2 Bibɔrb Aabɔr 15 - Uwumbɔr aagbaŋ

Asa aah nan toor waanib aabimbin pu na aabɔr

¹ Uwumbɔr Aafuur Nyaan nan dan Oded aajapɔɔn Asaria pu,

² le u buen ki ti tooh Ubɔr Asa nsan pu. U nan teen ki len ke, “Ubɔr Asa, ni Juda, ni Benjaminn aanib bee mɔmɔk, n‑yoonn mumɔk ni bi Uwumbɔr chee na, u mu bi ni chee. Ni yaa ban u kan, u ga cha ni kan u, le ni yaa fenn nipuwɔb tii u kan, u ga di nimi lii.

³ Israel aanib nan bi ni yunn pam, kaa nyi Uwumbɔr bamɔnn, kaa kpa bitotoorb bi ga mɔk bi na, kaa kpa nkaal mu.

⁴ N‑yoonn mu bi nan ti kan tibɔr na, le bi fenn dan bima Israel yaab Aadindaan Uwumbɔr chee. Bi nan ban u le ki kan u.

⁵ Tibɔr ni mbimbin yɔl yɔl aah nan bi kitiŋ mɔk ni na, ubaa aa nan ŋmaa nya waatiŋ ni, ki ki gir ni laafee n‑yoonn ngbaan.

⁶ Litimbol libaa nan muk liken la, le kitiŋ kibaa muk kiken, ba pu? Uwumbɔr le nan joo ni tibɔbir bi pu.

⁷ Tɔ, ni ŋan ke ni li kpa lipobil ki taa cha nitaakpab yɔl. Naah tun lituln li na ga nan kan tinyoor.”

⁸ Asa aah ŋun Oded aajapɔɔn Asaria aah di Uwumbɔr aabɔr ti nabr u na, le utaakpab pɔɔk. U nan di Juda ni Benjaminn aatim aawaa mɔmɔk mae. U nan di waah nyaŋ ntim mu aan mu bi Efraim aajoo aatiŋ ni na mu aawaa mae. U nan toor Uwumbɔr aatork aabimbiln li nan bi Uwumbɔr Aadichal aachiln ni na.

⁹ Binib nan nyan ni Efraim, ni Manase, ni Simeonn aatim ni ki dan Asa chee ki nan bi waanaan ni, ba pu? bi nan kan ke Uwumbɔr bi u chee. Asa nan kuun bi mɔmɔk, ni Juda, ni Benjaminn aanib.

¹⁰ Bi nan kuun ni Jerusalem ponn ni, Asa aanaan aayoonn aabiln kipiik ni ŋiŋmu aaŋmataa ni la.

¹¹ Liyaadaal ngbaan bi nan kɔr tiwakor ti bi nan gaa butɔb ni na le tii Uwumbɔr. Bi nan kɔr inaa ikui ilole, ki kɔr ipiih mu ŋichur ŋilole.

¹² Bi nan puu tipuur tii Uwumbɔr, u ye biyaajatiib Aadindaan na, ke bi ga li joo bisui mɔmɔk dooni uma baanja la.

¹³ Unachipɔɔn, bee uninkpel, bee uja, bee upii, umɔk yii ke waan dii u na, bi ga ku udaan ngbaan.

¹⁴ Bi nan len mmɔpɔɔn pu ki puu Uwumbɔr aayimbil pu ke bi ga li joo tipuur ngbaan, le bi mɔmɔk teen mpɔɔn pu ki pii ikpiin.

¹⁵ Juda aanib mɔmɔk nan kpa mpopiin ke bi di bisui mɔmɔk le puu tipuur ngbaan. Bi nan di mpopiin le doon Uwumbɔr, le u gaa bi iŋaal ilee ki tii bi nsuudoon ŋipepel mɔmɔk pu.

¹⁶ Ubɔr Asa nan nyan uyaa Maaka ubɔrpii aanaan ni. Uyaa aah nan ŋa pu na le ye ke u ŋa liwaapii Asera aanaŋ ke li kpa timar. Asa nan chɔi chɔi liwaal ngbaan, ki see li mmii, Kidronn Aafataŋ ni.

¹⁷ Asa aa nan ŋmaa nyan biwaadam aawaadir mɔmɔk kitiŋ ngbaan pu, u mu nan tee dii Uwumbɔr ni usui mɔmɔk le ki ti kpo.

¹⁸ U nan di tiwan ni mɔmɔk ute Abija nan di tii Uwumbɔr na giin Uwumbɔr Aadichal ni, ki kpee uma ubaa aah nan di salmaa ni tikunabr aawan ni tii Uwumbɔr na pu.

¹⁹ Butɔb aa nan ki dan, see waanaan aabin piitaa ni ŋiŋmu ni.