2 Bibɔrb Aabɔr 29 - Uwumbɔr aagbaŋ

Juda Aabɔr Hesekia aabɔr

¹ Hesekia nan ye ŋibin moninko ni ŋiŋmu aanii le ki jin nnaan, le ki ka Jerusalem ni, ki joo waanib ki ti saa ŋibin moninko ni ŋiwae. Bi nan yin una ke Abija. Una aate le nan ye Sekaria.

² Hesekia nan dii uyaaja Ubɔr David aasan, le ki tun Uwumbɔr aah gee pu na.

Baah toor Uwumbɔr Aadichal ki ŋa li chain pu na

³ Hesekia aah nan jin nnaan ki nan gɔr libiln na aajan aaŋmal libiln ngbaan ni, le u ki piir Uwumbɔr Aadichal aabisamɔi le ki cha bi toor i.

⁴ U nan kuun bitotoorb ni Liifai yaab bibaa Uwumbɔr Aadichal aachiln li bi liwipuul wɔb na ni,

⁵ le ki tuk bi tibɔr nima chee. U nan len ke, “Nimi Liifai yaab le ga finn nibaa chain, le ki finn niyaajatiib Aadindaan Uwumbɔr Aadichal. Nyan man tiwan nimɔk bi li ponn ni ki bii li na.

⁶ Tiyaajatiib aa nan dii Tidindaan Uwumbɔr mbamɔm le ki tun waah kaa gee pu na. Bi nan yii u le ki fenn bipuwɔb tii waah koo nin chee na.

⁷ Bi nan di Uwumbɔr Aadichal aajaaleŋ tiib laŋ, le karyaa tiib junn; le baa ki seer tulalee aayon, kaa toor kitork ki bi ga di see mmii ni tii bima Israel yaab Aawumbɔr na.

⁸ Nima pu le Uwumbɔr gee liŋuul Juda ni Jerusalem pu, le waah ŋa bi tiwan ni na cha ijawaan chuu unii mɔk ki yuk bipobil. Ni nyi nimina mɔmɔk.

⁹ Bi ku titetiib butɔb ni, le ki yoor tipuutiib ni timi aabim buen tinaagbiir ni.

¹⁰ “Nima le m ŋa nlandak ke m puu tipuukpaan tii timi Israel yaab Aadindaan Uwumbɔr aan u taa ki gee ti pu liŋuul.

¹¹ Njapɔtiib, taa taan man. Nimi le Uwumbɔr lee ke ni li seer tulalee aayon tii u, ki li lolni binib nsan waadoon ni.”

^12-14 Liifai yaab bimina le nan bi nima: Kohaf aataŋaal pu yaab le nan ye Amasai aajapɔɔn Mahaf, ni Asaria aajapɔɔn Joel. Merari aataŋaal pu yaab le nan ye Abdi aajapɔɔn Kis ni Jehalelel aajapɔɔn Asaria. Gesonn aataŋaal pu yaab le nan ye Simna aajapɔɔn Joa, ni Joa aajapɔɔn Edenn. Elisafann aataŋaal pu yaab le nan ye Simri ni Jewel. Asaf aataŋaal pu yaab le nan ye Sekaria ni Matania. Hemann aataŋaal pu yaab le nan ye Jehuel ni Simei. Jedutunn aataŋaal pu yaab le nan ye Semaya ni Usiel.

¹⁵ Bijab bimina le nan kuun Liifai yaab biken, le bi mɔmɔk finn bibaa chain. Le ubɔr aah di pu tuk bi na, bi piin ki bi finni Uwumbɔr Aadichal chain, Uwumbɔr Aakaal aah mɔk pu na.

¹⁶ Bitotoorb nan koo Uwumbɔr Aadichal ni ke bi finn li ponn ni; le ki kaai tiwan nimɔk nan ye tijɔŋ aawan na siin lichiln ni. Le Liifai yaab yoor ni nima chee ki di nyan lipaal ki di buen Kidronn Aafataŋ ni.

¹⁷ Bi nan piin lituln ngbaan njan aaŋmal aawiin mbaa daal la; le ki joo cha winiin daal na bi doo li mɔmɔk, ki kpee Uwumbɔr Aadichal aanaakook mu. Le bi nan beenin tun kina ki ti ki saa iwiin iniin, uŋmal ngbaan aawiin kipiik ni iloob daal le nan bi na. Bi nan di iwiin ngbaan le toor Uwumbɔr Aadichal ke bi ki piin idoon li ponn ni.

Baah nan ki giin Uwumbɔr Aadichal ŋa uŋaal ni pu na

¹⁸ Liifai yaab aah nan di tibɔr ti tuk Hesekia na sɔ: “Ti finn Uwumbɔr Aadichal chain doo. Ti finn kitork aabimbiln li pu bi seer kitork aawan na, ni chain aaboroboro aah paani teebul u pu na, ni baawan mɔmɔk chain.

