Baruch 5 - Kalin Apo Dios

Nan Gawis Ay Ommat Isnan Jerusalem 5:1-9

¹ Jerusalem, kaanem nan inbabadom ay seg-ang ya babawi ta ibadom nan menbegew ay dayaw Apo Dios ay eng-enggana.

² Ibalabalmo ay kaneg ewes nan kinatet-ewan Apo Dios. Ibedbedmo isnan olom nan dayaw di maid patenggana ay Dios

³ tay awnit ipailan Apo Dios nan pilmi ay begewmo isnan am-in ay ili isnan batawa.

⁴ Wada nan kankanayon ay kankanana ken sik-a ay siya na, “Tomalnaka gapo isnan kinalintegmo ya madayawka gapo isnan mangpatpatgam ken sak-en.”

⁵ Jerusalem, itakdegmo isnan atakdag ay bilig ta ilaem isnan balaan di agew nan mangdagopan nan nalinteg ay Dios isnan an-akmo ay nagapo isnan ay solin di batawa. Men-gasgasingda tay nanemnem Apo Dios daida.

⁶ Olay no tinaynan di an-akmo sik-a tay inkaan di boso daida ay nang-ipadad-aan ken daida ngem id wani isagong Apo Dios daida ay menlologan ay kanegda et an-ak di ali.

⁷ Tay binilin Apo Dios ay madata nan anatakdag ay adi kagiba ay bilig ya maipangato nan nakakaongan ta madata nan daga tapno makadaan nan Israelita ay maid iyeg-egyatda isnan somaanda tay wada nan kabaelan Apo Dios ken daida.

⁸ Et isnan bilin Apo Dios et tomobo nan adoado ay menbango ay kak-aiw ta waday menlinlinongan nan Iraelita.

⁹ Awnit ipangpangon Apo Dios nan Israelita ay somaa et men-gasgasingda ay somaa ay ipangpangon nan seg-ang ya kinalinteg Apo Dios daida ya liliwesen nan pat-an di kawad-ana daida.