2 Bibɔrb Aabɔr 26 - Uwumbɔr aagbaŋ

Juda Aabɔr Usia aabɔr

¹ Juda aanib mɔmɔk nan lee Amasia aajapɔɔn Usia le ki di ŋa ubɔr. U nan ye ŋibin kipiik ni ŋiloob aanii la.

² Amasia aah nan kpo pu na aapuwɔb, le Usia nan ki nyaŋ ki gaa Elaf aatiŋ ŋa Juda aatim ni. U nan ki gir maa ki la.

³ Usia nan ye ŋibin kipiik ni ŋiloob le ki jin nnaan. U nan bi Jerusalem ni, ki joo waanib ki ti saa ŋibin piiŋmu ni ŋilee la. Una nan ye Jerusalem ni aanii la, le bi yin u ke Jekolia.

⁴ Usia nan dii ute aasan le ki tun Uwumbɔr aageehn.

⁵ N‑yoonn mumɔk Sekaria, u nan ye Uwumbɔr aadidiir, ki ye waasusur na nan bi limɔfal ni na u nan tun Uwumbɔr aageehn mbamɔm. Le Uwumbɔr nan ŋa u tinyoor.

⁶ Usia ni Filistia yaab nan faa tɔb butɔb. U nan tur baatim Gaf, ni Jamnia, ni Asdod aagon lir, le ki maa ntikpaam mu pɔɔ na gbaŋ Asdod ni Filistia aatim mu gur na.

⁷ Uwumbɔr nan ter u, le u nyaŋ Filistia yaab, ni Arab yaab bi koo Gur Baal aatiŋ ni na, ni Meunn yaab.

⁸ Amonn yaab nan pa tipar tii Usia, le u kan mpɔɔn le waayimbil di ti nyan Ijipt aatiŋ ni.

⁹ Usia nan maa bikikiib aadir ti fɔk na Jerusalem ni, le ki moo tii ki mpɔɔn. U nan maa ti Kilɔlɔŋ ni Aabisamɔb chee, ni Kifataŋ Aabisamɔb chee, ni ligoln ngbaan aah ti fenn nin chee na la.

¹⁰ U nan ki maa kina aadir timoor ni, le ki gbii inyunbun pam. Waah nan kpa tiwakor sakpen liwilir wɔb aajoo ŋi bi ŋijoosakpiin taab na ni pu na, le nan cha u ŋa kina. Waah nan gee tikpaar pu na, le u nan pɔɔk waanib aataakpab ke bi ŋum ndaan aasubil aasui ŋigongon aatim ni, ki ko tisar ntim mu nyuun na ni.

¹¹ U nan kpa butɔb aajab bi ŋeer bi buen butɔb ni na pam. Binib bi nan kahn ki nyi bijab ngbaan mɔk na le nan ye waagbaŋmeeb Jeyel ni Maaseya, le Hanania ye baaninkpel. Hanania nan ye ubɔr aaninkpiib ponn ni ubaa la.

¹² Bininkpiib bi nan lik bijab ngbaan na nan ye binib ŋichur ŋilee ni ikui iloob la.

¹³ Le baah nan joo butɔb aajab bi na nan ye bijab ŋichur ikui itaa ni ŋilole ni ikui iŋmu. Bi nan ye bijab bi ga ŋmaa jan ubɔr aadim kijaak mbamɔm na la.

¹⁴ Usia nan tii bijab ngbaan kijaak aapen, ni tikpaatunn, ni tikur aayikpupur, ni tikur aabɔkul, ni itɔi, ni ipiin, ni ŋifulaatan aatakpal.

¹⁵ Waanib bi nan naani tiwan ki bi Jerusalem ni na nan naan tiwan ni ga li too ipiin, ki ga li ŋmaa mae ŋitakpasakpiin bikikiib aadifɔfɔŋ na pu na tɔŋ tidir ngbaan, ni ligoln ngbaan aalɔlɔnn ponn ni. Waayimbil nan yaa koo ni mɔmɔk, le u moo kan mpɔɔn, Uwumbɔr aaterm pu.

Uwumbɔr aah daa Usia aatafal kipupuk pu pu na

¹⁶ Tɔ, Ubɔr Usia aah pɔɔk na, le u gur kpa kipupuk, le ni tur u lii libuul ni. U nan koo Uwumbɔr Aadichal ni ki ti see tulalee aayon, le ki bii Udindaan Uwumbɔr aakaal.

¹⁷ Utotoor Asaria ni bitotoorb imonko inaa bi kpa lipobil na nan dii ubɔr

¹⁸ ke bi ti kiir u, u taa see tulalee aayon ngbaan. Bi nan len ke, “Usia, saa kpa nsan ke aa see tulalee aayon mmii ni ki tii Uwumbɔr. Bitotoorb bi ye Aaronn aayaabitiib aan bi finn bi ke bi li tun kina aatuln na baanja le kpa kina aasan. Nya chain aabuul lee ni. Aa tun Tidindaan Uwumbɔr titunwanbir la, kina pu na, saan ki kan waanyoor.”

¹⁹ Usia nan gaar si Uwumbɔr Aadichal ni, baah seer tulalee aayon mmii ni, libimbiln li paab na chee, ki joo baah seer tulalee aayon lisambil li ponn ni na uŋaal ni. Usui nan fii bitotoorb ngbaan pu; libuul ngbaan ni, le tiwon aaween i bir na kpaan nyan uyigbeer pu.

²⁰ Asaria ni bitotoorb biken na nan gaar si lik ubɔr aayigbeer, le ni kpa bi ijawaan, le bi dar u ke u nya Uwumbɔr Aadichal ngbaan ni. U nan san mala ke u nya, ba pu? Uwumbɔr nan daa utafal.

²¹ Waaween ngbaan pu na, Ubɔr Usia nan gur ye ujɔŋdaan le ki ti kpo. Waa nan ki ŋmaa koo Uwumbɔr Aadichal ni. U nan gur koo ubaa aadichal ni ŋmeen la, kaa ki tun lituln libaa. Le ujapɔɔn Jotam gur joo kitiŋ ngbaan.

²² Amos aajapɔɔn Aisaya u nan ye Uwumbɔr aabɔnabr na nan ŋmee Ubɔr Usia aah nan ye ubɔr pu na aatun ŋiken aabɔr mɔmɔk bil.

²³ Usia nan kpo, le bi sub u nnaan aacheek ni, tɔ, waaween na pu, baa nan sub u bibɔrb aacheek ni. Ujapɔɔn Jotam le nan gaa waanaan.