2 Bibɔrb Aabɔr 17 - Uwumbɔr aagbaŋ

Jehosafat aah jin nnaan pu na

¹ Jehosafat le nan gaa ute Asa aanaan ki moo pɔɔk waasisii ke Israel yaab taa ki ŋman u.

² U nan kaan kaan bijab Juda aajawan aatim mɔmɔk ni, ki kpee Juda aatingbaan ni, ni Asa aah nan nyaŋ ki gaa ntim mu Efraim aapepel ni na.

³ Jehosafat aah nan laa jin nnaan na u dii nsan mu uyaaja David nan dii mu na, kaa dooni liwaal Baal, nima pu na le Uwumbɔr nan ŋa waanyoor ŋa u pu.

⁴ U nan dii ute Aawumbɔr la, le ki kii Uwumbɔr aakaal, kaa tun Israel yaab aabɔrb aah tun pu na.

⁵ Uwumbɔr nan di Juda aanaan aapɔɔn ŋa Jehosafat aaŋaal ni, le binib mɔmɔk nan joo ni u ipiin; le u nan kpa liwangol ni liyimbil.

⁶ U nan kpa limakl waah dii Uwumbɔr pu na, le ki ber biwaadam aah dooni baawaa nin chee na mɔmɔk, ki ber liwaapii Asera aanaŋ mɔmɔk Juda aatiŋ pu.

⁷ Waanaan aabitatar ni, le u nan tun bininkpiib bimina ke bi ti mɔk binib Uwumbɔr aakaal, Juda aatim ponn ni: Ben‑Hayil, ni Obadia, ni Sekaria, ni Netanel, ni Mikaya.

⁸ Bininkpiib ngbaan ni Liifai yaab biwae ni bitotoorb bilee le nan dii. Liifai yaab ngbaan le nan ye Semaya, ni Netania, ni Sebadia, ni Asahel, ni Semiramof, ni Jehonatann, ni Adonija, ni Tobija, ni Tobadonija; le bitotoorb ngbaan mu nan ye Elisama ni Jehoram.

⁹ Bi nan yoor Uwumbɔr Aakaal aagbaŋ le ki di bɔ dii Juda aatim mɔmɔk ni, ki mɔk binib ngbaan.

Jehosafat aayimbil aah nan nyan pu na

¹⁰ Uwumbɔr nan cha nnaan mu maln goln Ubɔr Jehosafat na san u ijawaan, kaa kaa bi ki tak u.

¹¹ Filistia yaab bibaa nan joo ni u tikunabr aapiin ni ipiin iken i wiir na, le Arab yaab bibaa mu joo ni u ipiih ŋichur ŋilole ni ikui ilole, ni iŋoob mu ŋichur ŋilole ni ikui ilole.

¹² Kina pu le Jehosafat moo kani mpɔɔn kpae. U nan maa ŋigon gob Juda aatim mɔmɔk, le ki maa tijikaar ni tiwan niken aatim mu

¹³ ki siin tiwan pam mu ni. U nan nyan bijab aaninkpiib bi nyi baatuln mbamɔm na le kaan Jerusalem ni.

¹⁴ U nan nyan bi itaŋaal itaŋaal pu la. U nan nyan Adna le Juda aataŋaal ni, le u ye butɔb aajab aaninkpel, ki kpa butɔb aajab ŋichur ikui itaa.

¹⁵ Jehohanann le nan paa u pu, ki kpa butɔb aajab ŋichur ikui ilee ni imonko inaa.

¹⁶ Le Sikri aajapɔɔn Amasia paa ntaa ki kpa butɔb aajab ŋichur ikui ilee. Amasia le nan nyan sil ubaa pu ke u ga li tun Uwumbɔr aatuln.

¹⁷ Eliada le nan ye butɔb aajab bi nyan ni Benjaminn aataŋaal pu na aaninkpel. U nan ye butɔb aaja u nyi butɔb aabɔr mbamɔm na la, le ki joo butɔb aajab ŋichur ikui ilee. Bi mɔmɔk nan kpa kijaak aapen ni itɔi.

¹⁸ U nan paa u pu na le nan ye Jehosabad. U nan joo butɔb aajab ŋichur nkub ni imonko inaa la, le bi kpa tijawan mɔmɔk.

¹⁹ Bijab bee le nan bi Jerusalem ni ki tun ubɔr aatun. U nan ki kaan kaan butɔb aajab Juda aatim mu mɔmɔk bi maa ŋigon gob mu na ni.