2 Bibɔrb Aabɔr 20 - Uwumbɔr aagbaŋ

Juda ni Edom aatɔb aabɔr

¹ Ni nan joo cha le Moab ni Amonn yaab, ki di kpee bimaantɔtiib bi ye Meunn yaab na aajab buen ti koo Juda aatiŋ ni.

² Ituun ibaa le nan buen ki ti tuk Ubɔr Jehosafat ke, “Butɔb aajab aanipaak ki nyan ni Edom na dii N‑yaan Aanyusakpem aapepel libaa wɔb ke bi nan tak si. Bi puen nyaŋ Hasasonn Tamar aatiŋ ma a.” Kitiŋ ngbaan le bi nan ki yin ki ke Enn Gedi na.

³ Ijawaan nan chuu Jehosafat, le u mee Uwumbɔr ki ban nterm, le ki bui ke waatiŋ mɔmɔk aanib lul bumɔb.

⁴ Binib nan nyan Juda aatim mɔmɔk ni ki buen Jerusalem ni ke bi ti ban Uwumbɔr chee nterm,

⁵ le bi ni Jerusalem aanib kuun Uwumbɔr Aadichal aachinpɔln na ni.

⁶ Le Ubɔr Jehosafat buen ti sil binimbiin ni, ki mee Uwumbɔr mpɔɔn pu ke, “Uwumbɔr, tiyaajatiib Aawumbɔr, sin le bi paacham ki joo ŋitimbol mɔmɔk dulnyaa wee ni. Aa ye Mpɔɔnsakpiindaan u ubaa aan ŋmaa kpak si na la.

⁷ Sin le ye timi Aawumbɔr. Saanib Israel yaab aah nan koo ni kitiŋ kee ni na, aa nan jenn nyan binib bi nan koo do na, le ki di kitiŋ ngbaan tii aajɔ Abraham aayaabitiib, ke ki li ye baatiŋ n‑yoonn mɔmɔk.

⁸ Bi koo do la, le ki maa lidichal tii si, ke bi di nyuŋ si,

⁹ ki nyi ke tibɔbir ti ye butɔb, bee iween i bir na, bee nkon yaa dan ke mu daa bitafal kan, bi ga ŋmaa dan ki nan sil Saadichal li bi dooni si li ponn ni na aabisamɔb. Bi ga ŋmaa mee si baamuk ni, le aa ga ŋun ki gaa bi lii.

¹⁰ “Tɔ, Amonn, ni Moab, ni Edom yaab nan tak timi a. Tiyaajatiib aah nan nyan ni Ijipt aatiŋ ni na, saa nan cha bi koo ntim ngbaan ni, kina pu na, tiyaajatiib nan gɔnn bi, le kaa kuln bi.

¹¹ Tɔ, baah joo tiwan ni pa timi na le ye ke bi dan nan jenn nyan timi kitiŋ ki aa nan di tii timi na ponn ni la.

¹² Sin le ye timi Aawumbɔr. Taa kpa nterm mubaa butɔb aajapaak ki bi tak timi na chee, kina pu na, daa bitafal. Taa nyi taah ga ŋa pu na, ti tee lik sin pu, le ki ban nterm.”

¹³ Juda aajab mɔmɔk ni bipuutiib, ni baabim nan si Uwumbɔr Aadichal chee nima.

¹⁴ Uwumbɔr Aafuur Nyaan nan sunn ni Liifai aanii ubaa u nan si ŋmal kinipaak ngbaan ni na pu. Bi nan yin u ke Jahasiel, le ute ye Sekaria; u nan ye Asaf aataŋaal ni aanii la. Uyaajatiib le nan ye Asaf, ni Matania, ni Jeyel, ni Benaya.

¹⁵ Jahasiel nan bui ke, “Ubɔr Jehosafat, ni Juda ni Jerusalem aanib mɔmɔk, Uwumbɔr bui ke ni taa cha nitaakpab yɔl, ki taa san butɔb aajapaak kee ijawaan. Butɔb ngbaan ye Uwumbɔr aatɔb la, naa ye nimi yaan.

¹⁶ Bi yaa fe dii Sis aasan na choo kan, ni ti tak bi. Ni ga fe ti tooh bi kifataŋ ki cha nteersakpiin ki bi gbɔk Jeruel na aah ti doo nin chee na la.

¹⁷ Naa ye ke nimi le ga jan butɔb bue ni. Nima li cha ki ti lul sil ki li kii; ni ga kan ke Uwumbɔr tii nimi linyaŋ a. Juda ni Jerusalem aanib, taa joo beeni ki taa san ijawaan man. Nya buen butɔb ni man, le Uwumbɔr ga li bi ni chee.”

¹⁸ Le Jehosafat gbaan kitiŋ ki cha uyigbeer ti meeh kitiŋ, le binib ngbaan mɔmɔk mu ŋa kina ki doon Uwumbɔr.

