŋŋangan wɔb na ki ti saa Beerseba ki bi ŋŋangii wɔb na, ke bi dan Jerusalem ni ki nan ji Lakr‑jer aajim, nkaal aah mɔk pu na, ki li wiir jer baah ti puun ji pu na.

⁶ Ubɔr ni waaninkpiib nan cha ituun nyan buen Juda ni Israel yaab aatim mɔmɔk ki joo nnyim aabɔr tee: “Israel aanib, ni ŋmar Asiria yaab aah gaa kitiŋ pu na ni. Tɔ, gir ni man Abraham, ni Aisak, ni Jakob Aadindaan Uwumbɔr chee, le u mu ga gir ni ni chee.

⁷ Ni taa li bi ke niyaajatiib ni niŋeen aatɔtiib Israel yaab bi nan yii kaa kii tii Bidindaan Uwumbɔr na. Ni kan ke u nan daa bitafal sakpen.

⁸ Taa li kpa tafalaaŋun ke baah nan kpa pu na man, ni tee kii Uwumbɔr aamɔb. Dan man Uwumbɔr Aadichal li Nidindaan Uwumbɔr ŋa li chain n‑yoonn mɔmɔk aan li bi Jerusalem ni na ni, ki nan doon u aan waaŋuul sɔŋ ni pu.

⁹ Ni yaa gir ni Uwumbɔr chee kan, le binib bi chur nimi aanib buen tinaagbiir ni na ga san bi kinimbaak ki cha bi gir kun ni. Nidindaan Uwumbɔr kpa tiŋann le ki san kinimbaak. Ni yaa fenn gir u chee kan, u ga gaa nimi.”

¹⁰ Ituun ngbaan nan buen Efraim ni Manase aanibol aapepel aatim mɔmɔk ni, ki di kina ti nyan ŋŋangan wɔb Sebulunn aanibol ni, le binib ngbaan nan tee laa bi ki ŋani bi mbɔnyun.

¹¹ Bibaa mu nan tee nyan ni Aser, ni Manase, ni Sebulunn aanibol ni ki gee ke bi dan Jerusalem aatiŋ ni.

¹² Uwumbɔr nan bi tun waatuln Juda aapepel ni, le ki cha binib ngbaan ŋa kimɔbaan baah pɔɔni bibaa pu ke bi kii waageehn ki dii ubɔr ni waaninkpiib aah len pu na.

Baah jin Lakr‑jer Aajim pu na

¹³ Kinipaak sakpeŋ le nan kuun Jerusalem ponn ni, ŋmalee ni, ke bi ji boroboro u kaa kpa boroboro aanyɔk na aajim.

¹⁴ Bi nan ber ŋiwaabimbin ŋi bi Jerusalem ponn ni aan bi nan joo toor kitork ki seer nnyɔknii ŋi pu na, ki di ŋi ti mae Kidronn aafataŋ ni.

¹⁵ Uŋmal ngbaan aawiin kipiik ni inaa daal le bi nan kɔr Lakr‑jer aatork aapihbi. Bitotoorb ni Liifai yaab bi nan kpa tijɔŋ baatuln chee na nan jin inimɔɔn sakpen le ki toor bibaa chain, le ki nin ŋmaa toor kitork ki bi joo seer mmii ni na Uwumbɔr Aadichal ponn ni.

¹⁶ Bi nan sil sil baabuu ni, Uwumbɔr Aadichal ponn ni, Uwumbɔr aanii Moses aakaal aah nan mɔk pu na. Liifai yaab le nan joo kitork aasin tii bitotoorb, le bi joo yɔk kitork aabimbiln pu.

¹⁷ Binib pam aah kaa nan toor bibaa chain na, baa nan ŋmaa kɔr Lakr‑jer aapiih, kina pu na, Liifai yaab le nan kɔr i tii bi, ki di i ŋum Uwumbɔr.

¹⁸ Ki kpee na, binib bi nan nyan ni Efraim, ni Manase, ni Isakar, ni Sebulunn aanibol ni na pam le nan ye binib bi kaa toor bibaa chain na, kina pu na, baah nan bi ji Lakr‑jer aajim na, naa nan ka kina. Ubɔr Hesekia nan mee limeel lee le tii bi:

¹⁹ “Uwumbɔr, tiyaajatiib Aadindaan, saaŋann pu, di cha pinn binib bi mɔmɔk joo bisui mɔmɔk dooni si na, hali bibaa aah kaa toor bibaa chain na pu na, di cha pinn bi.”

²⁰ Uwumbɔr nan kii Hesekia aameel; u nan di cha pinn binib ngbaan, kaa ŋa bi nibaa.

²¹ Binib bi nan kuun Jerusalem ponn ni na nan jin boroboro u kaa kpa boroboro aanyɔk na aajim ni mpopiin sakpen ki ti saa iwiin ilole; le iwiin ngbaan mɔmɔk bitotoorb ni Liifai yaab joo baapɔɔn mɔmɔk pak Uwumbɔr.

²² Hesekia nan pak Liifai yaab ngbaan baah nan di nlan mu tun baatuln ki joo cha Uwumbɔr aadoon chee na pu. Iwiin ilole i ponn ni bi nan toor kitork ki pak biyaajatiib Aadindaan Uwumbɔr na aah jer na,

Lelee aajim

²³ le bi mɔmɔk nan ki kpokl ki kii ke bi ki gir ji njim ngbaan iwiin ilole ki kpee. Le bi nan di mpopiin jin mu.

²⁴ Ubɔr Hesekia nan too inaaja lichur, ni ipiih ŋichur ŋilole le tii binib ngbaan ke bi kɔr ki ŋmɔ, le waaninkpiib mu too inaaja lichur ni ipiih ŋichur kipiik. Bitotoorb pam le nan toor nyan bibaa tijɔŋ ni.

²⁵ Kina pu na, unii mɔk nan kpa mpopiin la. Juda aanib, ni bitotoorb, ni Liifai yaab, ni binib bi nan nyan ni ŋŋangan wɔb na, ni biwɔwɔm bi nan kal Israel ni Juda aatim ni kaa ki cha nibaa na mɔmɔk nan kpa mpopiin la.

²⁶ Ki nyan David aajapɔɔn Ubɔr Solomonn aayoonn na kina aawan aa kee ŋa; kina pu na, Jerusalem aatiŋ ponn ni nan ye mmɔɔn ŋmeen la.

²⁷ Bitotoorb ni Liifai yaab nan mee Uwumbɔr aanyoor ŋa binib ngbaan pu. Le Uwumbɔr nan bi udo paacham ki ŋun baah mee u pu na le ki kii ŋi.