2 Bibɔrb Aabɔr 27 - Uwumbɔr aagbaŋ

Juda Aabɔr Jotam aabɔr

¹ Jotam nan ye ŋibin moninko ni ŋiŋmu aanii le ki jin nnaan, le ki ka Jerusalem ni, ki joo waanib ki ti saa ŋibin kipiik ni ŋiloob. Bi nan yin una ke Jerusa, le ki yin una aate ke Sadok.

² U nan tun Uwumbɔr aageehn ke ute na; waa nan tee tun taani ke ute aah nan see tulalee aayon Uwumbɔr Aadichal ni ki tun Uwumbɔr titunwanbir pu na. Waanib le nan tee beenin tun titunwanbir.

³ Jotam le nan maa Uwumbɔr Aadichal aabisamɔb mu bi yin mu ke Ŋŋangan Aabisamɔb na, le ki moo toor kitiŋ ngbaan aagoln Jerusalem aapepel liwɔb bi yin li ke Ofel na.

⁴ U nan maa ntim Juda aajoo ni, le ki maa tijawan aadichal ni bikikiib aadir tichoor ni.

⁵ U ni Amonn aabɔr nan faa tɔb butɔb, le u nyaŋ u ni waajab, le ki chuu Amonn yaab mpɔɔn ke bi li pa u tikunabr aamombil ŋi aanyunyuun ga pii njikaabim bɔtɔ tiib imonko inaa, ni njikaabim mu bɔtɔ ŋichur tiib imonko ilee.

⁶ Jotam aah nan kii tii Udindaan Uwumbɔr mbamɔm na le u nan moo pɔɔk.

⁷ Jotam aatun ŋi gur ki ye waanaan aayoonn, ni butɔb aabɔr, ni isan i u nan joo tun waatuln na bi Israel ni Juda yaab Aabɔrb Aatun Aagbaŋ ni la.

⁸ Jotam nan ye ŋibin moninko ni ŋiŋmu le ki jin nnaan, le ki ka Jerusalem ni, ki joo waanib ti saa ŋibin kipiik ni ŋiloob.

⁹ U nan kpo, le bi sub u David Aatiŋ ni, le ujapɔɔn Ahas gaa waanaan.