2 Bibɔrb Aabɔr 19 - Uwumbɔr aagbaŋ

Uwumbɔr aabɔnabr aah sak Jehosafat pu na

¹ Juda yaab Aabɔr Jehosafat nan gir kun waabɔrdichal ni, Jerusalem aatiŋ ponn ni, ni laafee.

² Hanani aajapɔɔn Jehu, u nan ye Uwumbɔr aabɔnabr na, nan buen ti tooh u nsan ni, ki baa u nsurm ni ke, “Aa dak ke ni ŋan ke aa ter bibiindam, ki kpee binib bi nan Uwumbɔr na pu uu? Saah tun pu na cha Uwumbɔr aaŋuul fii aa pu.

³ Nee mɔk mu pu na, aa beenin kpa kinyaan Uwumbɔr chee. Aa nyan liwaapii Asera aanaŋ ti binib nan dooni na, ki pɔɔn aabaa ki dii Uwumbɔr aageehn.”

Jehosafat aah cha waanib kpeln baabimbin pu na

⁴ Ubɔr Jehosafat nan koo Jerusalem ponn ni la, le ki mu nan tee chuun ki manni binib ngbaan n‑yoonn mɔmɔk, ki nya Beerseba ni bi ŋŋangii wɔb na, ki ti saa ŋigongon aatiŋ ki bi Efraim aatiŋ pu ŋŋangan wɔb na, ke u cha binib ngbaan gir ni biyaajatiib Aadindaan Uwumbɔr chee.

⁵ U nan kaan bibɔjirb Juda aatiŋ kimɔk bi nan maa ŋigon gob ki na,

⁶ le ki tuk bi ke, “Ni li nyi naah ji binib tibɔr pu na; naa ye unibɔn aapɔɔn pu le ni tun, ni ye Uwumbɔr aapɔɔn pu la, le u bi ni chee buyoonn ni bi ji unii tibɔr na.

⁷ Li san Uwumbɔr man, ki li nyi naah tun pu na, ba pu? Ni yaa kaa tii binib baabamɔn, bee ni yaa kpa imaagann, bee ni yaa gaal igaŋgaŋlik kan, Tidindaan Uwumbɔr aa gee kina.”

⁸ Jehosafat nan nyan Liifai yaab, ni bitotoorb, ni bininkpiib bibaa le kaan Jerusalem ponn ni ke bi li ji binib bi bii Uwumbɔr Aakaal na tibɔr, ni kitiŋ ngbaan ponn ni aanib aanikpakpak.

⁹ U nan di lilambil limina le tii bi: “Ni li san Uwumbɔr naah tun lituln li na ni, ni li si chob ki keei waamɔb tiwan mɔmɔk ni.

¹⁰ N‑yoonn mumɔk niŋeen aatɔtiib bi nyan ni kitiŋ mɔk ni ki joo ni linikul aabɔr, bee bi yaa bii nkaal, bee bi yaa koor likoobil na kan, ni mɔk bi baah ga joo bibaa pu libɔjil ngbaan ni na, aan bi taa koo Uwumbɔr aataani ni. Ni yaa kaa ŋa kina kan, nimi ni nido yaab ngbaan ga kan Uwumbɔr aaŋuul aah pɔɔ pu na. Le ni yaa tun nimi aatuln mbamɔm kan, naan lir tibɔr tibaa ni.

¹¹ Utotoorninkpel Amaria le ga li yeh tibɔr ti ye Uwumbɔr aasan ni na aabɔjil, le Sebadia u aate ye Ismael aan u ye Juda aayidaan na, ga li yeh binib aabɔr. Liifai yaab le ga kan ke bibɔjirb ngbaan aah siin pu na ŋa kina. Cha nitaakpab li pɔɔ aan ni li joo lilambil limina tun, ki cha Uwumbɔr li si unii u kpa mbamɔn na aachaŋ ni.”