¹⁹ Ti ki giin ni tiwan nimɔk Ubɔr Ahas nan yoor ŋibin ŋi waa nan ki dii Uwumbɔr na, ki ki di ni mu ŋa Uwumbɔr Aaŋaal ni. Ni mɔmɔk si Uwumbɔr aatork aabimbiln chee.”

²⁰ Ubɔr Hesekia aa nan taan le ki kpaan kuun bijab bi ye bisalolm na mɔmɔk, le bi mɔmɔk buen Uwumbɔr Aadichal ni.

²¹ Bi nan joo inaaja ilole, ni ipiih ilole, ni ipihbi ilole, ni iŋoob ilole le ke bi ti toor chapinn aatork, nnaan aadichal ni Juda aanib pu, ki kpaan toor nyan Uwumbɔr Aadichal mu aajɔŋ. Ubɔr nan bui Aaronn aayaabitiib bi ye bitotoorb na ke bi di tiwakor ngbaan toor kitork aabimbiln paab.

²² Bitotoorb ngbaan nan pue kɔr inaaja la, le ki paan ipiih, le ki di ipihbi paan; ki joo kitork mɔk aasin yaani kitork aabimbiln pu.

²³ Kookoo na, bi nan di iŋoob na buen ubɔr ni bimɔk nan dan kina aadoon ni na chee, le bi di biŋaal paan i pu.

²⁴ Le bitotoorb kɔr i, ki di yaasin kpir kitork aabimbiln pu, ke ni li ye kitork ki ga nyan binib ngbaan mɔmɔk aatunwanbir na. Ubɔr ngbaan nan bui ke bi toor kitork ki bi joo seer mmii ni na, ni titunwanbir aachapinn aatork tii Israel yaab mɔmɔk.

²⁵ Ubɔr ngbaan nan dii isan i Uwumbɔr nan di tii waabɔnabtiib Gad ni Natann ke bi di tii Ubɔr David na. Gad le nan ye unii u joo Uwumbɔr aabɔr nabr tii ubɔr ngbaan na. Ubɔr Hesekia nan ban Liifai yaab siin Uwumbɔr Aadichal ni, le bi joo tibar ni ichayakrtuun,

²⁶ ni tiwangbaakaan ni aaboln Ubɔr David nan joo tun na. Bitotoorb mu nan bi ki joo kakaan tiib.

²⁷ Hesekia nan tii nsan ke bi piin kitork ki bi ga di see mmii ni na. Baah piin na, le binib ngbaan gaa ilahn ki pak Uwumbɔr, le biwangbaab gbaa tiwan ki pii kakaan tiib.

²⁸ Unii umɔk nan bi nima chee na nan piin Uwumbɔr aadoon, le lilahngaal ni liwangbaal nan beenin damni, le bi ti see kitork ngbaan mɔmɔk mmii ni doo.

²⁹ Le Ubɔr Hesekia ni binib ngbaan mɔmɔk gbaan kitiŋ ki doon Uwumbɔr.

³⁰ Ubɔr ni binib ngbaan aasalolm nan bui Liifai yaab ke bi gaa ilahn i Ubɔr David ni Uwumbɔr aabɔnabr Asaf nan ŋmee na ki pak Uwumbɔr. Kina pu le binib ngbaan mɔmɔk nan beenin gbaa tiwan ki gaa mpopiin aalahn ki pak Uwumbɔr.

³¹ Hesekia nan bui binib ngbaan ke, “Naah finn nibaa chain kaa ki kpa tijɔŋ na, li joo ni man idoon aapiin ki nan toor tii Uwumbɔr.” Bi nan kii waamɔb, le biken mu nyan sil ki joo ni tiwakor ki nan toor kitork ki bi ga di see mmii ni na aatork.

³² Bi nan joo ni inaaja imonko itaa ni kipiik, ni ipiih nkub, ni ipihbi ikui ilee ki nan toor kitork ki bi ga di see mmii ni na tii Uwumbɔr.

³³ Bi nan ki joo ni inaaja ikui iloob ni ipiih ŋichur ŋitaa ki nan toor ke binib ngbaan ŋmɔ ima.

³⁴ Bitotoorb aah kaa nan wiir ki ga kɔr tiwakor ngbaan mɔmɔk na, le Liifai yaab nan ter bi, bi ti kɔr ni mɔmɔk doo. N‑yoonn ngbaan le bitotoorb pam nan finn bibaa chain. Ki joo cha tijɔŋ wɔb na, Liifai yaab nan ŋmaa joo bibaa chain jer bitotoorb na.

³⁵ Bitotoorb le nan ki yeh ke bi di baah nan di tiwakor ti toor ke binib ngbaan ŋmɔ na aakpan see mmii ni, ki ki toor tiwakor ti bi ga di see mmii ni timɔnn na aatork tii Uwumbɔr. Bima le nan ki yeh ndaan mu dii ni mmii ni aatork na aabarn. Kina le bi nan ki piin ki doon Uwumbɔr, Waadichal ni.

³⁶ Ubɔr Hesekia ni binib ngbaan nan kpa mpopiin, Uwumbɔr aah ter bi pu aan bi tun lituln limina mɔmɔk doo mala na pu.