Mika 1 - WAKALATA WANO WALI

¹ Mwe kalata wee, mul’ amazwi yano Imfumu e Leza wanenile Mika wa ku Moresheti, pampindi yino Jothamu, Ahazi nu Hezekiya walinj’ azyamfumu zyamwe Yuda. Imfumu e Leza wawumbulizile Mika ivyakwe Samariya nu Yerusalemu.

Ukulilila Samariya nu Yerusalemu

² Yivwani choo, mwe myiko yonsi, yivwani kwe choo, mwe wamunsi mwensi! Imfumu e Leza aliwasinila. Yivwani! Akuvwanga mung’anda yakwe iyakumupepela iyamwiyulu.

³ Imfumu e Leza akufuma mwisano lyakwe itele; wand’ ayike ayize awapita pamwamba papela.

⁴ Apano imyamba ilisunguluka pakwe weliwe ilisunguluka ndivino ipula likasunguluka kumulilo; il isunguluchila mumipata ndivino aminzi yakatantala pamwamba.

⁵ Vyonsinye vyoo vilichitwa amuno awa Israeli wawembuka swinya wasanguchila Leza. Wuzye wino alisumbichilwa weweni kukusanguka kwa wa Israeli? Awa mwe Samariya! Nga weweni wino watala umulandu wamakolania mwe Yuda? Awa mwe Yerusalemu!

⁶ Achaleka Imfumu e Leza wati, Samariya aliwa amifuli yavitalang’anda munsi, yawe amasyo yakulembeka imiti yavikomwa. Ndiyitila amawunguluwe yamukaya mumupata, mvulunganie imfula zyakaya.

⁷ Amakolania mazima yonsi ayamwenemo yaliyochwa nu mulilo. Awantu wachisile amakolanianye yaa, muno walinji awawipe kwe Leza, achaleka kanonzi wandi wapochelele ichawuwipe wawo.

⁸ Achaleka Mika ati, Muno achonyechoo, nandi ndalila ndalosya, nzule indyatu, swinya nzule nsyale tupu, kukulanjizya ichilanda chane. Nandi ndalila ndivino mumbwe akalila, swinya ndafwina ndivino mwakatala.

⁹ Ivilonda vyakwe Samariya vitanga vipole. Nu Yuda-nye wandi achule nivilonda vyamwata-nye woo; uwononi wata’wufika mumpongolo zyakwe Yerusalemu, muno awantu wane wikala.

Uwulwani kwe Yerusalemu

¹⁰ Mutize muleke awamwe Gati wamanye ivyakuchimba kwitu; mutize muleke walole kuno mukulila. Muye mukalanjizye ukupotwa kwinu mwewantu wamukaya kakwe Beti-Lea-fira mwe!

¹¹ Mwe wantu wa mwe Shafiri, swili nuwuntapwa tupu ninsoni! Awamwe Zenani watalipusuka. Ndiwiza wivwa kuno awamwe Betezeli wakulosya, uyize umanyangenye kuno kusi ukwakuvwama kweneko.

¹² Awa mwe Maroti wakunyongolonkana kuwulumila; wakalonda ukuti wangapepuchilwa, amuno Imfumu e Leza wapalamizya umupamba kwe Yerusalemu.

¹³ Mwe wikazi wa mwe Lakishi, nyepelelani wakavwalo winu kumagereta yisumo. Mwakolinie uluwembu lwa wa Israeli, amuleka Yerusalemu awembuka.

¹⁴ Achaleka namwe mwe wikazi wamwe Yuda, layani akaya kakwe Moresheti Gati. Imfumu zya mwe Israeli zitalipochelela ukwavwa ukufuma mukaya kakwe Achizibu.

¹⁵ Mwe wikazi wa mwe Maresha, Imfumu e Leza akuti ndiwalemeka kumulwani, wino alichimvya akaya kinu. Imfumu yamwe Israeli iliya ikavwame mumuchembo pa Adulami.

¹⁶ Mwe wikazi wa mwe Yuda, pelani inyele zinu pakulosya awana winu wane mwakunda. Pelani amapanza ngati amapanza yanzwanga, amuno awana winu walisendwa kwemwemwe, wawe wazya.