2 Bibɔrb Aabɔr 24 - Uwumbɔr aagbaŋ

Juda Aabɔr Joas aabɔr

¹ Joas nan ye ŋibin ŋilole aanii le ki jin nnaan, le ki nan bi Jerusalem aatiŋ ni ki joo waanib ti saa ŋibin imonko ilee. Bi nan yin una ke Sibia. Sibia nan nyan ni Beerseba aatiŋ ni la.

² N‑yoonn mu mɔmɔk utotoor Jehoyada nan bi limɔfal ni na, Joas nan tun Uwumbɔr aah gee pu na la.

³ Jehoyada nan ban bipiib bilee le tii Joas, le bi ma mbijabim ni mpiibim tii u.

⁴ Joas aah jin nnaan ni kpee siib na, le u ŋa nlandak ke u toor Uwumbɔr Aadichal.

⁵ U nan siin ke bitotoorb ni Liifai yaab chuun Juda aatim ni, ki gaa ŋimombil ŋi u ga di ŋa libiln libiln aatoorn Uwumbɔr Aadichal pu na. U nan bui bi ke bi gor mala, tɔ, Liifai yaab nan taan;

⁶ kina pu le u nan yin Jehoyada, u ye baasaloln na, ki nan baa u ke, “Ba ŋa saa cha Liifai yaab gaa Juda ni Jerusalem yaab chee lampoo u Uwumbɔr aatutunn Moses nan bui ke binib ngbaan li pa, aan bi li joo toor Uwumbɔr Aabool na?”

⁷ Atalia, upii beebeedaan na aadidiliib nan bii Uwumbɔr Aadichal ki nan joo tiwan ni ye chain na dooni liwaal Baal.

⁸ Ubɔr nan cha Liifai yaab ŋa dakaa ke binib li joo baapiin ŋani u ni, le ki di u siin Uwumbɔr Aadichal aabisamɔb chee.

⁹ Bi nan tun Jerusalem ni Juda aatim ni, ke unii mɔk li joo ni lampoo u Uwumbɔr aatutunn Moses nan puen gaa nteersakpiin ni na.

¹⁰ Nimina nan piir binib ngbaan, ni baasalolm aasui, le bi joo ni baalampoo aamombil ki nan gbiin dakaa ngbaan.

¹¹ Iwiin mɔmɔk kan, Liifai yaab nan yoor dakaa ngbaan ti tii nnaan ni aaninkpel u yeh kina aatuln na la. N‑yoonn mumɔk u ti gbiin na, nnaan ni aagbaŋmeer, ni Utotoorninkpel aanii bi lik ŋimombil ngbaan na le ga yoor dakaa ngbaan, ki ti nyan ŋi, ki ki giin u ti siin. Kina pu na, bi nan kan ŋimombil pam.

¹² Ubɔr ni Jehoyada le ga nan di ŋimombil ngbaan ti tii binib bi yeh Uwumbɔr Aadichal aatoorn aatuln na, le bi ban binib bi kpii ŋitakpal na, ni bikpikpiib, ni binib bi tun tikur aatuln na, le bi toor toor nin chee bii na.

¹³ Bitutum ngbaan nan tun lituln ngbaan ni linimaln, le ki ki giin Uwumbɔr Aadichal siin kib ke laah nan bi pu na.

¹⁴ Ntoorm ngbaan aatuln ngbaan aah nan ti doo na, bi nan di salmaa ni tikunabr ti gur na di tii ubɔr ni Jehoyada, le bi di ŋa Uwumbɔr Aadichal ni aasambil, ni tiwan niken. Jehoyada aah nan bi limɔfal ni ki ti saa n‑yoonn mumɔk na, bi nan toor kitork, Uwumbɔr Aadichal ni, n‑yoonn mɔmɔk.

Baah fenn Jehoyada aah siin nsisii mu na pu na

¹⁵ Waah ti por ki ti saa ŋibin nkub ni piitaa na, le u kpo.

¹⁶ Bi nan sub u nnaan aacheek ni, David Aatiŋ ponn ni, ki mɔk waah nan tun lituln li tii Israel aanib, ni Uwumbɔr, ni Uwumbɔr Aadichal na pu.

¹⁷ Tɔ, Jehoyada aah kpo na, le Juda aasalolm ŋmann Joas ke u dii baah ban pu na.

¹⁸ Kina pu na, binib ngbaan aa nan ki dooni biyaajatiib Aadindaan Uwumbɔr, Waadichal ni. Bi nan piin ki dooni ŋiwaa, ni liwaapii Asera aanaŋ ti bi maa maa siin na la. Baabɔr aah nan bii titunwanbir tee pu na le nan cha Uwumbɔr aaŋuul fii Juda ni Jerusalem aatim pu.

¹⁹ Uwumbɔr nan tun bibɔnabr ke bi ti sak bi ki cha bi gir ni u chee, le binib ngbaan yii, kaan ŋun tii u.

²⁰ Le Uwumbɔr Aafuur Nyaan nan fir utotoor Jehoyada aajapɔɔn Sekaria pu. U nan sil nin chee binib ga li waa u na le ki teen len ke, “Tidindaan Uwumbɔr baa nimi ke ba ŋa ni yii waakaal ki bi joo ni tibɔbir nibaa pu. Ni yii u, kina pu le u mu yii nimi.”

²¹ Ubɔr Joas nan kpee binib bibaa pu ke bi ku Sekaria, le uma ubɔr ngbaan cha bi yur ŋitakpal ku Sekaria, Uwumbɔr Aadichal aachiln ni.

²² Ubɔr nan suln Sekaria aate Jehoyada aah nan tun litunyaan li tii u na bɔr, le ki cha bi ku Sekaria. Sekaria aah bi kpu na, le u teen ki len ke, “Uwumbɔr li waa naah ŋani pu na ki daa nitafal.”

Joas aah nan kpo pu na

²³ Libiln ngbaan aatakuuk, le Siria aatɔb aajab buen ti tak Juda ni Jerusalem. Bi nan ku bisalolm mɔmɔk, le ki yoor tiwan pam di gir kun Damaskus aatiŋ ni.

²⁴ Siria aajab ngbaan nan par pam, le Uwumbɔr cha bi nyaŋ Juda aajapaak. Binib ngbaan aah nan yii uma, u ye biyaajatiib Aadindaan Uwumbɔr na, le nan cha ni ŋa kina. Kina le Uwumbɔr nan di daa Ubɔr Joas aatafal.

²⁵ U nan kan titotonn sakpenn tibaa, le baadim aah gir na, le waaninkpiib bilee nyan upuwɔb le ki ku u waawandookaan pu, ke bi di leŋ waah nan ku utotoor Jehoyada aajapɔɔn pu na. Bi nan sub u David Aatiŋ ponn ni la, ni mu aa nan tee ye nnaan aacheek ni.

²⁶ Binib bi nan nyan upuwɔb na le ye upii u nan nyan Amonn yaab aatiŋ ni aan bi yin u ke Simeaf na aajapɔɔn Sabad, ni Moab aatiŋ ni aapii u bi nan yin u ke Simrif na aajapɔɔn Jehosabad.

²⁷ Joas aajapɔtiib aabɔr, ni Uwumbɔr aabɔnabtiib aah nan len tibɔr ti Joas pu na, ni waah nan ki gir maa Uwumbɔr Aadichal pu na bi Bibɔrb Aagbaŋ na ni la. Ujapɔɔn Amasia le nan kal waajal pu ki ye ubɔr.