¹⁹ Liifai yaab bi ye Kohaf ni Kora aataŋaal pu yaab na nan fii sil le ki teen mpɔɔn pu, ki pak Israel yaab Aadindaan Uwumbɔr.

²⁰ Lichakpitaawoln, le binib ngbaan fii ke bi buen nteersakpiin mu bi gbɔk Tekoa aatiŋ na ni. Baah nan ban bi siir nima chee na, le Jehosafat di lilambil limina tii bi: “Juda ni Jerusalem aajab, di nimi aanaadii tii Nidindaan Uwumbɔr man, nima kan, ni ga sil chob. Kii tii waabɔnabtiib aah tuk nimi pu na, nima kan, ni ga kan linyaŋ.”

²¹ U ni binib ngbaan aah nan kpokl tibɔr na aapuwɔb, le u cha bilahngaab di baawanpeenkaan ni bi joo peeni iwinyaan daal na peen, ki loln butɔb aajab pu nsan, ki gaa nlahn ke, “Pak Uwumbɔr man. Waageehm aa kpa ndoon.”

²² Baah piin ki bi gaa ilahn kina na, le Uwumbɔr buen ti ŋmal baadim ngbaan aajab aalan, le ijawaan chuu bi.

²³ Amonn yaab ni Moab yaab nan di kpaan le ki di lir Edom yaab pu ki kuln bi pel pel, le ki mu ki di fenn lir tɔb pu ke biwaarb na.

²⁴ Juda yaab aah nan ti fuu bipepekb aadifɔfɔŋ ki bi nteersakpiin ni na, le bi lik baadim ngbaan wɔb, le ki kan ke bi mɔmɔk kpoi ki dɔ kitiŋ la. Bi ponn ni ubaa aa san ŋmar.

²⁵ Jehosafat ni waajab nan buen ke bi ti yoor baadim ngbaan aawan. Bi nan ti kan tiwakor, ni tijikaar, ni tiwanpeenkaan, ni tiwanbankaan niken. Bi nan di iwiin itaa le ki kuun tiwan ngbaan, kaa ŋmaa doo, ba pu? tiwan nan nyaŋ.

²⁶ Winaa daal le bi nan ti kuun kal Beraka Aafataŋ ni, ki doon Uwumbɔr waah ŋa tiwan ni mɔmɔk tii bi na pu. Nima pu le bi yin kifataŋ ngbaan ke Beraka.

²⁷ Uwumbɔr aah nan nyaŋ baadim na, le Jehosafat ni waajab di liyimbil gir kun Jerusalem ni.

²⁸ Baah nan ti fuu kitiŋ ngbaan ponn ni na, le bi di tibar ni kakaan tiib aalahn ti fuu Uwumbɔr Aadichal taab.

²⁹ Litimbol limɔk nan ŋun Uwumbɔr aah nyaŋ Israel yaab aadim pu na, ijawaan nan koo bi.

³⁰ Nima le nan tii Jehosafat nsuudoon u di joo waanib, le Uwumbɔr tii u lifuur ŋipepel mɔmɔk pu.

Jehosafat aah nan kpo pu na

³¹ Jehosafat nan ye ŋibin piitaa ni ŋiŋmu le ki jin nnaan, le ki ka Jerusalem ni, nnaan aajal pu, ki joo binib ti saa ŋibin moninko ni ŋiŋmu. Una le nan ye Silhi aabisal Asuba.

³² U nan bi ke ute Asa u nan puen u ki jin nnaan na la, u nan tun Uwumbɔr aageehn.

³³ Waa nan tee ŋmaa kuln ŋiwaa aadoon. Binib ngbaan aa nan fenn bisui mɔmɔk tii biyaajatiib Aawumbɔr ki dooni u.

³⁴ Jehosafat aah nan ki tun pu, ki nyan waanaan aapiin ki ti saa mu aadoon na, bi Hanani Aajapɔɔn Jehu Aagbaŋ ki ye Israel yaab Aabɔrb aatun aagbaŋ aapepel libaa na ni la.

³⁵ N‑yoonn mubaa Juda Aabɔr Jehosafat nan ti ŋa limaantɔl Israel aabɔr Ahasia u nan tun titunwanbir sakpen na chee.

³⁶ Bi nan ŋa iŋɔsakpiin i chuun nnyusakpem ni na, Esionn Geber aanyungbaan.

³⁷ Le Dodafahu aajapɔɔn Elieser, u nyan ni Maresa aatiŋ ni na, nan sak Jehosafat ke, “Saah ŋa butɔb aamaantɔl Ahasia chee pu na, Uwumbɔr ga bii saah ŋa tiwan ni na.” Le iŋɔi ngbaan nan bee nnyun ni, kaa chuun kpala.